Digơlan bol he òs kơlôi lah dòn duh Yàng la dô cơnoà lơi hơ̆ gơklŏ ngan, kung be pò tus dô pang sră pa bềng bơta gơklọ̆. Mơ ya ò, gơs tŭ bơta dòn duh sơntòm mơ dô nơm broă lơh gơlơh be …bơrngơl-gơla. Hơ̆ la tŭ oh mi pal lik bơh tiah oh mi neh gơrê bơh jọ̆ ngan, nàng lòt tus dô nơm tiah mơ oh mi ò gơs bơta lơi tom tê rlau mơ jơnau hòi jà. Tom ală tŭ behơ̆, oh mi rơp la ñcau: cau tơm pơnđơl sơmbat prap rài kis he, hala dô nă cau bơtê dòn duh jat kơndòl jơng Kơnràñ tus hơ ală tiah krơi?

Ngai do, ngai 15/06/2026, Bơta Hòi-Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Jessica Teed bơh tơnggume BƠTA PAL PHI DÔ NĂ CAU BƠTÊ DÊ.

“Dilah cau lơi kòñ jat añ, gen pơndang-sang tĕ să he, tui chi pơng he mơ jat añ.” (Mathiơ 16:24)

Añ tă dô nhơm tă jòng, ntoàt tus hơ đah cau gơnoar bơto mơ ơn di tê ồng kai mpồng hiu jum. Añ ñọ̆ mơ đơs: “Añ git cau gơnoar bơto òhềt git ñchi bơh tai añ lơh bè do, mơ ya añ pal cang dòn duh Yàng. Do la kai mpồng hiu jum mơ añ neh prap jọ̆ bơh lai òr. Dan cau gơnoar bơto hòi añ in tơnơ̆, añ rơp yal tơnggit dô bă loh làng.”

Bơh tom dơlăm hwềng nùs, añ neh đal git bơta tề lăm Yàng Hwềng Goh bơh oă kơnhai lài. Mơ ya đơs ngan, añ neh sac rwah pơndang sang mơ ò kòñ kơnọ Kơnràñ tom dô tŭ tơngai jòng. Dơ̆ do, cơnòa lòt tom bơta dòn bơr ò tŭ lơi la dô bơta lơh nền ƀuôn-soh. Gơ pal cang dô bơta pal dòp kàs mang ngan mơ añ git he pal lơh mo. Tŭ hơ̆, añ ò gơs tŭ jơ nàng yal tơlik cau lơi in bơh ală bơta he gam lơh hala tơnggu ñchi bơh tai. Tơnơ̆ 10 sơnam đềt mêr mơ têh dờng tom Hiu Jum Goh kòñ gơboh, tiah mơ añ neh dòn dòp Yàng Jesu lơh gơs Yàng Dọ̆ng-Klàs rài kis he, Kơnràñ tề lăm añ cơnoà tus dô nơm pah gùng pa-duh broă tom dô Hiu Jum Goh ndai. Dơ̆ sơnròp, añ sang loì jơh ală bơta òs mong ngan nàng cơnòa jat jơnau hòi jà Yàng dê. Sền bơh đah bơdih, bơta lơh nền do gơlơh be siău jak-chài mơ kalkê wă wơng. Mơ ya hơ̆ la bơta bơtê sơnròp añ jê hơđang gùng lòt gơlik gơs dô nă cau bơtê ngan Yàng Dọ̆ng-Klàs Jesu dê.

Yàng Jesu neh đơs mơ cau bơtê Kơnràñ dê lah: “Dilah cau lơi kòñ jat añ, gen pơndang-sang tĕ să he, tui chi pơng he mơ jat añ.” (Mathiơ 16:24)

Yàng ai bol he in gŏ lah bơta pal dòp broă lơh jat Kơnràñ hơ̆ la bơta dòn duh wil tơl. Hơ̆ la lơh nền rcang sir sang loì jơh ală bơta, lòi roh ală bơta rơndap mơ ji-gloh ìs nàng sac ai nùs kòñ Kơnràñ dê. Hơ̆ la ơn Yàng Jesu hơđang rlau jơh mơ gùng dà Kơnràñ dê hơđang nùs ìs he dê. Mơ ya, mìng behơ̆ lơm ò tơl gam òhềt yal tơlik jơh bơta wĭl tơl nùs nhơm dô nă cau bơtê ngan dê.

“Cau lơi kòñ gơboh di bèp hala mè rlau mơ Añ, gen ò di pal Añ in; mơ cau lơi kòñ gơboh di kòn klau hala kòn ùr rlau mơ Añ, kung ò di pal Añ in. Cau lơi ò tui chi pơng khai dê mơ jat Añ, gen ò di pal Añ in. Cau lơi jòi bàn bơta kis he, gen rơp roh; ai cau lơi tài bơh Añ mơ roh bơta kis he, gen rơp jòi bàn wơl.” (Mathiơ 10:37-39)

Cơnoà lòt jat Yàng Dọ̆ng-Klàs Jesu ò di mìng ơm bơdơh wơl tom nùs nhơm chò nùs ơn jơh rài kis. Hơ̆ la lơh nền rcang sir pơng đin nùs nhơm yau mơ phi bơta kìs he tài bơh sơnđan Kơnràñ.”

Jơnau Yàng tom II Kôrinhtô 5:17 cih lah: “Behơ̆ dilah cau lơi ơm tòm Bơtau Krist, hơ̆ la cau neh crơng gơs pa; ală bơta yau neh roh rau, do ală bơta gơlik gơs pa lơm.”

Gùng gơlik gơs cau bơtê ngan sơntòm bơh di tŭ bol he dòp git loh làng lah: rài kis he neh geh tơwài dô bă kàs màng ngan-bơta pal dòp mơ Yàng Dọ̆ng-Klàs Jesu neh pal tuh bal mơ jơh ală bơta, mơ mham kas màng mơ bơta kis Kơnràñ dê. Kơnràñ neh tơm ala bol he in dô bơta pal phi dờng rlau jơh, sơrlèt rlau mơ ală tơnggu ò kwơ mơ bol he gam sac rwah nàng kis kờp ngai. Gơlik gơs dô nă cau bơtê ngan gơtha la bơh nùs nhơm sac rwah chơt nùs nhơm-lơh nên sang-loi rài kis yau, nùs nhơm yau, bal mơ bơta jòng-să he dê. Bơh hơ̆, bol he sơntòm cơnoà lòt tom bơta pa sùm mơ Yàng neh rcang lài he in, bulah gùng lòt hơ̆ pal cang phi să mbe lơi.

Kung ndròm be gơltau tơrnòm yau ò rgơi prap tơrnòm pa, nùs nhơm yau bol he dê ò gơs gùng lơi gơròm bal mơ broă lơh gơklọ̆ Bèp Sàng-Goh dê, tài bơh gơnoar broă mơ bơta nđàc hòi sac Kơnràñ dê ai oh mi in dờng ơnàng rlau mơ hơ̆. Cau yau hơ̆ ò rgơi gơs pơnah bal tom ală bơta crih-crài Yàng Tom Trồ kòñ lơh tom oh mi mơ gan oh mi. La cau bơtê ngan Bơtau Krist dê, bol he pal “dòp-soh tĕ cau pa” kờp ngai, kis dô rài kis rcang sir nàng Yàng ơm bal mơ tề lam jơh ală bơta. Gơs tŭ, bol he pal chò nùs lơh ală broă mơ dunnia, cau kòñ gơboh, hala oh mi tom Hiu Jum Goh sền la bơrngơl-gơla. Mơ ya tom tŭ bol he dòp bơta gơkòl sền la “lu-sơnrang” di đap cau dunnia tài bơh jòng-ro Bơtau Krist, hơ̆ song la tŭ bol he ngan gơlik gơs jak-chài, mơ ngan la cau bơtê Kơnràñ dê.

Dan jà bol he dô nùs bal tòm bơta hòi dan: Khoai Bèp kòñ gơboh, gơs ală kai mpồng tom rài kis mơ jọ̆ ngai neh rlau kòn gam sơmbat prap kơ̆ ir-ală bơta gơrê mơ poăc să neh kơryan kòn cơnoà mùt tom rài kis bềng-liu Kơnràñ ai. Dan Hwềng Goh Kơnràñ ai kòn in khin cha nàng ơn jơh ală bơta lơh nền mơ nùs nhơm do hơđang cơnơng duh khoai bơta dòn duh dê. Dan dong kòn ò rngòt-rngơt tom tŭ cơnoà mùt tom gùng ò git đah lơi, tài bơh kòn git lah bulah gùng lòt krơi is mbe lơi, gen Bơtau sơmbat tê kòn gam la Bơtau Dòn-Sọ̆ng. Kòn sac rwah dòn bơr Kơnràñ, bulah dunnia sền hơ̆ la bơrngơl-gơla, tài bơh kòn git lah gùng dà Kơnràñ dê la gùng bơta kis bềng-liu ală bơta lơngai sùm sùm. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, digơlan tŭ do, oh mi sền gọ̆ he ơm ìs tom gùng lòt, kơlôi rngòt lah dunnia rơp dơnọ̆-tơnhiàl tài bơh ală bơta lơh nền gơpơrlơ̆ wơl he dê. Mơ ya pal kah tĕ lah, bơta bơrngơl-gơla tom mat kòn mơnùs gơs tŭ la bơta jak-chài ngan tom bơta rơndap Yàng Tom Trồ dê. Kơnràñ mìng pal cang oh mi dòn kơnòm Bơtau sơmbat prap ngai tơnơ̆ he dê. Ngai do, khin cha tĕ đơs mơ Yàng lah: “Khoai Yàng, kòn do, dan ngui kòn jat nùs kòñ Kơnràñ!” Tài bơh mìng tom tŭ oh mi rcang sir tơm-gơl jơh ală bơta bơh Kơnràñ, gen oh mi ngan rgơi joi gọ̆ gơtha ngan rài kis dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.