Gơs dồ jơnau song, hớ la kon mơnus ờs mờng jòi jat bơta ring lơngai. Bol he kờn ală rơndap loh lang, kờn git broă ală ngai rơp tus. Mơya bol he chò nùs nàng sang ală bơta ờs mờng, mơ cơnđoà lik bơh tiah lơngai nàng lòt tus hơ tiah mơ Yàng hòi sac he sơl ơ? hala bol he rơp lòi ală bơta kơlôi rcang, bơta roh ring lơngai kup cap jơng he dê taih?

Ngai do, 17/06/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ mò Martha Noelbel bơh tơnggume KHIN CHA CƠNĐOÀ MUT TÒM GÙNG PA

“Bulah bol mê pơrlac đah ma hala đah kiau, tồr bol mê rơp kơno gơs sap đơs đah ngkòi bol mê lah: “Do la gùng, lòt tĕ tòm hơ̆!” (Esai 30:21)

Tơnớ mơ neh tombau, hìu nhă bol hi típ dồ broă kalke ngan. Bau klau an neh roh broă lơh tòm tú bol hi gam tom hơ bau mơ ờ rgơi jòi bàn broă lơh lơi rềp mơ hìu. Mơya, bar nă bol he neh gơs nùs nhơm rơp lik lòt tòm tiah ndai, mơya do la broă tòm ngai pơnjat. Tòm tú hớ, broă an dan rlô broă lơh – gen bol he roh jền ròng siam kòp ngai. Gơwèt mơ pơnah jền priă, do là dồ cơnđoà lòt ờ di ngan. Mơya, tòm dơlam nùs, an dờp git Yàng gam hòi an, chồl chao bol hi cơnđoà tòm dồ nơm gùng pa.

Tòm Sră Goh, mò Ruto kung neh ntào dê đap bơta sac rhaw dờng. Tơnớ bau mò chơt, mò Ruto gơtơmut tòm bơt siơu siar bal mơ poh me la Naomi mơ bi ur la Ọt-ba. Pe nă cau ùr gơn kơnòm bal mơ gơp nàng kis. Tài bơh Naomi ờ gam gơs kon klau ndai ta, mò neh tơng kah mò Ruto mơ Otba rê wơl bòn tờm he dê nàng jòi jat dồ hìu nhă pa. Gơwèt mơ cau tòm rài yau, do la gùn lik dồ bă di pal ngan tus dê bàr nă cau ùr gam hèr niam. Otba neh sac lik lòt, mơya Ruto gen ờ sac, mò neh jơh nus đơs mơ poh me lah:

“Bañ bơklơn añ sang lòi mè hala wơlke ò jat mè. Mè lòt tiah lơi añ rơp lòt tiah hơ̆, mè ơm tiah lơi añ rơp ơm tềng hơ̆. Làng bol mè dê rơp la làng bol añ jê, mơ Yàng Tom Trồ mè dê la Yàng Tom Trồ añ jê.” (Rutơ 1:16)

Broă lơh do mò Ruto dê tú hớ geh cau sền là ờ niam, siơu bơta git wă. Gơ lòt pơrlơ wơl mơ rnoas kon mơnus dê. Mò neh sac lik bơh tiah lơngai mò dê. Tú mò sac lòt bal mơ mò Naomi, Ruto gơlơh bè neh kal bơta tòmbau mò dê, la gùng nàng dồ nă cau ùr tòm rài yau gơs nàng cèng bơta lơngap lơngai. Do la dồ bơta sac rwah kalke ngan, bơh dê đap mat là dồ nơm gùng ờ git mbè lơi. Mò sang sơbì jơh ala rùp rak, ală bơta gơrê mơ làng bol mò dê, nàng dơn kơnờm Yàng Tòm Trồ là bơtau kis sùm mơ tơrbó mơ làng bol pa krơi is. Bơta sac rwah do pal càng gơs bơta khin cha, tus bơh bơta dờn kớ cê, dờng rlau mơ ală bơta rngòt rngơt bơh ală ngai rơp tus.

Mơya Yàng Tòm Trồ sùm dòn song mơ kon sau Kơnràn dê. Yàng neh ai phan bàn bơh bơta dòn mò Ruto dê. Mìng dồ êt kơnnhai pơnjat tú mò mơ Naomi rê tus Betlehem, mò Ruto neh geh bơta nđàc dê đap mat Bô-ô – dồ nă cau jơi bơtiàn rềp mò dê. Jơnau yal yau bol khai dê neh gơlik gơs dồ jơnau yal niam rlau jơh mơ geh kờn gơboh rlau jơh tòm Sră Goh. Yàng ờ lòi mò Ruto gơkòl roh bơta lơi, Kơnràn neh tơm wơl dồ bă wil tơl mò in. Kơnràn neh pà ai mò in dồ nă bau klau kờn gơboh mò, mơtai Yàng kung neh pờ mpồng dờng tus dê mò Ruto bal mơ mò Naomi bềng bơta chò hòp mơ gơnkơnòm.

Bulah broă gơlik gơs mơ an ờ dờng bè mò Ruto, mơya an neh lơh nền rơp rlô broă bal mơ bau klau an dê nàng lòt tus tòm dồ nơm bòn ndai. Do la dồ bơta lơh nền kalke ngan. Bol hi cơnđoà lòt hơ đap bal mơ oă bơta ờ gơs: ờ gơs jền priă, ờ gơs bảo hiểm, ờ gơs dồ bơta lơi gơlơh bè kơcê. Mơya, bol hi dờp git lah: bơta lơngap lơngai tòm nùs kờn Yàng dê sùm kơcê rlau mơ bơta ring lơngai bơh jền priă. Mơ ngan, Yàng neh pà ai bol hi in ờ siơu dồ bơta lơi tòm gùng lòt. dồ êt kơnhai tơnớ, bau klau an dê neh jòi bàn dồ broă lơh pa, mơ bol hi sơn tờm dồ nùs bal nàng bơt bơtào hìu nhă, mơ sùm ơm bal ờ cah is tai.

Kung bè mò Ruto, bơta lơh nền ùr klau bol hi dê krơi is ngan. Mơya bol hi git lah: pal khin cha cơnđoà lòt bal mơ Yàng, niam rlau mơ lòt gùng dờng ơnàng mơ ờ gơs Yàng.

Dan jà bol he dô nùs bal tòm bơta hòi dan: Khoai Yàng kờn gơboh! Tú ntào dê đap bơta lơh nền dờng tòm rài kis, nùs kơlôi kon dê sùm gơs oă bơta kơlôi rcang, rngot rngơt mơ ală bơta rồn bơklơn tus bơh dunnia. Kon mhar jòi bơta ring lơngai tòm tiah jền priă, broă lơh, bơta jak chài kon mơnus dê rlau mơ jòi jat să tòm Yàng dê. Dan toh glài kon in ală tú kon siơu bơta dòn, ală tú kon ai pràn is nàng lòt mơ ờ kah Yàng la Bơtau tề lăm. Tú jơ do, dan Yàng pà ai kon kin nùs nhơm khi cha bè mò Ruto rài yau or, khin cha sang lòi ală broă yau, cơnđoà lik bơh tiah ring lơngai nàng jòi jat nùs kờn wil tơl Yàng dê. Kon jơh nùs hòi dăn ai sơnđan Yàng Jêsu Krist, Amen.

Ơ ală ồng mọ oh mi kờn gơboh, dilah ngai do, he gam ntào dê đap bơta lơh nền mơ gơlơh bè lòt krơi is mơ dunnia, lòi té dồ êt tú jơ nàng kơno iat jơnau đơs lơbơn niam Yàng dê. Kơnràn gam kờn he lòt gùng lơi taih? Ban lòi bơta rngòt rngơt kup cap bol he ờ rgơi lòt mơ Yàng. Kah té lah, bơta lơngap lơngai ngan ờ ơm tềng tiah bol he git loh làng ală ngai pơnjat, mơya ơm tềng tiah bol he git lah Bơta at bồ rài kis he dê gam lòt bal mơ bol he.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.