Bol he ơs gơs bơta kơlôi sơnưng at bồ jơh ală bơta. Bol he kơlôi lah ming cang pơnđơl pràn gen rơp geh lòt găn. Mơ ya ngăn, gơs ală dơ̆ sơlơ mpơr, bol he sơlơ gơduh tơm bơta sơ ỏi mơ gơsêl. La cau dòn Yàng, bol he pal cang dơp git bơta pràn kòn mơ nus dê la gơs nhal, mơ bol he gơs dô bơta pơndơm pơniang dơng ngăn tòm tŭ git Yàng Tòm Trồ sùm gơs mat digah he tòm ală bơta gơlik gơs mơ ngui tơwor tê pràn kơldăng Kơnrãn dê nàng yờ dơ bol he.

Ngai do, ngai 18/06/2026, Bơta Hôi Dăn Kơp Ngai dăn jà ală ồng mò h mi bơtê bal Jơnau Yàng kơnơm dê bơta dong kơl Maria Schleicher dê bơh tơnggumê TÊ YÀNG SƠMBAT KÒN.

“Dilah añ gơs pơnđar àng drim dê Tus ơm di tiah lồi nhàr dàlềng dê, Tềng hơ̆ tê Yàng kung rơp tề lam añ, Tê ma Yàng dê rơp sơmbat kơ̆ añ.” (Đơs crih 139:9-10)

Neh gơs tŭ lơi oh mi gơlơh be rhung rhăng mơ ò git lơh nin bơta lơi hala ò? Be gơlơh oh mi ming gơs măt lơm ò di là găm kis ngăn. Oh mi kis kơp ngai, găm sền gŏ ală bơta gut dar mơya gơlơh ní ơm kòn đơi moat jrung, ò gơri ngăn mơ rai kis do. Ãn kung neh lọt găn ală ngai behơ̆. Đah bơdih, ală bơta gơlơh be niam, mơya dơlăm la dô pahgợi mơ dô bơta jigloh tơhir mơ ò rgơi pồn ndơp geh. ãn pơnđơl jôi lơh lòt tòm rai kis mơ pràn is ãn jê ala mơ kơnom Jơnau Yàng. Mơya sơlơ pơnđơl pràn, ẵn sơlơ gŏ ală bơta sơlung sơlăng mơ roh gùng lòt.

Bulah behơ̆, tòm ală ngai klăm jơngo hơ̆, Yang Tòm Trồ găm la Bơtau git loh, gơs măt, mơ cèng tus bơta ring lơngai. Bơtau Dabit,cau neh lòt găn ală bơta bol glar jê sồt mơ dô pồn, neh cih lah: “Ntềng đah añ rgơi lòt ngài bơh di Hwềng Yàng dê taih? Hala tiah lơi añ rgơi dô pồn bơh di mat Yàng dê taih? Dilah añ guh hơ trồ, Yàng ơm tềng hơ̆! Dilah añ bic tòm lơgar Làng ƀồc,Yàng kung gơs tềng hơ̆ sơl! Dilah añ gơs pơnđar àng drim dê Tus ơm di tiah lồi nhàr dàlềng dê, Tềng hơ̆ tê Yàng kung rơp tề lam añ, Tê ma Yàng dê rơp sơmbat kơ̆ añ.” (Đơs crih 139:7-10)
Đơs crih 139 la jơnau đơs chò jong rơ bơh bơta git lam jơh mơ gơs măt lam tiah Yàng Tòm Trồ dê. Bơtau Dabit đơs lah Yàng git loh kơp pơnah tòm rài kis ồng dê: tŭ ồng nggui, tŭ ồng ntao guh, jơl tus dê ală bơta kơlô sơnưng mơ jơnau đơs ò hềt đơs tơlik. Kơnrãn ò wơng Dabit dô bă bal bal, mơ is ngăn mơ dềt mêr. Yàng git ală bơta niam mơ ală bơta neh lơh tis, tồi glài tòm bol he. Kơnrãn gŏ loh ală bơta neh lơh tis, bơta lơbơn lơñọ mơ jê sồt jrô ndơp rlau jơh tòm rai kis bol he.
Bơh dơp git Yàng Tòm Trồ la Bơtau git làm jơh, gen tang Dabit ơn sèng lup:

“Ntềng đah añ rgơi lòt ngài bơh di Hwềng Yàng dê taih? Hala tiah lơi añ rgơi dô pồn bơh di mat Yàng dê taih?” Bơh ồng git lah bulah hơđăng trồ, hala hơđơm lơgar lang bồc hala Tus ơm di tiah lồi nhàr dàlềng dê, Yàng Tòm Trồ gơs mat tòm làm ală tiah. Kơnrãn gơs mat mơ bol he tòm ală bơta chò hờp mơ kung tòm bơta moat jrung. Bulah gơs ală tŭ bol he sền gŏ he gơ duh tòm “lơgar lang bồc” bơta roh gơn kơnơm dê, nkgam, hala sền gŏ he găm ơm tòm “lồi nhar dàlêng” bơta owm is dê, gen “Tềng hơ̆ tê Yàng kung rơp tề lam” bol he. Ò gơs bơta lơi rgơi kơryăn bol he lik bơta gar măt lơbơn niam Kơnrãn dê.

Kơp bol he kung ơm tòm ală bơta gơlik gơs pha is, mơ ya bulah bơta gơlik gơs hơ̆ mbe lơi, bol he kung găm kơ̆ nùs dòn Yàng Tòm Trồ găm tơlik măt bal mơ he, mơ să tòm Jơnau Yàng neh đơs loh bơta hơ̆. Tian gơs bulah tom tŭ bơta dơp git lơh bol he in kơlôi lah Yàng ò sền gŏ hala kơnọ bơh bơta gơlik gơs bol he dê, gen jơnau song hơ̆ kung ò tòm gơl.

Bơta bơtao wơl sơntơm tòm tŭ bol he sac dòn tòm jơnau mơ dơp git lah bulah tòm ală sơndiang bơta roh gơnkơnơm mơ moat jrung, Yàng găm ơm ting hơ̆ mơ lơh lơh bơi wơl ală cau lề lac nùs nhơm. Mơ tòm ală tiah hơ̆, bol he găm rgơi yăl be Dabit lah: “….Tềng hơ̆ tê Yàng kung rơp tề lam añ, Tê ma Yàng dê rơp sơmbat kơ̆ añ.”

Dan jà bol he dô nùs bal tòm bơta hòi dan: Khoai Yàng, kòn ưnngai Kơnrãn bơh sùm ơm bal mơ kòn tòm ală bơta chờ hòp mơ moat jrung kòn dê. Dăn ai nùs kòn geh hưh hơh mơ hòn chò tom tŭ geh ơm tòm bơta gơs mat Kơnrãn dê. Bulah bơta gơlik gơs mơ kòn mbe lơi, dan dong kòn ò kơnơm pràn is he dê mơya git sơmbăt tơwor tê pràn kơldăng Kơnrãn dê. Kòn don Kơnrãn rơp tề lăm kòn lòt găn ală sơndiang dà mat dê mơ bơta jê sồt moat nàng đơs chò jong rơ Kơnrãn.
Kòn jơh nus hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, bulah gơs pơnđơl pràn tus mbe lơi, gen bol he kung ò rgơi lòt ngai hala ntoat pôn bơh bơta gơs mat Yàng dê. Tai bơh hơ̆, ngai do, ưnngai tĕ Yàng bơh Kơnrãn găm gơs măt mơ bol he. Mơ kung đơs tĕ mơ Yàng bơh ală bơta tơmlơh tòm rai kis oh mi dê, mơ hôi dăn bơta dong klas Kơnrãn dê. Lơi tĕ jơnau song Jơnau Yàng dê at bồ nus tôr oh mi dê, nang bulah tòm bơta gơlik gơs lơi oh mi kung găm rgơi đăl git lah Kơnrãn găm ăt bồ, mơ sùm geh bơntơl pràn tòm bơta kỡn gơboh mơ bơta nđàc crih crai Kơnrãn dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.