Ồng mò oh mi git ò, gơs dô bă tiah he buôn ngan nàng tis gung – ò di la tòm mơnơm jong cir jrô, mơ la tòm tiah bol he tồn lah he neh git loh lang. Bol he òs tis nrah tòm bơta òs mong he dê, tòm ală bơta he kơp kỡn, mơ gơs tú bol he lòt tis tòm bơta dòn he dê mơ he tồn lah ne ntào kớ. Bol he kừ wi wơ mơ ò rgơi jòi bàn gung, bulah gơs tú gung pal lòt ơm đap mat he tơn. Gơs tú lơi, tú he pơnđơl at bồ is rai kis he, gen hớ la tú mơ jơnau hòi jà Yàng dê ơm ngai ngai rlau jơh sơl?

Ngai do, ngai 20/06/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume LÒT LÊNG DI GUL TIAH ÒS MƠNG

“Ơ Yàng Jehôwa, añ git gùng dà jơi kòn mơnus dê ò di bơh bol khai lơh tòm, Bol khai ò rgơi lơh nền ală cơnđòa jơng bol khai dê.” (Jeremi 10:23)

Tú ẵn pa bau mơ rê ơm bal mơ bau klau ẵn jê, ẵn neh lòt tis gung, mơ gung hớ la tòm tiah tơnớ hiu ẵn jê.

Lòi ẵn yal wơl ồng mò oh mi in.

Gah tơnớ hiu ẵn jê gơs tiah ơnang rlau mơ 12 mẫu – gơs blang nhơt tơlir, gơs mơnơm dềt mơ chi xương rồng oă lò, mơnơm dơng oă chi, oă ir chi gơlơh bè dô nơm dơr-nhang bòn oă lò, mơ gơs dô nơm gung dềt gah hiong dà ò geh dà tai.

Tòm dô ngai ne, tú lòt jơng tòm gung dềt hớ tòm tú rlô ngai, ẵn kơno bơta bơto đơs bơh Yàng Tòm Trồ neh lòi làng bol Israel lòt tòm nrah nring tòm blang bràs tòm 40 nam mơ nên cê ngan la ming tòm 11 ngai lơm (Khà lang bol 32:13). Ẵn kừ kah kơlôi tus bơta bơto hớ, lah Yàng Tòm Trồ rgơi lơh dô gung lòt liah gơlik gơs gung jòng mbe lơi – mơ ẵn ò kah tai ẵn neh lòt tis gung dềt hớ tú lơi. Gơlơh bè la ẵn neh lòt wơl tòm gung mơ lang bol Israel neh lòt, mơ tòm bă tiah dềt rlau.

Ẵn ming roh 5 phút lơm nàng rê wơl bơh gah hiong hớ, mơ ẵn pal roh oă rlau tú jơ hớ la tòm 20 phút nàng lòt tòm bơta rngòt rngơt, lòt jat têl jơng ală phan poan jơng tòm mơ, dà phal gơlik oă ngan. Ẵn kơp kỡn so ẵn jê rơp lam ẵn gung rê tus hiu, mơya gơ ting jat ală phan bô bơlhô ndai mơ ò rgơi dong ẵn.

Tú jơ rlô ngai mor jơh mơ gung lik ò hềt gó, ẵn rơm să ngan. Ò di ming la ò gó gung rê hiu lơm, mơ la ẵn gò gơs rcang dô êt lơi nàng pò gung rê. Gut dar ẵn bêng lò mơ ẵn ming soh mpha liah lơm, ò di pal nàng lòt tòm gung bêng lò do, mơ tòm tê kung ò rgơi gơs phan lơi nàng tòm dră wơl mơ bơs tur, rngòt gơ lòt dô bă ni sơ na tú ẵn lòt tòm gung bêng nhơt do.

Ming kơ lôi tus bơta pal yal mơ cau lơh broă bal la ẵn rê tus rlau mơ jơ rlô ngai bơh ẵn lòt tis gung – behớ lơm ẵn kung tơl ẵn in kal ke nàng joi bơta dong kơl bơh cau ndai. Ẵn sơntòm sac rwah ală bơta rgơi lơh. Ẵn rgơi hòi bau klau nàng dong kơl ẵn, mơya kah tus tiah ẵn lòt tis gung ngai mơ hiu ming 200 met lơm lơh ẵn in ò khin hòi. Lôi dut, ẵn lơh nền hòi dan mơ Yàng.

Ming dô êt tú lơm, ẵn sên gó dô nơm kon kong kìm. Ẵn lòt jat gơ, mơ sơntòm sên gó dô nơm yung cau mòn mơ kong rơndeh dê mơ ẵn ò hềt gó bơh lài. Bơta hớ ndròm bè lah tòm dô gơs dô nơm gung dềt lam rê tus hiu. Lôi dut gen ẵn kung rgơi lik bơh hớ.

Bơh bơta neh git lam hớ lơh jơnau bơta bơto dê neh rngoh rngac mơ jrô ndơp tòm nùs nhơm ẵn jê. Yàng Tòm Trồ gơs gơnoar pò gung tòm blang bràs, mơ Kơnràn kung rgơi lam he lòt lêng, lơh gung rềp gơlik gơs gung ngai, dilah bol he kừ lòt is dô nă.

Ơ ală ồng mò oh mi kỡn gơboh, do la dô jơnau song jrô ndơp ngan tòm rai kis đah hwềng bol he dê. Gơs tú bol he “lòt lêng” ò di la bơh Yàng ò gơs mat, mơya bơh nùs pơnhừ să bol he dê lơh he in tôn lah he rgơi jòi bàn gung lòt. Bol he kừ tồn lah he git gung, jơl tus dê tú lòt tòm gung bêng lò gen he rgơi sên gó lah: kon mơnùs geh crơng gơs ò di nàng lòt is dô nă. Bơta kơlôi sơnơng “he rgơi lơh is” bulah sền la pràn kơldang mơya gơ la cau sò tơm pồn mat bơta dòn. Gơ lơh he in ò dòn song tòm bơta hòi dan, lơh bơta jong să he gơlik gơs dô nơm dơr nhang digul he mơ Bơtau kỡn gơboh he.

Hớ la tơnggu nchi bơh tài bol he kơno jơnau hòi jà Yàng dê hòi he rê tòm tú he lòt tis gung. Ồng Jang Bap-tit neh đơs: “Añ la jơnau cau hòi driau tòm ƀlàng bràs lah: ‘Bơsong tĕ gùng Yàng dê,” (Jang 1:23)

Gơnoar broă Jang dê hớ la sơnio bol he in gó gung nàng rê wơl, wàs gung, rcang nùs nhơm nàng dòp rò bơta bơto sôr mơ broă Yàng Tòm Trồ lơh.

Hớ kung la bơta ẵn pal lơh tòm ngai hớ: dô jơnau đơs tòm blang bràs neh sơnio ẵn in gung nàng rê wơl. Bulah jơnau hòi jà hớ tus bơh bơta bơto, bơh dô jơnau hòi dan, hala bơh dô nơm kon chôp lôp tus hơp yung mòn mơ kong rơndeh, Yàng Tòm Trồ đơs loh lang mơ ẵn lah: bẵn lòt lêng lang tai, rê wơl té mơ Kơnràn, kah rngal mơ cơnđoà lòt jat bơta dong kơl Kơnràn ceng tus.

Kah kơlôi té tus bơta mơ Yàng neh hơ jơnau hòi dan ẵn jê: ò di bơh rnàs dơng, kung ò di bơh dô nă cau gơnrơh mơ la bơh dô nơm kong kìm dềt. Hớ la broă Yàng Tòm Trồ òs lơh: Kơnràn êt lơh jat ală bơta he kơlôi sơnơng, mơ Kơnràn rơp hơ he in jat bơta he cang. Bơta tề lam Kơnràn dê la bơta tề lam pơndềt să, dềt rhên, mơ he pal cang gơs gar mat đah hwềng nàng dòp git. Dilah he kừ sên di ală têl krơi dơng, bol he rơp mhar húi bơh ală “kang kìm” Yàng pơyoa tus kòp ngai tòm rai kis he dê.

Behớ tàng, dilah ồng mò oh mi lòt gan ală ngai lòt tis gung hala ntào dê gul lò mơ lùp is lah nchi bơh tài he gơlik gơs bè do – dan kừ kớ nùs, Yàng Tòm Trồ ò sang lòi ồng mò oh mi ò.

Kơnràn sùm pò gung, mơya ồng mò oh mi pal chò nùs, dơh wơl, tơnliah să he hòi dan Kơnràn mơ ơn bơta dòn he dê tòm Yàng nàng Kơnràn lam ồng mò oh mi rê tus hiu

Dan jà bol he dô nùs bal tòm bơta hòi dan: Khoai Bèp kỡn gơboh! Kon ưnngai Yàng bơh Kơnràn la Cau Ê Lơbơn Niam, ò tú lơi lòi kon lòt is ngai mơ Kơnràn. Ơ Yàng, gơs tú kon kừ lòt jat gung is, kơnòm di pràn is kon dê, gơ lơh kon in bol glar mơ rngòt rngơt. Dan toh glài bol kon in bơh bơta pơnhừ să jrô ndơp tòm kon. Tú do, kon jơh nùs hòi dan dan Kơnràn dong kon. Dan pò mat đah hwềng nàng kon rgơi sên gó bơta tề lam Kơnràn pà ai kon in kòp ngai. Dan wàs sang jơh ală bơta kơlôi rcang, lơh bơsong gung dà tòm nùs kon, nàng kon cơnđoà lòt jat nùs kỡn Kơnràn dê. Bulah tòm blang bràs ro rãn hala tòm lò oă lò, kon dòn nền lah Kơnràn rơp tề lam kon, kon rơp jòi bàn gung rê tus hiu dô bă ring lơngai mơ lơngap lơngai. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, rai kis bol he dê kòp ngai kung bè bơta yal wơl tòm bơta bơtê ngai do dê. Gơs tú bol he tồn lah he neh git loh lang ală gung dà tòm rai kis he dê, jơl tus gơs ală bơta gơtơntus, ală bơta bol glar bè lò, bol he rgơi sền gó lah he dềt rhên mơ buôn ngan jê sồt moat jrum. Bẵn gơplớ nùs tú he ò hềt jòi bàn gung. Gơs tú Yàng ai bơta hớ gơlik gơs nàng bol he in bơtê sang ală bơta pơnhừ să kỡn he jòi bàn is gung dà. Tú ồng mò oh mi pơndềt să hòi dan, gen bơta tề lam Kơnràn dê rơp tus: dô jơnau pơndòm pơniang bơh dê dô năng cau, dô seng Sră Goh he kah, dô bơta lơngai digul calrbut,… Kơnràn sum gơs bơta nàng tơngkah ồng mò oh mi in gó lah: gung rê gam ting hớ, di đap mat ồng mò oh mi dê, tú ồng mò oh mi cơnđoà lòt jat Kơnràn.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.