Muaj tej lub sijhawm koj muab tag nrho koj lub siab los thov Vajtswv thiab tso siab plhuav rau ntawm Vajtswv. Koj teeb homphiaj rau yus lub neej vam khom rau cov lus taij thov ntawd, vim ntseeg tias Vajtswv yuav teb. Koj ntseeg tias yus tus mob yuav tau kho zoo, ntseeg tias koj yuav txais tau txoj haujlwm uas ib txwm nyiam, lossis koj yuav sib yuav rau xyoo no lossis xyoo tom ntej. Tiamsis thaum uas txhua yam tsis tshwmsim raws li qhov uas tos ntawd, ces txoj kev tag kev cia siab thaum pib tej zaug yuav maj nroos hloov los ua qhov kev iab siab, tu siab thiab ua xyem xyav puag hauv tus ntsujplig.

Hnub no, yog hnub 04/07/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jennifer E. Jones dhau ntawm Zaj kawm TOM QAB TEJ LUS THOV TSIS TAU TEB

“Lub ntuj nyob siab lub ntiajteb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd” (Yaxayas 55:9).

Thaum uas pib sau zaj lus thov Vajtswv no, kuv nyuam qhuav nrog kuv tus phooj ywg sib tham ntev heev. Wb sib tham txog txoj kev uas Vajtswv yuav teb peb tej lus thov… lossis kom yog dua thaum uas Vajtswv ua twjywm tsis teb.

Qhov no yeej tshwmsim nyob hauv txoj kev nrog tus Tswv mus. Yim nrog Yexus Khetos mus ua ke ntau xyoo, peb yuav pom tias lub neej no yeej tsis yooj yim lossis pheej mus qhov qub raws li tej ntaub ntawv cob qhia uas peb twb tau kawm lawm. Tseeb tiag, txoj kev taug hauv lub neej ntseeg nws muaj ntau qhov dub nyos sim siab. Peb txhua tus yeej ntsib dhau tej kev mob siab: peb siv tag nrho peb lub siab, taij thov rau yam uas yus ntseeg tias haum Vajtswv siab, tas thaum kawg peb tsuas paub ntsia lub teev txoob nrov thaum ib tag hmo ua twjywm ntsiag to txaus ntshai ntawd xwb?

Tiamsis muaj ib qhov tseeb peb yuav tau txais yuav. Tib neeg lub hlwb muaj nrim yeej tsis nkag siab tag nrho Vajtswv tus cwjpwm loj kawg nkaus, thiab peb haj yam muaj sijhawm tsawg los nkag siab txog tag nrho Vajtswv lub homphiaj uas Vajtswv npaj tseg rau peb lub neej. Ntawd yog qhov tseeb nyob hauv Vajluskub.
“Lub ntuj nyob siab lub ntiajteb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd” (Yaxayas 55:9).

Yuav muaj tej hnub koj ua tsis tau dabtsi, tsis nkag siab tias Vajtswv tab tom ua dabtsi. nws yog ib qhov tseeb thaum uas peb nkag mus rau hauv txoj kev sib raug zoo uas tsis muaj nrim – tus uas tab tom tswj thiab tsim muaj lub suab hauv lub ntuj. Peb tsis muaj cai, thiab kuj tsis muaj txaus lub zog los yuam kom Vajtswv yuav tau nthuav qhia meej meej Vajtswv daim duab.

Yuav tau txhawb zog heev thaum peb paub tias peb tsis nyob ib leeg hauv txua kev no. Tej neeg muaj kev ntseeg nto npe lug hauv keeb kwm Vajluskub kuj muaj tej lub sijhawm lawv nkag siab yuam kev Vajtswv lub siab nyiam. Lawv kuj xa tej lus taij thov “rau saum ntuj ceebtsheej” thiab tsuas txais tau lub suab tias “tsis tau khoom”. Txawm yog yuav nrog Vajtswv mus ua ke sib raug zoo npaum cas hauv ntiajteb no los, lawv yeej nkag siab tias tib neeg yuav nkag siab tsis tas tus uas paub txhua yam txoj kev xav. Yuav muaj tej lub sijhawm, vim kub dhau, peb khiav ua Vajtswv ntej thiab nres tos Vajtswv ntawm ib qhov chaw uas Vajtswv twb tsis tau npaj tias yuav tsuj taw mus txog.

Yog li, puas yog muaj tej lo lus thov Vajtswv yuav tsis muaj hnub tau Vajtswv teb? Vajtswv tus cwjpwm ncaj ncees thiab mloog peb nws ho nthuav tawm txawv (thov saib Paj lug 15:29). Nws teb txhua lo lus thov raws li tej uas koj teb koj tej menyuam tej lus: Tau, tsis tau, thiab tsis tau yog caij.

Thaum uas koj hnov cuag li txhua lo lus taij thov poob rau qhov tws kev, ntawd yog lub sijhawm peb yuav tau nres, ntsib Vajtswv thiab hais tias: “Tus Tswv, koj tab tom teb kuv tej lus raws li txoj kev uas kuv lub qhov muag sab ntsujplig tsis tau ntsia pom?” Cia li nug Vajtswv. Vajtswv yuav nthuav qhia rau koj.

“Cov Yixalayees tus Vajtswv uas dawbhuv, tus Tswv uas cawm nej dim hais tias: Kuv yog tus Tswv uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug” (Yaxayas 48:17).

Txais tau lo lus teb “Tau” ntawm Vajtswv ces zoo kawg nkaus. Nws yog raws li tej uas peb tos, thiab tseem teb yog lub sijhawm. Tag nrho peb yuav yooj yiam qhuas Vajtswv thaum Vajtswv ncaws hau. Tiamsis, lub neej tsis yog thaum twg twb tshwmsim raws li peb lub siab nyiam.

Vajtswv lub suab “Tsis tau” yog yam uas peb nyuaj txais tshaj, thiab yim mob siab tshaj thaum yuav tau mloog raws. Txawm li los yam zoo nyob tom qab lub suab “Tsis tau” ntawd yog: Vajtswv yeej muaj ib lo lus cog tseg txog Vajtswv txoj kev hlub pub rau peb thaum peb ntsib lub caijnyoog phem. Yuav tau nco txog Paulus thaum uas yawg taij thov Vajtswv tshem tus hmuv hauv yawg sab nqaij tawv mus. Nyob rau lub sijhawm uas mob ntawd, ntu Vajluskub tau tshwm los: “Kuv txoj kev hlub txaus rau koj lawm.” (2 Kauleethaus 12:9). Muab ua lwm lo lus hais, Vajtswv txoj kev hlub yuav txhawm kom puv nkaus txhua qhov khoob lug. Ntawd yog lo lus cog tseg txog Vajtswv txoj kev tshwm ntsej muag thaum nyob ib leeg, Vajtswv lub zog yuav pab peb thaum peb qaug zog, thiab kev kaj siab yuav loj dua tej kev txhawj ntshai uas vij puas ncig peb. Vajtswv txoj kev hlub yuav kho zoo peb txhua lub qhov txhab ntawm sab ntsujplig.

Nyob rau ntawm ib seem zoo, kuv ntseeg tias lo lus teb “Tsis tau yog lub sijhawm” yuav tshwm los ntau dua li uas peb xav, tshwj xeeb yog thaum uas koj tej lus taij thov nws haum Vajtswv siab thiab yog raws li Vajtswv tej lus. Qhov kev sim siab loj tshaj ntawm lo lus teb no yog peb yuav tau muaj lub siab ntev mloog lus thiab ntseeg nws. Peb yuav tau ntseeg tias Vajtswv yeej tsis hnov qab peb – thiab zoo li tej uas Hanpakus ntsia pom – Vajtswv lub sijhawm yeej yuav los txog xwb (thov saib Hanpakus 2:2-3). Hais mas yooj yim dua ua, kuv paub, tiamsis nws yog tus cwjpwm ntawm txoj kev sib tw hauv sab ntsujplig uas peb yuav tau koom tes rau.
Txoj kev nrog tus Tswv mus yog ib txua kev yuav tau muaj zog, tsis yog tias sib tw saib twg khiav ceev lossis sab nraud. Tsis paub leej twg hauv peb yuav txaus siab hais rau Vajtswv tias: txawm yuav muaj dabtsi tshwmsim los, txawm yog thaum uas kuv tsis nkag siab tas txhua yam Vajtswv tab tom ua los, kuv yeej txiav txim ntseeg Nws?

Thov caw nrog kuv peb thov Vajtswv ua ke: Kuv tus Vajtswv uas hlub kuv, kuv los rau ntawm koj lub zwm txwv los ntawm lub siab tab tom muaj kev tu siab. tus Tswv, muaj tej lub sijhawm kuv qaug zog, tsis paub ua cas vim tsis nkag siab koj txoj kev tab tom kav kuv lub neej. Thov zam txim rau kuv tej lub sijhawm uas kuv khiav ua koj ntej, thiab tej lub sijhawm uas kuv npau taws, yws koj. Kuv thov Vajtswv ntxiv zog rau kuv txoj kev ntseeg qaug zog, thov pab kom kuv saj tau Vajtswv txoj kev hlub puv npo nyob rau tej lub sijhawm uas tsaus ntuj nti tshaj. Kuv thov xaiv ncaj ncees thiab ua siab ntev, txiav txim tsis tso tseg mus ntxiv txoj kev no. Kuv thov hauv Tswv Yexus Khetos lub npe, Amees.

Cov kwv tij txhua tus, Vajtswv yeej xav ntsia kom pom peb sawv khov kho hauv txoj kev ntseeg, txawm yog thaum uas peb tej homphiaj ntawm tus kheej puas tshuaj. Thaum ntsib tej kev ua twjywm ntsiag to txaus ntshai, ntawd kuj yog lub sijhawm uas kev ntseeg tseeb tau nthuav tawm dhau ntawm lub siab ua siab ntev tos, pauv qhov uas tso tseg hauv txoj kev yws Vajtswv. Yog li, lo lus txiav txim rau koj thiab kuv lub sijhawm no yog: peb puas kam mus rau tom ntej los ntawm lub siab ncaj ncees, tsis yog tej kev ntshaw ib pliag? Cia siab tias nyob rau tej ceg kaum tsaus ntuj hauv lub neej, koj thiab kuv yeej tseem hais tau rau Vajtswv los ntawm tag nrho lub siab tawv tias: “Tus Tswv, muaj kuv nyob ntawm no!”
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.