Koj puas muaj zaum twg xav, yuav ua li cas kom tej neeg ib ncig thiaj ntsia pom Vajtswv dhau ntawm lub neej maj nroos thiab ntau qhov kev txhawj hauv yus lub neej? Peb pheej nrhiav Vajtswv txoj kev tshwm ntsej muag nyob hauv tej txujci loj lossis tej uas ntsib dhau ntawm sab ntsujplig, tiamsis ho hnov qab tias Vajtswv yeej tseem ua haujlwm dhau ntawm tej uas me tshaj hauv lub neej txhua hnub. Hnub no, peb yuav koom siab nrhiav txog Vajtswv txoj kev zoo nkauj tau nthuav tawm dhau ntawm tej uas peb xav tias yooj yim ntawd.

Hnub no, yog hnub 05/07/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Martha Noebel dhau ntawm Zaj kawm KEV TXAWJ NTSE QHIA TAWM HAUV LUB NEEJ

“Vajtswv ua li no rau qhov Vajtswv yeej porn zoo qhia zaj uas tsis muaj neeg paub no rau nws haivneeg paub. Zaj ntawd yog zaj uas muaj nqis heev thiab zoo kawg nkaus. Vajtswv twb npaj zaj no cia rau txhua haivneeg lawm. Zaj uas Vajtswv muab zais cia lawm yog hais tias Yexus Khetos twb los nrog nej nyob lawm; yog li ntawd, nej yuav tau Vajtswv lub tshwjchim uas ci ntsa iab” (Kaulauxais 1:27)

“Thaum cov Senpas tus poj vajntxwv hnov Xalumoos tej tswvyim thiab porn lub loog uas Xalumoos ua. Nws porn tej zaub mov uas luag rau, rau saum Xalumoos lub rooj, tej tsev uas nws cov nomtswv nyob, tej tub kavxwm los yeej nyob muaj chaw thiab tej tsoos tsho uas lawv hnav los zoo ib yam nkaus, tej tub ce dej ce cawv, thiab tej tsiaj uas tua fij hauv lub Tuamtsev ua rau poj vajntxwv yoob thiab xav tsis thoob li” (1 Vajntxwv 10:4-5).

Puas tau muaj zaum twg koj nug tias vim li cas Vajtswv ho muab tej yam uas cuag li nws tsis tseem ceeb nyob rau hauv lub neej sau cia rau hauv Vajluskub? Peb yooj yim nkag siab tias vim li cas ib tug poj vajntxwv muaj hwjchim zoo li Senpas nws ho xav tsis thoob rau Xalumoos txoj kev txawj ntse, plua nuj thiab txoj kev hwm Vajtswv ntawd. Tiamsis, Xalumoos muaj lub tswv yim dabtsi uas txawm yog txoj kev rau rooj noj xwb los kuj ua rau ib tug neeg muaj koob npe li pog yuav tau xav tsis thoob? Tej zaum tej rooj noj ntawd nws yuav qab heev, thiab tej tub qhe tej ris tsho yuav ua los ntawm tej ntaub uas zoo tshaj. Tiamsis, cov nom tej chaw zaum, nws muaj tus dabtsi txawv? Thiab vim li cas pog xav tsis thoob rau tej chaw tso tej dej cawv.

Qhov no ua rau kuv tig rov qab mus saib kuv lub neej sab ntsujplig. Kuv ntseeg tias Vajtswv yeej xav tsim kom tso muaj chaw rau peb lub neej, kom dhau ntawm tej uas me tshaj, lwm tus yuav ntsia pom Vajtswv lub tshwjchim. Ntau zaug txoj kev uas peb tswj peb lub neej sab nraud kuj nthuav tawm feem twg tu zoo ntawm sab ntsujplig, thiab kuj yog tus qauv nthuav tawm tus Tsim ib puas tsav yam lub hlwb. Nyob hauv txoj kev xav tsis thoob ntawd, poj vajntxwv Senpas thiaj tawm suab:

“Cia li qhuas tus Tswv uas yog koj tus Vajtswv! Nws ua rau sawvdaws porn hais tias nws txaus siab heev rau koj, nws thiaj tsa koj ua vajntxwv kav lub tebchaws Yixalayees. Vim nws txojkev hlub cov Yixalayees nyob mus ibtxhis li, nws thiaj tsa koj ua lawv tus vajntxwv coj lawv ua raws li nws txoj kevcai thiab txojkev ncaj ncees” (1 Vajntxwv 10:9).

Muaj qee tus hauv kuv tsev neeg yog qhov pov thawj ciaj sia rau qhov tseeb no. lawv lub tsev tu zoo zoo thiab puv npo kev kaj siab. feem ntau txoj kev kaj siab ntawd muaj los yog dhau ntawm lawv txoj kev mloog Vajtswv lus tsim muaj lub neej tswj tus kheej. Lawv tab tom mus hauv txoj kev txawj ntse nyob hauv Vajtswv, nthuav tawm dhau ntawm lub siab hlub Tswv Yexus, dhau ntawm muab lub neej fij rau kev tshaj tawm Txojmoo Zoo, thiab dhau ntawm txoj kev tswjhwm ncaj ncees hauv kev ua lub neej txhua hnub. Dhau ntawd, kuv ntsia pom Vajtswv txhais tes ua haujlwm thiab ciaj sia, zoo yam li Vaj Ntsujplig tej koob hmoov ua haujlwm hauv lawv lub neej.

Kuv ntseeg tias Vajtswv zoo siab nthuav tawm Vajtswv txoj kev txawj ntse rau peb txhua tus (Yakaunpaus 1:5). Thaum Leej Txiv muaj kev hlub pub kev txawj ntse rau peb txhua tus, ntau zaug tej kev taw qhia ntawd nws ntws los txog qhov uas peb xav tias ntawd yog peb tej kev xav. Qhov uas peb paub tej kev xav ntawd nws pib los ntawm Vaj Ntsujplig yuav ntxiv kev ntseeg rau peb, ua pov thawj meej meej rau yam muab zais cia tias “Yexus Khetos nyob hauv nej” (Kaulauxais 1:27). Yam uas nyias nyob muaj nyias chaw no tau Vajtswv tsim los ntawm yam uas loj tshaj txog rau tej uas me tshaj hauv lub neej, yog qhov kaj coj lwm tus mus rau ntawm txoj kev hwm Vajtswv.

Kuv tus kheej ntsib tej no ntau zaus. Tsis ntev no thaum kuv mus ua haujlwm, xwb tim “kuv xav tawm” kuv xav mus koom ib lub rooj sab laj uas thaum pib kuv tsis tau koom dua. Thaum kawg ntawm no ho yog ib qhov kev txiav txim yog, vim tej yam zoo tseem ceeb tau muab los sib tham nyob rau hauv txoj kev sib tham ntawd tau pab rau kuv zam tau ntau txoj haujlwm tsis tas yuav ua. Kuv zoo siab vim tau mloog Vajtswv lub suab tshoov kuv siab. kuv saib taus txhua lub sijhawm muaj nqis uas Vaj Ntsujplig tau coj kuv txawm yuav yog haujlwm loj lossis haujlwm me.

Txaus nyuaj siab tshaj, kuv kuj muaj ntau zaug tsis txais yuav lub suab hais ntsiag to ntawd. Muaj ib qhov piv txwv yog ncaj rau lub sijhawm so thaum caij ntuj sov thaum kuv kawm qib siab, thaum tsav tsheb los saib niam thiab txiv lawv, kuv txiav txim siab cia cov khoom tso rau saum tsheb. Kuv tau cia txhua yam tso tag nrho rau saum li vim tub nkeeg tsis xav muab khoom tso rov qab thaum xaus. Koj sim xam saib muaj ntau zaug kuv tau tsis quav ntsej cov lus ceeb toom hauv siab, hais tias yuav tau tso tseg txoj kev ua xyem xyav ntawd. Thaum kawg kuv ua poob ntau lub sijhawm pab lwm tus, vim tsis muaj chaw pab rau lwm tus nrog yus zaum tsheb ua ke.

Tshuav koj ne zoo li cas? Hnub no, kuv txhawb koj yuav tau ua twj ywm thov Leej Txiv saum ntuj pub tej tswv yim tsim txoj kev tso muaj chaw nyob hauv yus lub neeej txhua hnub. Tom qab ntawd, tseg sijhawm ntsiag to los mloog Vajtswv lub suab. Tej zaug koj yuav xav tsis thoob rau tej txoj kev loj mus txog rau yam me uas Vajtswv npaj yuav tav thiab hloov pauv koj lub neej.

Thov caw nrog kuv peb thov Vajtswv ua ke: Leej Txiv saum ntuj, kuv ua koj tsaug vim txoj kev txawj ntse thiab yam uas koj teeb nyias nyob muaj nyias chaw uas koj xav tsim muaj hauv kuv lub neej. Thov zam txim rau kuv tej lub sijhawm maj nroos, lossis txhob txwm ua txuj hnov qab Vaj Ntsujplig tej lus ceeb toom. Thov pub kom kuv muaj tus ntsujplig zeem paub Vajtswv coj kuv hauv txhua yam uas me tshaj hauv lub neej txhua hnub. Thov Vajtswv ua tus Tswv tswj kuv lub hlwb, pab kom kuv paub tswj kuv lub sijhawm, haujlwm thiab xyaum kev ua neej kom Tswv Yexus lub npe tau txhawb nqa. Thov kom Vajtswv txoj kev hlub thiab qhov kaj ntawm Txojmoo Zoo tau ci dhau ntawm kuv lub neej, kom tus uas ntsib kuv puav leej ntsia pom Vajtswv txoj kev tshwm ntsej muag. Kuv thov hauv Tswv Yexus Khetos lub npe, Amees.

Cov kwv tij txhua tus, paub tias lub neej sab ntsujplig tsis tau ntsuas los ntawm qhov uas zoo lossis tso muaj chaw sab nraud, tiamsis thaum peb lub siab hwm Vajtswv, Vajtswv txoj kev txawj ntse yuav chwv txog txoj kev uas peb tswj tej uas ib txwm ua txhua hnub. Ib qhov chaw ua haujlwm tso muaj chaw, ib lub neej tswj tus kheej lossis ua raws li tej uas Vaj Ntsujplig tshoov siab – tag nrho txhua yam no puav leej yuav dhau los ua zaj nkauj qhuas Vajtswv. Hnub no, koj thiab kuv yuav tau ua twjywm nug Leej Txiv saum ntuj saib Vajtswv puas xav kho yam dabtsi hauv peb txoj kev maj nroos hauv peb lub neej. Thiab thaum peb txaus siab cia Vajtswv ua tswv ces yam uas me tshaj, peb lub neej yuav cim civ dhau los ua cov lus pov thawj ciaj sia txog Vajtswv pub rau tej neeg ib ncig.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.