Muaj neeg piv peb txoj kev ntseeg zoo li lub tsom iav (viễn vọng), pab kom peb ntsia pom ntuj ceeb tsheej nyob ib txhis ntawm Vajtswv. Tiamsis, tsuas yog muaj ib qhov hmoov av me me paug rau xwb, ces qhov ntawd yuav ntsia tsis pom, thiab tag nrho tej peb pom yog kev txhawj ntshai ntawm qhov muag. Muaj ntau zaug koj thiab kuv peb cia “tej hmoov av’ ntawm txoj kev txomnyem ib vuag no npog tas nrho lub ntuj kev hlub uas Vajtswv twb npaj txhij lawm?

Hnub no, yog hnub 06/07/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Beth Patch dhau ntawm Zaj kawm NEEG LUB QHOV MUAG NTSIA NQAIM

“Tej uas kuv xav zoo tsis thooj li tej uas nej xav, thiab tej uas kuv ua zoo tsis thooj li tej uas nej ua” (Yaxayas 55:8)

“Tus Tswv hais tias, “Tej uas kuv xav zoo tsis thooj li tej uas nej xav, thiab tej uas kuv ua zoo tsis thooj li tej uas nej ua. Lub ntuj nyob siab lub ntiajteb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd” (Yaxayas 55:8-9).

Tej vij sub vij sw uas Vajtswv tso los rau Falaus ua kom Falaus tso “Vajtswv haiv neeg tawm mus” tau ua rau tag nrho cov neeg Iziv thiab cov Yixalayees lawv ntshai heev tsis ploj. Thaum uas cov neeg Iziv yuav tau ris txoj kev chim los ntawm Vajtswv txhais tes muaj hwjchim, ces Vajtswv haiv neeg tau tiv thaiv los ntawm Vajtswv txoj kev tswj kaj siab lug, tsis ua cas rau tej vij sub vij sw ntawd. Tus uas pom tej ntawd puav leej ceeb tag, txo hwjchim hwm Vajtswv tus muaj hwjchim loj kawg.

Qhov txujci no tas txog qhov txujci tod, nws qhib kev hauv hiav txwv thaum uas nws cov pej xeem tag kev cia siab. Ntawm lawv xub ntiag yog hiav txwv, tomqab yog cov tub rog Iziv uas muaj zog heev tab tom caum lawv. Tiamsis saib, muaj ib txoj kev qhuav qhawv qhib los, cov pej xeem Yixalayees mus hauv dej zoo li saum av qhuav, ob phab yog dej sawv ua phab ntsa ruaj khov. Tas thaum kawg, lawv lub qhov muag ntsia pom dej rov qab tawg rhe, muab tag nrho yeebncuab voob nkaus rau hauv hiav txwv.

Oh, zoo kawg nkaus li! Tus twg uas tau ntsib dhau tej txujci zoo li ntawd, tej zaug tag nrho lawv lub neej yuav tsis muaj ib zaum twg ua xyem xyav rau Vajtswv lub hwjchim lossis Vajtswv txoj kev pab tseg rau Vajtswv haiv neeg. Tiamsis… Vajtswv haiv neeg uas Vajtswv xaiv ho ntog.

Tsuas tau ob peb hnub kev mus dhau moj sab qhua qhuav qhawv, lawv txoj kev tshaib nqhis ntawm lub cev ntaj ntsug cia li muab lawv txoj kev ntseeg sab ntsujplig zuaj loj tsis taus. Lawv tig rov qab mus yws Mauxes, lawv tuaj yeem txais yuav txoj kev ua qhev nyob tim Iziv zoo dua li uas raug Vajtswv sim (Khiavdim 14:11-12).

Vim li cas tib neeg ho yooj yim hloov pauv li ntawd? Vim li cas lawv lub qhov muag ho dig tas rau ntawm Vajtswv txoj kev ua siab ntev – tus uas tswj thiab sawv tuaj lawv tog? Vajtswv nyuam qhuav muab lawv txoj saw hlau ua qhev rau lawv tas. Nws yuav qhuav muab hiav txwv tob tob ntawd ua kev rau lawv taug ntawm lawv qhov muag. Vajtswv tau ua tej yam uas lawv ua tsis tau vim lawv. Tiamsis, tsuas yog txoj kev nqhis ib pliag xwb, tag nrho cuag li yaj tas zoo li tej fuab tej pa taws.

Tej kev txomnyem ib vuag ntawd yooj yim plooj peb lub qhov muag sab ntsujplig, ua rau peb hnov qab Vajtswv tej koob hmoov loj uas Vajtswv tau hliv los rau yav dhau los. Tus cwjpwm sab nqaij tawv tsis muaj zog yeej tos ntsoov tshoov peb kom ua xyem xyav rau Vajtswv txoj kev ua siab ntev.

Puas yog muaj tej zaum koj thiab kuv kuj tab tom mus rau hauv txoj kev ntog ntawd?

Muaj ntau zaug peb xav kom yus muaj ib txoj kev ntseeg ruaj khov, tsis yoj yees, lees yuav ntawm Vajtswv txoj kev hlub txawm yog lub caijnyoog yuav zoo li cas. Tiamsis lub neej yeej ib txwm yog tej uas peb ntsib dhau hloov pauv. Peb ntsib txoj kev tag kev cia siab, raug ua rau muaj kev tu siab los ntawm tej neeg ib ncig. Thaum txoj kev ntseeg tsis paub dabtsi ntawd pob puas, peb txoj kev ntseeg ntawm Vajtswv kuj pib yoj yees.

Peb thov Vajtswv rau tej teeb meem nyiaj txiag, tiamsis thaum kawg lub tsev poob. Peb taij thov kom tau kho zoo, tiamsis tej neeg txheeb ze ho tag sim neej. Thaum lub hlwb tsis nkag siab, peb pib poob kev ntseeg thiab ntseeg rau lub qhov tob ua xyem xyav.

Nyob hauv 2 Kevcai 6:5, Vajtswv tej lus hais: “Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog”.

Tswv Yexus hais tias ntawm no yog ib nqe kevcai uas tseem ceeb heev (Malakaus 12:29-30). Qhov uas hwm Vajtswv tag siab, tas ntsujplig thiab lub zog yog tus yaum sij kub kom kov yeej tej kev ua xyem xyav. Kev hlub zoo kawg nkaus ntawd yuav txuas peb txoj kev ntseeg kom ruaj rau ntawm tej kis zeb ruaj khov, cheb tej kev txhawj mus.

Nyob hauv Yaxayas 55:8), Tus Tswv hais tias: “Tej uas kuv xav zoo tsis thooj li tej uas nej xav, thiab tej uas kuv ua zoo tsis thooj li tej uas nej ua”

Siv zog siv tib neeg lub hlwb muaj nrim los ntsuas thiab nkag siab Vajtswv txoj kev uas tsis muaj nrim tsuas ua rau peb qaug zog thiab tag kev cia siab xwb. Ntawd yeej tsis yog txoj kev uas peb yuav txhim tsa peb txoj kev ntseeg. Thaum uas hnub no peb nyuam qhuav saj tau qhov txujci mus hauv hiav txwv zoo li saum nruab qhuab, tiamsis taig kis cia li ua xyem xyav rau Vajtswv txoj kev ua siab ntev, qhov no qhia tias peb txoj kev ntseeg tab tom raug khi los ntawm lub caijnyoog. Nco ntsoov tias: lub caijnyoog yeej ib txwm hloov pauv, tiamsis Vajtswv ces tsis muaj ib zaum twg hloov pauv!

Yog tias peb txoj kev ntseeg zoo, ces txawm yog thaum uas tsis muaj tsev rov los tsev los, peb yeej xaiv hlub Vajtswv. Thaum tej neeg txheeb ze tag sim neej, peb yeej pehawm Nws. Peb kawm txoj kev mloog Vajtswv lo lus teb rau tej lus taij thov, thiab tas siab, tas ntsujplig, tas zog hlub Vajtswv – tshwj xeeb yog thaum peb tsis nkag siab Vajtswv lub homphiaj.

Koj thiab kuv yuav tau nco ntsoov tias: peb tsis ua lub neej vim tiam no. Muab piv rau lub ntuj ib txhis, peb lub sijhawm hauv ntiajteb no tsuas luv thiab dhau mus zoo li ua pa xwb.

Nyob hauv Lukas 17:33, Tswv Yexus hais tias: “Tus uas khuvxim nws txojsia, tus ntawd yuav tsis tau txojsia; tus uas tsis khuvxim nws txojsia, tus ntawd yuav tau txojsia”

Thov caw nrog kuv peb thov Vajtswv ua ke: Tus Tswv, kuv ua Koj tsaug vim koj tej lus cog tseg ncaj ncees. Ua Vajtswv tsaug vim kuv tau ua neej nag hmo thiab hnub no, rau taig kis thiab nyob hauv lub ntuj ib txhis tau koobhmoov ntawm koj ib sab. Ua Tswv Yexus tsaug tau hlub kuv, txawm yog kuv lub siab pheej hloov pauv thiab puv npo txoj kev qaug zog. Thov Vajtswv qhia rau kuv paub hlub Vajtswv los ntawm txoj kev ntseeg zoo li tus menyuam yaus, paub ntseeg Vajtswv hauv txhua yam, thiab paub muab lub neej fij tso rau hauv Vajtswv txhais tes ua tus tswj. Kuv thov hauv Tswv Yexus Khetos lub npe, Amees.

Cov kwv tij txhua tus, hnub no, nyob rau hauv tej kev txhawj xeeb hauv lub neej, koj tab tom siv zog pheeb rau yam dabtsi? Muaj mentsis kev tso siab rau nyiaj txiag vim muaj ib qhov nyiaj txiag pab, lossis tau neeg ntiajteb txais yuav, lossis ntshaw kom tau dhau los ua tus tswv rau lub neej raws li yus lub siab nyiam? Tsis paub koj puas npaj txhij tso yus txoj kev ntseeg rau ntawm Vajtswv, qhib siab thiab muab txhua yam tag nrho tso rau ntawm ntoo khaublig? Txhob siv zog ris ib leeg, muab txhua qhov teeb meem tso rau Leej Txiv ncaj ncees. Lub moj sab qhua qhuav qhawv hauv lub neej, tiamsis Tswv Yexus cog lus yuav nrog koj mus ua ke, tuav koj txhais kotaw kom ruaj txog hnub uas koj nkag mus rau hauv lub neej ib txhis.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.