Thaum uas sawv ntawm tej kev pob puas uas yog los ntawm yus qhov kev txiav txim siab, koj puas tau muaj zaum twg nug: “tsis paub Vajtswv puas tseem hlub ib tug neeg zoo li yus?” thaum ntsib tej uas yus ua puas tshuaj, hnov tub qaug rau tej kev txhaum vij puas ncig, ua rau peb tsuas xav khiav kom deb deb ntawm Vajtswv xub ntiag. Tiamsis Vajtswv tej lus ntuas peb tias txawm yog txhua yam ib ncig peb nws pob puas tas los, Vajtswv yeej tseem nrhiav ib daim zuj zus hauv peb lub neej, tiv thaiv peb los ntawm txoj kev hlub thiab pub rau peb muaj lub sijhawm rov qab pib dua.

Hnub no, yog hnub 07/07/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jordan Buntgen dhau ntawm Zaj kawm QUAJ NTSUAG RAU TEJ KEV TXHAUM

“Tus TSWV nyob ze cov neeg uas tas kev cia siab, nws cawm cov neeg uas tsis muaj chaw vamkhom. (Phau Ntawv Nkauj 34:18)

“Daviv hais tias, “Kuv tau ua txhaum rau tus Tswv lawm tiag.” Nathas teb hais tias, “Tus Tswv yuav zam txim rau koj, koj yuav tsis tuag. Tiamsis vim koj tau ua tej kev txhaum no saib tsis taus tus Tswv, koj tus menyuam yuav tuag.” Ces Nathas txawm rov mus tsev lawm Tus Tswv ua rau tus menyuam uas Uliyas tus pojniam yug rau Daviv ntawd mob hnyav heev. Daviv rau siab ntso thov Vajtswv kom tus tub ntawd zoo. Daviv tsis noj ib yam dabtsi li, thiab txhua hmo Daviv mus hauv nws chav pw, nws qhau cev pw hauv av ib hmos kaj ntug li xwb. Daviv cov nomtswv tu plaub ntug tuaj nplig Daviv siab kom nws sawv, tiamsis nws tsis kam sawv thiab tsis kam nrog lawv noj ib yam dabtsi li” (2 Xamuyees 12:13-17).

Zaj xwm hais txog Vajntxwv Daviv chwv txog kuv sab ntsujplig hauv kuv txoj kev nrog tus Tswv mus. Yawg ua ib lub neeg muaj lub siab tawv, nthuav tawm tej feem dub tshaj rau lub ntiajteb. Tas dhau ntawd, Vaj Ntsujplig siv tej ntawd los cob pab peb tus ntsujplig niaj hnub nim no. tiamsis tseeb tiag, yam uas ua rau kuv hnov kuv zoo li ntawd thiab muaj qhov kev sib txuas nrog tus vajntxwv no ho tsis yog tej uas kuv ua tau, tiamsis yog yawg tej kev txhaum uas yawg tau ua yuam kev.

Txoj kev rov qab nrhiav kev los cuag Leej Txiv saum ntuj pib hauv qhov av nkos kev txhaum, ib yam li vajntxwv Daviv thaum ub. Ntawm yawg, tus nqi yuav tua them rau yawg tej kev txhaum yog yawg tus menyuam mos. Tshuav kuv, tus nqi ntawd yog txoj kev pob puas hauv lub neej txij nkawm. Yeej tsis muaj ib txoj kev mob twg yuav mob tshaj thaum uas yus sawv ib leeg, tag kev cia siab ntsia cov kua muag ntws los dhau ntawm tej kev xaiv yuam kev, rhuav tshem tej uas yus cim civ ua.

Saib ib ncig, kuv tsis pom dabtsi dhau ntawm tej qhov txhab nyob hauv cov neeg uas hlub yus thiab sib raug zoo nrog yus. Txoj kev khuv xim tshwm tuaj thaum uas kuv tsis muaj hnub muaj pluas noj sov so ib ncig nrog tej txheeb ze lawm, tsis muaj tej kev hu xov tooj sib tham ntev ntev, thiab kuv tsis yog ib feem ntawm lub tsev sov so no ntxiv lawm.

Tomqab tej kev pob puas, kuv tsau tsawv rau hauv txoj kev mob, zom zaws tej kev mob uas yus cim civ ua. Kuv mob siab vim tej kev txiav txim siab yuam kev, khuv xim rau tej uas yus tau ua tas, thiab tu siab nrho saib lub neej puas ntsoog tamsim no uas tus kheej yuav tau ris. Kuv ntsib dhau tej hmo tsaus ntuj nti ntawm tus ntsujplig ntau txog qhov uas suav tsis txheeb. Nyob hauv tej hnub tsaus ntuj nti ntawd, kuv yeej nkag siab tsis tau Vajtswv lub siab hlub uas Vajtswv tseg rau kuv. Kuv yeej tsis paub tias tus cawm seej yeej ua siab ntev nres ntawd, tos kuv khaws tej daim txhais tawg tas hauv lub neej los tso rau ntawm Vajtswv xub ntiag, kom Vajtswv pab qhwv thiab kho zoo tej qhov txhab ntawd.

Txoj kev txaj muag cim civ txiav txim rau tus kheej vij puas ncig ua rau peb tsuas xav khiav nkaum Vajtswv. Tiamsis kuv tsis paub tias, kev txaj muag, kev txhaum thiab txoj kev khuv xim ntawm tus kheej yuav tau hloov los ntawm tej yam zoo hauv ib leej txiv tab tom khiav ceev heev los tos tus tub ua laib rov qab los. Kuv tsis paub qhov tob ntawm txoj kev pab tab tom tos yus nyob sab tom txoj kev mob ntawd.

“Tom qab ntawd, Daviv nplig Npasenpas uas yog nws tus pojniam siab. Daviv mus nrog Npasenpas pw, ces nws thiaj xeeb tub thiab yug tau ib tug tub, Daviv tis tus tub ntawd npe hu ua Xalumoos. Tus Tswv hlub tus tub no thiab hais rau Nathas tus uas cev Vajtswv lus kom mus tis tus tub ntawd npe hu ua Yedidiyas, rau qhov tus Tswv hlub nws heev” (2 Xamuyees 12:24-25).

Txawm yog tej kev txhaum uas yus ua tej paj txiv yeej tseem nyob ntawd los, Vajtswv tsis xaus Vajtswv lub homphiaj hauv Daviv lub neej. Vajtswv ua haujlwm hauv Vajtswv txoj kev hlub thiab kho zoo. Xalumoos lub neej yog qhov pov thawj ciaj sia rau lub hwjchim rov qab pib dua nyob hauv Daviv lub neej. Thiab Vajtswv ntau zaug tseem ua tej haujlwm loj dua nyob rau hauv Xalumoos tiam.

Thaum no, kuv lub neej tsis muaj dabtsi muab khi cia lossis ntaus nqi los ntawm tej yam yuam kev yav dhau los. Vajtswv tsis tso kuv tseg hauv tej kev mob lossis kev txaj muag. Vajtswv tab tom tswj kom pab peb dhau ntawm ib txoj kev cia siab hauv lub neej tshiab, ib yam li Vajtswv tau ua rau Vajntxwv Daviv thaum ub.

Txawm yog tej uas poob lawm yeej yuav nrhiav tsis tau rov qab los Vajtswv pub rau kuv muaj ib txoj kev cia siab thiab lub ntsiab tshiab mus ntxiv. Thaum no, kuv lub tsev me rov qab muaj tej ntsej muag tshiab zaum ntawm rooj noj, muaj suab luag, muaj kev zoo siab thiab sib txuas ua ke yog qhov khoom plig uas kuv yuav sib faib tau. Kuv lub xov tooj rov qab muaj neeg xa xov, hu thiab muaj duab – tej yam no ntuas kom kuv yuav tau paub saib taus, tau nkag siab thiab tau hlub. Ua ntej, kuv paub tias kuv tau txais rau hauv Vajtswv tsev neeg dawbhuv, tau pub lub neej tshiab ua Vajtswv menyuam, koom muaj ib qhov qub txeeg qub teg mus ib txhis.

Thov caw nrog kuv peb thov Vajtswv ua ke: Vajtswv yog tus siab ntev thiab puv npo lub siab hlub tshua. Kuv ua koj tsaug vim tau tuag saum ntoo khaublig rau kuv tej kev txhaum. Vajtswv! Kuv ntseeg koj! Kuv thov txais yuav txoj kev zam txim, kev hlub thiab lub siab hlub tshua uas koj tau txhiv kuv. Kuv txiav txim tsis cia kev txhaum ntaus nqi rau kuv lub neej ntxiv, tiamsis xaiv nrog Koj mus tas kuv lub siab. Vaj Ntsujplig, thov koj los kav lub neej, txhawb kuv tus ntsujplig thiab pab kom kuv ntsia pom koj nyob hauv tej ceg kaum hauv lub neej txhua hnub. Kuv cia siab tias kuv lub neej yuav yog qhov pom kev hauv qhov tsaus ntuj, muab txhua lub koob meej tso rau Leej Txiv saum ntuj! Ua Vajtswv tsaug tau cawm kuv txojsia thiab sau zaj xwm hauv kuv lub neej. Kuv thov hauv Tswv Yexus Khetos lub npe, Amees.

Cov kwv tij, tej paj txiv ntawm tej kev txhaum, tej uas peb xaiv yuam kev, tsis mloog Vajtswv lus. Tiamsis lub suab nyuaj suab, lossis ntu neej pob puas ntawd yeej tsis tau yog qhov kawg, thaum peb lub neej tau muab tso rau hauv Leej txiv saum ntuj txhais tes. Vajtswv yuav tsis cia koj tsau tsawv hauv qhov tsaus ntuj ntawm txoj kev tub qaug. Txhob cia tej kev txajmuag ntawd ua rau koj khiav deb Vajtswv ntxiv, cia li mus cuag Vajtswv lub sijhawm no los ntawm peb tej kev qaug zog. Cia siab tias tomqab lub sijhawm thov Vajtswv no, koj yuav muaj txaus lub siab tawv tso tej lub nra nyhav tseg thiab qhib siab los txais yuav Tswv Yexus cov ntshav cawmdim.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.