Muaj tej yam tsuas rau ntawm lub tsho, txawm tias yuav ntxhua ntau zaug lawm los yam tsuas ntawd yeej tsis ploj mus. Nyob rau ntawm sab ntsuj plig, txoj kev txhaum kuj zoo ib yam li cov tsuas uas tsuas rau ntawm lub tsho. Yog peb sij pheej nco ces haj yam ua rau peb hnov txaj muag thiab hnov tias peb tsis tsim nyog. muaj coob leej tau siv zog “ua kom huv” yus txoj kev txhaum los ntawm txoj hau kev hloov pauv, ua tes hauj lwm zoo los yog rov qab tsim txom yus tus kheej, tabsis hnov yam li txoj kev txhaum pheej sij nyob rau ntawd. Yog li ntawd puas muaj ib txoj kev zam txim twg li uas los daws tau txoj kev txhaum ntawd, thiab yuav los nrhuav tsem thiab ntxhuav huv si txhua yam kev phem kev qias nyob rau hauv peb lub neej ntawm sab ntsuj plig?

Hnub no, yog hnub 09/07/2026, peb kev thov Vaj Tswv Txhua Hnub Thov Caw koj los mloog thiab kawm Vaj Tswv Tsoj Lus ua ke dhau ntawm Ginny Dix muaj lub ntsiab KEV ZAM TXIM PUV NPHO

“Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus.” (I Giăng 1:9)

Zoo tiag tiag vim peb tau ntxuav cev kom huv si. Txawm yog yuav qias yuav khub npaum li cas los yog tau ntev los tsis tau ntxuav cev tsuas yog ob peb kauj ruam yooj yim xwb: Ib me ntsis tshuaj ntxuav plaub hau, tshuaj ntxuav cev thiab lub chaw muaj dej ces peb lub cev yuav rov qab huv si thiab tsw qab tshaj qhov qub.
Thaum uas peb ntxuav cev tas lawm, peb tsis tas nyuaj siab tias peb tau qias neeg npaum li cas lawm, kuj tsis tas yuav mus saib iav khawv khuav seb yus puas tau huv lawm los tsis tau. Tsuas yog yooj yim tias peb twb ntxuav cev huv lawm.

Zoo ib yam li ntawd, peb lub neej sab ntsuj plig los kuj zoo ib yam, yuav tsum tau dawb huv thiab tu kom huv si. Vaj Tswv Txoj Lus muab rau peb ib lo lus cog tseg meej heev nyob rau hauv I Yauhas 1:9 “Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus.”

Nqe Vaj Lug Kub ntawm no qhia tawm peb qhov tseem ceeb tshaj plaws. Thib ib, yuav tsum “lees tej kev txhaum”. Tsis yog yooj yim zoo li hais lo lus thov txim tiam sis yog txaus siab rau Vaj Tswv hais txog yus tej kev txhaum, lees txim thiab rov qab los cuag Vaj Tswv dua. Thib ob, lub hauv paus ntawm txoj kev zam txim yog nyob rau ntawm Vaj Tswv, uas yog Tus Tswv “ncaj ncees” thiab “ua raws li Nws tej lus cog tseg”. Ncaj ncees yog ua raws li tej lus cog tseg, tshuav ua raws li Nws tej lus cog tseg yog qhia tawm rau thaum uas Vaj Tswv zam txim rau peb dhau los ntawm Vaj Tswv Leej Tub tuag txhiv saum tus ntoo khaub lig. Thib peb, yog peb tau txais Vaj Tswv zam txim thiab ntxhuav kom peb “huv si txhua yam uas tsis ncaj ncees”, ntawd yog txoj kev zam txim tag nrho.

Txawm li ntawd los, tsis yog thaum twg los peb kuj hnov txog qhov ntawd. Ntau zaug peb tau tsaus tsawv rau hauv tej kev txhaum nyob rau lub neej qub qab, tias yus lub neej twb tau ua phem npaum li cas. Tej kev xav ntawd ntau zaug ua rau peb tsis paub tias peb tej kev txhaum uas tau ua puas tau Vaj Tswv zam los tsis tau.

Nyob rau hauv lub neej txhua hnub, muaj ntau qhov tsuas yooj yim ua kom huv, tabsis kuj ntau qhov tsuas yuav tsum dhau ntau kauj ruam thiaj li yuav huv tau. Kom yuav huv taus qhov tsuas ntawd, tej zaum peb yuav tau siv ntau yam tshuaj los mus ntxhua. Tiam sis muaj tej yam tsuas uas tib neeg tsis muaj peev xwm ua kom dawb huv zoo li qub. Qhov ntawd ua rau peb paub txog yam twg li uas tib neeg ua tsis tau ces Vaj Tswv muaj lub peev xwm hwjchim ua tau tag nrho. Muaj tej kev txhaum uas peb xav hais tias tej zaum Vaj Tswv zam txim tsis tau rau yus tus kheej tabsis Vajtswv kuj zam txim tau thiab. Yaxaya 1:18 sau tias: “Txawm yog nej tej kev txhaum yuav liab cuag ntshav los kuv yuav ua kom dawb paug li daus, txawm yog nej tej kev txhaum dub doog los kuv yuav ua kom dawb paug li tej plaub yaj.”

Peb pheej xav hais tias, peb yuav tsum tau ua ib yam dab tsi thiaj li txais tau txoj kev zam txim. Tabsis I Yauhas 1:9 qhia rau peb paub qhov tshwj xeeb tshaj plaws uas peb yuav tsum tau ua yog lees kev txhaum, tshuav kev zam txim yog nyob rau ntawm Vaj Tswv. Txoj kev zam txim tsis nyob rau ntawm peb qhov ua kev siv zog tabsis yog nyob rau hauv Tus Tswv Yexus tes haujlwm saum tus ntoo khaub lig.
Thaum uas Vaj Tswv Txoj Lus hais tias yuav nthuav kom peb huv “txhua yam ua tsis ncaj ncees” ces ntawd tsis yog kev zam txim ib feem xwb, tsis yog ib txhia kev txhaum tabsis yog tag nrho txhua txhia txoj kev txhaum. Txawm yog peb tus kheej tsis tau zam txim rov qab rau peb tus kheej lossis tab tom ntsib txhua yam kev phom sij uas yus tus kheej tes hauj lwm uas tau ua, los Vaj Tswv txoj kev zam txim yeej puv npho rau hauv koj lub neej.

Yog li ntawd, tsis txhob cia peb nyob rau hauv txoj kev txaj muag thiab xav tsis thoob, peb txhua tus tau caw los ntseeg ruaj khov rau ntawm Vaj tswv lo lus cog tseg. Thaum uas koj tau los lees tej kev txhaum thiab lees txim ces peb yuav sawv ruaj khov rau hauv qhov tseeb tias yus tus kheej twb tau Vaj Tswv zam txim thiab ntxhuav huv si lawm.

Thov caw nrog kuv peb thov Vajtswv ua ke: Leej Txiv Tus uas muaj kev hlub, nyuam yaus los rau ntawm Vaj Tswv Koj lub xub ntiag los ntawm lub siab mos muag thiab lees nyuam yaus tej kev txhaum rau Vajtswv Koj. Thov Vaj Tswv Koj zam lub txim rau nyuam yaus vim muaj ntau zaug, ntau txoj hau kev nyuam yaus tau ua txhaum rau Vaj Tswv Koj. Vaj Tswv aw! Nyuam yaus uas Vaj Tswv Koj tsaug vim txoj kev zam txim thiab muaj siab zoo hlub tshua txog nyuam yaus lub neej. Nyuam yau ntseeg tias Vaj Tswv Koj yog Tus Tswv ncaj ncees thiab ua raws li Koj tej lus cog tseg kom nyuam yaus tau txais kev zam txim thiab khiav dim ntawm txoj kev txhaum. Thov Vaj Tswv Koj pub kom nyuam yaus muaj lub siab tshiab thiab txoj kev xav thiab thov pab kom nyuam yuav xyaum ua lub neej dawb huv raws li Vaj Tswv Kojb lub siab nyiam. Nyuam yaus koom siab hauv Tus Tswv Yexus Khetos lub npe, Amees.

Tus phooj ywg, thaum uas lees txim rau Vaj Tswv, koj puas lees tiag tiag thiab txiav txim tig rov qab los rau ntawm Vaj Tswv los tsis tig lossis tsuas nres rau ntawm qhov uas hnov tias muaj lub siab yog paub li ntawd ces tsis ua lawm? Koj puas tau ntseeg ruaj khov txog Vaj Tswv txoj kev zam txim los tsis ntseeg lossis tseem tab tom ua neej rau hauv txoj kev txaj muag rau koj tej kev txhaum? Hnub no, cia li muab Vaj Tswv Txoj Lus los cog rau hauv koj lub siab lub ntsws tias Vaj Tswv tau ntxhuav koj dawb huv hauv txhua txoj kev txhaum lawm. Cia li xaiv thiab mus nyob rau hauv txoj kev ntseeg thiab ywj pheej hauv Tus Tswv Yexus Khetos tau muab pub rau koj. Ruaj siab khov kho ntseeg hais tias Vajtswv yog Tus Tswv Txhim Kho, muaj peev xwm hloov koj lub neej. Cia li thov Vaj Tswv ntxiv lug dag lub zog rau koj kom tsis txhob tsau tsawv thiab nyob rau hauv txoj kev txhaum, tabsis niaj hnub xyaum thiab ua raws lub neej dawb huv kom muaj lub neej haum Vaj Tswv siab nyiam.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.