Nyob hauv lub neej, peb ib txwm swm qhov uas siv zog kom tau txais yuav, kawm ntse kom tau qhuas, ua zoo kom thiaj tau meej mom siab, ua haujlwm pab ntau kom tau lees txais. Cuag li leej twg los twb xav kom lwm tus ntsia pom tej yam muaj nqis thiab yus tej kev siv zog. Nyob hauv lub neej ntseeg Vajtswv los kuj ib yam li ntawd, kub siab lug ua Vajtswv haujlwm yog yam uas yuav tau txhawb zog, tiamsis yog peb muab tej uas ua tau lossis tej lus qhuas tso ua ntej, ces ntawm no yog lub sijhawm uas peb hnov qab Vajtswv txoj kev hlub thiab pib vam khom rau tej haujlwm uas yus ua. Tsis paub peb tab tom siv zog ua haujlwm kom tau lees txais lossis txo hwjchim vam khom Vajtswv txoj kev hlub?

Hnub no, yog hnub 11/07/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm TXO HWJCHIM KOM TAU HWJCHIM

“Yexus hais tias, kuv qhia rau nej hais tias, thaum nkawd rov mus tsev lawm, tus sau se yog tus uas ua haum Vajtswv siab, tsis yog tus Falixais. Rau qhov tus uas khav hais tias, nws muaj hwjchim, tus ntawd yuav poob hwjchim, tiamsis tus uas txo hwjchim, tus ntawd yuav tau hwjchim.” (Lukas 18:14).

Ntau zaug peb cia li ntaus nqi rau lwm tus raws li tej uas yus ntsia pom. Thaum saib tej haujlwm lawv ua, peb yooj yyim ntaus nqi thiab faib cais yam yog thiab tsis yog hauv peb lub hlwb. Tus cwjpwm no nws tshwm los tsis muaj dabtsi thaiv txog qhov uas ntau zaug peb kuj tsis paub. Nyob rau ntau zaus, qhov uas ntaus nqi li ntawd nws muaj nqis pab kom peb xaiv tau kev yog, ntau zaug tseem pab kom peb zam tau tej yam uas tsis zoo.

Tiamsis yam dabtsi yuav tshwmsim tuaj yog tias peb coj tus cwjpwm no nyob hauv lub neej ntseeg?

Tsis paub peb puas tab tom ua peb lub neej ntseeg raws li hom “ntsuas” los tsis yog? Tej zaug peb pheej suav ntsoov rau qhov uas peb mus pehawm pes tsawg zaug, ua haujlwm pab pes tsawg sij, nyeem Vajluskub lossis thov Vajtswv hov ntev? Muaj tej lub sijhawm kuv ua haujlwm hauv Pawg Ntseeg cuag li siv tas hnub, ntau zaug tseem ua ntau txoj haujlwm rau ib hnub. Tiamsis yam uas nyuaj siab yog kuv xav tias “yus zoo dua” lwm tus vim tab tom ua ntau txoj haujlwm rau Vajtswv. Txawm kuv kev pab yuav ua rau Pawg Ntseeg muaj nqis, tiamsis kuv tus cwjpwm coj tsis yog. Vajluskub qhia tias peb tsis tau suav ncaj ncees los ntawm tej uas peb ua, tiamsis los ntawm Vajtswv txoj kev hlub thaum peb txo hwjchim ntawm Vajtswv xub ntiag.

Tswv Yexus hais meej txog lub siab no nyob hauv Lukas 18:9-14, Tswv Yexus tham:
“Muaj ib zaug ob tug txivneej mus thov Vajtswv hauv lub Tuamtsev: ib tug yog tus Falixais thiab ib tug yog tus sau se. “Tus Falixais sawv ntsug thiab nws thov hais tias, ‘Vajtswv, kuv ua koj tsaug, kuv zoo tsis thooj li lwm tus, kuv tsis ua neeg siab hlob, kuv yog neeg ncaj ncees, kuv tsis zes luag tej pojniam thiab kuv tsis zoo li tus sau se ntawd. Xya hnub twg kuv ua kevcai yoo mov ob zaug, thiab tej nyiaj uas kuv khwv tau los, kuv muab ib feem kaum rau koj. “Tiamsis tus sau se sawv nrug deb mentsis, nws tsis tsa qhovmuag saib saum ntuj, nws ntaus nws lub hauv siab thiab hais tias, ‘Vajtswv, kuv yog neeg txhaum, thov koj hlub kuv! ‘ Yexus hais tias, kuv qhia rau nej hais tias, thaum nkawd rov mus tsev lawm, tus sau se yog tus uas ua haum Vajtswv siab, tsis yog tus Falixais. Rau qhov tus uas khav hais tias, nws muaj hwjchim, tus ntawd yuav poob hwjchim, tiamsis tus uas txo hwjchim, tus ntawd yuav tau hwjchim.

Tus neeg Falixais nws tham txog tej haujlwm ua zoo ntawm Vajtswv xub ntiag. Yawg ua kevcai yoo mov ib thiv ob zaug. Yawg fij nyiaj ncaj ncees. Yawg hais tias yawg tsis ua phem zoo li tus neeg sau se ntawd. Cov neeg Falixais cov lus thov Vajtswv ntawd puv npo txoj kev khav theeb thiab sib piv.

Tiamsis tus sau se, muaj tus cwjpwm txawv. Yawg sawv deb deb, tseem tsis kam tsa muag ntsia saum ntuj, tsuas ntaus hauv siab nyuaj siab thiab tsa suab thov ib yam uas yooj yim: “Vajtswv, thov hlub kuv vim kuv yog neeg thaum!”

Txawm yog sab nraud, tus neeg Falixais no nws coj zoo thiab coj raws li tej kab lig kevcai ntseeg los, Tswv Yexus xaus lus tias tus neeg sau se thiaj yog tus uas tau suav tias ncaj ncees. Tswv Yexus hais tias: “Rau qhov tus uas khav hais tias, nws muaj hwjchim, tus ntawd yuav poob hwjchim, tiamsis tus uas txo hwjchim, tus ntawd yuav tau hwjchim”. Peb tus Vajtswv nws nyiaj txoj kev txo hwjchim thiab ntxub txoj kev khav theeb. Kev ncaj ncees tsis los ntawm tej kev ua zoo sab ntsujplig uas yus ua tau, tiamsis yog qhov uas tib neeg paub yus tej kev txhaum thiab thov Vajtswv hlub tshua.

Homphiaj ntawm txoj kev tswj sab ntsujplig yog rub kom peb nyob ze Vajtswv dua, tsis yog cia peb xav tias peb tsimnyog dua rau Vajtswv. Thaum peb pib tso siab rau tej uas peb ua ntau dua li tej uas Vajtswv ua rau peb ces tej zaug peb tab tom coj tus cwjpwm zoo li tus neeg Falixais uas peb tsis paub xwb.

Txawj kom twb ntseeg Vajtswv ntau xyoo lossis tsuas nyuam qhuav pib ntseeg xwb los, nco ntsoov tias kev txo hwjchim nws yuav yog lub qhov rooj coj peb mus muaj txoj kev sib raug zoo tob tob nrog Vajtswv. Thaum peb mus cuag Vajtswv los ntawm tus cwjpwm zoo li tus sau se: qhia tseeb yus lub neej thiab taij thov Vajtswv lub siab hlub tshua, ces ntawd yog lub sijhawm peb ncav cuag Vajtswv lub siab. thiab thaum uas peb txo hwjchim ntawd, Vajtswv yuav rub kom peb mus ze Vajtswv dua.

Thov caw nrog kuv peb thov Vajtswv ua ke: Tus Tswv, kuv los ntawm koj lub xub ntiag thiab lees tias kuv cheem tsum koj txoj kev hlub tshua. Thov Vajtswv zam txim vim muaj tej zaum kuv tau vam khom rau tej haujlwm kuv ua. Pauv qhov uas kuv ntseeg rau Vajtswv txoj kev hlub loj. Thov tshem txoj kev khav theeb tawm ntawm kuv mus, kom txhua zaus uas kuv los cuag koj kuv lub siab yog lub siab txo hwjchim mos muag tshaj. Kuv thov hauv Tswv Yexus Khetos lub npe, Amees.

Cov kwv tij txhua tus, puas muaj zaum twg koj tab tom muab yus lub neej sab ntsujplig piv rau lwm tus thiab pom tias yus zoo dua? Koj tab tom tso siab rau koj tej haujlwm ua, lossis Vajtswv txoj kev hlub? Hnub no yuav tau tshuaj koj lub siab thaum ua Vajtswv haujlwm, koj ua los ntawm txoj kev hlub pub rau Vajtswv lossis vim tus kheej? Thaum Vajtswv taw koj tej kev qaug zog thiab tej uas tseem ua tsis tau tau, cia li mus cuag Vajtswv lees txim thiab thov Vajtswv pub kom koj muaj lub siab txo hwjchim. Txhua zaug uas ua Vajtswv haujlwm, nco ntsoov tias lub koom meej tsis yog peb, tuas yog Vajtswv tib leeg xwb thiaj yog tus tsimnyog rau txhua lub koob meej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.