Muaj tej teeb meem hauv lub neej ua rau peb yeej hnov qab tsis tau. Tej zaug yog ib tug mob, ib qhov kev puas tshuaj lossis ib qhov kev sim siab uas peb xav tias yus yuav kov tsis yeej. Feem ntau, thaum peb tiv dhau tej ntawd, peb tsuas xav muab khaws tseg rau peb thiab ua lub neej mus ntxiv. Tiamsis ntau zaug, twb yog tej xwm txheej ntawd ho yog txoj kev uas Vajtswv siv los ua rau kom muaj kev cia siab rau lwm tus.

Hnub no, yog hnub 14/07/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dayna Lovelady dhau ntawm Zaj kawm TAU CAWM DIM MUS TSHAJ TAWM

“Koj cia li rov qab mus tsev thiab qhia tej uas Vajtswv pab koj lawm rau sawvdaws mloog.” (Lukas 8:39)

Muaj ib taig kis sawv ntxov nrog Vajtswv nyob ua ke, kuv nyeem Vajluskub hauv Lukas 8 thiab xav txog txoj kev uas Vajtswv kho mob thiab pab kuv yav dhau los.
Lukas 8:26-39 tham tias thaum Tswv Yexus mus txog rau ntawm Xixaleyas, muaj ib tug neeg raug dab tuaj ntsib Nws. Tus neeg no nyob tom roob toj ntxas, tsis hnav ris tsho thiab tsis muaj leej twg yuav tuav tau nws, txawm yog twb raug muab saw hlau khi ntau zaug. Thaum ntsia pom Tswv Yexus, cov dab cia li ntshai tshee nyo. Vajtswv sam hwm kom dab khiav tawm ntawm tus txiv neej thiab nkag mus rau hauv pab npua tab tom noj zaub saum roob. Tomqab ntawd, tag nrho pab npua thiaj khiav dhia tsua tuag tas.

Thaum cov pej xeem tuaj pom, lawv xav tsis thoob. Tus txiv neej vwm ntawd thaum no ho hnav ris tsho zoo, lub hlwb meej pem tab tom zaum ntawm Tswv Yexus ko taw. Tiamsis pauv qhov uas zoo siab, cov pej xeem lawv ho ntshai thiab thov kom Tswv Yexus tawm mus. Tshuav tus neeg uas tau tso dim ces xav nrog Tswv Yexus mus ua ke, tiamsis Tswv Yexus hais tias: “Koj cia li rov qab mus tsev thiab qhia tej uas Vajtswv pab koj lawm rau sawvdaws mloog.” (Lukas 8:39).

Tus neeg uas yav dhau los ua neej nyob hauv qhov tsaus ntuj, nyob tom toj ntxas thaum no ho tau Vajtswv pub rau ib lub homphiaj tshiab, dhau los ua ib tug pov thawj txog Vajtswv lub hwjchim.

Thaum xav txog qhov no, kuv nco txog tej kev txomnyem uas kuv tau ntsib dhau. Muaj tej lub sijhawm kuv ntsib kab mob kev nkeeg nrog lub cev ntaj ntsug tsis muaj zog. Tiamsis qhov mob loj dua yog thaum kuv yuav tau ncaim ntau tus neeg txheeb ze hauv tsev neeg mus ib ntus luv luv.

Tiamsis nyob hauv txhua lub caijnyoog ntawd, Tswv Yexus yeej tseem yog kuv qhov chaw pheeb ruaj khov. Nws kho kuv txhua hnub thiab ntxiv zog rau kuv kom kuv nrog nws mus. peb pheej xav txog txoj kev kho zoo ntawm sab nqaij tawv ntau dua li kev xav, tiamsis qhov kev kho zoo loj tshaj yog thaum Tswv Yexus tuav peb tus ntsujplig nyob ze nws ntawm tej lub caijnyoog muaj kev nyuaj siab, peb muaj cov lus pov thawj txog ib tug cawm seej muaj lub siab hlub tshua thiab ncaj ncees.

Tus neeg uas tau cawm dim ntawm dab tau raug txib mus ua tim khawv txog Tswv Yexus. Yawg mloog lus thiab mus rau txhua qhov qhia txog yam loj uas Tswv Yexus tau ua rau yus. Yawg txoj kev tau tso dim yuav tau mus coj lwm tus los cuag Tswv Yexus.

Hnub no, tej zaug Vajtswv twb pab koj kov yeej ib txoj kev sib raug zoo puas tshuaj, ib ntu sijhawm sib tawm tsam nrog kev txhaum, lossis ib qhov kev sim siab uas koj xav tias yus yuav kov tsis yeej. Tej ntawd yeej tsis yog tias tsis muaj nqis. Vim Vajtswv muaj cuab kav siv tej kev mob hauv koj lub neej los ua ib lo lus pov thawj coj txoj kev cia siab mus rau lwm tus. Yeej yog raws li tej uas Paulus tau sau nyob hauv tsab ntawv 2 Kauleethaus 1:4 “Nws txhawb peb lub zog thaum peb raug txhua yam kev nyuaj siab, kom peb thiaj txhawb tau lwm tus lub zog thaum lawv raug tej kev nyuaj siab; peb txhawb lwm tus lub zog ib yam li Vajtswv twb txhawb peb lub zog lawm”

Thov caw nrog kuv peb thov Vajtswv ua ke: Tus Tswv, kuv qhuas Koj vim koj yog tus kho zoo thiab pab kuv tej kev pob puas thiab kuv tej mob nkeeg. Thov pab kom kuv nco txog txhua zaug uas koj tau tso kuv tawm hauv kev sim siab thiab lub caijnyoog tsis zoo los. Kuv ntseeg tisa Koj yuav siv tej ntawd kom kuv coj mus pab lwm tus. Thov pab kom kuv muaj lub siab tawv qhia Txojmoo Zoo nrog koj tej lus muaj hwjchim saum kuv lub neej. Kuv thov hauv Tswv Yexus Khetos lub npe, Amees.

Cov kwv tij txhua tus, puas yog Vajtswv kuj tab tom siv koj zaj xwm los txhawb ib tug twg ntawd lub neej? Yog tias Vajtswv twb ua tej yam loj loj ntawd rau koj lawm, yam dabtsi tab tom ua rau kom koj nyob ntsiag to? Hnub no yuav tau tseg sijhawm los nco txog lub sijhawm txomnyem uas Vajtswv tau coj koj dhau, thiab ua Vajtswv tsaug txog Vajtswv txoj kev ncaj ncees nyob rau txhua lub caijnyoog. Nyob hauv thiv no, cia li tham rau tsawg kawg yog ib tug txog ib yam uas Vajtswv twb ua rau koj lawm. Txhob muab yus tej kev tu siab zais cia, tiamsis thov Vajtswv pub kom muaj kev txawj ntse siv koj zaj xwm los txhawb lwm tus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.