Nyob hauv lub neej, tej kevcai tau tsim los coj kom lub ntiajteb nyob tug thiab thaj yeeb. Kuj ib yam nkaus li ntawd, nyob ntawm cov ntseeg, Vajtswv txoj lus yog lub hauv paus coj peb kev mus ua lub neej haum Vajtswv siab. Tiamsis, muaj tej zaug peb ho tsom ntsoov rau tej kev cai sab nraum ua rau peb hnov qab yam uas haum Vajtswv lub siab tiag tiag lawm. Thaum peb tuav tej kevcai kom zoo tiamsis tsis mus nrog kev hlub thiab kev khuvleej, ua rau tej haum phiaj uas tau tsim los kom coj txoj koob hmoov los rau peb ho dhau mus ua ib lub nra nyhav rau peb tug kheej thiab rau lwm tus.

Hnub no yog hub 10/08/2026, Kev thov Vajtswv txhua hnub thov caw peb ib tsoom sawv daws nrog tus sau Dinna Sleiman kawm txog zaj kawm: KEVCAI THIAB KEV KHUVLEEJ

Yexus hais rau lawv hais tias, “Hnub Xanpataus, yog nej leejtwg muaj ib tug menyuam lossis ib tug nyuj mus poob rau hauv qhovtshij lawm, txawm yog hnub ntawd yog Hnub Xanpataus los nej yeej yuav mus muab nrawm nroos xwb los sav?” (Luka 14:5)

Ze los no, kuv hnov zoo siab heev thaum tau muaj ib tug menyuam xeeb thib peb. Kuv nyiam siv sijhawm los nrog cov menyuam xeeb ua si ua ke. Peb koom sib nce ntaiv, ncaws pob, muab av puab tej tus tsiaj me.

Tiamsis muaj ib yam uas kuv tsis nyiam. Ntawd yog thaum kuv tug tub xeeb tsib xyoo piav nws cov khoom ua si, tiamsis mentsis xwb nws twb rov tsim dua lwm txoj cai tshiab, tiamsis txoj cai tsuas yog ua zoo rau nws xwb, yog pab kom nws kov yeej.

Qhov ntawd ua rau kuv nco txog cov thawjcoj kev ntseeg nyob rau Tswv Yexus tiam. Lawv txhab ntxiv tej kev cai uas yog lawv cim civ tsim rau hauv Vajtswv tej kev cai. Lawv ntseeg tias tej kev cai ntawd yuav pab lawv pov hwm Vajtswv txoj kev cai. Tiamsis, sijhawm dhau mus, lawv muab tej kevcai ntawd tso siab npaug luag lossis tseem siab dua Vajtswv tej kevcai lawm thiab. Vajluskub sau: Muaj ib hnub uas yog Hnub Xanpataus, Yexus mus noj mov hauv cov Falixais ib tug thawj lub tsev; muaj neeg saib ntsoov Yexus. Muaj ib tug txivneej tes taw phobvog los cuag Yexus, Yexus nug cov xibhwb uas qhia Vajtswv txoj Kevcai thiab cov Falixais hais tias, “Peb txoj kevcai puas pub peb kho mob Hnub Xanpataus los tsis pub?” Tiamsis lawv tsis teb li. Yexus tuav nkaus tus txivneej ntawd, Yexus kho nws tus mob zoo thiab kom nws mus tsev lawm. 5Yexus hais rau lawv hais tias, “Hnub Xanpataus, yog nej leejtwg muaj ib tug menyuam lossis ib tug nyuj mus poob rau hauv qhovtshij lawm, txawm yog hnub ntawd yog Hnub Xanpataus los nej yeej yuav mus muab nrawm nroos xwb los sav?” 6Lawv teb tsis taus Yexus lo lus ntawd li. (Luka 14:1-6)

Cov neeg Falixais muaj ntau li ntau kevcai txog hnub Xanpataus. Feem ntau cov kevcai no tsis tau sau nyob rau hauv Mauxes kevcai, tiamsis yog tej kevcai sau dhau keebkwm los. Lawv ntseeg tias tej kevcai uas tib neeg tsim muaj dhau keeb kwm los li no yuav pab txhawb Vajtswv txoj kev cai. Tiamsis dhau sijhawm mus zuj zug, tej kevcai no cia zoo li txoj hlua ntsuas tib neeg lub siab rau ntawm Vajtswv txoj kevcai lawm. Twb yog ua li no thiaj ua rau cov lawv hnov qab lub haum phiaj tseem ceeb tshaj ntawm Vajtswv txoj kevcai, ntawd yog qhia tawm Vajtswv lub siab hlub.

Hnub xanpataus tau Vajtswv tsim los kom tib neeg muaj hnub so thiab nrog Vajtswv sib raug zoo. Tiamsis, tej kevcai uas tib neeg tsim los ua rau hnub xanpataus yog ib lub nra nyhav. twb yog vim li no lawv thiaj tsis lees paub Tswv Yexus yog Vajtswv leejtub. Txawm tias tus Tswv twb ua tiav tej lus uas cov cev lus hais, tiamsis lawv yeej tsis lees tias Tswv Yexus yog Tus Mexiyas – yog Tus uas tagnrho Vajluskub puav leej ua tim khawv txog.

No kuj yog ib lo lus ntuas tsim dheev rau peb hnub no. Qee zaug, peb kuj cia tej kevcai hauv ntiajteb nyob siab dua thiab tseemceeb dua Vajtswv txojlus lawm. Tej uas tau tsim muaj los pab kom peb tsav mus nyob ze Vajtswv dua ho dhau los ua qhov kev tav peb ntsia tsis pom Vajtswv lub siab.

Thaum Vajtswv nug cov Falixais: “Hnub Xanpataus, yog nej leejtwg muaj ib tug menyuam lossis ib tug nyuj mus poob rau hauv qhovtshij lawm, txawm yog hnub ntawd yog Hnub Xanpataus los nej yeej yuav mus muab nrawm nroos xwb los sav?” twb yog Tswv Yexus tabtom ntuas lawv txog lub haum phiaj tiag ntawm hnub Xanpataus. Yog cov Falixais ua siab cawm lawv tug tub lossis tug tsiaj nyob rau hnub Xanpataus, ces qhov uas kho zoo ib tug neeg tabtom txomnyem yeej tsis muaj dabtsi txhaum li, tiamsis tseem haum Vajtswv lub siab nyiam dua thiab. Tswv Yexus qhia tawm lub ntsiab tias kev khuvleej yeej tsis tawm tsam kev mloog Vajtswv lus hlo li, tiamsis nws tseem ua yog Vajtswv lub siab nyiam.

Nyob thooj ib lub sijhawm, Tswv Yexus kuj hais li no ““Nej cov uas sab sab vim ris nra hnyav, nej cia li los cuag kuv, kuv yuav cia nej so. Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so. Tus quab uas kuv muab rau nej kwv yoojyim kwv, thiab lub nra uas kuv muab rau nej ris, lub ntawd tsis hnyav.” Mathais 11:28-30
Tswv Yexus los hauv lub ntiajteb no tsis yog los rhuav tshem Vajtswv txoj kevcai tiamsis yog los ua tiav. Tus Tswv kuj tso peb dim ntawm tib neeg tej kevcai yuam kev hauv ntiajteb. Nws xav kom peb tsav los ze Nws ntawm lub siab hlub tiag tiag. Tsis yog tsuas coj tej kevcai sab nraum.

Yuav tsum rau siab ntso kawm Vajtswv txojlus thiab thov Vajtswv ci rau peb kom Vajtswv txoj lus kho peb sab kev ntseeg thiab peb lub neej ruaj khov. Thaum ntawd, koj yuav sab tau kev ywj pheej ntawm tug neeg nyob hauv qhov tseeb. Txoj kev ywjpheej ntawd yuav coj koj mus rau qib uas mloog lus thiab ci tawm Vajtswv lub siab khuvleej hauv koj lub neej txhua hnub.

Thov caw nrog kuv peb thov Vajtswv ua ke: Tus Tswv, thov Koj zam txim vim muaj tej zaug kuv tsav los cuag Koj los ntawm tej kevcai sab nraum tsis muaj lub siab hlub thiab mloog Koj lus tiag tiag. Thaum kuv nyeem Koj txoj lus, thov kom cov Lus ntawd ntuas kuv, pab kom kuv paub ua neej sib hlub thiab qhia tawm lub siab khuvleej ib yam li Koj. Tus Tswv kuv tsis xav ua lub siab tawv tabmeeg ntawm Koj txoj lus, tiamsis thov Koj pab kom kuv paub mloog lus, qhia tawm lub siab hlub hauv txhua yam uas kuv hais thiab ua. Kuv taij thov txhua lo lus no los ntawm Tswv Yexus Khetos lub npe, Amees.

Ib tsoom phoojywg sawvdaws, Vajtswv txojlus hnub no nqua hu peb los tshuaj xyuas peb lub lub siab. puas muaj thaum twg peb muab ntiajteb tej kevcai, tej kev swm coj noj coj ua, lossis peb tug kheej txoj kev xav tso siab dua Vajtswv txojlus lawm los tsis tau? Puas muaj ib zaug twg peb rau siab rau tej kevcai sab nrau tiamsis ho hnov qab lub siab khuvleej uas Vajtswv xav tau? Yuav tsum cia Vajtswv txojlus kho peb tsim peb sab kev ntseeg thiab lub neej. Thaum peb ua lub siab txo hwjchim tsav los ze Vajtswv txojlus, Txojlus ntawd yuav tsis ua kom peb dhau mus ua tus neeg khav theeb lossis siab tawv, tiamsis yog hloov pauv peb yim zoo li Khetos dua, paub mloog hwm Qhov Tseeb thiab thib ib yog muaj lub siab khuvleej ib yam li Yexus Khetos twb tau muaj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.