Txawm yog paub tias lub neej no yeej puv npo tej xwm txheej thiab kev sim siab los, peb yeej khiav tsis dhau qhov kev txhawj yuav ntsib tej ntawd. Kab mob kev nkeeg, kev sib tsoo, tsis muaj haujlwm ua thiab tej xwm txheej tshwmsim tamsim ua rau peb tsis paub yuav ua li cas ntxiv. Lub homphiaj ntawm tej kev txomnyem no tshwmsim hauv peb lub neej ntseeg Vajtswv yog dabtsi? Kom muab peb tsuj hauv pem teb, lossis cob kom peb loj hlob dua hauv kev ntseeg? Ua Vajtswv tsaug vim peb muaj cuab kav yuav nrhiav tau lo lus teb ntawm tus Tswv yug zoo, tus tab tom nrog peb mus ua ke txawm yog peb mus dhau hauv lub “tiaj nras kev tuag”.

Hnub no, yog hnub 07/08/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Linda Vulcano dhau ntawm Zaj kawm HAUV HAV TUAG TXAUS NTUJ NTI

“Tus Tswv, txawm yog kuv taug txojkev uas tsaus ntuj nti los kuv tsis ntshai dabtsi, rau qhov koj nrog nraim kuv. Koj tus pas thiab tus cwj nrig tsomkwm kuv” (Ntawv Nkauj 23:4)

Tsis ntev los no, kuv mus koom ib lub rooj kawm Vajluskub txog Ntawv Nkauj 23. Tej zaug tag nrho peb puav leej swm nqe thawj hauv tshooj Ntawv Nkauj no: “Tus Tswv yog tus tsomkwm kuv”. Puag thaum ub los txog tamsim no, txhua zaus uas nyeem nqe Vajluskub ntawd, kuv yeej ib txwm xav txog ib tug neeg yug yaj muaj kev hlub, rau siab ntso rau nws pab yaj. Tiamsis nyob rau hauv zaj kawm hnub ntawd, kuv paub ntxiv tias thaum tsaus ntuj, tus yug yaj nws yuav pw ntawm qhov rooj zov nws pab yaj, kom tsis pub muaj yeebncuab thiab tsiaj qus los tom.

Ntawv Nkauj 23:4 sau: “Tus Tswv, txawm yog kuv taug txojkev uas tsaus ntuj nti los kuv tsis ntshai dabtsi, rau qhov koj nrog nraim kuv. Koj tus pas thiab tus cwj nrig tsomkwm kuv” nqe Vajluskub no tsis hais tias tus ntseeg Vajtswv yuav tsis muaj hnub ntsib kev phomsij lossis teeb meem. Tiamsis Vajtswv qhia rau peb paub tias muaj tej lub sijhawm peb yuav mus dhau “lub tiaj nras kev tuag”. Nyob ntawm Daviv, “Tiaj nras kev tuag” uas yawg ntsib tej zaum yog tej hnub yawg raug yeebncuab caum, yawg txojsia raug hem. Tshuav peb niaj hnub nim no, “tiaj nras kev tuag” tej zaum yog kab mob kev nkeeg, kev puas tshuaj, teeb meem, muaj tsis txaus, lossis ib yam twg uas ua rau peb ntshai thiab tsis paub yam dabtsi tab tom tos peb tom hauv ntej.

Vajluskub tsis hais tias Vajtswv yuav coj yawg tawm hauv “tiaj nras kev tuag”, tiamsis yawg hais tias: “Kuv yuav tsis ntshai ib yam dabtsi, vim Vajtswv nrog nraim kuv.” Dhau ntawd, peb txais tau kev kaj siab ntawm tus neeg ntseeg Vajtswv los ntawm tus yug yaj zoo kev tshwm ntsej muag. Thaum peb ntseeg tias Vajtswv yuav tsis muaj hnub tso peb tseg, ces peb yuav mus rau tom ntej, txawm yog txoj kev tamsim nws phem thiab mus nyuaj los thaum peb mus dhau lub tiaj nras kev tuag thiab teeb meem, peb thiaj kawm tau Vajtswv txoj kev ncaj ncees, Vajtswv lub hwjchim thiab Vajtswv txoj kev hlub tob li cas thiab nws tseeb li cas.

Thaum uas ua tib zoo mloog tus qhia nws qhia txog Ntawv Nkauj 23, kuv nco txog muaj ntau zaug Vajtswv tiv thaiv kuv, thiab kuv pib lees txais txhua zaum ntawd. Tsuas tau ib pliag xwb, kuv nco txog muaj kaum zaus, thiab tseem yuav muaj ntau ntxiv. Nyob hauv txhua zaum ntawd, muaj ib zaum ua rau kuv nco ntsoov tsis hnov qab.

Hnub ntawd, kuv npaj tsav tsheb coj ib pab tub hluas mus koom Pawg Ntseeg kev pehawm. Thaum kuv hliv roj, kuv cia li muaj ib qhov kev tshoov hauv siab tias kuv yuav tau thov Vajtswv tiv thaiv kuv txoj kev mus. Xav txog cov hluas uas kuv yuav thauj mus rau hmo ntawd, kuv taij thov Vajtswv tiv thaiv peb.

Hmo ntawd, thaum peb tab tom mus yuav txog, kuv ntsia pom muaj ib tug pas txhos ntawm kev raws txoj kev. Vim tsis muaj teeb txoj kev nws tsaus ntuj heev. Xwb tim cia li muaj ib lub tsheb khiav txiav kiag kuv taub hau tsheb. Txhua yam tshwmsim sai dhau heev, ua rau kuv tsuj feeb tsis yeej. Lub tsheb ntawd khiav ti kuv lub heev txog qhov uas kuv xav tias ntshai ob lub tsheb yuav sib txhuam.

Txog rau tamsim no, kuv yeej tseem tsis kam xav txog tej xwm tau tshwmsim rau hnub ntawd yog kuv lub tsheb tsoo kiag lub tsheb ntawd thaum khiav ceev heev li ntawd. Txhua zaug nco txog, kuv lub siab yeej nco ntsoov Vajtswv tshav ntuj.
Ntau xyoo tom qab, kuv thiaj tau nug Vajtswv vim li cas Vajtswv ho tshoov kuv siab kom kuv thov Vajtswv rau txoj kev yuav mus hmo ntawd. Nws tsuas tiv thaiv peb xwb twb tau lawm” tas kuv nkag siab tias yog tsis thov Vajtswv, tej zaum kuv yuav xav tias kuv hmoov zoo, tas cia li hnov qab Vajtswv txoj kev tiv thaiv. Twb yog lub sijhawm txomnyem ntawd, Vajtswv qhia kuv paub vam khom Vajtswv thiab ua rau kuv pom txog Vajtswv txoj kev ncaj ncees dhau ntawm kev thov Vajtswv. Qhov no tsis tau txhais tias peb yuav zam dhau txhua qhov teeb meem, tiamsis ntuas kom peb nco ntsoov tias Vajtswv nrog nraim Vajtswv cov menyuam txawm yog lub caijnyoog yuav zoo li cas.

Kuv nco muaj ib zaug kuv tus xibhwb nws tham txog lub sijhawm uas nws tus ntxhais ua tsheb loj sib tsoo. Yawg hais tias, yog tau, yawg yuav ua txhua yam kom cawm tau yawg tus ntxhais. Thaum xav txog qhov no, kuv cia li xav txog ib leej txiv hauv ntiajteb nws tseem hlub nws tej menyuam li ntawd, ces Vajtswv txoj kev hlub tseg rau peb yuav loj npaum cas.

Ntawv Nkauj 23 ntuas kom peb nco ntsoov tias tus Yug yaj yuav tshwm los cuag peb ntawm qhov chaw muaj zaub mos nyoos thiab hauv qhov chaw “tiaj nras kev tuag” tib si. Tus ntseeg Vajtswv lub neej yeej yuav khiav tsis dhau tej kev sim siab lossis kev phomsij, tiamsis peb muaj ib lo lus cog tseg tias Vajtswv yuav tsis tso peb tseg. Tsuas yog paub tus yug yaj tab tom nrog peb nyob xwb, peb yuav muaj kev kaj siab mus ntxiv.

Thov caw nrog kuv peb thov Vajtswv ua ke: Tus Tswv yog kuv tus Tswv yug yaj zoo. Kuv ua koj tsaug vim muaj tej lub sijhawm koj coj kuv mus rau ntawm thaj chaw muaj zaub mos nyoos, muaj dej haus txias zias, tiamsis kuj muaj tej lub sijhawm kuv yuav mus rau ntawm tej lub tiaj nrag sim siab thiab teeb meem. Thov zam txim rau kuv vim muaj tej lub sijhawm kuv hnov qab koj kev tshwm ntsej muag nyob hauv tej qhov chaw tsaus ntuj ntawd. Tus Tswv thov qhia rau kuv paub ntseeg siab rau Vajtswv ua tus coj. Kuv ntseeg tias nyob hauv tiaj nras kev tuag hauv lub neej, koj tsis tso kuv tseg, tiamsis pab kom kuv paub txog koj tob dua. Kuv thov hauv Tswv Yexus Khetos lub npe, Amees.

Cov kwv tij txhua tus, thaum ntsib lub “tiaj nras kev tuag” hauv lub neej, peb xav kom tej kev txomnyem ntawd dhau mus sai sai, tiamsis tej zaum yam uas Vajtswv xav ntuas peb yog ua ntej yog Vajtswv txoj kev tshwm ntsej muag. Hnub no, cia li suav tej koob hmoov uas Vajtswv pub rau koj, nrog rau txhua zaus uas Vajtswv puag koj cia thiab cawm koj dim ntawm tej “tiaj nras kev tuag”. Yog tias lub sijhawm no koj tab tom mus hauv “tiaj nras kev tuag” cia Vajtswv tej lus ua rau kom koj muaj lub siab tshiab thiab txhawb koj lub zog. Yuav tau thov Vajtswv, ntseeg siab thiab mus ntxiv, vim tus yug yaj tab tom nrog koj nyob ntawm txhua txua kev hauv koj lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.