Muaj tej lub qhov txhab yav dhau los mob heev tsuas chwv me me xwb kuj txaus ua rau peb ib ce tshee nyo. Twb muaj ntau zaug koj tsau tsawv rau tej kev yuam kev qub, pheej cuam tshuam koj txog tej hnub yuam kev dhau los? Koj thiab kuv yooj yim hnov qab tias, peb tus kheej kuj tsis tau ntaus nqi los ntawm tej kev txhaum qub, tiamsis yog los ntawm tus cawm peb txoj kev hlub. Txawm yog peb twb mus txog deb qhov twg los, nws yeej sawv ntawd, hu peb rov qab los cuag Nws.

Hnub no, yog hnub 08/08/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Carolyn Fraiser dhau ntawm Zaj kawm TAU CAWMDIM LOS NTAWM KEV HLUB

“Nej tsis txhob ntshai, kuv yuav cawm kom nej dim. Kuv twb tuav nej npe hu nej lawm, vim nej yog kuv haivneeg” (Yaxayas 43:1)

Thaum tab tom txhos caug hauv Vajtswv txoj kev tshwm ntsej muag, kuv cia li quaj, tej kua muag cia li ntws los zoo yam li tau muab npog cia ntev heev los lawm. Tomqab ntau xyoo siv zog tswj txhua yam, thaum kawg kuv kuj pom tias txoj kev uas kuv xaiv tau coj kuv mus rau ntawm txoj kev tws. Kuv txiav txim tso tes, mloog Tswv Yexus txxoj kev hlub. Tiamsis, txoj kev txaj muag rau tej kev txhaum pheej vij puas ncig kuv. Kuv tau yuam kev, ua siab tawv, ntau zaug tseem ua xyem xyav rau Vajtswv txoj kev hlub, tas muaj ntau zaug chim thiab cem Vajtswv.

Kuv ceeb tas thaum rov qab nco txog tej zaj kawm Vajluskub thaum tseem yau. Kuv pom tias kuv yog ib tug neeg puas tshuaj thaum tau ua poob ntau xyoo ua neej nrog txoj kev tawm tsam. Hauv kuv lub siab thaum ntawd, tej zaum Vajtswv yuav tag kev cia siab heev rau kuv, tshuav kuv ces zoo li tsis pom kev tsis paub yuav ua li cas thiaj cawm tau. Kuv pom kuv yog ib tug neeg puas tshuaj. Tsis paub Vajtswv puas yuav rov qab txais kuv los nyob hauv Vajtswv lub tsev dua? Tsis paub Vajtswv puas tseem yuav siv ib tug neeg txhaum zoo li kuv? Kuv lub siab thiab kuv txoj kev sib raug zoo ua ke nrog, cheem tsum kev kho zoo tob heev.

Muaj ib hnub, kuv nyeem pom ntu Vajluskub tau hloov pauv kuv txoj kev xav txog Vajtswv txoj kev cawmdim: ‘Nws… ccawm kuv dim vim Nws nyiam kuv.” (Ntawv Nkauj 18:19).

Thaum pib, kuv lub hlwb puv npo tej uas yuam kev ua rau kuv ntseeg nyuaj heev rau tus Tsim ib puas tsav yam uas muaj hwjchim ho “nyiam kuv” ib tug neeg txhaum zoo li kuv. Tiamsis, Vaj Ntsujplig tau ci rau kuv pom txog qhov tseeb no: Vajtswv txoj kev hlub tsis yog qhov nqi zog pub rau kuv tom qab tau txais kev cawmdim, lossis thaum kuv pib kub siab lug ua Vajtswv haujlwm. Nws cawm kuv dim, tsuas yog vim Nws nyiam kuv. Tsis muaj ib qhov kev siv zog twg yuav yuav tau txoj kev hlub ntawd, vim Vajtswv txoj kev hlub ib txwm muaj nyob puag thaum pib los lawm. Twb yog qhov tseeb no thiaj qhib lub qhov rooj tiag tiag rau kuv tus ntsujplig.

Paulus rov qab lees txog qhov tseeb no nyob hauv Loos 5:8: “Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb”. Vajtswv hlub koj thiab hlub kuv kiag ntawm qhov chaw peb tab tom sawv, ntawm lub neej peb tab tom ua tamsim. Paub tias, Vajtswv hu peb txhua tus nrog Nws mus thiab paub Nws zoo, tiamsis ntawd yog txua kev cia kom peb lub siab hlub Vajtswv dhau los mus tob dua. Tshuav Vajtswv txoj kev hlub pub rau peb yeej ib txwm nyob ntawm ntu uas zoo kawg nkaus lawm, thiab qhov no yeej yuav tsis hloov pauv.

Tshooj 43 hauv phau Yaxayas zoo li “ib tsab ntawv kev hlub” uas Vajtswv xa rau cov neeg Yixalayees thaum ub, thiab kuj xa rau peb txhua tus – cov neeg uas tab tom nrog tus Tswv Yexus mus hnub no. Ntawd yog cov lus cog tseg ruaj khov txog Vajtswv txoj kev tshwm ntsej muag thiab tiv thaiv peb lub neej, txawm yog thaum no peb tab tom ntsib nthwv cua loj npaum twg.

“Thaum nej hla tej dej tob, kuv yuav nrog nraim nej lossis nej mus hauv dej, dej yuav tsis tshoob nej. Thaum nej mus hauv cov nplaim hluavtaws, hluavtaws yuav tsis kub nej; txojkev sim siab no yuav txov tsis tau nej. Rau qhov kuv yog tus Tswv uas yog nej tus Vajtswv. Kuv yog cov Yixalayees tus Vajtswv dawbhuv uas cawm kom nej dim. Kuv muab cov Iziv los ua nqi txhiv nej, muab cov Sudas thiab cov X en pas los pauv nej” (Yaxayas 43:2-3).

Vajtswv yuav tsis tso peb tseg. Tej zaum peb yuam kev, tej zaum peb yuav ntog. Peb txoj kev ntseeg yoj yees, peb lub siab ntau zaug npau taws, tiamsis Vajtswv txoj kev hlub tseg rau peb tsis tau muaj ib zaum twg yaj, vim peb yeej yog qhov khoom muaj nqis hauv Vajtswv lub qhov muag. Ntawd yog tej lus cog tseg ruaj khov uas peb ntseeg siab tau.

Thov caw nrog kuv peb thov Vajtswv ua ke: Tus Tswv, kuv ua koj tsaug rau koj txoj kev hlub tsis muaj hnub ploj. Thov pab kom kuv paub txais yuav txoj kev hlub ntawd, nkag siab tias kuv tau Vajtswv saib muaj nqis heev. Kuv tsis tas yuav siv zog kom kuv tsimnyog rau Vajtswv txoj kev hlub, thiab kuj tsis muaj ib yam dabtsi yuav cais tau kuv tawm ntawm txoj kev hlub ntawd. Thov kom kuv lub neej nthuav tawm txoj kev hlub no mus rau cov neeg uas kuv ntsib hauv txoj kev ua neej. Kuv thov hauv Tswv Yexus Khetos lub npe, Amees.

Cov kwv tij txhua tus, thov pab kom kuv nco txog qhov tseeb no: Vajtswv hlub koj vim koj yog Vajtswv tus menyuam. Txhua zaug uas koj ntog yeej ntaus nqi tsis tau rau koj tus kheej, thiab kuj ua tsis tau rau kom Vajtswv txoj kev hlub pub rau koj yuav tsawg mus. yog li txhob cim civ tsimtxom tus kheej. Qhib siab los txais yuav Vajtswv txoj kev hlub, cia Vajtswv kho zoo koj lub siab. Vajtswv txoj kev zam txim loj dua tej yam yuam kev uas koj tau ua, thiab tej qhov txhab qub ntawd yuav dhau los ua pov thawj rau lub neej tshiab hauv txoj kev hlub.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.