Thaum uas saib lub hauv paus ntoo do dus, tomqab muaj cua daj cua dub ntsawj dhau, tib neeg yuav xav tias txhua yam xaus lawm. Thaum ntsib tej teeb meem puas tshuaj, lossis tej uas yus khwv tau los cia li ploj tas, peb lub siab yooj yim yoj yees thiab xav tias txhua yam tas li lawm. Tiamsis tej uas Vajtswv ntsia pom nws txawv peb. Ntawm qhov chaw uas peb xav tias muaj tsob ntoo tuag ntawd, ces Vajtswv lub qhov muag ntsia pom muaj ib tug kaus pib tuaj nws muaj lub neej tshiab tos ntsoov.

Hnub no, yog hnub 11/08/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Paula L. Stansbury dhau ntawm Zaj kawm ZAJ XWM HAIS TXOG TSOB NTOO RAUG NTOV

“Thiab lawv yuav zoo ib yam li tej ntoo qhib uas luag muab ntov tas tshuav lub hauvpaus lawm xwb. Lub hauvpaus ntoo ntawd piv txog Vajtswv haivneeg uas yuav rov hlav tuaj dua tshiab.” (Yaxayas 6:13)

“Tseem muaj kev cia siab rau tus ntoo uas luag muab ntov lawm; nws lub hauvpaus tseem ciaj thiab hlav taus kaus tuaj. Txawm yog nws tej cag laus thiab lub hauvpaus qhuav rau saum npoo av lawm los thaum muaj dej ntub nws yuav hlav kaus tuaj ib yam li tsob ntoo mos” (Yauj 14:7-9).

Muaj tsawg tus hauv peb yuav xav tias ib tsob ntoo do dus, muab ceg txiav tas nws yuav rov qab tuaj taus kaus – tsis tau hais txog yav tom ntej. Tiamsis, kuv ntseeg tias Tus Tswv, ntsia pom ib lub caijnyoog txawv thaum uas nws nplawm cov neeg Yixalayees.

Nyob hauv Yaxayas 6:13, Vajtswv hais txog Nws haiv neeg li no: “Thiab lawv yuav zoo ib yam li tej ntoo qhib uas luag muab ntov tas tshuav lub hauvpaus lawm xwb. Lub hauvpaus ntoo ntawd piv txog Vajtswv haivneeg uas yuav rov hlav tuaj dua tshiab.”

Yav dhau los, kuv muaj sijhawm tau nyob thiab ua haujlwm rau ib thaj chaw tau sawv daws hu los ntawm lub npe zoo tias “The Land”. Ntawm no nws nyob saum lub ncov roob pob zeb siab tshaj 50 tshim, saib ntsoov mus rau tom hiav txwv ntsuab xiab. Muaj ib taig kis, thaum tab tom mus kev taw saib tej uas zoo kawg nkaus ntawd, nqe Vajluskub hauv Yaxayas no cia li tshwm hauv kuv lub hlwb. Thaum rov qab los rau hauv chav nyob thiab muab Vajluskub nthuav los saib, cov lus ntawd thaum pib tsuas kos tau ib daim duab yog ntshav ntws lug thiab kev puas tshuaj xwb. kuv cim civ nug, dabtsi yuav tshwm sim rau daim av dawbhuv no – qhov chaw uas yeej ib txwm muaj keeb kwm, yog qhov chaw ntawm tej koob hmoov?

Ntawd yog ntu uas muaj kev yij fab yij fwj ntawm tes haujlwm The Land. Thiab tej uas kuv nkag siab txog nqe Vajluskub no tab tom hais txog lub neej tom ntej tsaus nti. Muaj ntau txhiab tus tib neeg tau raug nqus tuaj rau ntawm no, muaj ntau tus ntsib Tswv Yexus thiab taug txoj kev loj hlob tawg paj txi txiv. Tiamsis tomqab ntau xyoo nyob ntawm no thaum lub sijhawm zoo dhau mus lawm, kuv ntsia pom tib neeg tsawg zuj zus, nrog rau tej phab ntsa pib ntais zuj zus. Nqe Vajluskub no cia li lo kiag rau hauv kuv lub hlwb, tes haujlwm The Land cuag li pab tsis tau lawm.

Daim av zoo no thaum kawg yuav yog leej twg tug? Thaj chaw ntsia mus rau tom hiav txwv tsis muaj qhov xaus zoo heev no. ntawm no yog ib qhov kev nqus tau ntau tus tib neeg tuaj nyob, txawm yog cov neeg nyob hauv zej zos tib si.

Hauv ntu Vajluskub tau muab sau hauv Vajluskub Qub no, tsob txiv ntoo qhib – yog ib hom ntoo tau hais txog ntau zaug. Nws cov cag ntsia mus tob thiab nthuav dav heev thiaj ua rau tsob ntoo ntsuab xiab mus li txawm yog lub ntuj yuav qhuav nkig nkuav. Hom ntoo no loj heev thiab nws nyob ntev heev tsheej txhiab pua xyoo twb yog vim li no hom ntoo no thiaj dhau los ua ib tug cim, nco txog, thiab qhov chaw rau sawv daws so nkaum ntxoo.

Thaum ntsib kev sim siab, feem ntau peb tsuas ntsia pom lub ntsis uas raug luag muab txiav ua ntej tiamsis hnov qab nws cov cag sab ntsujplig yeej tseem raug ntsia av tob tob hauv txoj kev hlub. Txawm yog thaum raug muab txiav lawm los, yuav muaj ib tug kaus tawg tuaj ntawm lub hauv paus ntawd. Hauv Vajluskub hom ntoo no yog lub cim rau txoj kev tiv thaiv thiab ua siab ntev, ib yam li thaum ub tus Tswv tau tshwm los rau Aplaham. Chivkeeb 18:1 sau: “Tus Tswv los tshwm rau Anplahas pom ntawm cov ntoo xeeb hauv thaj chaw Males. Hnub ntawd tshav ntuj kub heev nws thiaj tawm tuaj zaum ntawm nws lub tsevntaub lub qhovrooj” twb yog nyob rau txoj kev sib ntsib no, Vajtswv thiaj pub Nws ib lo lus cog tseg yuav muab ib tug tub rau yawg.

Vajtswv txoj kev cob lub homphiaj tsis tau yog muab rhuav pov tseg ib zaug li. Nws ua tej ntawd kom rov qab tuaj dua tus kaus tshiab. nqe Vajluskub hauv Yaxayas hais meej “caj ces dawbhuv yog los ntawm nws lub hauv paus los” tau chwv txog kuv lub siab. Nyob rau ntawm The Land no, Txojmoo Zoo no twb tau tseb rau hauv txhua tus tib neeg uas tau tuaj sib ntsib rau ntawm no, tuaj kawm thiab tuaj cob qhia. Zoo li cov neeg Yixalayees uas tseem tshuav yav dhau los, tiam tom ntej yuav yog cov kaus tuaj, nws yuav ua rau muaj ib lub caij sau ntawm sab ntsujplig loj heev rau tej xyoo tom ntej.

Phau ntawv Yauj 14:7-9 ntuas peb tias: “Tseem muaj kev cia siab rau tus ntoo uas luag muab ntov lawm; nws lub hauvpaus tseem ciaj thiab hlav taus kaus tuaj. Txawm yog nws tej cag laus thiab lub hauvpaus qhuav rau saum npoo av lawm los thaum muaj dej ntub nws yuav hlav kaus tuaj ib yam li tsob ntoo mos”.

Txawm yog yuav muaj ib lub hauv paus tuag lawm los, Vajtswv lub noob uas yog Vajtswv tej lus yuav tau Vaj Ntsujplig ywg dej rau thiab lub noob ntawd yuav ciaj sia, tsis muaj hnub puas tshuaj. Ib lub hauv paus ntoo qhuav twb tseem muaj kev cia siab tias nws yuav tau nqus dej los yug nws, yuav hais dabtsi txog koj thiab kuv, thiab tej neeg ib ncig peb? Ntseeg siab rau Vajtswv, vim nyob hauv Tswv Yexus txhais tes, tej zaum lub hauv paus ntoo yuav raug muab txiav pov tseg tiamsis nws yuav yog qhov pib ntawm txoj kev huam vam.

Thov caw nrog kuv peb thov Vajtswv ua ke: Vajtswv Vaj Peb Leeg uas muaj sia nyob, Koj yog leej txiv uas siab ntev thiab yog tus kav tag nrho kuv lub neej tom ntej. Tus Tswv, muaj tej lub sijhawm kuv tsis paub ua cas thiab kuv qaug zog rau tej kev puas tshuaj ib ncig, lossis nyob hauv kuv lub siab. thov Vaj Ntsujplig zam txim thiab pab kuv txoj kev ntseeg uas tsis muaj zog. Thaum no, thov Vajtswv ywg dej rau kuv lub siab qhuav qhawv los ntawm tus dej ciaj sia. Kuv xaiv muab kuv txoj kev ntseeg tso rau hauv Vajtswv txoj kev hloov pauv, ntseeg tias kuv lub hauv paus ntoo yeej tseem yog lub hauv paus dawbhuv tau Vajtswv tiv thaiv. Thov kom tej cag sab ntsujplig yuav txhos mus tob hauv Koj, tiv taus thiab ua tau siab ntev tiv dhau lub caij ntuj qhuav tos txog lub sijhawm rov qab huam vam. Kuv ntseeg tias tus kaus yuav tawg ntawm lub hauv paus qhuav qhawv, yuav dhau los ua duab ntxoov rau Vajtswv lub tsev. Kuv thov hauv Tswv Yexus Khetos lub npe, Amees.

Cov kwv tij, tej zaum koj kuj tab tom hnov tias yus lub neej zoo li ib lub hauv paus ntoo qhuav nrog tej uas ua yuam kev, tej kev tu siab thiab kev puas tshuaj. Koj saib rau lub neej tom ntej thiab tsuam pom tsaus ntuj nti, cuag li lub qhov rooj muab kaw cia thiab tej hnub zoo twb dhau mus yuav tsis muaj hnub pom ntxiv. Tiamsis thov kom koj nco ntsoov tias, thaum txhua qhov chaw pheeb sab nrauv raug muab ntov tas, ntawd yog lub sijhawm uas koj tej cag sab ntsujplig yuav rhau cag mus txhos tob dua rau hauv Vajtswv tus dej cawmsiav. Pauv qhov uas saib ntsoov rau lub hauv paus ntoo qhuav, ces tig mus saib lub noob uas Vajtswv tseb rau hauv koj lub siab. tsuas yog lub noob ntawd tau Vaj Ntsujplig ywg, ces nws yuav ciaj thiab tawg paj txi txiv. Vim nyob hauv Tswv Yexus txhais tes, peb muaj kev cia siab.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.