Lub neej no nws yeej muaj tej “thaj chaw tso siab” sov so – qhov chaw uas peb nco txhua txoj ncau kev mus, tej kev xav thiab tsis xav ntsib tej yam tshiab. nyob hauv qhov chaw tso siab ntawd nws zoo heev, tiamsis ntau zaug nws ho cia li xov laj kab thaiv tej uas peb yuav ntsib dhau ntawm sab ntsujplig thiab kaw lub qhov rooj ua kom peb txojkev ntseeg tsis nce rau ib theem siab. kom peb tawm tau mus, yuav tau txiav txim siab, muaj lub siab tawv tawm mus raws li lub siab tshoov hauv peb lub siab sab hauv.

Hnub no, yog hnub 12/08/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm TXOJ KEV KHIAV TAWM THAJ CHAW TSO SIAB

“Cia li qhuas tus TSWV uas yog koj tus Vajtswv! Nws ua rau sawvdaws pom hais tias nws txaus siab heev rau koj, nws thiaj tsa koj ua vajntxwv kav lub tebchaws Yixalayees. Vim nws txojkev hlub cov Yixalayees nyob mus ibtxhis li, nws thiaj tsa koj ua lawv tus vajntxwv coj lawv ua raws li nws txoj kevcai thiab txojkev ncaj ncees.” (1 Vajntxwv 10:9)

“Xalumoos lub koob meej nrov ncha moo lug d mus txog rau cov Senpas tus poj vajntxwv, nws thiaj li tuaj rau hauv lub nroog Yeluxalees, nws nug ntau zaj uas tsis yoojyim totaub, sim saib Xalumoos puas teb tau… Thaum cov Sen pas tus poj vajntxwv hnov Xalumoos tej tswvyim thiab porn lub loog uas Xalumoos ua. Nws porn tej zaub mov uas luag rau, rau saum Xalumoos lub rooj, tej tsev uas nws cov nomtswv nyob, tej tub kavxwm los yeej nyob muaj chaw thiab tej tsoos tsho uas lawv hnav los zoo ib yam nkaus, tej tub ce dej ce cawv, thiab tej tsiaj uas tua fij hauv lub Tuamtsev ua rau poj vajntxwv yoob thiab xav tsis thoob li… Cia li qhuas tus Tswv uas yog koj tus Vajtswv! Nws ua rau sawvdaws porn hais tias nws txaus siab heev rau koj, nws thiaj tsa koj ua vajntxwv kav lub tebchaws Yixalayees. Vim nws txojkev hlub cov Yixalayees nyob mus ibtxhis li, nws thiaj tsa koj ua lawv tus vajntxwv coj lawv ua raws li nws txoj kevcai thiab txojkev ncaj ncees.” (I Vajntxwv 10:1, 4-5, 9).

Xyoo no xwb, kuv txais tau ib lo lus caw sau ntawv rau ib lub rooj txhawb zog sab ntsujplig rau ib qhov chaw ua haujlwm. Thaum nyeem kuv tus phooj ywg cov ntawv xa xov, kuj yog ib tug saib xyuas, kuv xav ntau heev. Twb ntev heev lawm, kuv xaiv nkaus nkoom tsis sau ntawv, tsis txais lus koom tes nrog rau ib lub rooj twg lossis ib pab pawg twg lawm. Lub neej maj nroos nrog tej kev txhawj txhua hnub yog ib feem tav kuv, tiamsis qhov tseem ceeb dua yog kuv cim civ nrhiav ib qhov chaw nkaum, ib qhov chaw nyob ntsia to tso siab lug rau kuv. Qhov uas yuav rov qab tuav mem sau ntawv dua, nthuav tawm tej uas yus xav ntawm lub siab rau tsheej txhiab tus tib neeg tau mloog yog ib lub suab nrov nrhuav tshem kuv thaj chaw nkaum tso siab uas kuv siv sijhawm los tiv thaiv. Tiamsis nyob hauv kuv lub siab, kuv hnov Vajtswv tshoov kuv siab. nws xav kom kuv txiav txim zoo li lub npe ntawv uas kuv nyiam, thiab kuj qiv lub npe ntawv no rau zaj lus thov Vajtswv hnub no, “Txua kev tawm ntawm qhov chaw tso siab”. Vajtswv xav kom kuv tawm ntawm qhov chaw tso siab uas kuv ib txwm swm ua Vajtswv haujlwm raws li txoj kev tshiab.

Tiamsis txij li lub sijhawm kuv ncaws hau thooj yim txog rau thaum kuv cev tes sau yog ib ntsus kev tsov rog sab hauv nrog txoj kev tos tso thiab hnov tub nkeeg heev. Tomqab tus nplaim taws kub lug thaum pib, kuv lub hlwb pib kos tawm tej yam uas “tsim nyog rau kuv tsis txhob ua’ kom kuv zam kev. Tomqab ib lub sijhawm ntev qaug zog zis rau tej haujlwm, qhov uas peb txuag peb tus kheej nyob hauv txoj kev ua xyem xyav nws muaj ib lub zog loj heev thaum sawv ntawm lub máy tính tsis muaj dabtsi. Kuv pheej xav tias: “Cia taig kis mam sau”. “Thiv tom ntej mam xam”. Txoj kev tub nkeeg no nws yog ib qhov kev ntshai yuav tau tawm hauv txoj kev tso siab yeej ib txwm muaj thiab lub nra yuav tau ua kom zoo. Saib pom kuv txoj kev ua xyem xyav, kuv pom tias lees lo lus caw tsuas yog ntawm ncauj xwb, tshuav kov yeej tus kheej txoj kev tub nkeeg thiaj yog lub sijhawm txoj kev ntseeg raug sim siab.

Txoj kev tawm tsam me me ntawd xwb tim ua rau kuv xav txog ib txua kev tau sau tseg nyob hauv keeb kwm Vajluskub ntawm I Vajntxwv tshooj 10 – tus poj vajntxwv tebchaws Senpas. Yog ib tug poj vajntxwv muaj hwjchim nplua nuj, nyob rau sab qab teb, pog muaj txhua yam uas tib neeg txhua tus ntshaw: zwm txwv, hwjchim, kev nplua nuj, thiab ib qhov chaw tso siab zoo tshaj plaws. Teb chaws Senpas ib txwm nto npe txog tej khoom muaj nqis, tej tshuaj tsw qab thiab kub. Tus poj vajntxwv no muaj cuab kav xaiv nyob hauv nws lub tsev zoo ntawd, txais yuav lub neej nplua nuj thiab cov pej xeem txoj kev hwm nws tsis tas yuav txhawj txog yam dabtsi.

Tiamsis, qhov chaw tso siab ntawd, txhawm tsis tau pog lub siab ntshaw paub qhov tseeb thiab kev txawj ntse. Thaum hnov moo ncha txog vajntxwv Xalumoos, nrog rau tus Tswv lub npe nrov txog pog, tus poj vajntxwv no raug tshoov siab. pog tsis txaus siab rau tej uas pog tau paub, kuj tsis kam muab yus tus kheej kaw cia hauv lub neej nyob tso siab plhuav tamsim. Pog ntshaw kom yus cim civ lub qhov muag pom, tau chwv txog thiab kawm txog tej yam zoo tshaj tej uas yus hnov.

Yog li, niam vajntxwv tebchaws Senpas thiaj txiav txim siab: tawm ntawm nws qhov chaw nyob tso siab. ntawm no tsis yog ib qhov kev ua si. Kom tuaj ntawm Senpas rau Yeluxalees pog thiab nws tej tub teg tub taw yuav mus ib txua kev deb li 2000 daim phiaj zeb. Hla dhau moj sab qhua qhuav nkig nkuav, ntsib ntau qhov kev phom sij tiam thaum ntawd. Yog pog kuj ua kom zoo rau pog, yog pog tsis quav ntsej vim ntshai tshav kub, ces keeb kwm yuav tsis muaj ib tshooj zoo heev sau txog pog. Pog coj ib pab neeg muaj ntxhuav thauj nra thauj tej tshuaj tsw qab, tej kub nrog rau tej qe zeb muaj nqis – yog tej khoom nyob hauv nws lub tebchaws mus – tsis yog ua khoom plig sib paub xwb, tiamsis yog ib qhov kev nqes peev ua luam rau txoj kev mus nrhiav tej lo lus teb rau cov lus nug uas pog tsis tau muaj lus teb hauv pog lub siab.

Thaum tsuj taw tuaj rau hauv Yeluxalees thiab nrog Xalumoos sib tham tim ntsej tim muag, tus poj vajntxwv Senpas no nws xav tsis thoob. Vajluskub sau tseg tias vajntxwv teb tas nrho pog cov lus nug, tsis muaj ib yam dabtsi zais cia uas vajntxwv yuav teb tsis tau rau pog. Thaum pog qhov muag ntsia tim ntsej tim muag vajntxwv txoj kev txawj ntse, pom tej vaj loog zoo nkauj, txoj kev coj noj coj ua thiab tej khoom fij muab fij rau Vajtswv, poj vajntxwv xav tsis thoob li. Pog lees tias tej uas pog pom tseem zoo tshaj tej uas luag nchav txog pog hnov nyob rau pog lub tebchaws. Txua kev hla dhau moj sab qhua, hla dhau txoj kev noj qab nyob zoo ntawm pog lub tebchaws tau pauj rau pog ib qhov kev ntsib dhau ntawm sab ntsujplig thiab pom txog txoj kev txawj ntse uas tsis muaj nqi. Zaj nkauj qhuas tus Tswv, tus uas yog Xalumoos tus Vajtswv, thiab paub tias Vajtswv txoj kev hlub loj heev pub rau Vajtswv haiv neeg.

“Cia li qhuas tus Tswv uas yog koj tus Vajtswv! Nws ua rau sawvdaws porn hais tias nws txaus siab heev rau koj, nws thiaj tsa koj ua vajntxwv kav lub tebchaws Yixalayees. Vim nws txojkev hlub cov Yixalayees nyob mus ibtxhis li, nws thiaj tsa koj ua lawv tus vajntxwv coj lawv ua raws li nws txoj kevcai thiab txojkev ncaj ncees.” (I Vajntxwv 10:9).

Rov qab saib poj vajntxwv Senpas zaj xwm thiab saib kuv tus kheej nyob rau tej hnub kuv tsis ua haujlwm dhau los, kuv cim civ nug tus kheej: twb tau ntev li cas lawm kuv xaiv nyob rau hauv kuv qhov chaw tso siab hnov qab tias Vajtswv niaj hnub hu peb kom saj tau Vajtswv ntau dua? Peb qhov chaw tso siab tej zaum yuav yog ib txoj haujlwm zoo ua tsis muaj kev hloov pauv, ib lub neej sab ntsujplig tsis kub tsis txias, lossis tsuas yog ib lo lus tsis kam pab haujlwm vim ntshai tsam ua tsis tiav, ntshai tsam khwv – zoo li qhov uas kuv tsis kam sau ntawv li yav dhau los. Txoj kev tub nkeeg ntawm sab ntsujplig ntau zaug nws npog zoo heev nyob rau hauv lub npe “kev kaj siab”. ua rau peb tsis kam hloov pauv, tsis kam ua thiab tsis kam them nqi. Yog tias niam vajntxwv Senpas tsis kam tso nws lub zwm txwv zoo nyob rau sab qab teb taug kev tuaj mus ntsib Xalumoos, pog tsuas yog ib tug neeg nplua nuj xwb tsis tau muaj ib zaum twg ua rau pog lub siab pom txog Vajtswv txoj kev txawj ntse. Pog yuav tsis tau sau tseg hauv keeb kwm Vajluskub zoo li ib tug qauv rau txoj kev mus nrhiav qhov tseeb, thiab ntau zaug tseem tau Tswv Yexus qhuas nyob rau tiam Vajluskub Tshiab. Tawm ntawm qhov chaw tso siab mus txhais tias yog txais yuav txoj kev tsis tab pov, txais yuav kev kov yeej lub cev nqaij tawv txoj kev tub nkeeg thiab tej kev khwv thaum pib. Tiamsis ntawd ho yog tib txoj kev kom peb ntsia pom Vajtswv lub tshwjchim loj tab tom ua haujlwm hauv lub neej.

Qhov uas kuv kov yeej kev tub nkeeg rov qab sau ntawv nyob hauv tej kab ntawv thov Vajtswv txhua hnub, yog thawj kaujruam kuv tawm hauv kuv qhov chaw tso siab. tej zaum zaj lus thov no tseem zoo tsis tau txaus, tej zaum tseem ua rau kuv tseem txhawj, tiamsis kuv ntseeg tias thaum kuv muaj lub siab tawv kam tawm mus raws li Vajtswv lub suab hu, Vajtswv yuav qhib dua txoj kev tshiab, tej zaj kawm kev ntseeg tshiab tiamsis yog pheej nyob hauv qhov chaw tso siab, kuv yuav tsis muaj hnub chwv txog li.

Tshuav koj ne zoo li cas? Tsis paub puas yuav muaj ib txua kev rau koj tawm hauv qhov chaw tso siab twg, lossis ib tug cwjpwm pheej tsis kam ua twg uas Vajtswv xav kom koj kov yeej nrog nws mus kiag hnub no? Nco ntsoov tias, sab tom moj sab qhua qhuav nkig nkuav ntawm tej kev sim siab yuav yog lub tebchaws kev txawj ntse thiab kev hlub nplua mias tab tom tos peb.

Thov caw nrog kuv peb thov Vajtswv ua ke: Tus Tswv, kuv paub tias Vajtswv tsis xav kom kuv pheej nyob rawv qhov qub ntawm qhov chaw tso siab ti ti ntawm tus kheej. Thov Vajtswv pub kom kuv muaj siab tawv thiab muaj kev ntseeg txhais ruam tawm ntawm kuv qhov chaw tso siab, npaj txhij txais yuav lub sijhawm ua Vajtswv haujlwm thiab yuav saj tau Vajtswv raws li txoj kev tshiab. ib yam li niam vajntxwv Senpas thaum ub, thov coj kuv mus kom raws li Vajtswv lub siab nyiam thiab raws li Vajtswv lub homphiaj. Kuv thov hauv Tswv Yexus Khetos lub npe, Amees.

Cov kwv tij txhua tus, tawm hauv qhov chaw tso siab tsis tau txhais tias peb yuav ua tej yam loj tamsim. Ntau zaug, txua kev ntawd tsuas yooj yim yog peb muaj lub siab tawv qhib siab qhia yus txoj kev ntseeg rau ib tug phooj ywg, lees lus koom tes nrog ua ib txoj haujlwm me hauv Pawg Ntseeg, lossis rov qab teem lub sijhawm thov Vajtswv kom muaj nqis rau txhua taig kis. Txhob cia txoj kev ntshai txog qhov uas zoo tsis txaus lossis tej phab ntsa thaiv thaum pib ua rau koj tsaug leeg. Vim thaum peb kam mus raws li Vajtswv lub suab hu, Vajtswv yog tus yuav npaj txhij thiab ntxiv zog rau peb txhua txua kev. Kav tsi ua siab tawv tso koj qhov chaw tso siab hnub no tseg kom saj tau lub neej ntseeg Vajtswv tshiab dua thiab koom tes rau tej haujlwm loj uas Vajtswv twb npaj txhij tseg rau koj lawm.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.