Muaj tej lub sijhawm peb cia li ho rov qab pom tej daim duab qub, ib phau ntawv lossis ib qhov khoom qub uas txwm swm tas nco txog tej hnub uas yus tau mus dhau. Muaj tej yam ua rau peb luag, muaj tej yam ua rau peb rov qab nco txog tej hnub txomnyem dhau los thiab cuag li uas yus yuav tiv tsis dhau. Tiamsis thaum tig rov qab mus ntsia, peb pom tias Vajtswv tsis tau tso peb tseg nyob rau tej hnub tsaus ntuj nti ntawd. Nws yog tus rub peb tes thiab hloov tej teev kua muag ntawd dhau los ua tej lus pov thawj txog Vajtswv txoj kev ncaj ncees.

Hnub no, yog hnub 17/08/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus Marissa Nordlum dhau ntawm Zaj kawm ZAJ NKAUJ TSHIAB

“Nws qhia kuv hu ib zaj nkauj tshiab, yog zaj nkauj uas hu qhuas peb tus Vajtswv. Txhua tus uas porn yuav ntshai thiab yuav cia siab rau tus Tswv” (Ntawv Nkauj 40:3)

Peb nyuam qhuav txav chaw los nyob rau thaj chaw tshiab no thiab tab tom npaj txhua yam tseg. Kuv so tej paug ntawm lub thoob mus, qhib tej hlua khi tawm thiab xav tsis thoob li thaum uas kuv pom nyob hauv muaj tej khoom qub khaws tseg txog yav dhau los thaum kuv tseem yau. Muaj tej daim duab qub, txog tej kauj toog tes, tej duab kawm ntawv thiab ntau qhov khoom plig khaws cia.

Tiamsis yam uas ua rau kuv ceev faj tshaj yog kuv tus txiv muaj ib phau ntawv sau tes qub qub. Kuv luag muab tuav ntawm tes qhib los nthuav saib.

Sab hauv yog tej zaj nkauj thiab tej zaj lus paj huam kuv saum thaum tseem mus kawm ntawv. Thaum muab txhua nplooj ntawv nthuav los, txoj kev xav sab hauv cia li ntws lug los, coj kuv rov qab mus rau lub sijhawm sau tej kab ntawv ntawd. Kuv nco kuv tau zaum hauv chav pw, ib sab yog lub taub ghita thiab phau Vajluskub. Ntawd yog ntu uas kuv sib mos nrog txoj kev tub qaug ntawm tus kheej txog qhov uas muaj tej lub sijhawm kuv xav xaus kuv lub neej. Txawm yog ntsib dhau tej hnub txomnyem ntawd los kuv nrhiav tau kev kaj siab thiab kev zoo siab hauv Vajtswv txoj kev tshwm ntsej muag.

Vajntxwv Daviv kuj tham txog lub sijhawm uas tau Vajtswv tso dim ntawm qhov chaw tag kev cia siab, yawg hais: “Nws qhia kuv hu ib zaj nkauj tshiab, yog zaj nkauj uas hu qhuas peb tus Vajtswv” (Ntawv Nkauj 40:3a)

Ntawv Nkauj 40 yog vajntxwv Daviv cov lus pov thawj tomqab uas tau Vajtswv tso dim. Yam tshwmxeeb yog Daviv nws tsis cim civ tsim “zaj nkauj tshiab” rau yus, tiamsis Vajtswv tso zaj nkauj ntawd hauv yawg lub qhov ncauj. “Zaj nkauj tshiab” tsis yog tsuas yog ib zaj muab cov suab tshiab xwb, tiamsis tseem yog ib lub siab twb saj tau Vajtswv txoj kev cawmdim. Tsis yog tsuas hloov pauv Daviv lub caijnyoog xwb, tiamsis Vajtswv tseem hloov pauv peb sab hauv, ua rau yawg qhuas tau Vajtswv ntxiv nyob rau hauv tej kev txomnyem.

Qhov ntawd pab kom peb nkag siab tias txoj kev kho zoo yog los ntawm Vajtswv tes haujlwm nyob hauv peb lub neej. Thaum peb coj tej kev mob, kev qaug zog thiab zaj xwm txog yus lub neej mus qhia rau Vajtswv, Vajtswv muaj cuab kav hloov pauv dhau los ua ib “zaj nkauj tshiab” kom peb muaj cuab kav ua tim khawv txog Vajtswv txoj kev ncaj ncees thiab Vajtswv txoj kev hlub.

Nyob rau lub sijhawm ntawd, thaum kuv thov Vajtswv, sau tej kev xav thiab tej kev kawm tau hauv Vajtswv tej lus, Vajtswv ua rau kuv muaj lub siab tshiab. Kuv sau txog tej kev ywj pheej, kev cia siab, txog Vajtswv txoj kev tshwm ntsej muag txawm yog nyob rau tej hnub uas tsaus ntuj nti tshaj.

Tej kab ntawv sau tseg thaum ub thaum no dhau los ua pov thawj rau Vajtswv txoj kev nrog kuv mus hauv kuv lub neej.

Thaum peb txais yuav Vajtswv ua peb tus Tswv, peb tau caw nkag los rau hauv txoj kev sib raug zoo nrog Vajtswv. Nyob hauv txoj kev sib raug zoo ntawd, kev pehawm tsis yog tsuas yog tej lus qhuas ntawm ncauj xwb tiamsis tseem yog tag nrho ib lub neej pehawm Vajtswv. Muaj tej zaum peb “zaj nkauj tshiab” yog cov lus ua tsaug, tiamsis kuj muaj tej lub sijhawm yog cov lus quaj ntsuag thiab taij thov thaum nyuaj siab, qaug zog.

Hnub no, tseg sijhawm rov qab mus saib “zaj nkauj” ntawm yus lub neej. Koj tab tom nyob rau lub caij twg? Yog tias koj tab tom nyob lub caij raug sim siab, ces ntseeg siab rau Vajtswv. Yog koj tab tom nyob rau lub caij zoo siab, cia li tawm suab ua Vajtswv tsaug. Txawm yog lub caijnyoog tamsim yuav zoo li cas los, Vajtswv yeej zoo siab txais yuav thiab hlub tshua cov muas muaj lub siab tiag los cuag Nws.

Yeej paub tsis tau, dhau ntawm tej uas koj ntsib dhau hnub no, Vajtswv kuj tso rau hauv koj lub qhov ncauj “ib zaj nkauj tshaib” kom coob tug pom tej ntawd thiab “hwm Vajtswv”

Thov caw nrog kuv peb thov Vajtswv ua ke: Tus Tswv, kuv ua koj tsaug vim koj yeej tseem hlub tshua thiab tso cov neeg uas muab siab ntseeg kom dim. Txawm yog nyob rau lub caijnyoog twg los, thov pab kom kuv mus cuag Vajtswv los ntawm lub siab qhuas Vajtswv thiab nco Vajtswv tshav ntuj, kom kuv lub neej dhau los ua ib zaj nkauj tshiab, ua tim khawv txog Vajtswv txoj kev hlub.
Kuv thov hauv Tswv Yexus Khetos lub npe, Amees.

Cov kwv tij txhua tus, hnub no, tseg sijhawm mus cuag Vajtswv thiab muab zaj nkauj tshiab hauv koj lub neej fij rau Nws. Tib txhij ntawd nco txog lub sijhawm uas Vajtswv tau tso dim, pab thiab kho koj, kom koj tau ntuas txog Vajtswv txoj kev ncaj ncees. Yog muaj sijhawm, cia li ua tim khawv txog lwm tus kom lawv kuj tau txhawb zog thiab ntxiv lub siab ntseeg.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.