29.08 Amăn Jơ Krao Khan Rim Năr: SƯ TRŎ KƠ PÔK PƠƯ

Bơ̆n oei arih lăm chăl mă tơdrong kăl kơ ‘bôh păng pơdrơ̆ng ‘bôh nhen thoi tam mă đei pran thoi noh. Hăm minh pôm điên thoăi đĕch, rim ‘nu lu bơ̆n kư̆m gơh pơm rup kơdih, wă kơ đei bơngai hnhoi lăng păng chơchă. Dôm kơ tơdrong hơ iă, tơdrong klahsong dah đei bơngai hnhoi jing thoi tơmam pơtŏ đei yua lăm măt lơ bơngai. Bơ̆n kăl kơ tơchĕng tơdrong ‘noh kư̆m mơ̆t lăm tơdrong arih gah bơhngol. Lu bơ̆n bơ̆jang kơ Kră Yang, mălei bơ̆n wă kơ bơngai nai ‘blŏk kơ bơ̆n hloh kơ ‘blŏk kơ ‘Bok Krist. Lei bơ̆n rơhing kơ anăn Kră Yang đei pôk pơư dah wă kơ lơ bơngai lăp đon kơ bơ̆n? Bu oei dơ̆ng ‘bơ̆t tŏkbŏk tơdrong arih păng tơdrong bơ̆jang tơgŭm lu bơ̆n?

Năr ‘nâu, năr 29/08/2026 tơdrong tơdă ‘Măn Jơ Krao Khan Rim Năr krao wơ̆n bơngai mơ̆ng wong pơwao hơdai nơ̆r Kră Yang hăm kơ̆l ‘bai SƯ TRŎ KƠ PÔK PƠƯ

“Sư rai đunh rai pơm tih; gah inh rai đunh rai sruh rai iĕ.” (Yôhan 3:30)

“Na đei minh ‘nu bơngai Juđê năm tơ lu bơngai pơhrăm păng Yôhan pơjah pơjăng păng sư gah tơdrong pơm kơ đe ‘batem. Lu bơngai pơhrăm păng Yôhan năm tơ Yôhan păng khan: “Ơ ‘bok thây, ‘Bok mă oei hơdai hăm ih pah to krong Jôrđăn, bơngai mă ih khan Sư Kon ‘Bok Kei-Dei, dang ei Sư kư̆m pơm kơ đe ‘batem. Đĭ-đăng bơngai năm kơdih kơdih tơ Sư.” Yôhan khan kơ lu sư thoi âu: “Ưh kơ đei bu gơh pơm tơdrong kiơ dah ‘Bok Kei-Dei ưh kơ ăn kơ sư. Iĕm kư̆m kơtơ̆ng boih tơdrong inh khan kơ iĕm ki, inh ưh kơ sĭ kơ ‘Bok Krist ôh. Inh bơngai ‘Bok Kei-Dei ăn truh hơdrol wă hơmet trong kơ ‘Bok Krist. Pơtih gia, lăp đe pơkong, drŏ-nglo mă iŏk akăn, sư boih hiôk chơt tơpă. Păng buăl mă pơm kơdranh drŏ-nglo ‘noh sư kư̆m dơ̆ng jê̆ ‘bơ̆t sư mơ̆n păng mơ̆ng sư pơma, buăl sư kư̆m chơt hiôk mơ̆n. Na inh kư̆m dang kơdranh bơngai mă iŏk akăn ‘noh mơ̆n. Inh kơtơ̆ng Yêsu pơma, inh hiôk chơt tơpă. Sư rai đunh rai pơm tih; gah inh rai đunh rai sruh rai iĕ.” (Yôhan 3: 25-30)

Inh juăt kơ khan kơdih jơ̆ minh ‘nu bơngai ưh kơ băt “bơwei nơ̆r pơư” kơplah ‘bôh minh ‘nu bơngai bu jang keh ‘lơ̆ng tơdrong jang dah pơm minh tơdrong kiơ đei yua, inh ưh kơ hmach kơ minh nơ̆r pơư wă kơ tơiung lu sư. Đei bơngai tơl hăm nơ̆r bơnê, đei bơngai lăp hiĕk đĕch, đei bơngai iŏk đon ala: “Ưh kơ đei kiơ, lăp hmă đĕch lah!”. Rŏ lăng lăm lu bơ̆n bu bu kŭm đei hiôk kơplah đei bơngai pơdrơ̆ng. Noh jing minh tơdrong kăl hăm kon bơngai. Mălei, tơdah ưh kơ pơ’lơ̆ng, ‘maih wă kơ bơngai nai pơdrơ̆ng pơm kơ bơ̆n rơhing wă kơ bơngai lăng păng pơư. Măkhan lăm tơdrong bơ̆jang kơ Kră Yang, lu bơ̆n kư̆m chơchă wă kơ bơngai nai hơiă kơ bơ̆n hloh kơ pôk pơư kơ ‘Bok Krist.

Lăm Sơ̆p hla bơar ‘Bok Kei Dei, Yôhan ‘Batem jơ̆ minh ‘nu bơngai đei lơ bơngai yom. Đei lơ kon pơlei pơla năm mơ̆ng sư bơtho păng pơm ‘batem. Mălei, Yôhan băt sư bu bơ̆t anăp ‘Bok Krist. Sư đei khan ” ưh kơ hơnhŏ yaih chơkhŏ” Sư (Yôhan 1:27) kơplah tơdrong jang Kră Yang Yêsu rai wơ̆ tŏk, sư kŭm khan: “Sư rai đunh rai pơm tih, gah inh rai đunh rai sruh rai iĕ.” (Yôhan 3:30).

Kră Yang Yêsu trŏ kơ pôk pơư yua kơ Sư jơ̆ kon ‘Bok Kei Dei, jơ̆ ‘Bok Dŏng Pơklaih, păng jơ̆ ” Drŏ nglo iŏk akăn”, mă Yôhan đei pơm kơdranh, Yôhan hlôh kơdih sư jơ̆ bơngai hơmet trong. Yua kơ thoi noh, sư bơtho gah tơdrong tơbral wă hơmet jơhngơ̆m kon pơlei, bơtho lu sư ‘bôh kăl kơ ‘Bok Dŏng Pơklaih păng dui lu sư kơnhăm lăng tơ Kră Yang Yêsu. Yua kơ bơngai hơmĕt trong ưh kơ trŏ kơnhăm truh mălei tơdrong jang sư tơgŭm bơngai nai năm tơ ‘Bok Krist.

Dang ei, rim ‘nu lu bơ̆n kư̆m đei krao wơ̆n wă jing bơngai “hơmet trong” kơ Kră Yang, hăm tơdrong răroi Tơdrong ‘Nao ‘Lơ̆ng, pơtrŭt bơngai nai tơbral, arih minh tơdrong arih pơdah tơ’bôh ‘Bok Krist, păng dui bơngai nai lăng tơ Kră Yang tơplih kơ lăng tơ kơdih.

Dôm lu nơ̆r ‘nâu đei khan kơplah tơdrong jang Yôhan ‘Batem wă jê̆ tôch. Adrol kơ ‘noh, khul tơpôl bơngai năm tơsư mơ̆ng sư bơtho păng pơm ‘batem. Mălei đơ̆ng rŏng kơ noh Kră Yang Yêsu pơtơm tơdrong jang, rim năr rai lơ bơngai kiơ̆ Sư. Lu jơ̆ngbang Yôhan hiơ̆k bơngơ̆t yua kơ tơdrong hơyuh thây sư rai sruh rai iĕ. Dah lu bơ̆n, rŏlăng lu bơ̆n bơngơ̆t lu bơ̆n gô tơplih, gô hiơt dah ưh pă rŏ bơih. Mălei Yôhan ‘Batem sư hmă đĕch. Tơplơ̆ kơ noh sư pơting kơdih sư thoi buăl bơngai drŏnglo chă akăn, hiôk chơt kơplah kơtơ̆ng nơ̆r bơngai drŏnglo iŏk akăn. Tơdrong sư hiôk kơ plah ‘Bok Dŏng Pơklaih pôk pơư.

Hrei ‘nâu, lu bơ̆n ưh kơ đei layơ pơma, kŭm ưh kơ đei layơ tơchĕng kơdih maih tơ plih Kră Yang, mălei tơdrong yoch oei pơ hlŭ lu bơ̆n dan kơdih bơ̆n bơ̆t anih trŏ kơ anih gah ‘Bok Krist. Lu bơ̆n pơtơm bơ̆jang hăm tơdrong ‘mêm kơ Kră Yang, mălei kiơ̆ kơ jơ ‘năr, lu bơ̆n hiơ̆k bơngơ̆t kơ bơngai nai tơchĕng kơ bơ̆n hloh. Lu bơ̆n hiôk kơplah ‘bai bơtho bơ̆n đei bơngai pơư, kơplah jơ kơkuh kơdih bơ̆n chông anhăk đei lơ bơngai lăp đon, kơplah bơ̆n reh brŏ pơm kơ lơ bơngai mơ̆ng hiôk, dah tơdrong jang bơ̆n đei yua. Dôm tơdrong noh ưh kơ glăi, mălei sư jing hli krê ‘biơ̆ kơplah lơ bơngai lăp đon jing pơtrŭt bơ̆n hloh kơ pơm kơ Kră Yang lăp đon. Teh đak dang ei ling lang pơtrŭt bơ̆n pơjing “anăn kơdih” wă chă tơdrong lơ bơngai băt, lơ bơngai lăng păng đei yua. ‘Net ‘net, lăm hnam akŭm, lu bơ̆n đei jô̆ tơdrong đei yua hăm kơsô̆: dôm ‘nu bơngai năm, dôm ‘nu bơngai đei chĕp iŏk, dôm ‘nu bơngai băt kơ kơdih. Kơplah noh, lu bơ̆n bơ̆jang kơ Kră Yang ‘mônh kơ kơnhăm kơdih, ưh kơ kơnhăm ‘BoK Krist trŏ kơ pôk pơư.

Yôhan ‘Batem sư phara. Sư hlôh ” hiôk chơt tôm mah” kơplah ‘bôh bơngai nai năm tơ ‘Bok Dŏng Pơklaih, ưh kơ trŏ bơwei jơ̆ng ‘bang dah bơwei tơdrong pơrŏ sư.

Tơdrong ‘nâu kŭm jing nơ̆r tơ’blŏk kơ rim ‘nu lu bơ̆n. Jing mĕ ‘bă, tơdrong kơnhăm ưh kơ trŏ wă kơ kon gơnang kơ bơ̆n, mălei wă kơ lu sư đei đon lui păng yak năm kiơ̆ ‘Bok Krist. Jing bơngai pơm yŏng, lu bơ̆n ưh kơ pơjing wă kơ kon bơngai kiơ̆ bơ̆n, mă wă tơiung lu đĭch đam tơnăp hăm Kră Yang. Minh ‘nu bơngai bơ̆ jang lăm hnam akŭm, tơdrong kơnhăm lu bơ̆n wă kơ lơ bơngai ‘bôh tơdrong ‘lơ̆ng rŏ ‘Bok Dŏng Pơklaih, ưh kơ trŏ wă kơ lu sư ‘blŏk kơ anăn dah tơdrong jang lu bơ̆n.

Yua kơ thoi noh, hơpơi lu kơ lu bơ̆n kŭm pơma thoi Yôhan ” Sư trŏ kơ pôk pơư, na inh rai sruh rai iĕ”. ‘Nâu boih nơ̆r pơkă pơkăm kơ minh ‘nu bơngai đei rơngei đơ̆ng tơdrong pôk pơư kơdih. Kơplah ‘Bok Krist đei pơgơ̆r lăm jơhngơ̆m, lu bơ̆n ưh kơ pơjei wă kơ đei bơngai ‘blŏk, ‘lơ̆ng rŏ dah pơting kơdih hăm bơngai nai. Kơplah noh, tơdrong hiôk chơt tih păng tôm mah noh ‘bôh anăn Kră Yang trŏ kơ pôk pơư.

Noh boih wă tơbăt ăn kơ minh tơdrong arih bơhngol wơ̆ ‘lơ̆: rai wơ̆t ‘lŏ lăm ‘Bok Krist, inh rai ưh pă roi kơ kơdih kâu păng rơhring wă kơ bơngai nai lăng ‘bôh Kră Yang.

Apĭnh đĭ đăng krao khan hơdai: Kơkuh kơ Kră Yang mă ‘mêm kơeng, pinh Ih nĕ kơ jô̆yo kơ kon yua kơ kon bơ̆jang kơ Ih wă yua kơ kơdih kon, ưh kơ ‘maih wă pôk pơư kơ Ih. Năr ‘nâu, kon apinh tơbral, apinh Ih hơmet ming tơdrong bơ̆jang kon. Apinh Ih tơgŭm kon bơ̆jang kơ Ih hăm tơdrong kơnhăm ‘lơ̆ng trŏ păng ‘lơ̆ng rơgoh. Hơpơi kơ dôm tơdrong kon jang yua kơ đơ̆ng tơdrong ‘mêm kơ Ih păng ‘maih pôk pơư Ih. Kon kŭp kơ̆l krao khan hăm anăn Yang Yêsu Krist, A-men

Ơ lu bơngai mơ̆ng ‘mêm kơ eng, năr 29/8 rim sơnăm đei ‘blŏk hơdơ̆r kơ Yôhan ‘Batem lôch (Mak 6:7-29). Tơdrong arih Yôhan ‘Batem jơ̆ tơdrong arih tơnăp hăm tơdrong pôk pơư Kră Yang Yêsu. Hrei ‘nâu, hơpơi đĭ đăng kơ lu bơ̆n kư̆m dai đei jơhngơ̆m thoi Yôhan ‘Batem. Kơplah bơ̆n wă mơ̆t lăm tơdrong bơ̆jang, athei pơnhen tơdrong đơ̆ng kơdih kơnhăm: buăl jang wă kơ đe lăng dah wă pôk pơư Kră Yang. Kơplah tơdrong bơ̆jang buăl đei yua, athei pơyơ̆r tơdrong ‘lơ̆ng rŏ ăn kơ Kră Yang. Kơplah buăl bơ̆jang thĕng hreh, athei chơt hiôk yua kơ anăn Kră Yang đei pôk pơư. Athei apinh Kră Yang tơgŭm buăl arih nhen thoi lu bơngai hơmet trong tơnăp kơ Kră Yang, wă kơ đơ̆ng tơdrong arih buăl, lơ bơngai đei tơ’bơ̆p păng yak năm kiơ̆ ‘Bok Krist.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.