Rim ‘nu lăm lu bơ̆n đei lu tơdrong mă bơ̆n krao khan apinh ‘Bok Kei-Dei khŏm khŏm. Kư̆m đei lu bơ̆n hơmĕng kơ Sư tơplih chăl arih, dah iŏk tŭk lê̆ tơdrong trăp trĭn đơ̆ng bơ̆n. Mă-lei nơ̆r ‘Bok Kei-Dei tơl tơwih ưh kơ kiơ̆ thoi tơdrong bơ̆n hơmĕng chang gô. Tơdrong noh rŏ lăng pơm kơ jơhngơ̆m bơ̆n rơdu păng tơchĕng ưh kơ ngeh kơ tơdrong ‘lơ̆ng đơ̆ng Sư. Mă-lei Sơ̆p hla bơar ‘Bok Kei-Dei bơtho ăn kơ bơ̆n băt kơ Kră Yang jơ̆ Bơngai Wei Triu ‘Lơ̆ng Tơpăt, Tơ’ngla ling-lang ‘mêm kơ kon Sư păng băt tơpă tơdrong kiơ ‘lơ̆ng, kăl hloh ăn kơ rim ‘nu kon Sư.

Năr ‘nâu, năr 08/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Gene Markland kơ̆l ‘bai KRĂ YANG BĂT TƠDRONG ‘LƠ̆NG HLOH.

“Bơngai chă tơtông truh, sư wă tơtông iŏk đĕch păng wă pơrăm đĕch. Mă-lei inh truh tơ âu wă ăn kơ triu arih păng hiôk chơt tơpă.” (Yôhan 10:10)

Tơ̆ng ih sơ̆ đei păn jĭ lăm hnam pơgang, ih gô chu drơ̆ng iŏk dôm lu năr hơtuch kơ tơdrong hơmet tơdrong jĭ, dôm lu tơdrong pơm kơ ih jing bơ̆l hăl. Ih oei lăm anih păn jĭ, lăng puăn pah tơ năr hnam, lăng tivi, na chang gô truh jơ sŏng sa.
Inh kư̆m đêl đei tơ’bơ̆p minh tơdrong thoi noh mơ̆n gah pơge, đe ba tơmam sa. Inh bâu ka phê ‘lơ̆ng dêh, na jơhngơ̆m inh hiôk, inh adrin pơih tơmam sa. Mă-lei lăp inh lăng tơ lăm, inh dơ̆ng ‘mơ̆i. Tơ kơpal pơnhan đei ‘bĕng păng ‘bar tŏ kơtăp iĕr. Mă gah sŭk sĭch inh chang gô dêh ưh kơ đei ‘bôh. Inh krao y tă păng khan kơ sư, rŏ lăng bơngai pai gŏ hiơt kơ sŭk sĭch inh boih.

Inh sa hơdrol, na gô sŭk sĭch ba truh, inh gô sa đơ̆ng rŏng. Đơ̆ng rŏng kơ noh minh ‘bar phŭt, đei re dơdŭ ‘măng. Lăm jơhngơ̆m inh tơchĕng: “Ŏ, bơngai ba tơmam sa truh boih.” Mă-lei bơngai mơ̆t noh tă kơ y tă, sư tŭn gre ‘bĕnh kơ tơmam pơgang păng tơmam jang pơgang. Yua kơ lăm jơhngơ̆m inh nŏng tơchĕng kơ sŭk sĭch tam mă đei, na inh hăt kơ pơma: “Ơ, ih ưh kơ bơngai ba sŭk sĭch truh hă?” Y tă noh lăng tơ inh minh ‘bar phŭt, na sư hiĕk khan: “Ưh ôh, mă-lei inh ba ăn kơ ih pơgang.” Na bre nhi hiĕk hơdai.

Đơ̆ng noh inh băt tơdrong inh chang gô ưh kơ ling-lang jơ̆ tơdrong inh kăl yua tơpă. Gah sŭk sĭch noh rŏ lăng pơm kơ tơmam sa gah pơge ‘lơ̆ng hloh, mă-lei pơgang jơ̆ tơmam gơh tơgŭm akâu inh klaih păng jing pran. Lu ‘bok pơgang păng lu bơngai jang pơgang băt hloh kơ tơdrong kiơ ‘lơ̆ng kăl hloh ăn kơ inh.
Yêsu khan: “Bơngai chă tơtông truh, sư wă tơtông iŏk đĕch păng wă pơrăm đĕch. Mă-lei inh truh tơ âu wă ăn kơ triu arih păng hiôk chơt tơpă.” (Yôhan 10:10)
Kră Yang Yêsu tơ’bôh akâu Sư jơ̆ Bơngai Wei Triu ‘Lơ̆ng Tơpăt, Tơ’ngla ‘mêm kơ triu Sư păng chu lôch yua kơ triu Sư. Kơplah Sư pơma gah “tơdrong arih hiôk chơt tơpă,” Sư ưh kơ pơkă khan tơdrong arih lu bơngai kiơ̆ Sư gô ling-lang hiôk hian, dah rim tơdrong gô đei tôm ôh. Tơdrong arih hiôk chơt tơpă adrol noh jơ̆ tơdrong arih lăm Yêsu Krist: jơ̆ đei huay kơ jô̆ yo tơdrong yoch, đei pơgơ̆p hăm ‘Bok Kei-Dei, păng rim năr đei Sư tơplih ăn kơ lu bơ̆n jing nhen thoi rup Sư. Tơdrong Kră Yang ăn kơ bơ̆n ưh kơ ling-lang jơ̆ tơdrong bơ̆n hơmĕng chang gô. Mă-lei bơ̆n sĭt lui ngeh tơpă kơ Sư, yua kơ Sư ling-lang bơ̆jang kiơ̆ kơ Sư wă, wă kơ tơdrong arih bơ̆n đei hiôk ‘lơ̆ng (Rôm 8:28)

Inh ‘blŏk bơngai hơwen hơwo lăm Tơdrong Jang 3. Tơ hnam akŭm ‘Bok Kei-Dei tơm tơ Pơlei Jêrusalem, đei minh ‘nu bơngai hơwen hơwo đơ̆ng nge, oei tơ noh apinh jên. Lăp sư ‘bôh bre Pêtrôs păng Yôhan wă mơ̆t akŭm, sư apinh jên bre sư. Mă-lei Pêtrôs khan kơ sư: “Inh ưh kơ đei jên ôh, mă-lei inh tơgŭm ih. Yua anăn Yêsu Krist Pơlei Nasaret, yak bĕ.”

Đơ̆ng noh đei tơdrong mơsêh mơyang na bơngai hơwen hơwo noh klaih hloi. Sư yak ‘lơ̆ng, jơhngơ̆m sư hiôk păng sư bơnê kơ ‘Bok Kei-Dei pơklaih sư.” (Tơdrong Jang 3:1-10)

Bơngai hơwen hơwo noh wă kơ đei jên lăp kơ arih lăm rim năr đĕch, mă-lei tơdrong truh kơ sư hloh kơ tơdrong sư hơmĕng chang gô, sư đei pơklaih. Tơdrong mơsêh mơyang noh ưh kơ pơkă khan rim ‘nu bơngai gô đei pơklaih jĭ jăn ôh, mă-lei wă tơ’bôh ăn kơ bơ̆n băt kơ Yang Yêsu Krist mă bơ̆n lui kơ Sư, Sư arih ling-lang păng oei bơ̆jang kiơ̆ tơdrong ‘lơ̆ng Sư wă. Dah năr noh bơngai hơwen hơwo noh ưh kơ đei pơklaih lei Kră Yang kư̆m jơ̆ ‘Bok Kei-Dei ‘lơ̆ng tơpăt. Yua kơ thoi noh, đon lui bơ̆n ưh kơ dan lăm Kră Yang pơm tơdrong mơsêh mơyang kiơ̆ thoi bơ̆n wă, mă gơnang kơ tơdrong ‘lơ̆ng tơpăt đơ̆ng Sư.

Rŏ lăng đunh boih ih oei krao khan apinh Kră Yang tơgŭm tơdrong ih kăl yua, dah pơklaih ih đơ̆ng tơdrong kiơ noh. Lu bơ̆n pơjao kơ Sư tôm tơdrong, mă-lei bơ̆n kư̆m athei đei jơhngơ̆m iŏk đon ala pơjao tôm tơdrong kiơ̆ kơ Sư wă, Sư ling-lang ăn kơ bơ̆n tơdrong ‘lơ̆ng kăl hloh, ưh kơ kiơ̆ thoi jơhngơ̆m bơ̆n wă. Tơdrong krao khan đei Sư tơl tơwih kiơ̆ thoi bơ̆n apinh jơ̆ minh tơdrong hiôk dêh. Mă-lei kư̆m đei, tơdrong ‘lơ̆ng hloh jơ̆ dui ba jơhngơ̆m lu bơ̆n rai jê̆ Sư kơplah lu bơ̆n oei chang gô.

Yua kơ thoi noh, bơ̆n ‘nĕ kư̆ chơchă tơdrong pŭn hiôk đơ̆ng Kră Yang đĕch, mă athei chơchă Kră Yang tơpă. Lăm Yêsu Krist, bơ̆n đei tôm tơdrong bơ̆n kăl yua. Bơngai Wei Triu ‘Lơ̆ng Tơpăt băt tơpă tơdrong kiơ ba ăn tơdrong hiôk ‘lơ̆ng kơ tơdrong arih ling-lang kơ triu Sư.

Na tơ tuch luch tơmam sa pơge inh kư̆m đei ‘nhĕm ‘buh. Tơpă boih, lu bơ̆n wă kơ tơdrong bơ̆n wă đĕch, mă-lei Kră Yang đĕch băt tơpă tơdrong kiơ bơ̆n kăl yua.

Apĭnh đĭ đăng krao khan hơdai: Kơkuh kơ Kră Yang, Apinh Ih bơtho kon băt bơnê kơ Ih, kơplah tơdrong kon kăl wă đei Ih tơl tơwih kiơ̆ thoi kon apinh, dah ưh kơ đei tơl tơwih. Yua kơ kon lui ngeh kơ Ih đei tơdrong tơdă ‘lơ̆ng ăn kơ tơdrong arih kon. Apinh Ih tơgŭm kon lui kơjăp yak kiơ̆ tơdrong Ih wă, păng rim năr kon đei tơ’bơ̆p tơdrong arih hiôk chơt tơpă đơ̆ng Ih, Tơ’ngla Wei-lăng tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr ‘nâu athei ‘măn jơ lăng ming dôm lu tơdrong ih đei krao khan apinh Kră Yang. Đei tơdrong kiơ ih oei hơmĕng kơ Sư tơl tơwih kiơ̆ kơ thoi ih wă ưh? Athei pơ̆n nuih pơjao kơ Sư dôm lu tơdrong ih kăl yua, mă kư̆m krao khan apinh Sư ăn kơ ih đei jơhngơ̆m iŏk đon ala kiơ̆ kơ tơdrong Sư wă. Apinh Kră Yang tơgŭm ih lui gơnang kơ Sư, mă nơ̆r Sư tơl tơwih jơ̆ “đei”, “tam mă đei”, dah “ưh kơ đei”, Sư kư̆m ling-lang ‘mêm kơ ih păng oei bơ̆jang kiơ̆ tơdrong gơh hơgei đơ̆ng Sư. Athei chơchă Kră Yang mă tơpă, ‘nĕ kơ chơchă dôm lu tơdrong pŭn hiôk đĕch đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.