Ngài pơjum Yom Kippur, hala Pơjum Tơwài-glài, geh sền la ngai dờng mang rlau jơh tom nam cau Juđa dê-pah tŭ jơ nàng kòn mơnùs dòp geh bơta nđàc toh-glài tom nam rlau. Digùl rài kis mhar ngan pah rài ngai do dê, bal mơ ò git nđò bơta bơklơn, ală tŭ gơpừ m bơơta bòl glar klơn hwềng soàn, bol he kung jê-gloh tơhir gơs dô tŭ ngềt-ngơt nàng lòi bơta ơnòng-kơnjơ̆ mơ lơh pa wơl rài kis đah hwềng. Bulah bol he ò gam lơh jat ală sơnoa rnoas ơn phan duh khoai kung be hơđơm Rài Bơta Ho Bal Yau, mơ ya nùs nhơm bơta Pơjum Tơwài-glài kư tơngkah dô jơnau song ò tŭ lơi tơm-pơrgơl: cau lơi tom bol he kung pal cang bơta toh-glài, pal cang dô nơm tiah king-crŭ lơngap-lơngai hwềng soàn in. Mơ hơđang rlau jơh, bol he pal cang bơta tơwài-glài wĭl tơl mơ Yàng Dọ̆ng-Klàs Jesu neh lơh wĭl tơl gan bơta phi să Kơnràñ dê.

Ngài do, ngai 21/9/2026, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Paula L. Stansbury bơh tơnggume BƠTAU AI BƠTA LƠNGAP-LƠNGAI WĬL TƠL.

“Kơnràñ kung ò ngui mhàm ală be dam mơ kơnrồ kòn dê, mơya ngui mhàm să tòm Kơnràñ dê mơ lòt tus hơ tiah sàng goh ngan dô dơ̆ tơl rau, lơh gơs bơta tơwài glài gam sùm sùm” (Hebrơ 9:12)

Sră Lêbi 16 cih tơlik broă lơh Arôn dê tom gơnoar broă Cau Gơnoar Lam Bồ Ơn Phan Duh Khoai tom ngai Pơjum Tơwài-glài. Yàng Tom Trồ sồr Arôn cơnđoà mùt di tiah Sàng-Goh. Tềng hơ̆, ồng ơn ală phan ơn la kơnrồ dăm, belàt dăm mơ bê dăm nàng tơwài-glài. Sơnoa rnoàs tơwài-glài do ò di mìng ai să-tòm ồng in mơ kung ai jơh làng bol Israel in. Kờp năm, Cau Gơnoar Lam Bồ Ơn Phan Duh Khoai lơh jat sơnoa rnoàs hơ̆ tò làng bol rgơi pơnjat kis tom bơta gơtomklac bal mơ Yàng Tom Trồ mơ git lam bơta lơngap-lơngai Kơnràñ dê.

Pơjum Tơwài-glài la gùng Yàng Tom Trồ bơtào gơs nàng làng bol Kơnràñ geh tơwài-glài mơ pơnjat sùm bơta gơtomklac mơ Kơnràñ bơh nam do tus nam ndai. Mơ ya tom Bơtau Krist, bơta tơwài-glài hơ̆ neh geh lơh sir dô dơ̆ tơl rau, mơ bơta lơngap-lơngai Kơnràñ ai gam wơl sùm sùm. Dô àng drim ne, tom tŭ añ nggui momọ̆ di đap mattơngai lik lòt gan mpồng dềt, Yàng neh cih jrô jơnau song hơ̆ tom nùs añ:

“Nùs rĭng-lơngai tĕ”

Tom jơnau Hebrơ, jơnau salom òs geh wă wờng la “lơngap-lơngai”, mơ ya gơtha jơnau do gơ jrô ndơp rlau tai. Salom đơs tus bơta wĭl tơl, gơtomsòr mơ lơngai-lơngò mơ Yàng Tom Trồ ai.

“Salom! Cơnđoà lòt tĕ tom bơta lơngap-lơngai wĭl tơl.”

Bơh sơnròp, añ kơlôi lah jơnau hơ̆ ò rgơi dong tă bơh ală bơta tomsò neh jọ̆ tom bơta gơtomklac digùl añ mơ dô nă cau rềp rlau jơh. Mơ ya, tom tŭ añ sac rwah kis tom bơta lơngap-lơngai Yàng ai, bơta gơtomklac hơ̆ neh tomgơl jat bơta niam oă rlau jơh.

Salom ò di mìng la bơta lơngap-lơngai tom nùs. Hơ̆ la nùs nhơm wĭl tơl, hừh-hơh mơ lơngai-lơngò mơ Yàng Tom Trồ kòñ ai kòn mơnùs bol he in-hwềng nùs, hwềng-soàn mơ să-jan. Gơpơrlơ̆ wơl, tom tŭ siă bơta lơngap-lơngai hơ̆, bơta pràn kơldang, rài kis tom dơlam mơ ală bơta gơtomklac bol he dê kung rơp gơkòl phà.
Tom Ephesô 4:3, Jơnau Yàng bơto bol he: “Jơh nùs tĕ ai bơta ring lơngai be dô nơm che kơt oh mi dô bă bal tòm Yàng Hwềng.”

Bơh bơta ring-lơngai mơ añ git lam tom bơta gơtomklac hơ̆ kung la bơta Yàng Tom Trồ kòn ai làng bol Israel in gan ngai Pơjum Tơwài-glài. Kơnràñ sồr bol khai ơn ìs ngài hơ̆ lơh gơs ngài sàng-goh, nàng tơnliah să he di đap Kơnràñ mơ geh lơh gơtomsòr mơ Kơnràñ. Ngài pơjum do geh Yàng Tom Trồ bơtào gơs nàng làng bol Kơnràñ prap gàr bơh rài do tus rài ndai. Kơnòm bơh hơ̆, làng bol geh tơwài-glài mơ pơnjat kis tom bơta gơtomklac mơ Yàng Tom Trồ.

Arôn mơ làng bol Israel joi jat bơta lơngap-lơngai hơ̆ gan bơta ơn phan duh khoai Yàng Tom Trồ in tom kờp tŭ Pơjum Tơwài-glài. Mơ ya dĭ gơna Yàng sră Hebrơ tơngkah bol he lah: “bơh mhàm kơnrồ dam mơ be dam dê ò rgơi tă sang tồi glài.” (Hebrơ 10:4). Gen tang, nam lơi Cau Gơnoar Lam Bồ Ơn Phan Duh Khoai kung pal mùt tom tiah Sàng-Goh Ngan nàng ơn phan duh khoai tơwài-glài. Bơh broă pal kư lơh sùm hơ̆ ai gŏ phan ơn duh khoai hơ̆ ò rgơi cèng bơta toh-glài wĭl tơl.

Mơ ya ưnngai Yàng, bơta yal yau ò ơm bơdơh tềng hơ̆. Dĭ gơna Yàng sră Hebrơ pơnjat rang tơlik dô nơm jơnau hòn-chò dờng:

“Mơya Bơtau Krist neh tus lơh gơs cau gơnoar dờng lam bồ ơn phan duh khoai gơwèt mơ ală bơta niam neh tus rau, Kơnràñ neh mut tòm Hìu Ing Duh Khoai dờng rlau mơ wil tơl rlau, ò di bơh tê kòn mơnus bơtào gơs, hơ̆ ò di la bal mơ ală phan tòm rài do. Kơnràñ kung ò ngui mhàm ală be dam mơ kơnrồ kòn dê, mơya ngui mhàm să tòm Kơnràñ dê mơ lòt tus hơ tiah sàng goh ngan dô dơ̆ tơl rau, lơh gơs bơta tơwài glài gam sùm sùm.” (Hebrơ 9:11-12)

Sră Esai 9:6 yal Yàng Dọ̆ng-Klàs Jesu la Yàng Lơngap-Lơngai. Ngan behơ̆, Kơnràñ la tom ryàs jơh ală bơta lơngap-lơngai tom rài kis bol he. Kơnràn ai bơta lơngap-lơngai hwềng nùs in, hwềng-soàn mơ să-jan bol he. Kơnràñ kung la phan ơn wĭl tơl neh tơwài-glài bol he in dô dơ̆ tơl rau, kung lơh gơtomsòr bol he bal mơ Yàng Tom Trồ mơ dô ƀă bal ală cau dòn Kơnràñ wơl bal mơ gơp.

Bơta lơngap-lơngai ngan la phan ai gòi mìng Yàng Dọ̆ng-Klàs Jesu lơm rgơi ai. Oă nam lài, tom tŭ añ ho wơl bơta phi să Kơnràñ dê hơđang chi-pơng mơ jơnau Amen!, bơta lơngap-lơngai Kơnràñ dê neh bềng-liu tom să-jan añ.

Bơta Pơjum Tơwài-glài la ngai làng bol Yàng pal tơnliah să gơjràñ sang-glài mơ kơlôi sơnơng di đap Kơnràñ. Bal mơ hơ̆, hơ̆ kung la ngai bềng bơta hòn-chò, tài bơh jơnau ho toh-glài mơ bơta dong klàs bơh ơnòng-kơnjơ̆ tồi-glài cèng tus bơta lơngap-lơngai, bơta gơn kơnòm mơ hòn-chò jrô bơh tom dơlam nùs. Hơ̆ kung la bơta Yàng Dọ̆ng-Klàs Jesu ai bol he in ngài do. Ò di mìng tom dô ngài Pơjum Tơwài-glài, mơ ya geh bềng tơl lơngap-lơngai tom kờp ngài bol he kis hơđang ù do.

Dan jà bol he dô nùs bal tòm bơta hòi dan: Khoai Yàng Tom Trồ lơbơn-niam kòn dê, kòn ưnngai Bèp tài bơh gan Yàng Dọ̆ng-Klàs Jesu, kòn ò gam pal bòl glar kơp gơn dô ngai tơwài-glài kờp nam tài. Kơnòm bơta phi să wĭl tơl Kơnràñ dê hơđang chi-pơng, kòn neh geh toh glài, geh lơh gơtomsòr mơ Bèp mơ dòp geh bơta lơngap-lơngai sùm sùm. Dan dong kòn ò kis tom bơta moat-jrùng is hala gơkòl kơ̆t bơh tồi-glài, mơ ya git rlô ƀòl tom broă lơh dong tơwài mơ Yàng Dọ̆ng-Klàs Jesu neh lơh sir. Dan bơta lơngap-lơngai Kơnràñ dê at-ƀồ hơđang kòn, nàng kòn kung git kis gơtomsòr mơ cèng bơta lơngap-lơngai hơ̆ tus mơ ală cau gùt dar. Kòn jơh nùs hiò-dan tom sơnđan Yàng Jesu Krist, Amen!

Ơ jơh ală ồng mò, oh mi kòñ gơboh, oh mi neh đal git ngan Yàng Dọ̆ng-Klàs Jesu la Yàng Lơngap-lơngai, mơ la Cau Gơnoar Lam Bồ Ơn Phan Duh Khoai dờng rlau jơh he dê hala òhềt? Kơnràñ jê-gloh tơhir ai oh mi in btơa lơngap-lơngai mơ dunnia ò rgơi ceng tus, dô bơta lơngap-lơngai jơh hwềng nùs, hwềng-soàn mơ să-jan in. Kơnòm di bơta phi să wĭl tơl Kơnràñ dê hơđang chi pơng, bol he geh lơh gơtomsòr mơ Yàng Tom Trồ mơ geh hòi jà kis gơtomsòr mơ jơh tơl nă cau. Bơta lơngap-lơngai hơ̆ ò di la bơta ngài ngan. Hơ̆ la phan ai gòi Yàng Dọ̆ng-Klàs Jesu neh rwàt mơ mham tom Kơnràñ dê mơ rcang sir nnàg ai kờp nă cau git dòn kơnòm, rlô ƀòl tom Kơnràñ. Salom!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.