Kòn mơnus bol he ƀuôn ngăn gơ kòl pơrlồm pơndờm bơh ală rùp soñio di đap măt: ală bơta gơlik gơs klăm jơngo, ală dơrñàng thèng jơnhòa mơ bol he dòn lah he ò rgơi tŭ lơi lòt găn. Ngăn sơl lah bol he găm gơkòl tòm bơta sền lăng jăt đah poac să dê, gèn mìng sền rmê tòm ală tŭ tơngai bol glăr di đap măt? Ngăn sơl lah ală sền gơlơh be ò gơs gơn kơnòm lơi găm pơr long dơngoh kơlôi lơbơn lơño bol he dê? Hala digơlăn, bol he găm ơn nus kơlôi tòm ală bơta gơlik tus lơi huĭ lah Yàng Tom Trồ gam lơh broă?

Ngai do, ngai 25/09/2026, tơnggu Hoi Dan Kòp Ngai dan ja ông mò oh mi kơlôi sơnưng bal jơnau Yàng kơnòm bơta dong kol Nina Keegan bơh tơnggu me GAR MAT OH MI GAM GƠS ÀNG LOH SƠL?

“Dan Yàng pò mat añ nang añ in sền gŏ bơta crih crài tòm bơta boh lăm Kơnràñ dê.” (Đơs Crih 119: 18)

Dơngoh kơlôi oh mi di gam wèt hơ đah lơi taih? Bơh ală bơta pal càng mơ bơta ò tơl pràn să tòm he dê hala bơh bơta dờng ơnàng mơ gơnap gơnoăr ò lôi Yàng Tom Trồ dê? Bơta lơi gam bồr bêng gar mat nus bol he di?

Hơdang jơh ală bơta, bol he pal cang wèt mat hơ Yàng Dong Jesu. Bol he pal cang dan Yàng pò mat đah hwềng bol he dê.

Tòm IIAlă Bơtau 6, Êlise mơ cau duh broă guh nàng gŏ dô mpôl ling pràn kơldang gam gơrwàng ƀòn. Ntao di đap broă hơ̆, cau duh broă rngòt rngơt ngan mơ driau dờng lah: “Ơ cau bơtô, bol hi pal lơh ñchi lơi taih?” Neh nđò dơ̆ bol he neh driau tòm toh sèng lùp hơ̆ tòm tŭ roh nus?

Mơya ala boh rngòt rngơt, ông Elise sơrbac sơrbang hoi dăn!

Ò lơnggoh lơngơr, ông hoi dăn dăn Yàng pò mat cau dĭ he in. hơ̆ ò di la dô yô găr mat să jan, mơya la găr mat đah hwềng. Ông rac dăn nàng cau dĭ sền gŏ bơta òs sùm gơs mơ mat òs ò rgơi đăl git: mpôl ling Yàng Tom Trồ dê gam ơm ting hơ̆, oă rlau mơ gơnap gơnoăr rlau mơ oă mpôl ling lơi kòn mơnus dê.

Tòm tŭ Yàng Tom Trồ pò mat cau dĭ gơna khai dê, khai sền gŏ jơh monơm bềng ơseh mơ rơndeh mơ ồs ơm gut dàr Elise. Rùp hơ̆ tơngkah bol he lah ală bơta mat poac să he sền gŏ ò tŭ lơi la jơh ală bơta gơs behơ̆. Dilah ngai do Yang tom Trồ kung pò mat đah hwềng bol he dê, di gơlăn bol he rờp sền gŏ bơta lơi?

Ông hơ lah: “Bàñ rngòt, ală cau ơm bal mơ bol he oă rlau mơ cau ơm bal mơ bol khai.” Gèn Elise hoi dăn lah: “Ơ Yàng Jehôwa, dan pò mat cau dĭ àñ, nàng khai in geh gŏ.” Yàng Jehôwa pò mat khai, mơ khai gŏ monơm bềng ală ơseh, mơ rondeh mơ ồs ơm gùt dàr Elise.” (2 Ală Bơtau 6: 16-17)

Mpôl ling Yàng Tom Trồ dê neh ơm ting hơ̆ nàng sền gàr mơ tơmloh ala bol khai in, bulah ò gơs cau rgơi sền gŏ mơ mat poac să. Hơ̆ la gùng Yàng Tom Trồ găm sum lơh broă. Kơnràñ sùm ơm bal mơ bol he tòm ală tŭ bol glar kalkê. Kơnràñ ò tŭ lơi siău mat digùl ală bơta tòmlơh ală kòn lang Kơnràñ dê. Tòm tŭ bol he kơlôi lah he mìng gơs dô nă, Kơnràñ găm gơs mat mơ lơh broă.

Sră Goh oă dơ̆ ai bol he in gŏ Yàng Tom Trồ la Bơtau tòmlơh ala lang bol Kơnràñ in. behơ̆ gèn, ala bơh bol he kơnòm di pràn is, bol he geh hòi ja ơn bơta dòn tòm Kơnràñ. Bơta dòn ò ơn tòm ală bơta mat sền gŏ, mơya tòm Bơtau sùm dòn song bulah bol he ò hềt sền gŏ Kơnràñ găm lơh broă.

Găn di bơta dòn, bol he git lah Yàng Tom Trồ gam lơh broă kò lang Kơnrañ in jat ală gùng lòt rlau mơ mat poac să rgơi sèn gŏ mơ bồ dơngoh kon mơnus rgơi wờng git. Kòp nă bol he ròp gơs tŭ bol he tòm tip mơ ală bơta gơlòng gơloh be ò gơs gùng lơi rgơi lik klàs. Gớs ală ngai, àñ kơñjơ̆ rài kis dê dờng tian gơs bol he ming git tă nhờm jòng mơ lùp is: “Lơh mƀe lơi he rgơi pơnjat cơnđòa lòt tai?”
Mơya tòm ryas jơh ală bơta dong kòl bơh yàng Tom Trồ ò tŭ lơi lôi. Kơnràñ neh rcang jơh ală bơta bol he pal càng. Bơta nđàc sơngit Kơnràñ dê ò tŭ lơi jơh, bơta nđàc Kơnràñ dê sùm tơl bol he in ngui, mơ mpl ling bơh đang trồ Kơnràñ dê găm sùm lơh jat nus kờñ Kơnràñ. Bulah mat poac să ò rgơi gŏ, bơta hơ̆ găm la song ngăn.

Bol he pal sùm joi jat Yàng Tom Trồ mơ sền jơh ală bơta mơ gar mat bơta dòn dê. Dòn kơnòm tĕ Kơnràñ, bơh Kơnràñ sùm rcang ai jơh ală bơta nđàc pal càng ngui nàng bol he ntao kơ̆ mơ lòt găn jơh ală bơta gơlik os ò niam.

Dilah bol he ò sền gŏ Yàng Tom Trồ găm lơh broă tòm rai kis he, bơta pal càng ò gơ ơm tòm gơnap gơnoăr lala bơta rcang nus dong tă Kơnràñ dê, mơya di gơlăn gơ ơm tòm gar mat đah hwềng bol he dê. Dan Yàng pờ mat bol he nàng bol he sền gŏ bơta gơs mat mơ broă lơh Kơnràñ dê loh làng rlau tai.

Êlisi hoi dăn. Dơ̆ do, ông ò dăn Yàng Tom Trồ pờ mat, mơya dăn Kơnràñ lơh cau sò tơm in jơngo. Yàng Tom Trồ neh dòp jơnau. Kơnòm ting hơ̆, Elise ò càng pal tòmlơh. Ông tề lăm jơh ală mpôl ling hŏ tus tiah Yàng Tom Trô neh lơh nền lai, mơ să tòm Kơnràñ neh dong tă lang bol Kơnràñ dê. Bơta pha lin ò tus bơh pih đao hala gơnoăr pràn kòn mơnus dê, mơya bơh gơnap gơnoăr Yàng Tom Trồ dê.
Bàr gùng sền sơlơ̆ wơl tòm sèng yal yau do kùng pơnđang wơl rai kis cau jat Yàng kòp nă bol he di. Bơta gơlik gơs rgơi ò gơlik gơs ntơn, mơya tŭ Yàng pờn mat bol he, bơta rngòt rngơt rờp ò găm la bơta kơring nus nhờm tai.

“Dan Yàng pò mat añ nang añ in sền gŏ bơta crih crài tòm bơta boh lăm Kơnràñ dê.” (Đơs Crih 119: 18)

Dan jà bol he dô nùs bal tòm bơta hòi dan: Khoai Yàng, dăn toh glài kon in bơh oă dơ̆ kòn mìng sền gŏ mpôl ling cau sò tơm gời mơ hŭi lah mpôl ling Kơnràñ dê găm ơm sum gùt dar mơ sền gàr kòn làng Yàng. digùl càl rbùt mơ bơta gơlik gơs ò niam gơrwàng, dăn pờ mat đah hwềng nàng kòn sền gŏ gơnap gơnoăr mơ bơta gơs mat Kơnràñ dê, tò kòn in ò găm kis tòm bơta rngòt rngơt tai, mơya kơ̆ nus cơnđòa lòt tòm bơta dòn mơ bơta gơn kơnòm. Dan dong kòn sùm wèt mat hơ Kơnrañ mơ cơnđoà lòt kơ̆ cề tòm ală bơta gơlik gơs. Kòn jơh nus hoi dăn tòm sơnđăn Yàng Jesu Krist, Amen.

Ơ ală ông mò oh mi kơñ gơboh, di gơlăn gar mat đah hwềng bol he dê gam pò hala tìl sơl? Ngăn lah boh bơta pin wil wơl, siaŭ bơta dòn, gơ plơ̆ nús mơ rai kis hoi dăn lơhwit lơhwat neh lơh bol he in ò găm sền gŏ jơnau song, tồ bol he kòp cơnđòa gơduh tòm dă diău mơ cau sò tòm neh lơh? Bol he khin chà dòn lah tòm tŭ jơnau hoi dan bol he neh geh ơn Yàng in, Yàng Tom Trồ neh sơntơm lơh broă, bulah mat bol he ò hềt gŏ? Sền tĕ mơ gàr mat bơta dòn nàng dòp git lah mpôl ling hơđang trồ Kởàñ dê găm tòm lơh ala kòn lang Kơnràñ in. mơ kòp kơñ ngai do, bơta dòn bol he dê kùng lơh Yàng Dong Jesu niam nus, nàng bol he pơnjat cơnđòa lòt tòm bơta ring lơngai tŭ git lah jơh ală bơta tòm lơh gơ ơm tòm tê Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.