Gơs tú lơi ồng mò oh mi sên gó gut dar he oă ngan bơta tơnggit lơh he in bol glar mơ kơlôi sơnơng oă sơl? Oă ngan bơta sơlông sơlang tòm lam bă tiah, lơh bor glar tòm poac să mơ bơta kơlôi sơnơng, kơlôi sơnơng mơ bơta rngòt rngơt jơm gom he sơl? Cau nggà driau, tòm pit bơta di he in, tòm pơndang mơ ală jơnau đơs srat bơtang – mơ bè la jơh dunnia do lòt jat bơta ò ring lơngai hớ. Mơya Yàng hòi jà bol he jãn sơnggơr jat jơnau ntas krơi is – jơnau ntas rang tơlik bơta ring lơngai mơ dòn kơnòm di gơnoar at bồ Kơnràn dê.

Ngai do, ngai 27/09/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Ruth Kastberg bơh tơnggume: JÃN SƠNGGƠR JAT JƠNAU NTAS KRƠI IS.

“Gen bơta lơngap lơngai Yàng Tom Trồ dê, la bơta jòng rlau jơh ală bơta git wă, rơp sền gàr nùs mơ bơta kơlôi sơnơng oh mi dê tòm Yàng Krist Jesu.” (Philip 4:7)

Tòm ală nam lài or, tú Hiu Jum Goh ơt sa mơ hòi dan bồ sơnam, ẵn lơh nền ò mut sên ală bơta yal broă mơ mạng xã hội. Bơta hớ ò di la tis, mơ la ală bơta hớ lơh roh oă tú jơ ẵn jê. Sên tiah lơi kung gó ò gơs cau lơi kỡn kơno iat bal mơ gơp. Đơs dơng jơnau, cau do ò ai cau ne đơs, mơ tồn lah cau lơi đơs dơng rlau gen cau hớ la cau di lơm.

Ò di la sên gó nàng git ală bơta gơlik gơs tai, ẵn gó dơrcul ngan. Tồn lah rgơi đơs oă, lùp còp să oă cau mơya gơ lơh ẵn in kơnjớ kơnjut tòm nùs wơl.

Tòm jơh kơnhai hớ, tú kỡn ai điện thoại – gơs tú gen kon tê mor bư di mạng xã hội – ẵn sac ơn nùs nhơm he hơ Yàng Jesus. Ẵn sơntòm hòi dan. Ẵn jơh nùs tơnggor sên hơ Kơnràn.

Mơ tàng, bơta ring lơngai bơkah lơngồt bêng liu tòm hwêng soan ẵn.

Pleh ngai bơta nggôr nggàc dunnia dê, gen song ẵn rgơi dòp git wil tơl bơta tòm klac đềt mêr mơ Yàng. Bulah cau dunnia kừ đơs lài ală bơta sơbơng roh, mơya bơta rngòt rngơt ò rgơi rơsih hala at bồ bơta kơlôi sơnơng ẵn jê tai. Nùs ẵn dơh wơl, ring lơngai mơ tơl pràn nàng tòm pà bơta gơn kơnòm cau ndai in. Ẵn ò di dô pleh hala lơh bè ò sên gó bơta lơi gơlik gơs tòm rai kis ngai do – ẵn sên gơ mơ bơta sên gó Bơtau pà ai bơta ring lơngai dunnia do in.

Ẵn neh sac, mơ kòp ngai cơnđoà lòt jat jơnau ntas krơi is – dô jơnau ntas sơnròp mơ krơi is.

Seng Sră Goh ngai do ai bol he in gó dô nơm rùp sơnio ndròm bè tòm gung lòt lơh cơng ồng Pol dê. Broă tap 27 yal wơl bơta gơkram ơhò digul càlrbut dơng. Tòm 14 ngai, 276 nă cau kòl càlrbut tơnkram. Bol khai roh pràn, ji gloh mơ kis tòm bơta rngòt rngơt roh bơta kis. Mơya, ồng Pol ò gơs dô êt bơta rngòt rngơt lơi, tài bơh ồng ò sên di càlrbut, mơ ồng ming sên di Yàng Tòm Trồ lơm.

Ồng đơs dô jơnau pơndòm pơniang bol khai:

“Ngai do la jơt poan ngai rau mơ ală ồng ơm kơp gơn mơ ơm ơt ò sào sa dô êt lơi. Behơ̆, añ bơto pơndòm ală ồng sào tĕ, nàng gàr bơta kis ală ồng dê, mơ ò gơs cau lơi tòm ală ồng rơp roh dô dang che sŏ bơh dê bồ he dê ò.” (Broă 27:33-34)

Bơta pơnjat ồng Pol lơh rang tơlik ồng la cau pràn kơldang, khin cha. Ồng ò di pơndòm pơniang mơ jơnau đơs lơm, mơ ồng nẵ ntào lơh krơh niam bol khai in tòm tú hớ.

Sră Goh cih lah ồng at piang lă, ưnngai Yàng Tòm Trồ di đap mat bol khai mơ sa. Bơh tú ồng lơh behớ gen cau ndai đòm jat ồng. Bơta dòn kớ cê ồng dê neh tòm gơl ală bơta tòm tú hớ. Bơta ring lơngai tòm ồng kừ behớ rang tơlik tus cau ndai in.

Ẵn gơboh ngan bơta do. Di gul càlrbut bêng bơta sơlông sơlang mơ rngòt rngơt, ồng Pol kừ ưnngai Yàng Tòm Trồ. Digul bơta rngòt rngơt jơm gom, ồng kừ lơh lòt jat bơta dòn nền kớ cê.

Pơrlai soh ngan la tòm oă nam lòt gan, dunnia ò tơm gơl oă. Rai kis do gam gơs bơta ò niam gơlik gơs, gam nggôr ngàc, ală bơta gơlik gơs tòm dunnia do kừ rơsih bơta rngòt rngơt mơ dơrcul. Mơya ngai do kung bè tú hớ, bol he ò geh gơngoar nàng sac rwah.

Bol he rgơi tơnggơr sên hơ Bơtau at bồ jơh dunnia do tòm mpàng tê Kơnràn dê. Mơ bơta dòn dềt rhên bè kon dềt, bol he geh hòi sac gơlik gơs ală cau pơndòm pơniang, chôl bơtrôt cau ò dòn tơnggơr sên – sàng tơngkah bal mơ gơp lah bơta dong kơl he dê ngan tus bơh tiah lơi.

Dan jà bol he dô nùs bal tòm bơta hòi dan: Khoai Yàng, kis digul dunnia bêng bơta nggôr nggàc, ò gơs bơta ring lơngai mơ rngòt rngơt, dan toh glài kon in bơh oă tú kon lòi nùs kon lòt jat ală bơta gơlik gơs tòm dunnia. Dan dong kon git dơh wơl, sang té ală bơta dơrcul lơnggơr nàng rê wơl mơ Kơnràn. Dan ai bol kon in bơta lơngai sơrlèt rlau mơ bơta git wă, mơ dô bơta dòn kớ cê bè ồng Pol lai or, git ưnngai Yàng digul càlrbut mơ cơnđoà lòt jat nùs kỡn Kơnràn dê. Dan ơn tòm bơr sơndôi kon ală jơnau chôl bơtrut, pơndom pơniang nàng bơh rai kis kon, ală cau ơm gut dar kon rơp dòp geh bơta lơngai mơ bơta gơn kơnòm. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, bol he rgơi ơm ring lơngai ò di ming kis tòm bơta rngòt rngơt mơ sơlông sơlang lơm ò. Bol he rgơi rang tơlik bơta ring lơngai ò di bơta rngòt rngơt. He ò di ming lòi bơta rngòt rngơt lơh he in roh bơta gơn kơnnòm, he kung rgơi rang tơlik dô bơta dòn kớ cê tòm Yàng Tòm Trồ he dê – Bơtau at kớ ngai hing he dê dô bă wil tơl. Kơp kỡn bol he rơp kớ cê jãn sơnggơr dô jơnau ntas krơi is hớ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.