Gơs oă dơ̆ rau he sơwì lùp is la do là dơ̆ lồi dut he ơn gơn kơnòm, mơya gen dơñ wơl bơta gơbồng ji sồt rlau bơh lài? Tŭ ală mpồng rhòi rhòi geh til, tŭ ală bơta pơnđơl pràn sŏng ngăn mơ dơñ wơl bơta hut hung, mơ plơ̆ dră, plai nùs kọn mơnùs rơp gơlik gơs mhar ngăn bơh ală phăn sền gar. Bŏl he bơtê kră kơldăng, bơtê git bơta ò kơp koñ tai, mơ bơta iơh rlau la tui yô mơ bơta kơlôi sơnơng: ò Kơp gơn gen ò tŭ lơi rọh bơta gơn kơnòm tai. Bơta dòn lài niăm her ngăn git nđợ rhòi rhòi siar rọh, lòi wơl tòm hwing nùs dô bơta hut hung mơ lơngăm lơngờm. Mơya he gơs kơlôi lah, tòm tiah lơi kung găm òs gơs bơta gơn kơnòm tơl dờng nàng lơh hwing nùs bŏl he khĭn dòn kơnòm mơ rơp sơntom wơl?

Ngai do, ngai 29/09/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Martha Noebel dê bơh Tơnggume BƠTA GƠN KƠNÒM GƠS NGĂN

“Dan Yàng Tom Trồ la tòm ryas bơta gơn kơnòm lơh oh mi in gơs bềng lìu ală bơta hòn chò mơ lơngap lơngai tòm bơta dòn, tồ bơta gơn kơnòm oh mi dê sơlo dờng tòm gơnap gơnoar Yàng Hwềng Goh dê.” (Rôma 15:13)

Hơđăng gùng ri bơh lơh broă, ăñ sền gŏ jơnau cih hơđăng mpàn dô nơm hìu pơjum ne di lah: “Bơta Gơn Kơnòm La Gơs Ngăn”

Ăñ neh dơh wơl mơ kơlôi sơnơng, mơ òs ngăn la ăñ dòn wil tơl bơh jơnau đơs hơ̆. Mơya tŭ kơlôi nền rlau bơh ală jơnau liah geh cih, dềt rhền, ăñ đal git lah gơwèt mơ oă cau, bơta gơn kơnòm la bơta ngài ngăn, tơ’ai gơlơh be ò gơs ngăn.
Ăñ dòn lah dô tơm ală phăn bàn kwơ màng rlau jơh bŏl he rơp ai cau ndai ĭn hơ̆ la bơta gơn kơnòm.

He gŏ sơl ơ, dô nă cau găm rọh bơta gơn kơnòm mơ ơm is òs ò tŭ lơi să tòm he lik klàs bơh ală broă gơlik gơs geh tìp ò. Bŏl khai cèng tơm nùs bơta pơnji pơnkôr rọh gơcọh git nđợ băl mơ gơlơh be jơh gơnoăr pràn rau. Hơ̆ la tŭ bŏl he càng tus hơ bŏl khai, cèng Jơnau Niăm Yang Jesu di tus hơ bŏl khai, băl mơ jơh ală bơta Kơnrẵn ai pà: bơta dŏng klàs, bơta sền gar, bơta koñ gơboh mơ dô bơta gơn kơnòm ngăn.

“Cau kơñau mìng tus nàng kơñau, hàl mơ tơnroh; ai Añ neh tus tồ belàt in geh bơta kis mơ bơta kis tơngkah tơngkañ.” (Jang 10:10)

Gơn kơnòm gơs gơtha la kơp gơn bơh nùs dòn mơ kơp gơn. Bŏl he cèng tus Jơnau Yang mơ bơta gơn kơnòm di Kơnrẵn tus băl ală cau òhềt git bơta gơn kơnòm la gơs ngăn. Tŭ bŏl he cèng bơta gơn kơnòm tus, kŭng la tŭ bŏl he găm cèng bơta kis tus di bŏl khai.

Tŭ bŏl he bơtê git geh pò nùs dòn kơnòm dô dơ̆ tai ngăn là dô cơnđòa lòt pa tòmgơl jơh rài kis. Bơta cơnđòa lòt hơ̆ lòt găn rlau ală jơnau rac dăn Yang ho dŏng he dô bơta păl càng diđap măt, hơ̆ găm la tŭ bŏl he git kơp gơn Kơnrẵn lơh broă, mơ kơ̆ nùs dòn lah Kơnrẵn găm lơh ală bơta lòt găn rlau hơđăng bơta măt sền liah he di.

Digul tiah lơi ală jơnau họi dăn, nùs dòn kơnòm mơ ơt ơl kơp gơn Yang ho wơl, bŏl he rơp jòi bàn bơta he càng ngăn.

“Añ dòn ngan lah añ rơp gŏ bơta niam Yàng Jehôwa dê tòm lơgar cau kis dê! (Đơs Crih 27:13)

Neh jŏ rau, ăñ neh đal git lah dô tòm ală broă gơlik gơs dờng rlau jơh dunnia ngai do di hơ̆ lah: gơs oă cau neh tơnrọh bơta gơn kơnòm. Gut dăr he gơlơh be tŭ lơi kŭng gơs oă bơta moat jrung ji sồt, ală broă gơlik gơs gơbơtơl rlau, kòp ji, rung rài, jền priă phăn mơna, hiu nhă rlơm-lề, băl mơ ală bơta gơtòmgơl pah rài mơ kơlôi rcang di pah rài do. Dunnia tồn lah lơh tơnrọh ală bơta àng gơn kơnòm.
Dilah siơ̆u Yang Tom Trồ, rài kis do ngăn lah tiah siơ̆u iơh rlau mơ rọh bơta gơn kơnòm git nđợ. Mơya, bơh bơta dŏng kòl mơ mpang tê tề lăm Kơnrẵn di, bŏl he rơp lòt găn wil tơl. Ăñ koñ he ĭn git lah, bulah tŭ do mo he păl tìp ală broă gơlik gơs mbe lơi, bơta gơn kơnòm òs sum ơm băl mơ he. Digơlan he òhềt gŏ hala dòp git bơta gơn kơnòm hơ̆, mơya bơta àng òs găm ơm tềng hơ̆, wil tơl gơwèt he ĭn.

Lơh mbe lơi nàng jòi bàn wơl bơta gơn kơnòm taih? Mìng dô bă tiah he rơp jòi bàn bơta gơn kơnòm ngăn – hơ̆ la tòm Yang Dong Jesu.

Ăñ neh jòi lùp jơnau “gơn kơnòm” tòm Sră Goh mơ jòi bàn oă ngăn jơnau ho pơgon niăm ngăn. Oă pơnah dờng sèng Sră Goh hơ̆ ơm tòm ală sră Đơs Crih mơ Jơnau Pơnđik. Tòm rài kis he, bơtau Dabitneh oă dơ̆ gơtơn dùh tòm bơta bŏl glăr, mơ tơm ală tŭ hơ̆, ồng geh tơngkah is să tòm ồng di la bơta gơn kơnòm la gơs ngăn, bơh bơta hơ̆ tus bơh Yang Tom Trồ. Hơđơm do là nùs nhờm gen Đabit neh họi dăn mơ Yang:

“Ơ Yàng, tŭ do ñchi añ kơp gơn taih? Añ gơn kơnòm di Kơnràñ.” (Đơs Crih 39:7)

“Ơ hwềng soàn añ jê, ñchi bơh tài mê gơplơ̆ nùs mơ ò suk ơm taih? Gơn kơnòm tĕ di Yàng Tom Trồ, bơh añ rơp jòng ro Kơnràñ tai, La Bơtau dong kòl añ mơ la Yàng Tom Trồ añ jê.” (Đơs Crih 42:11)

“Ơ Yàng Jehôwa, dan ai añ in git ală gùng dà Kơnràñ dê, Mơ bơto añ in git gùng sơnah Kơnràñ dê. [5] Dan lam añ tòm jơnau song Kơnràñ dê mơ bơto sồr añ, Bơh Kơnràñ la Yàng Tom Trồ bơta dong klàs añ jê; Bơh Kơnràñ añ kơp gơn jơh ngai mho.” (Đơs Crih 25:4-5)

“Ngan dan bañ lòi cau lơi kơp gơn di Kơnràñ gơkòl ƀàssìl; Ai ală cau dờng nùs pơrlơ̆ dră gen lòi bol khai gơkòl ƀàssìl.” (Đơs Crih 25:3)

“Ne, mat Yàng Jehôwa dê sền di cau duh rngòt di Kơnràñ, Mơ sền di cau gơn kơnòm di bơta kòñ gơboh Kơnràñ dê,” (Đơs Crih 33:18)

“Dan Yàng kah wơl jơnau Kơnràñ đơs mơ cau duh broă Yàng dê, Bơh Yàng neh ai añ in gơn kơnòm di jơnau hơ̆.” (Đơs Crih 119:49)

Kơ̆ nùs dòn kơnòm tĕ di Yang Tom Trồ, tài bơh hơ̆ la bơta Kơnrẵn òs kơp koñ kòp nă bŏl he. He càng bơtê git dòn bơr mơ dô nùs bơh măt sền Yang di bơh broă gơlik gơs he găm lòt găn. Digul ală bơta kơlôi rcang, Kơnrẵn găm ràng tơlik bơta lơi bơh să tòm he mơ nùs koñ niăm her Kơnrẵn gơwèt mơ rài kis he? Băñ lòi nùs kơp koñ pơt lơhơ hala ală bơta rngòt rngơt ing lơm at bồ. Niam rlau, bŏl he păl òs tơngkah git lah bơta rơndăp Yang di rcang lài rài kis bŏl he ĭn sum la ală nùs kơlôi niăm her ngăn. Cau gơnoăr hwơr Jêremi neh cih kah ală jơnau hơ̆ pơndòm pơniang hơ̆:

“Yàng Jehôwa đơs: “Bơh Añ git bơta kơlôi sơnơng Añ jê gơwèt mơ bol mê, la bơta kơlôi sơnơng lơngap lơngai, ò di la rung rài, nàng bol mê in geh bơta gơn kơnòm tòm ngai tơnơ̆ bol mê dê.” (Jeremi 29:11)

Bŏl he ò càng gơtơnkram tòm bơta rọh gơn kơnòm hala gơlơh ơm is dô nă. Sơlơ̆wơl, bŏl he gơs gơnoăr geh bềng lìu bơta gơn kơnòm! Bơta koñ gơboh krơi is Yang Tom Trồ di rơp tŭh tòm hwing nùs rơp chu ồs bơta gơn kơnòm wơl òs neh kòl bur jrô ndơp tòm dơlăm nùs. Mơ bơh Jơnau Yang rơp bơtơl gơnoăr pràn, chồl bơtrut bŏl he, kòp dơ̆ bŏl he jòi jat Kơnrẵn bơh hwing nùs kơp gơn băl mơ bơta dòn kơ̆ cê. Cau Gơnoăr bơtọ dờng Pol neh pơyoa ală jơnau chồl bơtrut bềng lơngap lơngai hơ̆ tòm Sră Goh Rôma:

“Mơ bơta gơn kơnòm ò lơh ƀàssìl, bơh bơta kòñ gơboh Yàng Tom Trồ dê neh tuh tòm nùs bol he la bơh Yàng Hwềng Goh la Bơtau mơ Yàng Tom Trồ neh ai gòi bol he in.” (Rôma 5:5)

“Bơh ală bơta neh cih bơh yau la cih nàng bơto sồr bol he, tồ bơh bơta kơ̆ nền mơ bơta chồl pơndòm Sră Goh dê mơ bol he geh bơta gơn kơnòm.” (Rôma 15:4)
Tơnơ̆ do là ală sèng Sră Goh gơs kwơ, dŏng bŏl he sền gŏ ală broă lơh jat tòm rài kis bơta dòn. Ală jơnau be “kơ̆ nùs tĕ”, “lơh khin cha” “kơp gơn”, “duh rngòt Yang Tom Trồ tòm bơta dòn duh mơ duh khoai”, “kơp gơn tòm bơta gơn kơnòm”, “ơt ơl kơp gơn”, mơ “hòn chò tòm bơta gơn kơnòm” gen geh tơngkah bŏl he bơh ală bơta he rơp lơh jat kòp ngai. Sền tĕ dờng ală sèng Sră Goh do tòm tŭ họi dăn kòp ngai. Lòi tĕ Jơnau Yang Tom Trồ mut tòm rài kis he kòp ngai, mơ he rơp dòp git bơta gơn kơnòm rhòi rhòi ri wơl tŭ bơr sơndồi he yăl ală jơnau Kơnrẵn hơđăng rài kis he di.

“Ơ jơh ală cau gơn kơnòm di Yàng Jehôwa, Lơh tĕ pràn kơldang mơ kơ̆ nùs wền dơngoh.” (Đơs Crih 31:24)

“Ală cau duh rngòt di Yàng rơp gŏ añ mơ hòn chò, Tài bơh añ gơn kơnòm di jơnau Kơnràñ dê.” (Đơs Crih 119:74)

“Mơya cau lơi gơn kơnòm di Yàng Jehôwa gen rơp geh pràn pa, bol khai rơp pò pơnđar par jơnhoa hơđang kung be klàng bung; bol khai rơp ntoat mơ ò bòl glar, bol khai rơp lòt mơ ò lơgah lơgañ.” (Esai 40:31)

“Mơya tòm tŭ cau neh gŏ bơta he gơn kơnòm rau, behơ̆ ò di la bơta gơn kơnòm tai: Bơh ñcau gam gơn kơnòm bơta he neh gŏ rau taih? [25] Mơya dilah bol he gơn kơnòm bơta he òhềt gŏ, gen sồng bol he ai nùs ơt ơl mơ kơp gơn bơta hơ̆.” (Rôma 8:24b-25)

“Hòn chò tĕ tòm bơta gơn kơnòm, ơt ơl tĕ tòm bơta rung rài, kơ̆ nùs tĕ tòm bơta hòi dan.” (Rôma 12:12)

Kơp koñ ală jơnau bềng bơta gơnap gơnoăr do rơp cèng wơl bơta kis he inĭn. Driau dờng jơnau yăl tơnggit ală jơnau yăl tơnggit gơn kơnòm hơđăng rài kis mơ ală broă gơlik gơs he di. Ăñ gơs gơn kơnòm! Bơta gơn kơnòm ăñ ji ơn tơm Yang! Ăñ rơp kơ̆ nùs mơ kơp gơn Yang. Ăñ jào phi ơn rài kis he mơ hiu nhă he tòm bơta dòn kơnòm di Yang Tom Trồ. Yăl tơnggit tĕ ală jơnau do kòp ngai. Bơta Gơn Kơnòm Là Gơs Ngăn. Bơta gơn kơnòm tus bơh Yang Tom Trồ! Kơnrẵn neh ơn bơta gơn kơnòm tòm nùs he. Pò bơr yăl tơnggit tĕ mơ kơp gơn ală bơta lơi Yang rơp lơh.

“Dan Yàng Tom Trồ la tòm ryas bơta gơn kơnòm lơh oh mi in gơs bềng lìu ală bơta hòn chò mơ lơngap lơngai tòm bơta dòn, tồ bơta gơn kơnòm oh mi dê sơlo dờng tòm gơnap gơnoar Yàng Hwềng Goh dê.” (Rôma 15:13)

Dan jà bol he dô nùs bal tòm bơta hòi dan: Khoai Yang, neh gơs tŭ kọn bŏl glăr tài bơh ală bơta hut hung mơ rọh bơta gơn kơnòm, tian gơs ò khin kơp gơn bơta lơi tai. Dăn tọh glài bơh bơta lơbơn hơ̆ mơ chu wơl ồs gơn kơnòm tơm nùs kọn dô dơ̆ tai. Ngai do, kọn dăn jào phi ală bơta kalke mơ kơlôi rcang tơm mpang tê lơbơn niăm Kơnrẵn di. Dăn ai pà kọn ĭn bơta dòn kơ̆ cê nàng kơp gơn tềl krơi bơh Yang Dong Jesu – mìng la tòm ryas bơta gơn kơnòm rài kis kọn di. Dăn Yang Hwing Gọh Kơnrẵn bôr bềng đah hwing kọn bơh bơta lơngap lơngai mơ hòn chò wil tơl. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, bơta păl càng rlau jơh he di tơm ngai do la ñchi taih? Di ngăn la bơta dŏng kòl bơh jền priă phăn mơna, bơta sơmbòi wil tơl tòm să jan, dô nơm broă lơh pa rĭng lơngai, hiu nhă rĭng lơngai hala rơndeh lòt rê? Bulah là ală bơta lơi, cèng tĕ ơn jơh tòm tê Yang Jesu ngai do mo. Mơ ơ he, gut dăr he tŭ do gơs cau lơi găm ơm is mơ càng geh chồl bơtrut sơl? Tòm pà tĕ ală jơnau bềng gơn kơnòm gơs gơnap gơnoăr yò tơnguh bơta kis. Dòn tĕ nền lah Bơta Gơn Kơnòm La Gơs Ngăn – khin cha tĕ pò tơlik nùs mơ sền rmê bơta gơkrơi Broă Yang lơh!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.