Kroi is ngan tŭ kon monus rgơi kis wil tơl nggul pah tơngai, sền gŏ ò git nđò bơta go tơmgơl ală rai dê, mơ gam lu li bơh tonggu he gơs mat tom ù do. Tŭ ală kon neh tih dờng mơ dô ngai bơh hiu nhă, tŭ ală bơta kơlôi rcăng bơh ală phan soh phăn ngui sa tŭ do gơ rùc wơl bơh ngkơi, bol he tòm tip mơ ală pah gòi dơng ơnang, do nơm seng lup jê sồt: “Tŭ do an git lơh ñchi lơi taih?”

Ngai do, ngai 02/10/12026, tơnggu Hoi Dan kop ngai dan ja ông mò oh mi kơlôi sonung bal Jonau Yang kơnòm bơta dong kơl Martha Noenel boh tơnggu me TŬ DO AÑ LƠH ÑCHI LƠI TAIH?

“Bơta kis gam sum sum la dop git Bèp, la Yang Tom Trô song ngan mơ ming gơs dô nă lơm, bal mơ Jesu Krist la Bep neh sôr lot tus.” (Jang 17: 3)

Gơs tŭ lơi ông mò oh mi nisona driau “oh” tòm tu sên Jơnau Yàng , gơlơh ƀe gơs dô bơta mơ nđờ jŏ he găm kol kơl?

Di gơlan oă cau tòm bol he neh gơs behơ̆

Tòm àng drim ngai hơ̆, añ kùng neh lòt gan bơta hơ̆. Tơnơ̆ mơ oă pah tơngai lòt jatYàng, loi dùt Kơnràñ kung sol pơnđang añ in gŏ dô jơnau song- mơ bơta hơ̆ neh tòm gơl wil tơl gúng dà añ sền lang rai kis. Gơlơh be nrơt nrơl, gơloh be mpông lơgar trồ pa gơpờ di đap mat. Jơh ală bơta gơƀừ tus hơ añ tòm tŭ sền wol Jơnau Yàng Jesu tòm Jang 17: 3:

“Bơta kis gam sum sum la dop git Bèp, la Yang Tom Trô song ngan mơ ming gơs dô nă lơm, bal mơ Jesu Krist la Bep neh sôr lot tus.”

Do la tŭ lơmpah lôi dùt Yàng Jesu ơm di gah ală cau bơtêlai mơ tŭ Kơnràñ kong pơng. Lòt găn ală tŭ tơngai neh rlau, Kơnràñ neh rcang sir bol khai in tòm tip mơ ală bơta mòr gơlik tus, mơ tŭ do, Kơnràñ wèt tus hơ Yàng Tom Trồ nàng hoi dan bol khai in. Tŭ do, ală cau bơtê găm ò rgơi wờng jơh ală bơta Kơnràñ neh đơs. Mìng tơnơ̆ mơ tŭ Kơnràñ kong chờt, kis wơl mơ Yàng Hwềng Goh mù tòm Ngai Wèr Prăm Jơt, bol khai rgơi wờng dô ba wil tơl ală jơnau Kơnràñ dê.

Đơs ngăn, añ kùng neh lòt găm sơnăm 50. Añ neh lòt găn rlau nggul rài kis jơi kòn mơnus, kùng neh cơnđòa tus đah ne gùng rai kis. Boh hơ̆ mơ tus dê ngai do añ pa sơntòm git lu li Yàng Tom Trồ la Bơtau mbe lơi, kung be wờng he pal cang kis rai kis do mbe lơi tŭ dipal gơs gơtha.

Sền lăng wơl ală gùng bol he neh lot găn, añ dòp git gơlơh be he mìng la “gơs măt”. Kư gơkram tòm tom bơta kơlôi rcang bơh ală bơt apal cang kòo ngai, rong siam kon sau, broă lơh, duh broă Yàng….mơ añ ò hit kis mơ tơnggu đap loh lang. Ngăn lah, ală broă lơh hơ̆ kùng dờng mang, mơya bol gơ pal cang ơn tòm toh ơnih tiah he dê. Tŭ do añ rgơi wờng, dilah bơh sơnròp añ git ơn bơta dờng mang rlau jơh lai ngan, gèn di gơlăn tơnggu broă mơ gơnoăr broă ndai neh loh lang mơ gơlik plai đo oă rlau.

Tŭ do, añ gŏ he gam ntao di đap dô sơnah pa. Ală kòn kùng neh tih dờng. Mè bèp añ kùng neh ri mơ Yàng. añ pơnđơl pràn joi broă lơh mơya jơh ală bơta ò hit tus tiah lơi. Tòm nus añ kừ gơkòl kơt dô nơm sèng lùp lah: “Tŭ do, he pal lơh ñchi lơi tơnơ̆ do?” mơ sèng hơ wơl neh tus dô bă lơƀờñ niam tòm ang drim ngai hơ̆: “Dòp git tĕ Bèp”.

Ngăn lah bơh lai òr añ neh sền sèng Sră Goh hơ̆ oă dơ̆. Mơya pal tus di àng drim do, tŭ kơlôi sơnưng wơl, añ rgơi git jrô gơtha ală jơnau do – it lùi la gơwèt mơ gùng da añ neh lòt găn

Añ pơnyơu ông mò oh mi in sền.

Kơlôi kah tĕ bơh cau mơ ông mò oh mi wờng rlau jợ tòm rai do.

Gơwèt mơ añ, hơ̆ la bau klau kờn gơboh. Kơnhai sin tus, bol he wil tơl tòm pê jơt prăm sơnăm ngai tombau. Añ wơng bi rlau mơ jơh ală cau tom dunnia do. Añ đal git tŭ bi găm kơlôi sơnưng mo gơplơ̆ nus, mơ kung git loh bơta lơi rgơi lơh bi in ñọ̆. Hơ̆ mơ, oă dơ̆ lùp bi găm kơlôi sơnừng bơta lơi, gèn sèng hơ wơl bi di găm lơh añ in mơp dơl bơh ò hít tŭ lơi rgoi kơlôi tús.

Ngăn lah, añ ò rgơi sền bơta kơlôi sơnưng bi dê, ƀuôn la tai bơh añ ò rgoi git loh jơh ală bơta bơh bi. Be la, añ ò rgơi git nền màu sắc lơi la bi gơboh rlau joh (bulah kơloi kah wơl bơta hơ̆ kùng tŭ loi la dờng mang tai.)

Bulah añ ơn oă sơnam tai ming nàng tơmbơh bơr mơ iat kơno bi đơs, añ git he kùng găm ò rgơi git loh lang bơh bi.

Tŭ do, ông mò oh mi lòng sền kơlôi bơh Yàng bol he dê. Dơh wơl tĕ kơlôi sơnưng bơntơl dô et tai

Ròp mbe lơi dilah ông mo oh mi pờ bơr lup Kơnràñ sền Kơnràñ neh crơng gơs mpôl ong mƀe lơi? Di gơlăn ming sèng hơ wơl kùng tơl nàng lơh bol he in roh dô pah rai nàng iat kơno mơ kơlôi sơnưng. Sền lùp tĕ Kơnràñ bơh ală bơta boh lam rơnđap trồ tiah do dê? Añ kơlôi lah bulah ơn jơh rai găm sùm sùm, dul tom ală cau tom bol he do kùng ò rgơi geh wơng loh jơh.

Hala pơnyơu bol he lùp Kơnràñ: Tŭ lơi Kơnràñ chò hòp rlau jơh? Tŭ lơi Kơnrañ gơguh bơta gơjrañ? Hala tŭ lơi la tŭ nus Kơnràñ lề làc jề sồt rlau jơh?

Ming gơs dô nơm gùng nàng bol he rgơi wờng git bơh Yàng tom Trồ: hơ̆ la găn dê Yàng Jesu Krist. Să tòm Kơnràñ neh pờ mpông lơgăr trô mơ crè bài kơrnìng gơr bàr cang digul Tiah Sang Goh ngan. Kơnòm git Yàng Jesu, bol he rgơi cơnđòa mùt tơm bơta gơ tomklac mơ Yàng Tom Trồ mơ dòp git ngan Kơnràñ.

Mơ Jang 17: 3 neh đơs nền bơta hơ̆: hơ̆ la bơta kis găm sum sùm.

Hơ̆ kung la sèng hơ wil tơl rlau jơh ai sèng lùp: “Tŭ do añ git lơh ñchi lơi taih?”
Bulah ông mo oh mi gam ntao di ơnih tiah lơi rai kis de, bulah la kơnòm să găm nggui di tiah bơtê hala ală ngai kơnhai loi dùt rai kis hơđăng dê, gèn geh git Kơnràñ sùm la klọ̆ bơta kis gam sum sum dê. Hơ̆ kung la tơnggu ñchi bơh tai Yang Tom Trồ crơng gơs bol he.

Añ dan pơndùt wơl mơ jơnau hoi dăn cau gơnoăr bơtô Pol dê- dô pơnah sèng Sră Goh mơ añ sùm gơboh:

“Nàng añ in rgơi geh git Bơtau Krist mơ gơnap gơnoăr bơta kis wơl Kơnràñ dê, lơh añ in gơlik gơs be Kơnràñ tòm bơta chờt Kơnràñ dê, nàng dilah rgơi, añ geh tus di bơta kís wơl bơh bơta chơt.” (Philip 3:10- 11)

Dan jà bol he dô nùs bal tòm bơta hòi dan: Khoai Yang la Bơtau Crơng Gơs kờn gơboh, kòn ưn ngai Bèp bơh lòt găn ò git nđò gơguh gơmù, Kơnràñ găm sùm sền gàr mơ don song mơ kòn. Sền lăng wơl ală gùng neh lòt, mơ oă bơta giga kơlôi rcăng, kòn sơlò dòp git bơta kơn gơboh Kơnràñ dê ò tŭ lơi lòi kon. Dan Yàng ƀằñ lơi kon kis tòm ală kơnhai sơnăm găm wơl tòm bơta blai soh hala sơlung sơlăng, mơ ya dăn pò mat đah hwềng kòn dê nàng kòn ngăn geh git Kơnràñ, kờñ gơboh Kơnràñ mơ cơnđòa lòt tòm bơta gơtờm klac đèt mềr mơ Kơnràñ. Dan ngui rai kis gam wơl kòn dê nàng yal tolik bơta kờn gơboh mơ bơta ang Kơnràñ dê hiu nhă in, kon sau mơ ală cau Kơnràñ ơn digah kon. Kơn jơh nus hoi dăn tòm sơnđăn Yàng Jesu Krist, Amen.

Ơ ală ông mò oh mi kơñ gơboh, tŭ jơ lòt găn mhăr ngăn, mơ kòp tŭ lòt găn la kòp tŭ dòng mang ò rgơi ri wơl. Bulah nhà sọ̆ neh tơmgơl jat ngai kơnhai sơnăm, bàr nơm gơltăng neh lơbờñ, gùng lòt hơ đăp bol he dê găm wil tơl tơnggu tòm tŭ gơs YÀng lòt bal. Sền dờng mang tĕ kòp tŭ jơ Yàng ai, ngui tĕ tŭ jơ găm wơl nàng joi jat Kơnràñ, nàng lơh gơrề bơta kờñ gơboh hơ̆ tùs dê hiu nhă, kon sau bal mơ ală cau gùt dàr bol he. Ƀañ ò ƀăt ñyà tai, tùs tĕ mơ Yàng ngai do mơ, bơh geh git Yàng mơ geh kis Kơnràñ in la tơnggu đap gơklŏ àng mơ gơs gơtha rlau jơh rài kis do dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.