Digùl ală bơta giga mơ sơrlèt mhar rài kis dê, neh nđò jọ̆ rau oh mi ơm dơh wơl nàng sền di mat cau đah mơ he taih? Gơs tŭ lơi oh mi lòt gan cau lơi hơ̆ tom gùng mơ nisơna kơlôi lah, tơnơ̆ mơ bơta lơngai be òs hala bơta ñọ̆ hơ̆ digơlan la dô nùs nhơm gam pun-prap ò git nđò bơta kơlôi rcang mơ ơm ìs taih? Bol he òs sùm ting jat ală bơta dờng mang, mơ ya gơs tŭ, Yàng rgơi ngui dô jơnau lùp còp-să song-ngan oh mi dê nàng yò đo dô hwềng soàn gam bòl glar mơ pal cang ngan bơta dong-klàs Kơnràñ dê.

Ngai do, ngai 04/10/2026 Bơta Hòi-Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Dayna Lovelady bơh tơnggume NÙS NHƠM ÀÑ-ƠNÒNG ALĂ HWỀNG-SOÀN ROH RUI.

“Bol mê la bơta àng dunnia dê. Dô nơm ƀòn dờng bơt bơtào hơđang mơnơm gen ò rgơi ndơp.” (Mathiơ 5:14)

Lơh cơng tom ală gùng dà la dùl tom ală broă lơh añ kòñ rlau jơh. Bơta geh lik bơdih lòt tom gùng, geh tìp mơ oă cau gơrê hơ oă pơnah tom dunnia mơ tơmbơh bơr bol khai in kơno bơh bơta kòñ gơboh Yàng Jesu dê sùm cèng wơl añ in dô nơm pràn pa ngan.

Dô ngai trồ tiah niam ngan, añ tìp mơ dô nă cau mè gam pơnu să gam tề nđò nă kòn dềt rê hơđah cau rwàt ală phan. Muh mat khai yal loh bơta bòl glar mơ kơlôi rcang, pơrlơ̆ wơl mơ ală kòn dềt kơnhơl, ntoàt dô bă hòn-chò hơđơm mattơngai niam. Tom tŭ khai cơnđoà tus, añ tus rềp mơ tơmbơh bơr mơ yal tơlik kòñ hòi-dan khai in. Kung bè geh tă ơnòng-kơnjơ̆, khai tă nhơm jòng nggòc-nggơr: “Ñchi bơh tai bi git ngai do añ pal cang ngan bơta hòi-dan mơ pal cang cau kơno taih?” Añ ñọ̆ mơ ho: “Yàng Tom Trồ git bi pal cang bơta hơ̆, mơ añ chò-hòp ngan tom tŭ ơm ting do nàng hòi-dan bi in.”

Digùl jơnau hòi chò-hòp sềm dê tom ròs càl mrềt, khai sơntòm pò nùs yal tơlik bơh ală bơta gơlik gơs mơ he lòt gan, ai ală kòn dềt gen kư koar di jơng añ ơm gùt dar ñŏ-pơnồr. Añ chò-hòp, yal khai in kơno ală gùng kalkê bòl glar mơ să-tòm añ neh ntào, mơ mbe Yàng Tom Trồ neh dong tă kung be tề lăm añ lòt gan kờp cal-rƀùt mbe lơi. Añ jà khai nggui bal tom cơnòng rềp tềng hơ̆, dô nơm tê sơmƀăt kơ̆ tê khai, tê ne kơnđu ală kòn dềt tom nùs. Tom tŭ añ hòi-dan, ală dà mat sơntòm hòr di tom bò khai dê. Tơnơ̆ hơ̆, añ lăm khai kư pơnjat đơs wơl jơnau hòi-dan dòn dòp Yàng Jesu. Lơngap-lơngai ngan ò git nđò tom tŭ nđò nă kòn dềt khai dê kung pò bơr dô bă ƀă-lĭa, kư pơnjat sùm kờp jơnau hòi-dan hơ̆.

Sră Luka 15:7 cih lah: “Añ đơs mơ bol mê, kung behơ̆ sơl hơđang trồ rơp hòn-chò bơh dô nă cau glài gơjrañ-sang-glài rlau mơ sin jơt sin nă cau song-ring ò càng gơjrañ-sang-glài.”

Jơh lơgar trồ kung be tơrlah tom bơta hòn-chò hừh-hơh kờp tŭ gơs cau kơno bơh Bơtau Krist, mơ pò nùs dòn dòp Kơnràñ la Yàng Dọ̆ng-Klàs rài kis he dê. Añ kơlôi tus hơ̆ pal la dô bơta pơjum ryŭ-ryơm ngan, hòn-chò ngan rlau jơh! Ngan la dô bơta nđàc wĭl tơl tom tŭ să tòm bol he geh pơnah rcang lài bơta chò-hòp ò git lơh hơđang lơgar trồ.

Kung be bol he hòn-chò tom tŭ joi geh wơl dô phan mang neh roh, Yàng Tom Trồ la Bèp kung hòn-chò behơ̆. Sră Goh yal pơnyơu bơh kòn klau dulềng rê wơl hơ hiu mơ bèp neh pò bơta pơjum sa chò-hòp. Cau bèp đơs: Mơ ya pal di ngan sa chò-hòp mơ hòn-chò, bơh oh mê do neh chơt mơ kis wơl, neh roh mơ geh bàn wơl.” (Luka 15:32)

Digơlan broă lơh cơng tom gùng dà ò di la jê-gloh tơhir oh mi dê, mơ bơta hơ̆ rgơi wă wơng. Mơ ya ò git lah gùt dar oh mi gam gơs ală cau gam gơn geh iat Jơnau Niam Yàng Jesu Krist dê gan rài kis kờp ngai să tòm he dê sơl? Hơ̆ digơlan la dô nă cau gơp ƀòn, dô nă cau bơyô, hala mìng la cau lơi hơ lòt gan oh mi tom tiah rwàt phan. Digơlan bol khai rơp ò tŭ lơi cơnđoà jơng mùt tom hiu jum hala sền dô bơta rơndap Jơnau Niam lơi. Să tòm oh mi la cau geh sồr lòt mơ bol khai pal cang tìp nàng dòp geh phan ai gòi la bơta dong-klàs bơh Yàng Tom Trồ. Kung be sră Mathiơ 5:14 cih: “Bol mê la bơta àng dunnia dê. Dô nơm ƀòn dờng bơt bơtào hơđang mơnơm gen ò rgơi ndơp.”

Hòi-dan tĕ dan bơta khin-cha nàng sơntòm cèng bơta kòñ gơboh Yàng Tom Trồ dê tus ală cau gùt dar tom rài kis kờp ngai. Tài bơh oh mi geh crơng gơs nàng lơh bơta àng dunnia do in.

Dan jà bol he dô nùs bal tòm bơta hòi dan: Khoai Yàng kòñ gơboh, kòn kơp kòñ geh tơmpà bơh bơta kòñ gơboh Kơnràñ dê cau ndai in. Dan ai kòn in bơta khin-cha nàng tus mơ ală cau gam roh rui gùt dar kòn, tô bol khai dòp geh phan ai gòi la bơta dong-klàs tom Yàng Dọ̆ng-Klàs Jesu Krist. Kòn kơp kòñ bol khai git lam bơta kòñ gơboh Kơnràñ dê gan rài kis să tòm kòn. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, đah bơdih ne bulah gam oă bơta rngềt-rngơt, mơ ya rài kis oh mi neh geh tơnrăm mơ bơta kòñ gơboh Yàng Tom Trồ dê. Bàñ gơn jơl tus di tŭ sền gọ̆ he ngan neh rcang sir hala kơlôi lah pal gơs ală jơnau song niam song pa sơntòm yal bơh Yàng. Ngai do, pò tĕ nùs nang đal git ală cau pal cang Yàng ơm gùt dar he. Ò git lah digơlan mìng dô jơnau hòi-dan ƀă-lĭa oh mi dê gơlik gơs tơnggu bơta hòn-chò dờng hơđang trồ, tom tŭ dô hwềng soàn rê wơl mơ Yàng. Dan Yàng Tom Trồ ngui rài kis oh mi nàng ceng bơta lơngai tus oă cau in mơ nàng oh mi gơlik gơs bơta àng digùl dunnia do.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.