Lơ 07/02/2022: TƠLƠI KHĂP JING HIƯ̆M PĂ ?

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Blan 2 jing blan arăng pioh pơmĭn nao tơlơi khăp. Rơngot biă mă, lu mơnuih ƀu thâo klă rơđah ôh tơlơi khăp jing hiư̆m pă? Djơ̆ mơ̆ hnŭn jing sa tơlơi mưn phara ha ƀôdah jing tơlơi hơgĕt pơkŏn?

Hrơi anai, lơ 07/02/2022, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Wendy Lanier tui hăng akŏ tơlơi hrăm TƠLƠI KHĂP JING HIƯM PĂ ?

Tơdah ƀing gih khăp kơ tơdruă, mơ̆ng tơlơi anŭn yơh abih bang mơnuih c̆i thâo krăn ƀing gih jing ding kơna Kâo.” (Yôhan 13:35)

Amăng plah wah 50 thŭn găn gao, tơlơi buih bơ̆ng gah bruă ngă rai gơnam mơak ngui ngơr ƀrư̆ hrơi ba c̆ơlah đuaĭ ataih mơ̆ng khul tơlơi phiăn hmâo nua yom hiam klă, ăt ƀrư̆ ƀrư̆ arăng pơmĭn tơlơi khăp ăt jing ngă bruă mơhlŭn. Rơngot biă mă tơdang lu mơnuih ƀu thâo krăn tơlơi phara tơ̆ng krah dua mơta tơlơi anai.

Hlâo dih, kâo hmâo pơtô c̆ơđai anih 6 gah tơlơi kơhnâo. Anai jing sa tơlơi pơlông lăng prŏng tơdang gir c̆ơdơ̆ng tơlơi ră ruai hăng tơpul c̆ơđai hrăm anih 6 kơ akŏ prŏng tơlơi tơkeng rai mơ̆ng yang đar hmâo dua mơta tơlơi pơgop glaĭ, laih anŭn tơlơi tơkeng rai hmâo mơ̆ng ha sa đôc̆. Hlâo c̆ơdơ̆ng tơlơi ră ruai anai, kâo thâo kâo hmâo dŏ laih amăng akŏ prŏng anai. Wơ̆t tui anŭn, kâo ăt aka prăp pre ôh pơbư̆p hăng sa tơlơi pơđah hling hlang biă mă.

Tơ̆ng krah khul asăp klao mlâo, amăng mông kâo gir hiăp tơlơi pơhiăp hlâo mrô hrăm, hmâo sa c̆ô c̆ơđai pơhiăp đĭ c̆iôh, “ Ô, kâo pơmĭn dah tơlơi pơhrăm mông anai, nai c̆i pơtô ƀing gơmơi hơdră jơlan ngă bruă mơhlŭn”.

“Nai ƀu pơmĭn hrŭp hăng anŭn ôh,” kâo laĭ glaĭ. “Rơngiao kơ tơlơi anŭn, nai kiăng ƀing ih hluh rơđah ngă bruă mơhlŭn laih anŭn tơlơi khăp jing dua mơta bruă phara”.

Tañ mơtam, anih hrăm rơiăt hĭ. Ƀing gơñu ƀơƀa lăng kâo. Gơñu hling hlang laih anŭn mơ̆t mrơ̆ng ngă kâo hơhưk hơtai boh tơdang lăng ƀuh ƀing c̆ơđai kâo pơtô, ƀing gơñu hmâo đaŏ boh pơhiăp hlañ ƀlŏr amăng rơnŭk rơnai anai. Ƀing gơñu pơmĭn tơlơi khăp jing bruă ngă mơhlŭn yơh.

Ƀu djơ̆ kơnơ̆ng tui anŭn đôc̆ ôh, jua pơmĭn lŏn tơnah rơnŭk anai, lu mơnuih đaŏ tơlơi khăp jing tơlơi hơgŏm truh blĭp blăp ngă ƀing ta ƀu thâo glơng hlâo kiăng kơ dưi wai lăng. Tơhnal phŭn hlâo hmâo pơhiăp tơbiă rai tơdang pơklaih rơkơi bơnai “Kâo ƀu khăp ñu dơ̆ng tah”. Tơlơi pơhiăp anai juăt nao hrŏm hơbĭt hăng tơlơi sŭ pran tai, tơlơi tah akŏ rŏ dah mơnuih pơhiăp ƀu hluh tơlơi hơgĕt truh hiư̆m pă.

Wơ̆t tui anŭn, Hră Ơi Adai Pơhiăp pha ƀing ta ƀuh sa pŏk rup tơlơi khăp phara biă mă. Amăng 1 Kôrantô 13:4-6, ƀing ta ƀuh tui anai:

“Tơlơi khăp thâo gir añ laih anŭn bă hăng pran jua hiam klă; tơlơi khăp ƀu gar hil ƀôdah pơđĭ ñu pô ôh; ñu ƀu pơang ôh, ƀu ngă tơlơi wĕ wŏ, ƀu hơduah tơlơi tŭ yua kơ ñu pô, ƀu tañ hil, ƀu djă pioh tơlơi sat ôh; ƀu mơak ôh kơ tơlơi ƀu tơpă, samơ̆ ñu mơak amăng tơlơi tơpă sĭt.”

Laih anŭn amăng 1 Yôhan 4:7-8, ƀing ta thâo tơlơi khăp rai mơ̆ng Ơi Adai, yua Ơi Adai jing phŭn tơlơi khăp. Ƀu hmâo tơlơi hơgĕt hơgŏm ôh amăng anai. Tơlơi khăp hmâo laĭ nao rơđah rơđong mơ̆ng boh pơhiăp Ơi Adai.

Hling hlang biă mă, ƀu thâo hluh ôh wơ̆t ƀing đaŏ ăt đaŏ tơlơi khăp jing sa tơlơi mưn bă blai amăng pran jua. Samơ̆ tơlơi khăp ƀu djơ̆ jing sa tơlơi mưn. Anŭn jing sa tơlơi ruah mă. Amăng Mathiơ 5:44, Khua Yang Yêsu laĭ ƀing ta: “Khăp bĕ kơ ayăt ƀing gih”. Ƀu dưi ôh hmâo bă blai tơlơi mơak amăng pran jua hăng ƀing ayăt. Yua tơlơi sĭt ayăt jing ayăt yơh, ƀu dưi rŭ đĭ amăng ƀing ta sa tơlơi mưn kar hăng anŭn. Sĭt yơh, Khua Yang ƀu mă ƀing ta ngă sa bruă hơgĕt ƀu hmâo sĭt, ƀu dưi ngă, tơlơi anŭn kiăng laĭ tơlơi khăp jing sa tơlơi ruah mă ƀu djơ̆ ôh sa tơlơi mưn.

Khua Yang Yêsu pơtô: “Tơdah ƀing gih khăp kơ tơdruă, mơ̆ng tơlơi anŭn yơh abih bang mơnuih c̆i thâo krăn ƀing gih jing ding kơna kâo.” (Yôhan 13:35)

Tơdang hluh hơnal mơta tơlơi khăp laih anŭn ruah ngă tui ñu, ƀing ta pơrơđah kơ ta pô jing ding kơna Khua Yang Yêsu. Ƀu djơ̆ ôh ao mơyô hmâo gru tŭt rup kơyâo bơrơkal ƀing ta juăt buh, ƀôdah rup akan ƀlit ƀơi deh. Ƀing ta pơrơđah ta pô jing mơnuih lơ̆m kơ Khua Yang Yêsu găn mơ̆ng tơlơi khăp.

Amăng anih rơŏt, phŭn kơyâo hreo hrau amăng byan Puih, tơnap biă mă kiăng ƀing ta thâo krăn klă phŭn kơyâo pă anăn ñu. Kơlih yua kơ rĭm than kơyâo leng ruh hla, lăng gơñu kar kaĭ đôc̆. Tơdang byan Bơnga rai, ƀơi than kơyâo c̆ơdơ̆ng c̆ăt bluh đĭ, laih anŭn anăn ñu ƀrư̆ hrơi biă rơđah. Samơ̆ khŏm truh giăm đŭt byan Phang, phŭn kơyâo anŭn mă rơđah klă tum tơdang boh ñu hmâo rai. Hlăk anŭn ƀu hmâo ôh bruă huơ̆l wơl tơ̆ng krah boh ƀôm hăng boh ŏ. Boh jing tơlơi pơsĭt klă rơđah.

Tơlơi hơdip kơ ƀing đaŏ ăt kar hăng anŭn. Lăng mơ̆ng ataih ƀing ta ăt jing ƀing mơnuih kar kaĭ ƀu hmâo tơlơi hơgĕt phara ôh. Samơ̆ tơdah nao jĕ, kơsem lăng ten hloh, ƀing ta khŏm pơrơđah boh Yang Bơngăt Hiam jing tơlơi pơsĭt pơrơđah kơnuih kơ ƀing ta đuăi tui Khua Yang Yêsu, hrŭp amăng Galati 5:22 hmâo c̆ih:

“Samơ̆ boh mơ̆ng Yang Bơngăt Hiam jing: Tơlơi khăp, tơlơi hơ̆k mơak, tơlơi rơnŭk rơnua, tơlơi gir run, tơlơi klă djrưng, tơlơi hiam klă, tơlơi tŏng ten, tơlơi tơdu rơun, tơlơi djơ̆ hơnơ̆ng”.

Tơdang Hră Ơi Adai Pơhiăp laĭ nao khul mơta kơnuih anai hrŭp hăng mơboh phŭn kơyâo, tơlơi anŭn kiăng pia jing ƀing ta dưi wai lăng gơñu prŏng đĭ. Tơdang ƀing ta jing mơnuih prŏng laih amăng Khua Yang, boh Yang Bơngăt Hiam c̆i prŏng đĭ tui amăng ƀing ta. Ƀôdah ƀiă hloh khŏm tơbiă yơh.

Kâo laĭ sĭt tơlơi anai, tăp năng kâo mưn ƀuh tơnap yua ƀu thâo krăn ôh kâo pô hơdip djơ̆ hăng ƀing đaŏ khŏm hơdip aka. Amăng mông pioh mông iâu laĭ, kâo brŏk hăng Khua Yang: “Ơ Khua Yang, yua hơgĕt tơlơi anai tơnap biă mă”. Laih anŭn juăt ñu amăng mông kâo brŏk, Khua Yang pơhơdơr kâo abih bang bruă ƀu tơnap tap kar hăng anŭn ôh. Khăp Khua Yang laih anŭn khăp mơnuih “yua tơlơi khăp gom lu tơlơi soh” ( 1 Pêtrôs 4:8). Abih bang bruă kar hăng tui anŭn đôc̆.

Rơkâo ƀing ta pioh mông iâu laĭ hrơ̆m hơbĭt: Ơ Khua Yang, kâo hluh tơlơi khăp jing sa tơlơi ruah mă. Rơkâo Ih thim brơi pran kơtang kiăng djru kâo khŏm hơdip thâo khăp wơ̆t dah hăng ƀing mơnuih kâo ƀu hmâo mưn, ƀu khăp ôh. Kâo iâu laĭ, hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, ƀing ta hlăk pơrơđah tơlơi khăp amăng tơlơi hơdip ƀing ta hyư̆m pă lĕ? Anăm c̆ang tơguan ôh tơl hmâo tơlơi mưn mă khăp, ƀing ta dưi ruah hơdip thâo khăp rĭm hrơi. Hrơi anai, ƀing ta dưi pơrơđah tơlơi khăp găn mơ̆ng bruă mă ƀing ta ngă hiam, thâo djru arăng, c̆ơdơ̆ng mơ̆ng ƀing mơnuih jum dar ƀing ta.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.

bình luận

Trở thành người đầu tiên bình luận cho bài viết này

RADIO MỚI NHẤT

Hướng Về Phía Sao Mai Ngời Sáng

Tĩnh Nguyện Hằng Ngày

Ân Điển Và Thương Xót

Tĩnh Nguyện Hằng Ngày

Học Biết Ý Chúa

Tĩnh Nguyện Hằng Ngày

Từ Máng Cỏ Đến Thập Tự Giá

Tĩnh Nguyện Hằng Ngày

Phước Cho Nhân Loại

Tĩnh Nguyện Hằng Ngày

bình luận

CHƯƠNG TRÌNH RADIO

RADIO MỚI NHẤT