Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ană mơnuih ƀing ta amuñ biă mă mŭt nao amăng khul tơlơi pơrơjah “mơak ăl”. Wơ̆t kơ tui anŭn, ƀơƀiă biă mă arăng pơrơjah yua kơ tơlơi sĭt, samơ̆ biă mă ñu jing kiăng wai lăng kơnuih pô ta laih anŭn pơsĭt ƀing ta jing djơ̆. Khua Yang iâu pơthưr ƀing ta khŏm thâo răng pô ta laih anŭn hmâo pran jua tơdu rơun, thâo khăp tơdang hmâo tơlơi pơrơjah. Yua kơ tui anŭn, anăm brơi kơnuih kơ ta pô ƀôdah ayăt pơčut, rĭm čô ƀing ta khŏm răng kiăng ƀu ngă pơ ruă ayŏng adơi ƀing ta.

Hrơi anai, lơ 24/09/2022, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Katy Kauffman  tui hăng akŏ tơlơi hrăm ɃING IH AMUÑ ARĂNG PƠČUT MƠ?

“Mơyun hiam yơh kơ ƀing thâo luă gŭ, yua kơ gơñu či mă tŭ lŏn tơnah!” (Mathiơ 5:5)

Eo anăn ñu Sam mŭt amăng tơlơi hơdip kâo hlăk kâo 9 thŭn. Ñu ƀu băk ôh čiơng yua hnŭn yơh ƀing gơmơi ƀu thâo pô khua ñu jing hlơi. Sang anŏ gơmơi tŭ mă rong eo anai, laih anŭn ñu jing eo gơmơi khăp hơeng biă mă amăng 18 thŭn. Yua hơjăn ñu đôč jing mơnơ̆ng rong amăng sang, ƀing ih dưi pơmĭn ñu rơngot biă mă. Samơ̆ ƀu tui anŭn ôh. Yua kâo dŏ jĕ giăm ñu nanao.

Kâo amuñ biă mă “pơčut” ñu. Hăng sa bơlâu čăng, sa ară hrĕ, apui pit ƀôdah apui pơčrang laze, kâo tañ biă mă dưi ngă ñu lăng nao pơ kâo laih anŭn plư ñu mŭt amăng tơlơi ngui ngŏr pơkiăo mă. Mơta mơtah ñu hiam kraih đơi, laih anŭn ñu ƀu anăm krơ̆ng glaĭ ôh. Pă tơkai tơpur ñu či pơsĭt tơlơi kơñăm, laih anŭn abih gơnam hơgĕt kâo hlăk djă tuč nuč ăt či dŏ ƀơi amăng bah ñu. Mơak hăng tơlơi dưi anŭn, tơdơi anŭn ñu či wơ̆t glaĭ mơnơi ia ƀôdah tŏ tui hơduah sem ngă bruă ñu hlăk ngă.

Pơmĭn nao khul bruă eo kâo hmâo ngă, kâo tơña kơ kâo pô amuñ tŭ tơlơi arăng “pơčut” mơ̆? Ƀu djơ̆ ôh tui hơdră jơlan plư mŭt amăng tơlơi ngui ngŏr eo kiăo akuih, samơ̆ mŭt nao amăng tơlơi pơblah hăng boh pơhiăp laih anŭn hăng kơnuih kơ kâo pô? Hlâo adih, arăng pơčut kâo amuñ biă mă. Sĭt biă mă tơnap kiăng krơ̆ng glaĭ tơlơi pơsua pơhiăp kơ tơlơi mơak al. Samơ̆ kâo ƀuh glaĭ djơ̆ ñu pơpŭ đĭ tơlơi sĭt, hnal tuč kâo pơrơjah kiăng pơsĭt kâo jing djơ̆. Ƀing ta juăt pơsua pơblah tơdang “tơlơi kơdrưh ang”, tơlơi tŭ yua ƀôdah kơnuih ta pô hlăk bưp tơlơi hiư̆t. Nang ai ñu anai jing yua hơgĕt Khua Yang Yêsu juăt laĭ nao tơlơi luă gŭ amăng khul tơlơi mơyun hiam.

Mathiơ 5:5 čih: “Mơyun hiam yơh kơ ƀing thâo luă gŭ, yua kơ gơñu či mă tŭ lŏn tơnah!”

Kâo mlâo biă mă tơdang hơdơr nao tơlơi mơyun hiam Khua Yang Yêsu pha brơi kơ mơnuih thâo luă gŭ. Kâo ƀu lui ôh khul tơlơi pơblah rŏ dah “hiam”. Samơ̆ tơlơi kâo ƀu hluh anŭn jing: mơnuih luă gŭ ñu ƀu lui ôh tơlơi dưi “kiăng kơdưi hĭ” rŏ dah pơpŭ - ƀing gơñu ruah lui hĭ tơlơi tŭ yua kơ gơñu pô kiăng ƀu ngă răm kơ mơnuih pơkŏn. Nang ai gơñu kơnơ̆ng dŏ rơiăt, ƀôdah laĭ glaĭ kơ khul boh pơhiăp ngă pơ ruă pran jua hăng kơnuih hơđơ̆ng. Ƀing gơñu ƀu amuñ ôh tŭ tơlơi pơčut mơ̆ng kơnuih kơ gơñu pô ƀôdah tơlơi pơiă noh, kiăng pơdơ̆ng glaĭ hăng tơlơi ƀu djơ̆ ôh.

Tơdang Khua Yang djru, ƀing ta dưi pơkơdơ̆ng glaĭ lu hơdră pơdơ̆ng ƀu thâo tơlơi pơpŭ, laih anŭn či mă tŭ lŏn tơnah (Mathơ 5:5). Amăng Hră Tơlơi Pơgop Phrâo, “lŏn” laĭ nao khul tơlơi mơyun hiam prŏng prin.

Kơnuih luă gŭ djru ƀing hmâo tơlơi lir pơgop hrŏm hơbĭt hăng Khua Yang. Yua kơ “lŏn” amăng Tơlơi Pơgop Hơđăp juăt pơrơđah kong ngăn kơ mơnuih dŏ amăng tơlơi lir pơgop hiam klă hăng Ơi Adai, yua kơ anŭn yơh dưi laĭ pran jua luă gŭ djru ƀing ta hơpuă sa tơlơi lir pơgop jĕ giăm hăng Khua Yang hrơi anai, sa kong ngăn kiăng biă mă laih anŭn nang lăp biă mă kiăng ƀing ta thâo răng kơ ta pô. Tơdang thâo răng kơnuih tañ hil kơ ta pô laih anŭn hơngah hĭ tơlơi ƀu djơ̆, ƀing ta hlăk pơư ang Pô hmâo pran jua khăp pap, gir tŭ mă laih anŭn gir añ hloh kơ abih bang. Ƀing ta ngă bơmơak kơ pran jua Ama, laih anŭn dưi jing hĭ hơĭn kơnang hloh amăng tơlơi lir pơgop amăng bruă mơnuă Khua Yang jao. Ƀing ta dưi hmâo tơlơi mơak. Laih anŭn tơlơi yom kơ ƀing ta pô ƀu lŏm kơ bruă dưi hĭ hăng pô pơkŏn hăng boh pơhiăp laih anŭn tơlơi pơgal, samơ̆ lŏm kơ pô Pơtao prŏng prin, Pô nanao khăp kơ abih bang mơnuih.

Eo kâo abih tơlơi c̆ang rơmang laih. Ñu ƀu anăm pơkơdơ̆ng glaĭ ôh hăng tơlơi plư ngui ngơr hiam mơak. Samơ̆ amăng tơlơi hơdip rĭm hrơi, tơdang pioh tơlơi khăp glong hloh kơnuih pô ƀing ta, ƀing ta dưi pơkơdơ̆ng glaĭ hăng khul tơlơi pơrơjah ƀôdah tơlơi pơlông lăng "hiam jơman" hmâo dă pioh ƀơi anăp. Ƀing ta dưi prah thăm tơlơi hil, tơlơi kreñ, tơlơi sat ƀai (Kôlôs 3:8) laih anŭn buh mă pran jua pap drap, hiam klă, luă gŭ (Kôlôs 3:12).

Yua kơ Khua Yang khăp kơ ƀing ta, Ñu c̆i djru ƀing ta thâo hơgĕt khŏm pơhiăp ƀôdah ngă hơgĕt amăng tơlơi hơdip hmâo bruă truh, laih anŭn Ñu c̆i pơala pơblah brơi kơ ƀing ta tơdah kiăng. Tơlơi khăp laih anŭn tơlơi djru mơ̆ng Khua Yang pha brơi kơ ƀing ta tơlơi kơtang tơdang ƀing ta ruah mă hơdip amăng tơlơi luă gŭ, ƀu djơ̆ ôh tơlơi hil kreñ. Hlăk anŭn, ƀu hmâo hlơi ôh dưi pơc̆ut ƀing ta tui jơlan ƀu ha abih pran  jua dơ̆ng tah.

Rơkâo ƀing ta pioh mông iâu laĭ hrŏm hơbĭt

Rơkâo kơ Khua Yang pap brơi kơ kâo đa yua kơ khul tơlơi pơrơjah pioh kơnuih kơ kâo pô jing blung hlâo, ngă pơruă ayŏng adơi laih anŭn kơƀah hĭ tơlơi khăp. Rơkâo kơ Ih pha brơi kâo pran jua tơdu rơun gir añ wơ̆t kơ tơlơi kơhnâo rơgơi laih anŭn tơlơi thâo răng kiăng ƀu tơglŭng nao amăng khul tơlơi pơrơjah ƀu ba glaĭ tơlơi tŭ yua. Rơkâo kơ Ama djru kâo thâo bơglaĭ hăng abih bang tơlơi truh hăng pran jua khăp laih anŭn gir añ. Kâo iâu laĭ hăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, djơ̆ mơ̆ ƀing ih jing mơnuih amuñ biă mă arăng pơčut kiăng tơglŭng nao kơ khul tơlơi pơrơjah ƀu ba glaĭ tơlơi tŭ yua, ngă pơruă mơnuih pơkŏn? Tal tơdơi, tơdang dŏ dơ̆ng ƀơi anăp tơlơi pơrơjah, kơnang bĕ Khua Yang djru kơ ƀing ih hmâo pran jua tơdu rơun laih anŭn gir añ. Hlăk anŭn, ƀing ih či hmâo sa tơlơi pơmĭn kơhnâo rơgơi hloh kiăng dưi thâo pơkra amăng abih bang tơlơi truh tui hơdră jơlan hiam hloh laih anŭn rơnŭk rơnua hloh.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih