Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Thaum tau caw los koom tes ua Vajtswv haujlwm nyob rau ib teg dej num twg lossis pab ib txoj haujlwm twg nyob rau hauv Pawg Ntseeg, thaum ntawd koj ua li cas? Koj zoo siab thiab ua ib siab hlo los ua lossis nrhiav kev muab tso tseg? Vajtswv txojlus hnub no caw koj cia li ua ib siab hlo ua Nws txoj haujlwm. 

Hnub no, yog hnub 06/03/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Craig von Buseck dhau ntawm Zaj kawm CIA LI UA IB SIAB HLO UA

Koj yuav tsum paub hais tias, tus Tswv tau xaiv koj kom ua nws lub Tuamtsev uas yog qhov chaw dawbhuv. Nimno koj cia li nqis tes ua thiab muab lub siab xyivfab hlo ua (1 Xwmtxheej 28:10)

Nyob hauv I Xwmtxheej 28, vajntxwv Daviv hu tag nrho cov thawj coj Yixalayees, nrog rau yawg tus tub Xalumoos tuaj thiab qhia rau lawv txog kev yuav ua lub tuam tsev. Daviv hais tias: 

“Yog li ntawd, cov Yixalayees uas yog tus Tswv haivneeg, kuv qhia ntxiv rau nej tabmeeg tus Tswv thiab nej sawvdaws kom nej yuav tsum hwm thiab ceev tus Tswv uas yog peb tus Vajtswv tej Ius uas nws tau samhwm rau peb lawm, kom nej thiaj yuav tau lub tebchaws av zoo tshaj plaws no los ua nej tug, nej thiaj yuav tuav tau lub tebchaws no cia ua nej cov menyuam tug mus ibtxhis.”

“Thiab nws hais rau Xalumoos hais tias, "Kuv tus tub, kuv qhia ntxiv rau koj; koj yuav tsum paub koj txiv tus Vajtswv thiab ua nws tes haujlwm kom kawg koj lub siab thiab tsis txhob ua ob lub siab. Nws paub txhua yam uas peb xav thiab txhua yam uas peb npaj siab ua lawm. Yog koj mus cuag nws, nws yuav zoo siab txais yuav koj; tiamsis yog koj khiav tawm ntawm nws, nws yuav tso koj tseg mus ibtxhis li” (nqe 8-9). 

Nyob hauv Daviv cov lus hais rau nws tus tub, yawg yeej taw qhia meej meej txog txoj kev sib nraug zoo nrog Vajtswv thiab nuj nqis yuav txais tau li hauv qab no: Yog koj mus cuag Nws, Nws yuav zoo siab txais yuav koj; tiamsis yog koj khiav tawm ntawm Nws, Nws yuav tso koj tseg mus ibtxhis li”.

Vajluskub qhia rau peb paub tias Daviv tau xaus nws tej lus nyob rau hauv cov lus no: 

“Koj yuav tsum paub hais tias, tus Tswv tau xaiv koj kom ua nws lub Tuamtsev uas yog qhov chaw dawbhuv. Nimno koj cia li nqis tes ua thiab muab lub siab xyivfab hlo ua” (1 Xwmtxheej 28:10). 

Nyob rau tiam Vajluskub tshiab no, peb paub tias Vajtswv tau xaiv peb txhua tus los ua Nws lub tuam tsev los ntawm lub pob zeb uas muaj sia, txhais tau tias yog dhau ntawm peb txhua tus lub neej thiab Vajtswv Pawg Ntseeg. Hnub no peb yuav tau muaj lub siab tawv taij thov Vajtswv thiab siv zog ua txoj haujlwm vim Vajtswv lub koob meej.

Thov caw nrog kuv peb thov Vajtswv ua ke: Ua Vajtswv Koj tsaug vim Koj tau xaiv kuv los koom tes ua Koj lub tuam tsev, thiab txhim tsa Koj lub tebchaws nyob rau hauv ntiajteb no. Thov Vajtswv Koj pub lub dag zog thiab pub kom kuv muaj lub siab tawv tag siab ua Koj tej haujlwm thiab muab lub koob meej fij rau Vajtswv Vaj Peb Leeg. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv txhua tes haujlwm uas koj txais tau yog yam uas Vajtswv tau xaiv thiab muab cob rau koj. Yog li cia li ua ib siab hlo txais yuav lub nra thiab tag siab ua Vajtswv tes haujlwm thaum uas koj tseem muaj sijhawm. Ntseeg tias Vajtswv yuav foom koob hmoov thiab siv koj kom tawg paj txi txiv rau Nws.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.