Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Phooj ywg, muaj ib tsev neeg yeej xyab tes txais tos koj, ntawd yog Vajtswv tsev neeg. Vajtswv niaj hnub tos koj txais yuav Nws thiab txais yuav Vajtswv txoj kev hlub tseg rau koj. Thaum ntawd, Vajtswv yuav dhau los ua Koj leej txiv, thiab koj dhau los ua Nws tus menyuam uas Nws hlub. 

Hnub no, yog hnub 08/09/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joni Wolf dhau ntawm Zaj kawm LOS RAU HAUV VAJTSWVV PAWG NTSEEG

“Kuv yuav yog nej txiv, nej yuav yog kuv cov tub cov ntxhais. Tus Tswv uas muaj hwjchim loj kawg nkaus yog tus uas hais li no” (2 Kauleethaus 6:18). 

Wb ib niam txiv thawj zaug ntsib Cam Lee rau xyoo 2017. Tus menyuam ntxim hlub heev, nws plaub hau liab, nws ob lub qhov muag ntsuab, plhu muaj quav hnav thaum ntawd nyuam qhuav muaj plaub xyoos. Nws tseem me li no xwb los nws tau ua ntsuag tsis muaj leejtxiv lawm. Thiab thaum ntawd, nws niam yeej ua ib siab cia nws txiv ncaim mus. 

Thaum kuv tus tub yuav Cam niam los ua nws tus txijnkawm, nws kuj puag tus menyuam los tu thiab xav kom tus menyuam yog nws tug. Peb zoo siab heev thaum hnov txog qhov xwm txheej no, thiab lub siab kub lug rau hnub uas Cam dhau los ua wb tus menyuam xeeb tiag tiag. 

Cam nkawd ib niam tub los rau hauv peb tsev neeg. Cam txawm cia li muaj kwv tij nus muag; ntawd yog Macy, hlob Cam ob peb thiv, thiab Zane, me dua Cam ob xyoo. Yeej tsis poob sijhawm ntau, lawv peb leeg txawm cia li dhau los sib txheeb. 

Wb ib niam txiv cia siab tias Cam yuav txais yuav wb, ib yam li wb tau txais yuav Cam, tiamsis wb paub tias yuav poob sijhawm ntau. Vim yav dhau los nws yeej muaj pog yawg hlub nws heev txij thaum nws tau yug los. Wb yuav tau nthuav qhia wb txoj kev hlub rau Cam pom. Thiab muaj ib hnub thaum uas tshuav kuv thiab Cam wb xwb, txhua yam cia li hloov pauv. 

Thawj zaug uas kuv coj Cam mus ua si. Kuv thauj nws mus rau ntawm thaj chaw ua si thiab qhia rau Cam paub txog tej thaj chaw uas Cam tus txiv tshiab tau ua si thaum tseem yau. Thiab wb sib tham ua ke. Thaum taug kev hauv lub vaj, Cam maj mam tuav kuv tes ua rau kuv zoo siab heev. 

Thaum tab tom taug kev ib tug tuav rawv ib tug tes, wb txawm cia li mus pom  ib lub chav rau ntawv tseg rau sawv daws nyeem. Nyob rau hauv muaj ntau hom ntawv tseg rau txhua hom hnub nyoog. Cam muaj cai xaiv ib phau ntawv uas Cam nyiam, tiamsis pauv rau qhov ntawd, Cam ho cev rau kuv ib phau ntawv muaj plhaub ntaub thiab hais tias: “Pog tej zaum koj yuav nyiam phau no.” 

Cam nws swm phau Vajluskub plhaub ntaub uas kuv pheej nqa nrog nraim thaum uas mus tshaj tawm Txojmoo Zoo. Tiamsis wb yeej tsis pib txoj kev sib raug zoo dhau los ntawm sib tham txog Tswv Yexus. Wb txoj kev sib raug zoo pib thaum uas sib tham txog daim plhaub ntaub! Thaum uas koom saib tej phau ntawv muaj tiv ntaub! Thiab xaiv daim tiv uas yus nyiam, wb tau sib txuas tau ua ke. 

Thaum xaus hnub ntawd, zoo tshaj plaws li thaum Cam hais tias: “Kuv tsis xav mus tsev; kuv xav nrog pog koj nyob ua ke”. 

Vajtswv hlub peb. Vajtswv lub homphiaj puag thaum pib yog txais peb ua menyuam puag thiab muab peb hloov los ua ib feem nyob rau hauv Vajtswv tsev neeg. Vajtswv tau nthuav qhia Nws txoj kev hlub thaum tuag saum Ntoo Khaub Lig hloov peb chaw. Ib yam li Vajluskub tau sau: 

“Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb.” (Loos 5:8). 

“Vajtswv  thiaj xub xav tseg lawm hais tias Vajtswv yuav txib Yexus Khetos los coj peb mus ua Vajtswv cov menyuam. Qhov ntawd haum Vajtswv siab thiab raws li Vajtswv tau xav tseg lawm” (Efexaus 1:5). 

Wb ib niam txiv cia siab tias Cam yuav txais yuav wb thiab txais yuav wb txoj kev hlub. Kuj zoo ib yam li Vajtswv xav kom peb txais yuav Nws thiab Nws txoj kev hlub. Vajtswv xav nrog peb nyob ua ke, nrog peb sib tham, nrog peb tuav tes thiab ua tus mloog peb hais: “Kuv xav nrog Koj nyob ua ke”. Ntawd yog yam uas zoo tshaj plaws!

“Nej cia li los nyob ze Vajtswv, Vajtswv thiaj yuav los nyob ze nej” (Yakaunpaus 4:8). 

“Txawm yog li ntawd los cov neeg uas lees yuav nws thiab ntseeg nws, nws pub lawv muaj cai los ua Vajtswv cov menyuam.” (Yauhas 1:12).

Thov caw nrog kuv peb thov Vajtswv ua ke

Kuv ua Vajtswv Koj tsaug vim Koj tau nthuav qhia Koj lub siab hlub tshua tseg rau kuv nyob saum Ntoo Khaub Lig, kom kuv muaj sijhawm dhau los ua ib tug nyob rau hauv Koj tsev neeg. Thov Vajtswv koj pub kom kuv ua lub neej tsimnyog thaum yog Koj tus menyuam thiab hlub Koj tshaj qub. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv xav kom txhua tus txais yuav Nws thiab txais Nws nyob rau hauv Nws txoj kev hlub. Ntseeg tias dhau ntawm peb txhua tus lub neej, coob tug yuav paub Vajtswv, txais yuav Nws txoj kev hlub thiab nkag los nyob rau hauv Leej Txiv saum ntuj lub tsev. 

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.