Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Hais txog koob tsheej Yexus yug, sawv daws yuav xav txog tej lub koob tsheej zoo siab, tej zej zog muaj teeb ci pom kev txhua qhov, tej tsob ntoo Nô-en ua kom zoo nkauj, lossis tus yawg laus Nô-ên caij tsheb zag mus faib khoom plig rau tej menyuam yaus… 

Hnub no, yog hnub 08/12/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gene Markland dhau ntawm zaj kawm DAIM DUAB TIAG NTAWM LUB KOOB TSHEEJ

Vajtswv txib nws tib leeg Tub los rau hauv ntiajteb no kom peb cov uas ntseeg nws tus Tub tau txojsia tshiab. Vajtswv ua li ntawd twb yog Vajtswv qhia rau peb hais tias nws hlub peb. Txojkev hlub lub ntsiab yog li no: Tsis yog peb hlub Vajtswv, tiamsis yog Vajtswv hlub peb thiab nws txib nws tus Tub los tuag theej peb lub txhoj, Vajtswv thiaj zan tau peb lub txim. ( 1 Yauhas 4:9-10)

Sim xav txog lub sijhawm no seb. Muaj ib lub tsev ntoo nyob rau nram tw roob. Daus voob av tas thiab tej tsob ntoo los khov ua daus tas zoo li hlaws kub. Qhov cub cig hlob hlob tawg pig poog ntawm sab tes laug hauv tsev tuaj. Ib phab ntsa dav ntsia pom rau nram nroog nyob hauv tiaj nrag, thaj chaw uas tab tom muaj teeb cig kaj nrig txhua qhov npaj tos koob tsheej Yexus yug. Tag nrho tau cov ntoo khov ua daus no xov ncig nyob rau hauv cig kaj nrig thaum lub hli tab tom ntseg. Tsob ntoo Nô-ên nyob ntawm sab tes xis hauv chav tau tsab zam zoo kawg. Ntawm nws lub hauv paus muab ib daim ntaub liab coj los xov puas ncig, tsaus ntuj tuaj ua rau lub siab nyob tsis tus, tos ntsoov tej khoom plig nyob sab hauv. 

Ntawm no yog lub caij npaj ua koob tsheej Yexus yug uas kuv ntsia pom… nyob rau hauv ib phau ntawv tau ib tug neeg uas kuv nyiam nyeem nws cov ntawv heev sau. Yog, kuv tab tom zaum saum rooj thiab nyeem txog zaj xwm txheej no. Lub ntsiab lus ntawm phau ntawv puv npo lub caijnyoog ua koob tsheej, tham txog ib nkawm niam txiv nkawd tau muaj sijhawm mus ncig nrog tej lub caijnyoog hloov pauv hauv lub neej. Nkawd txawm muaj ib txoj kev pib dua tshiab, nrhiav pom kev hlub thiab kev cia siab rau lub neej tom ntej, nyob rau hauv lub koob tsheej Yexus yug. Phau ntawv no nws muaj ntau yam zoo tseg los nyeem ua si, tiamsis tshuav lub koob tsheej Yexus yug no ho zoo li cas? 

Thaum uas nyeem ntawd, kuv kuj qhib tej nkauj hu txog koob tsheej Yexus yug saum fuab cua Internet. Kuv mloog tej suab nkauj ib txwm hu txog koob tsheej Yexus yug xws li zaj xwm txheej tus neeg daus, koob tsheej dawb, tsheb khiav saum tej daus thiab tus nees zag… thiab ib zaug ntxiv kuv rov cim civ nug tias tej nkauj no zoo mloog ua si, tiamsis tshuav lub koob tsheej Yexus yug no ho zoo li cas? 

Peb tu vaj tu tsev kho kom zoo, mus koom kev pehawm, tej haujlwm npaj ua koob tsheej Yexus yug, tiamsis yog ua tib zoo saib ces tej daim duab uas peb tsau tsawv rau hauv, txawm yog zoo siab tiag tiamsis nws ho tsis muaj yam dab tsi yog koob tsheej Yexus yug li. 

Thaum no, cia li xav txog lub sijhawm no. Ib lub qab zeb siv los ua lub nkuaj nyuj. Ib nkawm niam txiv hluas hluas yug menyuam tus pog pab yug xwb twb tsis muaj yuav ua li cas hais txog kws tshuaj. Tseem tsis muaj ib lub txaj rau tus poj niam no pw thaum uas nws yug menyuam. Tsuas muaj ib nyuag co khaub nyab qhuav tau tus txiv tab tom txhawj maj nroos muab los pua ua ib nyuag lub txaj pw tas muab lub nyuag tsho ntev pua rau saud. Sim xav txog lub sijhawm uas tus pojniam tuav nws tus txiv tes zawm ceev ceev thaum uas siv zog kom yug tau nws tus menyuam, tshuav tus txiv yeej tsis so thiab txhawb zog, “siv zog, twb yuav tau lawm, yuav tau tiag, ib ntsis thiab xwb tau lawm!” 

Tag nrho peb txhua tus yeej paub tias nkuaj nyuj tsw li cas thiab paub tias thajchaw ntawd nws tsis huv li. Tiamsis yam uas nkawm niam txiv hluas no muaj yog tau txais koob hmoov thiab Vajtswv tus muaj hwjchim loj kawg nkaus tiv thaiv thaum uas Vajtswv tus tub los yug rau hauv ntiajteb no. 

Lub caijnyoog zoo li no yeej tsis muaj yam dabtsi zoo ua si, tiamsis ntawm no thiaj yog koob tsheej Yexus yug tiag. 

Vajluskub qhia: 

“Vajtswv txib Nws tib leeg Tub los rau hauv ntiajteb no kom peb cov uas ntseeg Nws tus Tub tau txojsia tshiab. Vajtswv ua li ntawd twb yog Vajtswv qhia rau peb hais tias Nws hlub peb. Txojkev hlub lub ntsiab yog li no: Tsis yog peb hlub Vajtswv, tiamsis yog Vajtswv hlub peb thiab nws txib nws tus Tub los tuag theej peb lub txhoj, Vajtswv thiaj zan tau peb lub txim.” ( 1 Yauhas 4:9-10)

Yog li, xyoo no, thaum uas saib tej zaj movies lossis duab zoo nkauj txog koob tsheej Yexus yug, mloog tej zaj nkauj koob tsheej uas yus nyiam, mus koom nrog tej kev pehawm muaj kev zoo siab, cia li xav txog lub nkuaj nyuj tsw phem tsw qias uas muaj ib tug niamtsev hluas tab tom siv zog kom yug tau Vajtswv  Tus Tub, tus uas yog neeg ntiajteb tus cawmseej. Tswv Yexus los yug rau ib lub caijnyoog uas txomnyem tshaj plaws thiab qias tshaj plaws. Nco ntsoov tias Vajtswv tau nrog nkawd nyob rau hmo Tswv Yexus yug ntawd zoo li cas. Thiab nco ntsoov tias ntawd thiaj yog daim duab tiag ntawm lub koob tsheej Yexus yug.

Thov caw nrog kuv peb thov Vajtswv ua ke: Leej Txiv tus nyob saum ntuj, ua Koj tsaug vim Koj hlub peb thiab txib Koj Leej Tub los rau hauv ntiajteb no los ua qhov khoom theej txhoj rau peb. Thov pab kom peb nco ntsoov thiab ua lub neej kom tsimnyog rau Koj txojkev hlub ntawd. Kuv thov hauv Yexus Khetos lub npe.Amees.

Cov kwv tij txhua tus, kav tsij koom lub caijnyoog zoo siab ntawm lub koob tsheej Tswv Yexus los yug. Tiamsis nyob rau ib teg haujlwm twg uas koj tau nqes tes ua, cia li xav txog thawj hmo koob tsheej Tswv Yexus yug thiab xam txog Vajtswv tau hlub koj npaum cas thaum uas cia Nws tus tub los yug rau lub caijnyoog zoo li ntawd. Koj puas xav ua Vajtswv tsaug tamsim no?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.