Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Tau ib nrab xyoo ua neej nrog tus kab mob kis, ntsib dhau tej kev txomnyem, kev quaj ntsuag, thaum twg twb muaj kev txhawj, coob tug tab tom xav tsis paub tias yus tab tom ua neej nyob rau tiam twg, lub neej tom ntej yuav mus rau qhov twg? Yog li koj puas xav paub tias peb tab tom ua neej nyob rau tiam twg?

Hnub no, yog hnub 10/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm zaj kawm KOJ TAB TOM UA NEEJ NYOB RAU TIAM TWG?

Tus TSWV nyob saum ntuj ntsia ntsoov tuaj rau neeg ntiajteb saib puas pom leejtwg ua neeg ntse, thiab pehawm Nws.” (Ntawv Nkauj 14:2)

Nyob nrog tej uas tabtom tshwm sim nyob rau lub sijhawm tamsim no, kab mob kis thoob txhua qhov; kev tsov rog ntawm ntau lub teb chaws, tawg ua pab pawg, kev sawv tawm tsam ntawm txhua pab pawg sib tua ua phem; tej pejxeem tsis muaj noj muaj haus, khiav teb khiav chaw…, tib neeg tab tom sib nug tias, “Yus tab tom ua neej nyob rau tiam twg?” Lo lus nug no yog ib lub suab nqua hu kom tsim dheev los. Hais kom luv, peb twb ua yus li haujlwm ntev heev lawm thiab tamsim no yog lub sijhawm cia Vajtswv ua Vajtswv li haujlwm.

Ntawm no yog lub sijhawm cia Vajtswv ua raws li tej kev npaj nyob hauv Nws lub homphiaj. Tes haujlwm peb yuav tau ua yog tag siab nrhiav tus Tswv. Pauv qhov uas cia siab rau tib neeg tej tswv yim, peb yuav tau khiav mus cuag Vajtswv, vam khom Nws thaum uas peb ntsib tej teeb meem txom nyem.

“Tus TSWV nyob saum ntuj ntsia ntsoov tuaj rau neeg ntiajteb saib puas pom leejtwg ua neeg ntse, thiab pehawm Nws.” (Ntawv Nkauj 14:2).

“Cov neeg ntse nrhiav kev txawj ntse thiab muab siab rau kawm”. (Pajlug 18:15).

Kuv ntseeg tias tom qab lub caijnyoog txom nyem tsaus ntuj nti no ploj mus ces yeej yuav rov qab kaj ntug thiab lub hnub yeej yuav rov tawm ci tuaj zoo li thaum tav su. Ntau tshaj txhua yam, lub sijhawm no tsim nyog peb yuav tau taij thov Vajtswv, thov kom Nws pub kev txawj ntse, to taub thiab muaj kev ntseeg kom ruaj khov. Cia li thov Vajtswv pub rau peb paub yuav ua dab tsi thaum uas nyob rau tej hnub muaj kev txom nyem, nyob ua sab ua sua, thiab lub caijnyoog xov xwm raug ntau yam ua rau tsis zoo. Tag nrho peb txhua tus puav leej cheem tsum Vajtswv ua tus coj kev rau yus lub neej tom ntej, rau tsev neeg thiab rau yus txoj hmoo.

Ntawm no tsis yog tsuas yog ib lub sijhawm tsaus ntuj nti xwb tiamsis tseem yog ib lub caijnyoog cov ntseeg Vajtswv yuav tau txo hwjchim, nrhiav Vajtswv thiab qhuas Vajtswv tus uas muaj sia zees nyob. Vim yog peb tej lus qhuas Vajtswv ntawd ua rau yeeb ncuab yij fab yij fwj, xav tsis thoob. Yuav tau nkag siab tias peb tus yeeb ncuab tsis yog kab mob, ntshaib nqhis, thiab kev tawm tsam. Tus yeeb ncuab tiag yog ntxwgnyoog. Nws yog tus tswj neeg lub siab, tseb tej kev txom nyem rau tib neeg ntiajteb.

“Nej yuav tsum ceevfaj zov zoo tsis txhob nkees, rau qhov dab ntxwgnyoog tus uas yog nej tus yeebncuab, nws mus mus los los ib yam li tus tsov ntxhuav uas quaj nrhiav tom tsiaj noj. Nej yuav tsum muab siab rau ntseeg thiab tawmtsam dab ntxwgnyoog, rau qhov nej twb paub lawm hais tias cov kwvtij ntseeg hauv qab ntuj no, lawv tab tom raug kev tsimtxom ib yam li nej raug thiab. (I Petus 5:8-9).

Ntawm no yog tiam uas koj yuav tau mloog tej zaj xov xwm zoo. Vajtswv yog tus tswj, Nws yeej tseem tswj rawv txhua yam. Txawm yog lub ntiajteb koj tab tom nyob zoo li cas los yuav tau paub tias:

“Nws nyob ze txhua tus uas thov Nws thiab txhua tus uas muab siab npuab Nws. Nws pub rau txhua tus uas hwm Nws raws li tej uas lawv xav yuav, Nws hnov lawv tej suab thov thiab cawm lawv dim. Tus TSWV tiv thaiv txhua tus uas hlub Nws, tiamsis Nws yuav ua kom cov neeg siab phem raug kev puastsuaj.” (Ntawv Nkauj 145:18-20).

Ntawm no yog lub sijhawm yuav tau ntseeg siab tsis yog txhawj ntshai. Ntawm no yog lub sijhawm kev huam vam yuav tau nkag los rau hauv peb txhua tus lub siab, txij ntawd hloov pauv peb txoj kev ua neej.

Cia li pib los ntawm kev thov Vajtswv? Peb twb tau hnov ntau lo lus tim khawvz, paub ntau zaj xwm txheej txog kev huam vam. Tej ntawd nthuav qhia rau pom tias tib neeg lub siab tab tom tshaib nqhis Vajtswv. Thiab Vajtswv xav coj txoj kev huam vam los rau tus uas tag siab ntsws nrhiav Nws.

Yog muaj leej twg nug, “Koj tab tom ua neej nyob rau tiam twg?” koj puas npaj yuav teb, “Ntawd puas yog lub sijhawm huam vam losis tsi yog?

Thov caw nrog kuv peb thov Vajtswv ua ke: Ua Vajtswv Koj tsaug txawm yog lub ntiajteb no yuav zoo li cas los Koj yeej yog tus Vajtswv muaj nyob, tus tswj txhua yam thiab yeej zaum rawv saum Koj lub zwm txwv siab. Thov pub kom peb txhua tus lub siab txo hwjchim, khiav los nrhiav Koj, txhawb nqa Koj thiab ntsia pom kev loj hlob nyob rau hauv tsev neeg, Pawg Ntseeg thiab tej pejxeem. Kuv thov hauv Yexus Khetos lub npe. Amees.

Cov kwv tij txhua tus, ntawm no yog lub sijhawm uas koj thiab tej neeg txheeb ze yuav tau txo hwjchim, khiav los nrhiav Vajtswv hauv kev taij thov Nws. Cia li nqua hu los ntawm lub siab thov Vajtswv, koom siab ua ke thov Vajtswv rau cov Pawg Ntseeg teb chaws Nyablaj, pej xeem Nyablaj thov Kom Vajtswv tshua tpeb haiv neeg thiab kom muaj ntau tug tau Vaj Ntsujplig hloov siab kom txais tau txoj kev huam vam ntawm sab ntsujplig.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.