Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Cov ntseeg Vajtswv ua neej nyob rau hauv lub ntiajteb no tab tom muaj tej ntsus kev tsov rog ntawm sab ntsujplig thiab dab ntxwgnyoog niaj hnub nrhiav kev cab kom peb poob mus rau hauv txoj kev txhaum. Paub tias muaj ntau zaug peb yuav qaug zog, peb yuav swb, peb yuav ua txhaum, tiamsis los ntawm lub siab uas yog ib tug menyuam, peb tau nqua hu cia li khiav los ntawm Leej Txiv thiab thov Nws zam txim thiab pub hwjchim rov qab tawm tsam dua. 

Hnub no, yog hnub 11/02/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Terry Meeuwsen dhau ntawm zaj kawm TUS UAS UA MENYUAM LUB SIAB

Rau qhov nej tsis tau tus ntsujplig uas coj nej mus ua qhev kom nej txhawj nej ntshai, tiamsis nej tau Vaj Ntsujplig tus uas coj nej los ua Vajtswv cov menyuam, kom nej muaj cuabkav hu Vajtswv hais tias, "Anpas! Kuv Txiv!" (Loos 8:15)

Vajluskub qhia rau peb, 

“Nej yuav tsum ceevfaj zov zoo tsis txhob nkees, rau qhov dab Ntxwgnyoog tus uas yog nej tus yeebncuab, nws mus mus los los ib yam li tus tsov ntxhuav uas quaj nrhiav tom tsiaj noj” (I Petus 5:8). 

Vajluskub kuj qhia paub, 

“Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj.” (Efexaus 6:12). 

Peb tab tom nyob rau hauv ib ntsus tsov rog muaj lub ntsiab nyob mus ib txhis. Saib sab nraud, nws zoo cuag li txoj kev sib txeeb ntawm tus kheej nrog tej kev qaug zog ntawm sab nqaij tawv thiab lub siab. Thiab dab ntxwgnyoog xav kom koj xav li ntawd. Ntxwgnyoog xav kom koj suav tias ntawm no yog koj qhov teeb meem, yog koj txoj kev swb. Thiab tej teeb meem ntawd loj dua koj. Ntxwgnyoog txaus siab heev thaum ntsia pom koj swb rau tej seem no hauv koj lub neej. 

Ntau xyoo dhau los, kuv siv zog tawm tsam nrog tej kev sim siab nyob rau hauv lub neej los ntawm txoj kev siv zog txhawb yus lub siab, zawm hniav qees, ntaug taw. Kuj muaj ntau zaug kuv yeej, tiamsis feem ntau kuv hnov muaj kev txhaum ntawm Vajtswv xub ntiag. 

Puas tau muaj ib zaum twg koj ntsia pom tus miv muab tus nas qhwv rau hauv qab lawm tau? Feem ntau tus miv yuav zaum saib txaus siab thiab zes nws tus yeebncuab thaum ntsia pom nws tus yeebncuab nrhiav kev khiav tawm. Ntawd yog txoj kev uas kuv pom tias dab ntxwgnyoog tab tom zes kuv nyob rau hauv kuv txoj kev ua rog. Txhua zaug uas kuv swb, hauv kuv lub taub hau rov qab tshwm txoj kev xav, “Vim li cas kuv yuav tsis muaj zog li no? Kuv paub Vajtswv, kuv hlub Vajtswv, kuv paub tias yam twg yog yam yuav tau ua thiab kuv xav hloov. Vim li cas kuv ho ua kev txhaum li ntawd? 

Yog tias koj twb ntsib dhau tej yam zoo li no ib yam li kuv, cia li mus rau hauv Vajtswv txojlus nyob rau hauv Loos tshooj 7. Thiab thaum koj nyeem mus txog tshooj 8, koj yuav pom ib txoj kev ua rau koj xav tsis thoob: 

“Tus uas ua lub neej raws li lub siab qub qhia, tus ntawd yeej ua raws li nws lub siab qub nyiam, tiamsis tus uas ua nws lub neej raws li Vaj Ntsujplig qhia, tus ntawd yeej ua raws li Vaj Ntsujplig lub siab nyiam” (Loos 8:5) 

Yuav ua li cas kom peb ua tau lub neej raws li Vaj Ntsujplig lub siab nyiam? 

“Rau qhov nej tsis tau tus ntsujplig uas coj nej mus ua qhev kom nej txhawj nej ntshai, tiamsis nej tau Vaj Ntsujplig tus uas coj nej los ua Vajtswv cov menyuam, kom nej muaj cuabkav hu Vajtswv hais tias, "Anpas! Kuv Txiv!" (Loos 8:15)

Lo lus “Anpas” muaj lub ntsiab tias “Kuv txiv”. Yog li tus phooj ywg, ntawm no yog tus yaum sij rau koj txoj kev muaj yeej. Thaum koj ntsib kev sim siab, cia li khiav los mus cuag Leej Txiv! Cia li nkag los rau Vajtswv txoj kev tshwm ntsej tshwm muag thiab txais yuav Nws lub hwjchim. Vajluskub qhia rau peb paub tias nyob rau hauv peb txoj kev qaug zog, ces Vajtswv yog tus muaj zog. Vajtswv kev tshwm ntsej muag yuav pab rau kom peb pom meej txog peb tej teeb meem, thiab txoj kev tiv thaiv, kev kaj siab, thiab lub hwjchim saum ntuj yuav puv npo rau hauv peb. 

Yog tias koj nyob rau lub sijhawm uas koj tus kheej twb swb lawm thiab nyob rau hauv koj puv npo txoj kev xav tias yus yog neeg txhaum ces nco qab ntsoov tias, 

“Nim no tus uas nrog Yexus Khetos koom ib txojsia, tus ntawd yuav tsis raug txiav txim” (Loos 8:1)

Tsi txhob cia yeebncuab pleev tej niag kev phem kev qias rau koj lub ntsej muag. Vajtswv yeej yuav zam txim rau koj. Vajluskub yeej hais meej meej tias tsis muaj leej twg lossis ib yam dab tsi yuav cais tau koj tawm ntawm Vajtswv txoj kev hlub ib txhis uas Vajtswv tseg rau koj. Thaum ntsib kev txomnyem, thaum ntsib kev sim siab, cia li khiav mus rau ntawm Leej Txiv lub siab.

Thov caw nrog kuv peb thov Vajtswv ua ke: Anpas, Txiv, kuv yeej ib txwm tsis muaj zog, ib txwm yog neeg poob qis, thov Koj pab kuv thaum tej nthwv cua hauv lub neej los voob nkaus kuv. Kuv thov lees kuv tej kev txhaum rau Koj, thov Txiv Koj zam txim. Thov Koj laub kom puv nkaus Koj tus ntsujplig rau kuv thiab qhia kom kuv paub Koj txoj kev. Thov pub Yexus Khetos lub siab rau kuv thiab pab kom kuv paub tseeb tias kuv yog leej twg nyob rau hauv Koj. Ua Txiv Koj tsaug vim Koj txojlus yeej hais meej meej, “Peb vam khom tus uas hlub peb muaj yeej”, yog li kuv thiaj tau so nyob rau hauv txoj kev muaj yeej uas Koj pub. Hauv Tswv Yexus Khetos lub npe, kuv thov Amees.

Cov kwv tij txhua tus, yog tias koj twb tau swb thaum raug kev sim siab, hloov qhov uas koj khiav nkaum cia li khiav mus cuag Vajtswv thiab thov Nws zam lub txim. Vajtswv tab tom xyab Nws ob txhais tes dav los txais tos Koj los cuag Nws. Nyob hauv Vajtswv uas yog Leej Txiv tus muaj kev hlub, koj tsis yog tsuas txais tau kev zam txim xwb tiamsis koj lub neej tseem puv npo kev kaj siab thiab lub hwjchim kom ua lub neej muaj yeej mus ntxiv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.