Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas tau muaj zaum twg koj hais tej lus ua rau lwm tus tu siab thaum muaj kev sib ceg lawm tau? Txoj kev xav npau taws tswj tsis tau tus kheej los qhov twg los? Puas yog koj xav ua pov thawj qhia txog yus tus kheej thiaj yog tus yog? Peb sawv daws puav leej yog cov neeg zoo tsis txaus tiamsis tau Vajtswv zam txim. Txhua qhov teeb meem puav leej tau daws thaum uas peb tso yus lub meej mom tseg thiab zam txim ib yam li Tswv Yexus tau zam txim rau peb lawm.

Hnub no, yog hnub 15/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm Zaj kawm TSO YUS LUB MEEJ MOM TSEG

“Ob leeg zoo dua ib leeg, rau qhov ob leeg ua haujlwm tau nqi zog ntau dua. Yog ib tug ntog lawm, ib tug yuav rub nws tes sawv. Tiamsis tsis zoo rau tus uas nws ib leeg xwb, yog nws ntog lawm tsis muaj leejtwg yuav rub nws tes sawv”. (Tejlus Qhia 4:9-10).

Ncaj rau hnub xya ob peb thiv dhau los, kuv tau nrog kuv tus txiv sib cav heev. Thaum ntawd, wb nyias khawm nyias tes thiab ib tug hais lus nrov rau ib tug. Wb ob leeg yeej tsis muaj leej twg kam zam thiab kam ua tus swb.

Yog li kuv thiaj khiav mus rau nraum zoov dob nroj thiab cia siab tias qhov haujlwm no yuav ua rau kuv txoj kev chim ntawd dhau mus.

Kuv muab hlau los khawb av. Hmoov av ya rau txhua qhov, ua rau kuv tej ris tsho ceb tag. Tiamsis kuv rau siab ntso ua qhov haujlwm ntawd zoo yam li tsis muaj taig kis lawm. Tas kuv txawm cia li hnov tus neeg zej zog nyob ze kuv sawv ntawm kuv ib sab thiab ntxhi twj ywm rau kuv tias: “Muaj dabtsi tshwmsim los raug rau koj os niam laus? Saib cuag li hnub no koj qaug zog heev.” Kuv tsa muag saib los ntawm lub ntsej muag lo av li. Wb ob leeg puav leej cia li luag nrov nrov! Qhov uas tus phooj ywg tshwm los lub sijhawm no yog yam uas kuv cheem tsum.

Thaum uas wb pib hais lus ces tus neeg zej zog nws pib qhia nws qhov xwm txheej. Thaum tseem tab tom hais kuv txawm cia li zoo siab twj ywm thiab ua Vajtswv tsaug vim Vajtswv tau coj nws tuaj ntsib kuv.

Thaum ntsia pom tus neeg zej zog lub ntsej muag luag ces kuv xav tias: “Tej zaug nws tsis paub qhov uas nws tuaj ntsib kuv ntawm no yog Vajtswv lub siab nyiam thiab twb yog qhov uas nws muaj lub siab xyiv fab hlo ntawd ua rau kuv saib kuv tus kheej yeej tsis tseem ceeb dua lwm tus.”

Kuv xav tsis thoob vim txhua yam tshwmsim zoo li ntawd thiab kuv txoj kev chim nyob hauv siab cia li yaj tshis mus. Kuv hais twjywm rau kuv tus kheej tias: “Txawm zoo li cas los qhov haujlwm ntawd tsuas yog ib qhov haujlwm me xwb.” Thiab qhov uas nrog yus tus txiv sib ceg ob peb los dhau los ntawd yeej tsis muaj dabtsi tseem ceeb yuav ua rau yus npau taws npaum li ntawd.

Cov ntseeg Vajtswv yeej yog ib cov neeg zoo tsis txaus thiab tau Vajtswv zam txim. Vajtswv nkag siab peb tus neeg qaug zog thiab yeej ua tsis tau dabtsi tshaj lwm tus. Muaj ntau zaug nyob rau hauv lub neej no Vajtswv yuav siv lub caijnyoog los muab peb tus kheej txoj kev khav txo nqes. Peb tej phooj ywg, tej neeg txheeb ze lossis ntau zaug cov neeg uas peb tsis tau paub dua lawv yog cov uas kam mloog tej uas peb qhia. Lawv ua zoo pab peb tawm rau sab nraud thiab saib txhua yam los ntawm txoj kev tshiab.

Ua Vajtswv tsaug vim Vajtswv siv Vajtswv txojlus nyob hauv Tej Lus Qhia 4:9-10 ntuas kom peb nco txog lub nra thaum peb muaj coob tug nyob ua ke, nyob ua zej ua zos:
“Ob leeg zoo dua ib leeg, rau qhov ob leeg ua haujlwm tau nqi zog ntau dua. Yog ib tug ntog lawm, ib tug yuav rub nws tes sawv. Tiamsis tsis zoo rau tus uas nws ib leeg xwb, yog nws ntog lawm tsis muaj leejtwg yuav rub nws tes sawv”.

Thov caw nrog kuv peb thov Vajtswv ua ke.
Leej Txiv, kuv ua Koj tsaug vim Koj tau cia muaj coob tug neeg nyob ib sab ntawm kuv lawv hlub kuv thiab pab kuv. Thov Koj pab kom kuv paub tswj kuv txoj kev npau taws, zoo siab hlo tso kuv txoj kev khav theeb tseg thiab ua zoo rau lwm tus los ntawm txoj kev hlub. Kuv cia siab tias yuav coj txoj kev txhawb zog pub rau txhua txoj kev sib raug zoo uas kuv tab tom muaj. Thov Vajtswv pab kom kuv yuav pom txog lwm tus kev cheem tsum thiab zoo siab hlo pab lawv. Kuv thov hauv Tswv Yexus Khetos lub npe. Amees.

Cov kwv tij txhua tus, thaum peb muab peb tus kheej txo nqes thiab saib lwm tus tseem ceeb dua yus yuav pab tau peb yooj yim tso peb tus kheej txoj kev khav theeb tseg. Cia li muab peb tej kev xav fij rau Vajtswv cia Vajtswv ua tus tswv, Vajtswv yog tus pab koj daws tej teeb meem thiab kev tsis sib haum. Yog li txhob maj hais tawm tej lus ua rau lwm tus tu siab tiamsis cia li thov Vajtswv kom Vaj Ntsujplig ua tus coj koj kev ua yam yuav tau ua. Txais yuav lub sijhawm zoo Vajtswv pub rau koj kom rov qab sib haum nyob hauv txhua txoj kev sib raug zoo.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.