Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Koob tsheej Tswv Yexus sawv yog ib hnub tseem ceeb heev rau cov ntseeg Vajtswv ua kevcai nco txog Tswv Yexus sawv hauv qhov tuag rov los, coj txoj kev cia siab los rau cov uas ntseeg Nws. Tiamsis qhov uas muaj lub koob tsheej Yexus sawv twb yog vim Vajtswv hlub peb. Yog li, peb txhua tus tsis txhob coj txoj cai no zoo li yuav tsum tau ua xwb, tiamsis cia li txais yuav tag nrho tej uas Vajtswv tau ua pub rau peb. 

Hnub no, yog hnub 16/04/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Markins dhau ntawm Zaj kawm KUV LUB KOOB TSHEEJ YEXUS SAWV

Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb. (Loos 5:8)

Txij puas thaum tseem yau, kuv xtwb nyiam lub koob tsheej Yexus sawv heev. Vim tsis muaj ib yam dab tsi ua rau kom kuv yuav tsis nyiam lub koob tsheej no? Nyob rau lub sijhawm no, wb ob vivncaus tau niam thiab txiv nkawd yuav tej ris tsho tshiab, nrog tej tiab thoov tshiab, muaj nkawm vuam txwv taw  ntev, ib lub kaus mom thiab ntau zaug tseem muaj nkawm vuam txwv tes dawb thiab. Wb khaws tag nrho tej qe qaib ntawm lub cooj qaib thiab kos duab rau tej qe ntawd. 

Nyob rau hnub sawv ntxov ua koob tsheej, wb zoo siab txais tej qe thaj ua ntej uas yuav zaum rau saum rooj noj tshais. Kev pehawm hauv tuam tsev zoo heev, wb hnav wb tej ris tsho tshiab thiab mus hu tej zaj nkauj wb tau npaj tseg. 

Tom qab pe hawm tas, peb yuav mus rau ntawm niam tais tsev ua ke, koom nrhiav cov qe uas ua kevcai nco txog Tswv Yexus sawv. Yawg, pog, txiv, niam, dablaug, niam tais hluas, tej kwv tij viv ncaus koom ua ke ntawm lub rooj puv npo tej khoom noj. Peb muaj sijhawm sib zeg ua si, noj haus, tau saj ntau yam thaj thiab ncuav. 

Tej zaug koj yuav cim civ nug tias yog li Tswv Yexus nyob qhov twg nyob rau hnub koob tsheej tseem ceeb no? Tej zaug koj yuav xav tias vim li cas yog hnub nco txog Tswv Yexus sawv ua cas tsuas ua tej haujlwm tseg rau peb xwb? Kuv tus kheej yeej tsis muaj dabtsi khuab xeeb txog tej no. Kuv tsis yog hom neeg yuav txiav txim rau txoj kev coj noj coj ua rau hnub ua kevcai nco txog Tswv Yexus sawv vim kuv suav tias ntawd yog tej uas ib txwm coj yog, vim yuav pab kom sawv daws nyob rau hauv tsev neeg muaj sijhawm los nyob ua ke thiab muaj lub sijhawm zoo ua ke. Tiamsis yim loj hlob tuaj, kuv kuj pom txog kuv qhov teeb meem thaum hais txog hnub Tswv Yexus sawv, vim tias txhua yam tsuas npaj ua rau kuv tus kheej xwb: kuv tus kheej sab nraud, kuv tej khoom ua si, kuv txoj kev ua si. 

Hais tseeb tiag mas kuv nkag siab tias koob tsheej Yexus sawv ces yog ua kom muaj nqis rau kuv, tsuas txawv nyob rau ntawm tej uas Tswv Yexus tau ua. Tswv Yexus tau muab ntuj ceebtsheej zoo tso tseg, los nyob hauv lub ntiajteb puv npo kev sim siab, tsis muaj kev ncaj ncees, muaj kev tu siab no vim kuv thiab peb txhua tus. Nws tuag txomnyem ntsuav saum ntoo khaublig vim kuv thiab peb txhua tus. Nws twb kov yeej kev tuag thiab sawv rov qab los lawm, vim kuv thiab peb txhua tus. 

Vajluskub nyob rau hauv Loos 5:8 sau, 

“Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb”. 

Yog li tig rov qab los rau lub koob tsheej Tswv Yexus sawv, kuv xav kom peb yuav tau tuav tej uas ib txwm coj dhau los ntawd, yog lub sijhawm zoo muaj ua ke nrog tsev neeg kom peb muaj sijhawm sib hlub, nyob ua ke. Tiamsis tib txhij ntawd, peb txhua tus kuj yuav tau tseg ib hnub twg lossis ib lub sijhawm twg, piv txwv li hnub xya ua ntej hnub uas Tswv Yexus sawv los nco txog tej uas Tswv Yexus tau ua rau peb. Peb muaj cuab kav xav txog tej haujlwm, tej homphiaj yuav ua, tej khoom siv los ua rau hnub koob tsheej Yexus sawv thiab xav txog lub ntsiab ntawm tag nrho txhua yam nyob rau lub sijhawm uas tus Tswv tau tuag thiab sawv rov qab los. Kuv ntseeg tias tej ntawd yuav pab kom peb ntsia pom kom tob txog Vajtswv thiab peb kuj yuav tau Nws tshoov siab kom ua tim khawv txog Nws txoj kev tuag thiab kev txomnyem rau lwm tus. Peb siv ib nyuag mentsis sijhawm ntsiag to, los nyob hauv Vajtswv txoj kev hlub loj uas voob nkaus hnub uas Tswv Yexus sawv ntawd. 

“Cia li ua tus Tswv tsaug, cia li piav nws lub koob lub npe uas zoo kawg nkaus rau sawvdaws; cia li qhia kom txhua haivneeg paub tus Tswv tej haujlwm uas nws ua” (Ntawv Nkauj 105:1). 

Koob tsheej Yexus sawv yog lub caijnyoog tseg rau peb qhuas thiab pehawm Vajtswv thiab ua tim khawv qhia txog Vajtswv tej haujlwm. Peb cia li sau ib tsab ntawv ua Vajtswv tsaug. Peb qhia rau tej menyuam kos ib daim duab lossis ua ib qhov khoom nthuav qhia nco txog tej uas Vajtswv tau ua. 

Kuv ntseeg tias Vajtswv yeej tsis xav kom peb tso tseg txoj kev sib sau ua ke thiab siv zov muab tej kevcai ntseeg nruj nruj los hloov, los khi cia. Kuv ntseeg tias Vajtswv yuav zoo siab heev thaum ntsia pom peb luag, peb hlub thiab ib leeg ncaj ncees rau ib leeg. Tiamsis kuv kuj ntseeg tias Vajtswv yuav zoo siab dua thaum uas peb paub siv sijhawm los  nrog Vajtswv tshwm ntsej muag ua ke, nthuav tawm lub siab qhuas Vajtswv, nco Vajtswv tshav ntuj txog tej uas Vajtswv tau ua rau peb nyob rau hnub uas Tswv Yexus sawv ntawd.

Thov caw nrog kuv peb thov Vajtswv ua ke: Ua Tswv Yexus tsaug vim Koj tau los rau hauv lub ntiajteb no, tuag theej kuv tej kev txhaum. Koj tau sawv rov qab los muaj yeej thiab kov yeej kev tuag thiab qhib ib txoj kev cia siab rau kuv ua neej. Thov pub rau kom kuv zoo siab hauv Koj txoj kev tshwm ntsej muag thiab ua tim khawv qhia txog lub ntsiab ntawm koob tsheej Yexus sawv tseg rau tej neeg ib ncig. Kuv thov hauv Tswv Yexus Khetos lub npe. Amees.

Cov kwv tij, hnub no, cia li xav txog tag nrho tej uas Tswv Yexus tau ua rau koj dhau ntawm Nws txoj kev tuag thiab sawv hauv qhov tuag rov qab los. Koj yuav ua dabtsi los nthuav tawm txoj kev nco Nws txiaj ntsig ntawd pub rau Tswv Yexus? Koj muaj cuab kav mus cuag Nws thiab hu nkauj qhuas Nws, sau ib zaj nkauj, kos ib daim duab lossis lwm yam uas koj muaj peev xwm ua tau.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.