Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej txhua hnub uas lawv tau ntsib dhau los, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Nyob ntawm cov neeg peb hlub. Peb xav paub seb lawv xav li cas txog peb tus kheej. Yog li koj puas xav tias Vajtswv xav li cas txog koj?

Hnub no, yog hnub 18/03/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm lub npe VAJTSWV HAIS LI CAS TXOG KOJ?

Tej zaum cov hauv roob thiab pov roob yuav tawg mus, tiamsis Kuv txojkev uas hlub koj yuav tsis paub kawg li. Kuv coglus tseg hais tias yuav muaj kev thajyeeb, mas Kuv yuav ua raws li Kuv tej lus ntawd mus ib txhis tus Tswv uas hlub koj yog tus uas hais tej lus no

Koj puas paub tias koj tshwj xeeb heev rau Vajtswv ? Koj puas paub tias Vajtswv hlub koj tshaj txhua yam ? Kuv pom tau tias Vajtswv Txojlus twb hais ntau txog Vajtswv kev hlub, tiamsis cuag li peb ho tsis pom tej no.

2 Kevcai 32:9-10 nthuav qhia txog peb, yog Vajtswv cov, tau Vajtswv tiv thaiv, saib xyuas zoo li Nws ob lub qhov muag.

Hauv Kevcai 12:28, Vajtswv Txojlus cog tseg yog peb ua tib zoo coj raws li Vajtswv tej kevcai ces peb thiab peb tej xeeb ntxwv yuav tau koob hmoov mus ib txhis.

Hauv Henplais 13:5, Vajtswv cog lus “Kuv yuav tsis tso koj tseg lossis Kuv yuav tsis muab koj pov tseg ib zaug li.”

Nyob hauv Lukas 12:32, peb tau txhawb zog tias “Cov menyuam yaj, txawm yog nej tsis coob los nej tsis txhob ntshai, rau qhov nej Leej Txiv twb txaus siab muab Nws lub tebchaws rau nej lawm.”

Lossis nqe Vajluskub leej twg twb nco cia hauv siab Yauhas 3:16 Vajluskub qhia paub Vajtswv hlub peb txog qib uas “Nws thiaj txib Nws tib Leeg Tub los rau hauv ntiajteb. Tus uas ntseeg Nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis.

Thiab tseem tshuav ntau nqe Vajluskub ntxiv sau txog tej uas Vajtswv twb ua lawm, tab tom ua thiab yuav ua pub rau cov neeg uas ntseeg Nws.

Kuv muaj ib lub hnab tso kuv tsev neeg cov duab, nyob hauv muaj kuv pog ob peb daim duab thaum tseem menyuam yaus. Txhua zaug muab rau ib tug twg saib kuv yeej qhuas, “saib mas, saib kuv pog thaum tseem yau ntxim hlub heev ".

Kuv xav tias tej no yog tej uas Vajtswv txojlus nthuav qhia, Vajtswv kuj tab tom qhuas peb rau lwm tus. Tej ntawd qhia rau peb paub cov neeg uas yog Vajtswv tug Vajtswv hlub heev.

Vajluskub sau, “Tsis yog peb hlub Vajtswv, tiamsis yog Vajtswv hlub peb thiab Nws txib Nws tus Tub los tuag theej peb lub txhoj, Vajtswv thiaj zam tau peb lub txim.” (1 Yauhas 4:10). Cia li xav txog tej no, Tswv Yexus yog tus tsis muaj txim thiab tsis muaj ib yam twg yuav thuam tau Nws. Tiamsis Nws zoo siab cia luag muab Nws ntsia rau saum ntoo khaublig kom peb thiaj tau txojsia ib txhis. Tsis muaj ib yam dab tsi yuav zoo tshaj thiab muaj nqis dua qhov tseeb no. Ntawm no yog kev hlub siab kawg nkaus, kev hlub muab pub, kev hlub tuag theej.

Vajtswv Ntuj yog kev hlub. Vajtswv muab pub rau peb muaj sij hawm los ntseeg txais yuav Nws. Txais yuav Nws txoj kev hlub. Tsis muaj leej twg yuav hlub Nws tag siab ntsws mus txog rau thaum paub thiab nkag siab txog tej uas Tswv Yexus tau ua pub rau peb saum tus ntoo khaublig.

Vajtswv Txojlus hais nyob hauv Yaxayas 54:10

“Tej zaum cov hauv roob thiab pov roob yuav tawg mus, tiamsis Kuv txojkev uas hlub koj yuav tsis paub kawg li. Kuv coglus tseg hais tias yuav muaj kev thajyeeb, mas Kuv yuav ua raws li Kuv tej lus ntawd mus ib txhis tus Tswv uas hlub koj yog tus uas hais tej lus no.”

Yog koj hlub ib tug twg, koj yeej xav muab sijhawm pub rau nws, xav kom nrog nws hais lus ua ke txhua zaug. Koj yeej yuav nrhiav txhua txoj kev kom raug zoo tau nrog tus neeg ntawd. Yog li, cia li mus nyob ze Vajtswv thiab loj hlob txoj kev sib raug zoo nrog Vajtswv ua ke hnub no.

Thov caw nrog kuv peb thov Vajtswv ua ke:

Kuv ua Koj tsaug Vajtswv, Leej Txiv tus uas hlub kuv, vim txoj kev hlub loj uas Koj tau tseg pub rau kuv. Thov pab kom kuv niaj hnub caum txoj kev sib raug zoo nrog Koj thiab ua lub neej haum Koj siab. Thov kom kuv lub neej yuav yog txoj nkauj hu qhuas Koj lub npe thiab qhia txog Koj hauv txhua haiv neeg. Kuv thov hauv Yexus Khetos lub npe. Amees.

Cov kwv tij txhua tus, Vajtswv hlub koj, thiab xav kom muaj txoj kev sib raug zoo nrog koj ua ke. Cia siab tias koj yuav siv zog kom loj hlob txoj kev sib raug zoo no. Cia li siv sijhawm txhua hnub los nrog Vajtswv tham lus, kawm Nws txojlus thiab cim nco muab Nws txojlus los xav txawm yog koj yuav nyob qhov twg thiab ua dab tsi.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev txhawj xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj thiab peb xav kom txuas tau nrog koj.