Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Yog tias koj thov Vajtswv pub ib lub tsev rau koj thiab koj nrhiav tau ib lub tsev haum siab phim tus nqi, koj yuav ua li cas? Puas yog tamsim ntawd koj cia li txais yuav vim xav tias ntawd yog tej Vajtswv muab pub? Lossis koj yuav ua tib zoo tshuaj xyuas seb ntawd puas yog koob hmoov tiag lossis tsuas yog yeeb ncuab ib lub ntxiab cuab kev xwb? 

Hnub no, yog hnub 20/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Shadow Lane dhau ntawm zaj kawm TXOJ KOOB HMOV CUAV

Tom qab ntawd dab Ntxwgnyoog txawm coj Yexus mus rau saum ib lub roob siab siab, thiab ua rau Yexus pom tagnrho tej tebchaws hauv qab ntuj no thiab pom tej kev vammeej hauv tej tebchaws ntawd. Dabntxwsnyoog hais rau Yexus hais tias, “Yog koj txhos caug pe kuv, kuv yuav muab txhua yam no rau koj. (Mathais 4:8-9)

Ob peb xyoo dhau los, wb ib niam txiv tau npaj yuav yuav ib lub tsev uas yog wb txoj kev npau suav. Wb tau nug thiab siv zog nrhiav kom tau lub tsev nyob rau ntawm thaj chaw uas zoo kawg nkaus. Thiab wb tau nrhiav tau ib lub zoo li ntawd nyob rau ntawm cheeb tsam Shadow Lane. 

Ntawd yog ib lub tsev qub ob tshooj zoo heev nyob rau ntawm ib qhov chaw ntsiag to. Wb pom tias lub tsev no yuav yog lo lus teb rau wb tej lus taij thov. Tus nqi nws tsis kim heev pes tsawg thiab wb npaj siab yuav yuav. Txhua yam cuag li zoo heev… zoo kawg nkaus. Yog li, kuv thiaj txiav txim siab tshawb xyuas txog tej ntaub ntawv txog lub tsev kom yuav ua rau kaujruam ntxiv. Tsis poob sijhawm ntau los mus nrhiav, kuv pom tias tus tswv tsev nws tsis muaj cai tuav lub tsev no kom meej pem rau lub tsev no. Muaj qee qhov teeb meem coj mus xiab ua nuj nqi uas tus tswv tau muab zais wb puas thaum ua ntej lawm. 

Thaum nrog tus tswv tsev sib tham txog tej no, tus tswv tsev tsis kam teb txog tej kev xiab nuj nqi ntawd. Nws hais kom wb ntiav lub tsev no mus txog rau thaum uas tej nuj nqi xiab no tau them tas. Yog tias wb yuav mas wb tej nyiaj yuav poob tag nrho wb yeej tsis muaj ib yam dabtsi. Pom qhov teeb meem no, wb hnov tag kev cia siab. Wb tau suav tias ntawm no yog lub tsev ntawm wb kev txoj kev npau suav, yog Vajtswv tej lus teb rau wb txoj kev taij thov, yog koob hmoov Vajtswv pub rau wb. Tiamsis thaum no wb pom tias tsuas yog cov khoom cuav xwb, yog ib lub ntxiab cuab kev xwb!

Vajtswv tau cog lus yuav muab ib lub tsev rau wb. Tseeb tiag, Vajtswv twb npaj ib lub tsev thiab ntau yam ntxiv heev rau wb, tiamsis ua ntej uas wb yuav saj tau tej uas Vajtswv npaj tseg ua ntej zoo kawg nkaus rau wb ntawd yeeb ncuab twb tau taum tes rau thiab muab nthuav kiag ib txoj koob hmoov cuav. Yeeb ncuab lub homphiaj yog xav ntxias thiab txeeb txoj koob hmoov tiag uas Vajtswv xav pub rau peb. 

Txawm yog wb nyiam lub tsev ntawd heev los ua Vajtswv tsaug vim Vajtswv tau pub rau wb ua taus siab tiaj tus thiab txawj ntse tsis yuav lub tsev ntawd. Tsis ntev tom qab, wb kuj nrhiav tau thiab txais tau lub tsev uas Vajtswv tseg rau wb. Ntawd yog ib lub tsev zoo dua nyob rau ntawm thaj chaw zoo dua thiab wb yuav lub tsev ntawd tseem pheej yig dua tus nqi luag muag tawm sab nraud. Txoj kev nyuaj siab vim poob yam uas wb xav tias yog wb lub tsev uas zoo tau hloov los ua kev zoo siab thaum uas wb txais tau lub tsev zoo uas yog lub tsev tiag. 

Thaum koj mus rau hauv Vajtswv tej koob hmoov, nco ntsoov tias yeebncuab yuav nrhiav txhua txoj kev txeem los, ntxeev ntxias thiab txeeb koj tej koob hmoov ntawd. Yeeb ncuab tseem ua ntau tshaj thiab yog muab tej yam uas zoo ib yam nkaus li Vajtswv txoj koob hmoov, yog yam twg uas yuav nrhuav tshem tau Vajtswv lub homphiaj uas tseg rau koj. 

Thaum ntxwgnyoog ntxias Tswv Yexus, Ntxwgnyoog tau tawm ib lub homphiaj tshiab los hloov Vajtswv lub homphiaj. “Tom qab ntawd dab Ntxwgnyoog txawm coj Yexus mus rau saum ib lub roob siab siab, thiab ua rau Yexus pom tagnrho tej tebchaws hauv qab ntuj no thiab pom tej kev vammeej hauv tej tebchaws ntawd. Dabntxwsnyoog hais rau Yexus hais tias, “Yog koj txhos caug pe kuv, kuv yuav muab txhua yam no rau koj.” (Mathais 4:8-9). 

Nyob rau ntawm qee tus ces ntshe ntawm no yuav yog ib txoj kev ua lag luam tau nqi. Tswv Yexus lub homphiaj kawg los rau hauv ntiajteb no yog coj txhua tus mus rau hauv Vajtswv lub tebchaws thiab tswj hwm lawv los ntawm txoj kev ncaj ncees. Nyob ntawm no, Ntxwgnyoog tau tawm tswvyim muab tag nrho lub ntiajteb no rau Tswv Yexus tsis tas yuav poob dag zog. Paub tias Tswv Yexus yeej tsis txais yuav ntxwgnyoog lub tswv yim. Tswv Yexus paub tias tej khoom plig zoo tshaj plaws, thiab tseeb, puav leej yog los ntawm peb Leej Txiv tus uas nyob saum ntuj ceebtsheej, thiab Tswv Yexus txiav txim siab ua raws li Leej Txiv lub siab nyiam. 

Tswv Yexus rov ntsib tej no dua ib zaug dhau ntawm Petus, uas yog Nws tus thwjtim nyob ze Nws. Thaum Tswv Yexus hais rau cov thwjtim tias Nws yog Yexus Khetos, thiab Nws yuav tau tiv ntau txoj kev txomnyem hauv cov thawj coj Yudais tes, tej pov thawj hlob nrog rau cov thawj coj saib tsev sab laj, thiab yuav raug tuag rau nram Yeluxalees, ces … “Petus txawm coj Yexus mus rau ib cag thiab cheem hais tias, “Tus Tswv, thov Vajtswv txwv kom tsis txhob muaj li ntawd. Koj yeej yuav tsis raug tej no li!” Yexus tig hlo los hais rau Petus hais tias, “Niag Dab Ntxwgnyoog, koj cia li khiav ntawm kuv mus! Koj tsis txhob tav kuv kev, tej uas koj xav ko yog neeg li xwb, tsis yog Vajtswv li” (Mathais 16:22-23). 

Yeeb ncuab tau siv txhua txoj hau kev los haub ntxias kom Tswv Yexus txais lwm lub tebchaws los hloov Vajtswv lub, lub tebchaws cuav uas dabntxwgnyoog tsim muaj, yog ib lub tebchaws uas yuav nyob tsis ntev. Yog tias Tswv Yexus koom tes rau dabntxwsnyoog lub,  ces yuav zoo li wb thaum uas yuav yuav lub tsev rau ntawm cheeb tsam Shadow Lane, Ntxwsnyoog yog tus tswv tiag, thiab Tswv Yexus yuav poob txhua yam, thiab ua poob lub tebchaws uas Vaj Leej Txiv tseg pub rau Nws. 

Nyob rau hauv txoj kev nrog tus Tswv mus, koj cia li nrhiav yam uas yog Vajtswv lub siab nyiam, thiab tos txoj koob hmoov uas Nws tseg rau koj. Yuav tau ua tib zoo ceev faj kom tsis poob rau hauv dabntxwsnyoog lub ntxiab cuab tos kev. Ntawd yog yam uas tshwm ua ntej, tej zaug saib mas zoo nkauj thiab hnov zoo kawg, tiamsis yog koj ua tib zoo tshuaj xyuas, koj yuav pom muaj qee yam tsis yog. Thaum ntawd, yuav tau muab tshem tawm txhob cia koj raug khi rau hauv txoj koob hmoov cuav ntawd. 

Thov caw nrog kuv peb thov Vajtswv ua ke: Tus Tswv thov pub rau kom kuv muaj tus ntsujplig ntse ntsuav paub cais tej yam tsis yog uas dab ntxwgnyoog coj los, kom kuv tsis raug khi rau hauv tej koob hmoov cuav uas yeeb ncuab coj los ua poob koj txoj koob hmoov tiag. Kuv thov hauv Tswv Yexus Khetos lub npe. Amees.

Cov kwv tij txhua tus, ua ntej uas yuav txais tej koob hmoov los rau yus, txawm yog koj yuav nyiam heev los yuav tau ua lub siab tus, thov Vajtswv coj kev thiab ua tib zoo muab coj los sib tim ua ke nrog tej uas nyob rau hauv Vajtswv lub homphiaj, nrog tej uas nyob rau hauv Vajluskub. Yog tias ua xyem xyav thiab kom muaj yam tsis yog, ua siab tawv tsis txais thiab tos txoj koob hmoov tiag los ntawm Vajtswv los. 

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.