Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Thaum txiav txim siab ntseeg Tswv Yexus, peb thov caw Nws nkag los rau hauv peb lub neej thiab ua tus Tswv rau peb lub siab. Tiamsis hais tiag, rov qab tshuaj seb lub sijhawm dhau los, koj puas tau cia Vajtswv ua tus Tswv hauv koj lub siab lawm tiag tiag? Lossis koj tseem siv zog tuav kom tau qee thaj chaw hauv yus lub siab tsis xav cia tus Tswv nkag los rau hauv?

Hnub no, yog hnub 21/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Marsha Brickhouse Smith dhau ntawm zaj kawm KOJ PUAS TABTOM CIA VAJTSWV UA TUS TSWV HAUV KOJ LUB SIAB?

Peb cia li ua Vajtswv tsaug, rau qhov Vajtswv tus uas muaj hwjchim, Nws nyob hauv peblub siab. Nws ua tau ib puas tsav yam ntau dua li tej uas peb thov thiab tej uas peb xav. (Efexaus 3:20)

Tseeb yog ib hnub ntev thiab qaug zog kawg li. Kuv txiav txim siab mus ncig ib ncig ntawm tus dej ntws tus yees. Cua tshuab maj mam tuaj dhau ntawm tej nplooj ntoo siab. Ntawd yog ib hnub nyob rau lub caij nplooj ntoo zeeg zoo kawg nkaus. Tiamsis, kuv hnov nyob ib leeg kho siab heev. Muaj ntau yam heev nyob rau hauv lub neej tshwm sim tuaj ua rau kuv yij fab yij fwj.

Kuv pib nrog Tswv Yexus sib tham, tus uas nkag siab txog txhua txoj kev xav hauv kuv lub siab thiab hlub kuv tsis xam txog ib yam dab tsi li.

“Tus Tswv, Kuv thov Koj los nyob hauv kuv lub siab tiamsis ntau zaug kuv hnov kuv lub siab no tsis muaj dabtsi. Ua li Koj puas nyob ntawd tiag?”

Cuag li nyob hauv kuv lub siab, kuv pom tias Vajtswv tab tom hais twj ywm, “Kuv tus menyuam uas Kuv hlub, Kuv tab tom tos koj los thiab nug Kuv. Muaj tej yam ua rau koj lub siab tsis muaj ib yam dab tsi, thaum kuv nkag los rau hauv tej chav nyob hauv koj lub siab, nws twb muab kaw zoo zoo cia lawm. Vim hlub koj, Kuv tau muab txhua tus yaum sij cob rau koj txhais tes lawm. Muaj qee thaj chaw kuv nkag los tsis tau rau hauv vim koj twb muab kaw zoo zoo lawm. Koj thov kom Kuv ua tus Tswv nyob hauv koj lub neej tiamsis tseem tshuav qee thaj nyob rau hauv koj lub neej koj tsis xav qhib qhov rooj rau Kuv kom Kuv nkag los rau hauv. Kuv paub tias koj twb muab Koj lub siab fij rau Kuv lawm. Tiamsis muaj qee chav nyob rau hauv koj tau muab kaw zoo zoo cia thiab muaj daim ntawv ceeb toom “TSIS PUB NKAG MUS RAU HAUV’ Yog li koj thiaj hnov khoob lug thiab txias zias.

Kuv thiaj teb kiag tus Tswv, “Tiamsis tus Tswv nyob rau hauv tej chav ntawd ntim puv nkaus tej kev iab siab, nyuaj siab thiab tej kev yij fab yij fwj. Tej chav ntawd yog tej chav uas kuv tseem tsis tau qhib vim tias yog thaum twg kuv qhib nws yuav mob siab heev. Yog li txawm cia nws kaw nws twj ywm tsis tau lov?”

“Tsis yog, Kuv tus menyuam. Yog koj xav kom Kuv ua tus Tswv hauv koj lub neej ces Kuv yuav tau tswj thiab ua tus Tswv hauv koj lub siab. Tag nrho koj lub siab. Koj yuav tsum tau qhib chav uas muaj lub npe hu ua “chav tsis zam txim’ ntawd tawm thiab koj yuav tau zam txim. Zam txim tiag tiag thiab tsp dhau tej kev txhaum. Thiab ntxiv rov mus txog rau chav muaj npe hu ua “ mob siab” thiab cia kom Kuv ua kom puv npo lub chav ntawd los ntawm tej kev plig siab hlub tshua. Mus ntxiv rau ntawm chav muaj npe “yav dhau los’ cia kuv muab chav ntawd ntxuav los ntawm Kuv cov ntshav uas dawbhuv. Kuv mam muab txhua yam nyob hauv tej chav ntawd tawm mus thiab laub kom puv nkaus txoj kev hlub, kev tshua thiab kev zam txim. Kuv mam tshem kom tag nrho tej kev iab siab, so kom huv tej kev iab siab thiab koj yuav nrhiav tau tej yam muaj nqis koj tau muab zais cia ntawd.”

Kuv rov qab nco txog qhov uas Tswv Yexus tau yug rau hauv lub nkuaj nyug vim lub tsev so tsis tshuav chaw rau Tswv Yexus lawm. Thaum me los, txhua zaug uas xav txog qhov uas tsis muaj chav rau Tswv Yexus, kuv hnov nyuaj siab heev. Thiab kuj yog lub sijhawm no, Vajtswv rov ntuas kuv vim tab tom ua tib yam nkaus li ntawd. Thaum uas kuv muab tej chav hauv kuv lub siab kaw cia tsis pub tus Tswv nkag los rau hauv. Kuj yog kuv tab tom ua tib yam nkaus zoo li tus tswv tsev so thaum ub, hais tias kuv lub siab tsis muaj chaw seem rau Koj lawm. Vajtswv xav kom kuv qhib kuv lub siab thiab caw Nws nkag los tsis yog tsuas los rau hauv xwb tiamsis tseem muaj tag nrho txoj cai ua tswv hauv txhua lub chav, txhua feem hauv lub siab, hauv kuv lub neej.

Twb tau ntau xyoo dhau los, kuv muab tej chav ntawd kaw cia zoo zoo, tsis kam cia tus Tswv nkag los. Kuv cim civ nug vim li cas yus ho hu Nws ua Vajtswv, yog tus Tswv tiamsis yus tsis kam cia Vajtswv tswj tag nrho yus lub siab?

Kuv txhos caug rau ntawm ntus dej thiab thov kom Tswv Yexus nkag los rau hauv chav ntawd. Thiab Tus Tswv tau nkag los. Kuv ntseeg tias Vajtswv kuj yuav ua ib yam nkaus li ntawd rau koj. Cia Nws ua tus Tswv tag nrho rau hauv koj lub siab. Tsis yog ib feem tiamsis yog tag nrho. Thiab koj yuav tau hloov pauv tag nrho zoo tiag tiag.

“Peb cia li ua Vajtswv tsaug, rau qhov Vajtswv tus uas muaj hwjchim, Nws nyob hauv peblub siab. Nws ua tau ib puas tsav yam ntau dua li tej uas peb thov thiab tej uas peb xav.” (Efexaus 3:20).

Thov caw nrog kuv peb thov Vajtswv ua ke: Tus Tswv, thov Koj zam txim rau kuv, vim kuv tau kaw cia tej chav hauv lub siab zoo zoo cia. Hnub no kuv thov muab tag nrho kuv lub siab fij rau Koj. Thov Koj los Tswj, ua Tswv thiab saib xyuas txhua seem hauv kuv lub neej. Kuv thov hauv Tswv Yexus Khetos lub npe. Amees.

Cov kwv tij txhua tus puas muaj yam twg nyob hauv koj lub neej yeej tseem tsis tau tag siab ntsws ua raws li Vajtswv lub siab nyiam, yeej tseem xav tuav rawv rau tus kheej, xav ua raws li yus lub siab xav thiab yus tus nrim? Hnub no tus Tswv caw koj cia li ntseeg Nws, hwm Nws thiab koj yuav saj tau lub hwjchim hloov pauv zoo kawg nkaus uas Vajtswv yuav nthuav tawm dhau hauv koj lub neej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.