Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Txhua tus ntseeg Vajtswv puav leej nkag siab tias thov Vajtswv yog txoj pa ntawm lub neej ntseeg Vajtswv. Tiamsis peb tabtom thov Vajtswv zoo li cas thiab thov Vajtswv rau yam dab tsi? Puas yog peb txoj kev thov Vajtswv tsuas tsom ntsoov rau yus tus kheej xwb. Yog tias muaj tseeb li ntawd peb yuav tau muaj dua ib txoj kev hloov dua tshiab ntawm txoj kev thov Vajtswv. 

Hnub no, yog hnub 24/02/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm Zaj kawm HLOOV DUA TSHIAB NTAWM KEV THOV VAJTSWV

Thaum nej thov nej tsis tau, rau qhov nej lub siab phem, tej uas nej thov ntawd nej yuav coj mus siv raws li nej lub siab nyiam xwb (Yakaunpaus 4:3)

Peb yuav tau ua tib zoo ceev faj nyob rau hauv peb lo lus taij thov kom peb thiaj tsis thov yuam kev. Thov yuam kev yog thov li cas? Ntawd yog thov los ntawm lub siab xav tsis yog. 

Nyob hauv Vajluskub Tshiab, peb pom Vajluskub nyob hauv Yakanpaus sau txog tej uas yuav tshwm sim tuaj thaum peb thov Vajtswv yuam kev, thov los ntawm lub siab xav phem: 

“Thaum nej thov nej tsis tau, rau qhov nej lub siab phem, tej uas nej thov ntawd nej yuav coj mus siv raws li nej lub siab nyiam xwb” (Yakaunpaus 4:3). 

Oh, yog li ntawm no peb pom tias peb muaj tej zaug kuj thov Vajtswv yuam kev. Vim yog thov Vajtswv yuam kev peb thiaj txais tsis tau tej uas peb taij thov. Thiab qhov tseeb tiag tej no tshwm sim txhua lub sijhawm ntau dua li tej uas peb xav lees tias muaj li ntawd. 

Nyob hauv zaj sau “Vajtswv yog tus tswjhwm saum txhua lub tebchaws, yav tas los, tamsim no, thiab tomntej”. Tus sau Chip Brogden tau nthuav qhia txog tej ntsiab lus tob tob uas kuv xav qiv los hais nyob rau ntawm no:

Vajtswv yeej ua haujlwm tiag nyob rau hauv txhua lub tebchaws niaj hnub nim no. Tsis muaj ib yam dab tsi yuav khiav dhau Vajtswv. Vajtswv txojlus nyob rau hauv Yelemis 18:7-10 qhia paub tias Vajtswv txhua lo lus cog tseg rau txhua lub tebchaws, txawm yog koob hmoov lossis lus foom phem, zoo lossis phem, puav leej nyob txij ntawm lub tebchaws ntawd ua pub rau Vajtswv. 

Vajtswv yog tus tswj ib puas tsav yam. Txawm yog txhua lub hwjchim nyob saum ntuj thiab hauv ntiajteb no puav leej yog Vajtswv tug, tiamsis Vajtswv tso cai rau tib neeg tswj lub ntiaj teb no (Nawv Nkauj 115:16). Tiamsis, qhov no tshwm sim los nyob qab tswj hwm hauv Vajtswv. Txhais tias Vajtswv tso cai lossis tsis tso. 

Thaum Vajtswv qhib qhov rooj ces tsis muaj leej twg kaw tau. Thaum uas Vajtswv kaw lawm ces kuj tsis muaj leej twg qhib tau. Thaum Vajtswv txiav txim foom koob hmoov rau ib lub tebchaws twg ces yuav tsis muaj leej twg yuav foom phem tau rau lub tebchaws ntawd li (Teevnpe 23:11-12). Tshuav thaum uas Vajtswv txiav txim siab foom phem rau ib lub tebchaws twg lawm ces kuj yuav tsis muaj leej twg foom koob hmoov tau rau lub tebchaws ntawd li, lossis zamtxim rau kuj tsis tau, uas tsis coj cov lus foom ntawd rau yus tus kheej (I Xamuyees 15:17-19). 

Tib neeg muaj kev ywj pheej ua raws li yus lub siab nyiam nyob rau hauv ib qhov chaw twg xwb, tiamsis Vajtswv thiaj yog tus tuav txoj cai tswjhwm mus li. Yog cheem tsum, Vajtswv muaj cuab kav tav tau tib neeg tej haujlwm cia hloov pauv tej uas tau tshwm sim los thaum uas tib neeg khiav mus deb heev lawm. 

Dej nyab ntiajteb nyob rau tiam Nau-es yog ib qhov pov thawj rau tej no. Peb kuj pom zoo ib yam nkaus li ntawd thaum uas Vajtswv muab tib neeg cov lus coj los ua kom nyias hais nyias ib yam lus nyob rau qhov xwm txheej ntawm tus pejthuam npanpees. Lossis Vajtswv rhuav tshem lub nroog Xausdoos thiab Kaumaulas. 

Tswv Yexus hais tias yuav muaj ib lub sijhawm nyob rau tom ntej no, dhau ntawm Vajtswv ua tus tav, tib neeg ib leeg yuav tawm tsam ib leeg thiab rhuav tshem txhua yam muaj sia nyob rau hauv lub ntiajteb no (Mathais 24:22).

Yog li, txawm yog Vajtswv “muab lub ntiajteb no rau tib neeg los” kuj qhia meej meej tias “Lub ntiajteb thiab txhua tsav yam uas nyob hauv lub qab ntuj no puavleej yog tus TSWV li, lub ntiajteb thiab txhua tus uas nyob hauv lub ntiajteb puavleej yog Nws tug huv tibsi” (Ntawv Nkauj 24:1). Thaum uas tib neeg ib leeg ua rau ib leeg phem zuj zus ces qhov tseeb no yuav txhawb tau peb lub zog. Txawm yog yuav muaj yam dab tsi tshwm sim tuaj los Vajtswv yeej yog tus uas tswj tag nrho ib puas tsav yam. 

Thaum uas tebchaw (Nhật Bản) tuaj txeeb tebchaws Suav nyob rau kev tsov rog zaum II, muaj ib tug ntseeg Vajtswv yog neeg suav nws lub npe hu ua (Nghê Thác Thánh) tau taij ib lo lus thov uas peb ntseeg tias ntawm no kuj yog lo lus yuav tau thov rau lub ntiajteb peb tab tom nyob niaj hnub nim no. 

Luag tham li no tias thaum nyob rau hauv ib lub rooj txhawb siab,  yawm Nghê Thác Thánh nws txawm cia li zaum ua ke xyaw ib tug ntseeg uas yog neeg Nhật Bản thiab tej neeg ib ncig lawv hnov kub heev thiab ntxhov nyho thaum uas ntsia pom lub sijhawm ntawd. Tiamsis yawm Nghê Thác Thánh nws tsis muaj lub siab ntxub, lossis chim, thiab thaum tau caw thov Vajtswv, yawg thov Vajtswv li hauv qab no: 

Tus Tswv Koj yog tus uas tab tom tswj hwm. Peb muaj lub siab tawv hais li ntawd. Peb tus Cawmseej Tswv Yexus tab tom tswjhwm vim Koj yog tus Tswv ntawm txhua tus Tswv, tsis muaj leej twg yuav chwv tau rau Koj lub hwjchim. Tiamsis tej lub hwjchim ntawm sab ntsujplig tab tom nrhiav kev rhuav tshem Koj tej haujlwm nyob rau ntawm tebchaws suav thiab Nhật Bản. Yog li, kuv kuj tsis thov Vajtswv rau Nhật Bản. Kuv kuj tsis thov Vajtswv Koj rau tej haujlwm nyob rau tebchaws Suav thiab Nhật Bản. Peb kuj tsis liam lub txim rau tib neeg vim tib neeg tsuas yog tej nyuag cuab yeej rau Vajtswv Koj tus yeebncuab siv xwb. Yog li, tus Tswv, thov Koj rhuav tshem lub tebchaws uas tsaus ntuj nti vim Koj mob siab thaum Koj Pawg Ntseeg raug tsim txom. Amees.” 

Niaj hnub nim no, thaum Vajtswv Pawg Ntseeg nqua hu thov Vajtswv txog tej yam uas haum Vajtswv siab. Peb thov Vajtswv rau txhua lub tebchaws, nyob hauv muaj txoj kev ywj pheej pub rau lub tebchaws Yixalayees thiab tag nrho lwm lub tebchaws uas ua yeebncuab nrog. Peb muaj cuab kav hais lawv li tej uas yawm Nghê Thác Thánh, tau thov “Peb tsis yog thov Vajtswv rau tebchaws Yixalayees, kuj tsis thov Vajtswv rau cov tebchaws uas ua yeebncuab nrog Yixalayees. Peb thov Vajtswv Koj pab rau Koj tej haujlwm nyob rau hauv Yixalayees thiab tag nrho tej tebchaws ua yeebncuab nrog. Peb xav sawv los ua raws li Koj lub siab nyiam. Tus Tswv, thov Koj rhuav tshem lub tebchaws tsaus ntuj vim Koj mob siab thaum uas Koj ntsia pom Koj Pawg Ntseeg raug kev txomnyem. Amees” 

Txhob thov Vajtswv los ntawm lub siab xav phem, vim muaj ntau yam cheem tsum txog peb txoj kev thov Vajtswv niaj hnub nim no.

Thov caw nrog kuv peb thov Vajtswv ua ke: Peb Leej Txiv tus uas nyob saum Ntuj Ceebtsheej, thov kom sawv daws hwm Koj lub npe, thov kom Koj lub tebchaws los, thov kom peb txhua tus hauv ntiajteb no ua tau raws li Koj lub siab nyiam zoo li saum ntuj. Kuv thov Vajtswv Koj txoj kev tswjhwm tau nthuav tawm rau txhua qhov thiab rau txhua tus tib neeg, txhua yam puav leej hwm Koj. Hauv Tswv Yexus Khetos lub npe. Kuv thov Amees.

Cov kwv tij txhua tus, txhua hnub koj tab tom thov Vajtswv rau yam dab tsi? Dhau ntawm tej kev cheem tsum ntawm tus kheej, ntawm koj tsev neeg, puas tau muaj zaum twg koj thov Vajtswv pab rau Vajtswv tej haujlwm hauv lub ntiajteb no lawm tau, tshwj xeeb yog cia kom txhua tus neeg nyob txhua qhov puav leej paub txog Vajtswv yog tus tswjhwm? Yog tias yeej tsis tau muaj ib zaum twg thov Vajtswv rau tej no, vim li cas koj tsis pib kiag qhov ntawd hnub no?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.