Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Yog ib tug ntseeg peb nkag siab tias, kev ntseeg yog tus yaum sij pub rau peb kom txais tau txoj kev cawmdim, kom saj tau Vajtswv kev ua haujlwm nyob hauv peb lub neej. Tiamsis peb kuj yuav txawj ntse nyob rau hauv txoj kev ntseeg, ua tib zoo xaiv seb yuav tau ntseeg yam twg, kom thiaj yuav tsis raug ntxias mus yuam kev rau tej yam tsis yog, coj kev puas tshuaj los raug rau peb tus kheej thiab ua rau lwm tus muaj kev tu siab.

Hnub no, yog hnub 25/09/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Steven Halter dhau ntawm zaj kawm TXAWJ NTSE NYOB HAUV TXOJ KEV NTSEEG

Nej yuav tsum ntse ib yam li tus nab thiab muaj lub siab mos siab muag ib yam li tus nquab. (Mathais 10:16)

Kev ntseeg yog ib yam zoo kawg nkaus. Peb tau txais kev cawmdim vim yog Vajtswv hlub peb (Efexaus 2:8). Vim muaj kev ntseeg peb dhau los ua Vajtswv cov menyuam (Yauhas 1:12). Vim muaj kev ntseeg peb kuj ua tau haum Vajtswv siab (Henplais 11:6). Thaum peb ntseeg Vajtswv, tej yam ua tsis tau dhau los ua tau.

Tiamsis ua li puas yuav yog peb yuav tau ntseeg tag nrho txhua yam? Kom teb tau lo lus nug ntawd peb yuav tau tshuaj xyuas saib yus tab tom ntseeg leej twg thiab ntseeg rau yam dab tsi. Peb cov ntseeg ntau zaug kuj ntseeg tej yam tsis yog, thiab yooj yim ntseeg thiab ntseeg sai heev.

Piv txwv, ntau zaug peb yooj yim ntseeg rau tej niag lus moo cua ntawm cov phooj ywg ua haujlwm. Peb yooj yim ntseeg txog tej lus hais txog cov neeg muaj koob nto npe. Peb kuj ntseeg rau tej xov xwm tsis yog, muaj ntsis hais tsis zoo rau cov neeg tswj teb kav chaw. Tus thawj coj ntau zaug kuj ntseeg txog tej lus hais tsis zoo txog cov tub qhe ua haujlwm. Tej no yuav coj tau peb mus ua rau lwm tus muaj kev tu siab thaum uas ntseeg ib yam twg ntawd tsis yog txog lawv. Peb xav tsis zoo txog lawv thiab tseem ua rau tej ntawd dhau los tsis zoo thaum peb tham rau lwm tus mloog txog tej lus dag lossis ib nrab lus tseeb uas peb tau ntseeg.

Ntau zaug peb yuav cim civ ua rau peb muaj kev tu siab thaum uas ntseeg tej kev cob qhia uas yus tau hnov. Piv txwv li peb ntseeg ib tug neeg dag muaj peev xwm hais tau lus dag zoo tiamsis tseeb tiag yog tab tom nrhiav kev nyiag peb lub hnab nyiaj xwb.

Yog li yuav ua li cas thiaj yuav tiv thaiv tau yus tus kheej thiab zam kom tsis ua rau lwm tus muaj kev tu siab? Muaj qee yam peb ua tau. Ib nyob rau hauv ntawd yog txhob ntseeg ib phab xwb thaum uas tau mloog ib tug neeg twg tej xwm. Peb yuav tau mloog tag nrho ob tog kom peb ntsia pom zoo txog qhov xwm txheej ntawd.

“Tus yeejkom uas xub peev lus hauv tsev tu plaub zoo li nws muaj cai kawg, tiamsis cia txog thaum tus pemkom peev lus tas tso.” (Pajlug 18:17).

Dhau ntawd, peb kuj cim civ tiv thaiv tau tu kheej dhau ntawm tej kev cob qhia tsis yog los ntawm qhov uas muab tej uas peb mloog los sib piv rau tag nrho kev cob qhia nyob hauv Vajluskub. Vajtswv txojlus qhia peb: “Cov phoojywg uas kuv hlub, nej tsis txhob rawm ntseeg txhua tus uas khav hais tias lawv muaj Vaj Ntsujplig, tiamsis nej yuav tsum ua tib zoo xyuas saib tus ntsujplig ntawd puas yog Vajtswv tus tiag. Raug qhov muaj cov xibhwb cuav ntau leej tawm mus qhia rau txhua qhov txhia chaw lawm.” (I Yauhas 4:1).

Peb txiav txim siab tsis ua rau yus tus kheej muaj kev tu siab lossis ua rau lwm tus tu siab dhau qhov uas tsis txhob ntseeg tej yam tsis tsimnyog ntseeg, thov Vajtswv pab kom peb paub faib cais tias yam twg yog, yam twg yog yam ntse, yam twg yog kev. Tswv Yexus tau hais kiag rau cov thwjtim, “Nej yuav tsum ntse ib yam li tus nab thiab muaj lub siab mos siab muag ib yam li tus nquab.” (Mathais 10:16). Yakaunpaus sau: “Yog nej leejtwg tsis muaj tswvyim, kom nws cia li thov ntawm Vajtswv, Vajtswv yuav pub tswvyim rau nws, rau qhov Vajtswv yog tus muaj siab dawb siab zoo pub ib puas tsav yam rau sawvdaws, nws tsis khuv xim.” (Yakaunpaus 1:5).

Yog, kev ntseeg yog ib yam zoo kawg nkaus! Tiamsis tsis txhob xav tias yam twg los twb ntseeg. Peb yuav tau cia Vajtswv thiab qhov tseeb ua nruab nrab ntawm peb txoj kev ntseeg. Ua li no, peb yuav yog lub teeb ci rau lub ntiajteb ib ncig. Thiab thaum loj hlob hauv Vajtswv, peb yuav dhau los zoo li Tswv Yexus, uas yog peb tus Cawm Seej.

Thov caw peb nrog kuv thov Vajtswv ua ke: Tus Tswv, thov Koj pub Koj txoj kev txawj ntse rau kuv, kom kuv paub tias yam twg yog, yam twg thiaj yog kev, yam twg ntse, kom peb txoj kev ntseeg tau ruaj khov thiab tawg paj txi txiv hauv Koj. Kuv thov hauv Yexus Khetos lub npe. Amees.

Cov kwv tij txhua tus, koj txoj kev ntseeg yuav tau muab tso rau hauv Vajtswv thiab Nws txojlus, yog li, yuav tau siv sijhawm los tshawb nrhiav, kawm kom paub meej dua txog Vajtswv txojlus. Ua ntej ntseeg rau ib yam dab tsi twg, cia li muab coj los sib phim ua ke rau Vajluskub, thiab xav txog tej uas yus ntseeg seb puas muaj nqis li cas rau Vajtswv thiab Nws txoj haujlwm

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.