Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas muaj qhov teeb meem twg uas koj niaj hnub thov Vajtswv tau ntau xyoo dhau los thiab yeej tseem tab tom thov Vajtswv? Peb tib neeg feem ntau ua tsis taus siab ntev, tom qab thov Vajtswv tau ob peb zaug tsis hnov Vajtswv teb ces peb txawm cia li muab tso tseg. Tiamsis, Vajtswv xav kom peb ua siab ntev rau peb txoj kev ntseeg.

Hnub no, yog hnub 25/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm zaj kawm KEV NTSEEG UA SIAB NTEV

Nej tsis txhob poob siab, yog nej cia siab nej yeej yuav tau nqi zog ntau. Nej yuav tsum ua siab ntev, nej thiaj yuav ua tau raws li Vajtswv lub siab nyiam thiab tau tej uas Vajtswv cog lus tseg hais tias Nws yuav muab rau nej. (Henplais 10:35-36)

Thaum kuv muaj plaub xyoo, kuv khaws tau ib tug mem qhuav ntsuab thiab ib daim ntawv dawb, thiab kos ib co ntawv nkhaus mus nkhaus los rau saud dhos tau ib lo lus VAJTSWV YOG TUS ZOO KAWG NKAUS. Ntawd yog tej yam uas niam pheej hais qhia kuv.

Lub siab kub lug ntawm ib tug menyuam yaus, kuv xav tham qhia qhov tseem ceeb no mus rau tus neeg uas kuv xav qhia… yog kuv txiv.

Kuv pom thaum twg mas txiv twb tsis muaj sijhawm so li, ib txhais tes tuav khob café, ib txhais tuav rawv tsab ntawv xov xwm, maj nroos tawm mus rau nraum zoov kom siv tas lub sijhawm thaum sawv ntxov.

Kuv nco tias kuv tau khiav caum txiv qab ceev tshaj plaws nyob rau ntawm kuv ob txhais kotaw me me, rub lub ris ntev siv zog kom ua rau txiv tig rov los. Txiv ua tib zoo nres, nyo nqes, txais daim ntawv me me saum kuv txhais tes.

Kuv nco kuv twb ua tib zoo saib txiv zoo zoo thaum nthuav daim ntawv. Txiv lub ncauj pib luag. Txiv maj mam npuaj kuv lub taubhau, muab daim ntawv me me ntawd quav rov tso rau hauv txiv lub hnab nyiaj.

Lub caijnyoog ntawd yog tej uas tshwm sim tau 50 xyoo los lawm thiab daim ntawv tseem ceeb ntawd, txog rau niaj hnub nim no yeej tseem tau muab tso zoo zoo rau hauv kuv txiv lub hnab nyiaj.

Paub tias daim ntawv muaj ntsis ntuag thiab tej ceg kaum twb lwj tas lawm. Tiamsis tej niam txwm ntawv zoo li tej pas ntawd yeej tseem nyeem tau meej meej thiab tseem ceeb yog cov ntsiab lus tom qab tej lus ntawd.

Kuv cim civ nug tias txiv twb muab daim ntawv ntawd los nyeem pes tsawg zaus txog tej lus uas Vajtswv tau xa los rau txiv dhau ntawm nws tus ntxhais me me nrog tus mem qhuav. Hnov txaus luag tshaj plaws thaum muaj tej yam yooj yim nyob rau hauv lub neej tej zaug yuav dhau los ua ib qhov chaw nco txog nyob rau hauv lub neej, tsis yooj yim ploj mus.

Kuv leej txiv uas kuv hlub tshua tamsim no tab tom nyob rau hauv tsev laus thiab tau saib xyuas zoo tag nrho txhua lub sijhawm. Kuv yeej siv sijhawm mus xyuas thiab muaj sijhawm tseg rau txiv, qhia rau txiv paub txog Vajtswv txoj kev hlub thiab Nws yog tus zoo kawg nkaus. Ntau zaug kuv kuj pom txiv luag nyav ib yam li thaum kuv tseem yau.

Vajtswv ntuas kuv tias Nws yog tus zoo kawg nkaus. Tej uas Vajtswv twb pib nyob rau hauv kuv txiv ces Vajtswv yuav ua tiav. Txawm yog txiv yeej tsis tau ntseeg Vajtswv los tej lub noob ntawv twb poob mus rau hauv txiv lub siab thiab yuav tsim muaj ib lub caij sau hauv txoj kev zoo siab thaum uas txog Vajtswv lub caij nyoog zoo kawg nkaus.

Puas muaj ib tug twg hauv tsev neeg lossis ib tug neeg txheeb ze twg koj tab tom thov Vajtswv kom lawv paub Vajtswv? Kav tsij ruaj siab, Vajtswv yog tus zoo kawg nkaus thiab Nws yuav tsis ua rau tus uas muaj kev cia siab rau hauv lawv tej lus thov thiab lawv txoj kev ntseeg tu siab ib zaug li.

“Nej tsis txhob poob siab, yog nej cia siab nej yeej yuav tau nqi zog ntau. Nej yuav tsum ua siab ntev, nej thiaj yuav ua tau raws li Vajtswv lub siab nyiam thiab tau tej uas Vajtswv cog lus tseg hais tias Nws yuav muab rau nej.” (Henplais 10:35-36).

Thov caw nrog kuv peb thov Vajtswv ua ke: Tus Tswv kuv ntseeg Koj, yog tus ua raws li Koj tej lus cog tseg, yuav ua tiav tej uas Koj twb pib lawm. Thov pab kom kuv ruaj siab rau tej uas kuv twb tau thov thiab muab txhua yam tso rau ntawm Koj txawmyog tamsim no tej ntawd yuav tsis zoo los raws li tib neeg txoj kev ntsia. Kuv thov hauv Tswv Yexus Khetos lub npe. Amees.

Cov kwv tij txhua tus, kav tsij siv zog thov Vajtswv pab rau koj tej neeg txheeb ze tsis tau paub Vajtswv. Txawm yog tamsim no koj yeej ntsia tsis pom ib lub cim twg qhia paub tias tus neeg ntawd tsis tau ntseeg Vajtswv tiamsis kav tsij ua siab ntev, kav tsij ntseeg txhob tso tseg. Tos Vajtswv lub sijhawm thiab saj tau tias Vajtswv yog tus zoo kawg nkaus.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.