Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Koj puas tau muaj ib zaug twg pom tias koj tus kheej tau nyob deb Vajtswv cuag li uas yeej tig tsis tau rov qab los ze Vajtswv li lawm? Koj hnov cuag li txoj hlua txuas ntawm koj thiab Vajtswv twb raug txiav tu nrho lawm? Txhob txhawj, ntau zaug txoj kev rov qab txuas nrog Vajtswv tseem yooj yim dua li uas koj cim civ xav lawm ntau. Tsuas yog koj muaj lub siab tiag thiab qee qhov haujlwm xwb, ces ib zaug ntxiv koj yuav rov qab muaj txoj kev sib txuas ua ke nrog Vajtswv tus uas muaj  kev hlub dua. 

Hnub no, yog hnub 25/10/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Karen O'Connor dhau ntawm Zaj kawm ROV QAB TXUAS NROG VAJTSWV DUA

“Nws tsis tau muab cov neeg pluag tso tseg lossis tsis quavntsej tej kev txomnyem uas lawv raug, nws tsis tau khiav tso lawv tseg, tiamsis nws yeej teb lawv tej lus thov thaum lawv thov nws” (Ntawv Nkauj 22:24).

“Kuv lub neej muaj ntau yam ntxhov nyho”- kuv hais li ntawd rau Joe, nws yog tus sawv cev los pab cov ntseeg daws teeb meem hauv peb lub Pawg Ntseeg. “Kuv hnov kuv nrug deb ntawm kuv tus txiv, txhawj rau kuv tej menyuam, thiab kuv lub neej sab ntsujplig… hais tseeb tiag mas kuv hnov zoo li qhuav qhawv xwb. Kuv hnov nyuaj thov Vajtswv heev li. Cuag li Vajtswv nyob deb kuv heev.” 

Joe ua twjywm ib pliag. Tas yawg ua rau kuv rov ceev faj txog ib yam uas kuv yeej tsis tau xav txog. Yawg hais tias: “Cia li pib los ntawm muab sau ntawv tseg, sib tham nrog Vajtswv txhua hnub. Cia li pib kiag hnub no. Koj yuav hnov xav tsis thoob thaum uas pom tias koj txais tau Vajtswv kev tshwm ntsej muag sai heev.” 

“Tiamsis kuv twb yog ib tug sau ntawv muag yuav nyiaj txhua hnub nev” – Kuv hais. “Kuv tsis xav tias kuv yuav muaj txaus dag zog los sau tej uas tseg rau kuv tus kheej!” 

Tiamsis Joe yeej tsis yeem ua tus swb. 

“Cia li hais qhia rau Vajtswv tag nrho tej uas koj nyuam qhuav hais rau kuv” – Yawg hais ntxiv. “Cia li ua li no ib lub hlis. Tas rov qab tuaj ntsib kuv. 

Kuv tsav tsheb los tsev, tuav rawv ib phau ntawv ntawm tes, thiab pib sau. 

“Tus Tswv” – kuv pib – “yog kuv os, kuv yog Karen. Kuv yeej tsis paub yuav pib qhov twg…” kuv muab tej uas kuv tau hais rau Joe lawm sau cia tag nrho. Thaum sau tas, kuv cia li hnov muaj txoj kev kaj siab lug uas yav tas los kuv yeej tsis tau ntsib dhau tau ib xyoo ntev los. 

Ces txog hnub so tom qab uas kuv pib sau cia, tus pab dej num hauv Pawg Ntseeg muab ib phau ntawv tshiab rau kuv muaj lub npe tias: “Nrog Vajtswv sib tham” yog Mark Virkler ua tus sau. Tus neeg no yeej tsis paub txog kuv tej kev sib tawm tsam thiab txoj kev sib cog lus yuav muab sau ua ntawv cia! Kuv nyeem ib pliag xwb tas phau ntawv lawm. Tus sau nws muab ntau qhov piv txwv txog txoj kev nrog Vajtswv sib tham ua ke ntawm Vajtswv thiab Nws tej menyuam nyob rau hauv Vajluskub – ib yam li Mauxes, Daviv, Paulus thiab lwm tus. Zoo ib yam li lawv, kuv muaj cuab kav sau cia tej lus uas Vajtswv tau hais rau kuv. 

Kuv pib xyaum sau cia raws li txoj kev tshiab no, thiab pheej ua li no tau tshaj kaum xyoo. Thaum uas kuv tso tseg ib lossis ob hnub vim tsis khoom, tej zaug muaj mob, lossis mus ncig ua si, ces kuv txawm cia li hnov cuag li kuv tus kheej tsis muaj txaus ib yam dabtsi lawm. 

Yog tias yav dhau los koj yeej ib txwm tsis tau muab sau cia, cia li ua tib zoo xav saib puas yuav muab sau kiag hnub no! Tsis tas yuav coj raws ib txoj cai twg. Koj muaj cuab kav kos duab, lossis tsuas yooj yim yog sau ib kab ntawv lossis ob peb nplooj. Nyob txij ntawm Koj. Kuv paub muaj ib leej niam hluas heev nws tau sau ntawv tseg rau nws peb tus menyuam. Ib tug ib phau. Sheila hais:

“Kuv tsis kam khiav deb Vajtswv, thaum uas ib hnub dhau mus, kuv puav leej sau tej lus ua Vajtswv tsaug rau kuv tej menyuam, thiab muab tej koob hmoov uas Vajtswv tau foom rau kuv tsev neeg sau cia”. 

Koj kuj muaj cuab kav xaiv ib lub npe rau tag nrho ib xyoo. Piv txwv, xyoo 1997, kuv sau cia txog kev qhuas Vajtswv – ib hnub xav txog ib nqe Vajluskub txog kev qhuas Vajtswv, thiab tom qab ntawd sau ib lo lus thov Vajtswv luv luv rau txhua nplooj ntawv. Jane yog kuv tus phooj ywg nws hais tias nws  nyiam sau ntawv nthuav tawm kev hlub pub rau Vajtswv. Jane hais: “Tej tsab ntawv ntawd ua rau nws muaj txoj kev sib raug zoo ze heev nrog Vajtswv”. 

Los ntawm txoj kev hloov pauv lub npe txhua xyoo lossis txhua hli, koj yuav tsis muaj sijhawm hnov nkees, thiab kuv tab pov tias koj yuav txais tau txoj kev sib raug zoo nrog Vajtswv ze dua nyob rau txhua seem hauv lub neej. 

Tiamsis muab sau cia yeej tsis yog tib txoj kev no kom muaj txoj kev nyob ze Vajtswv. Hauv qab no yog qee txoj kev uas koj muaj cai xam txog. 

Xub thawj, yog cia li siv sijhawm cia sab ntsujplig tau nyob ntsiag to. Kuv tus txiv yog Charles thiab kuv nyuam qhuav mus so los tom qab uas muaj ib lub sijhawm so tseg rau cov ntseeg Vajtswv. Ntawd yog plaub hnub zoo kawg nkaus uas kuv tau muaj nyob rau hauv ib lub sijhawm ntev. Tiamsis qhov no yuam kom yuav tau muaj sijhawm thiab nyiaj txiag tseg rau kev mus los, noj haus, thiab chaw nyob, v.v. peb yeej tsis tshua muaj sijhawm mus li no. Tiamsis puav leej muaj cai npaj lub sijhawm los so ib tav su lossis ib hnub – so ib leeg lossis nrog lwm tus. 

Charles thiab kuv tau mus koom rau ib lub rooj thov Vajtswv ib hnub nrog Pawg Ntseeg. Peb ntiav ib lub tsev nyob ze ntawd, lub tsev nyob ze ib qhov chaw dav, ntawm no yog thaj chaw rau peb sib sau los thov Vajtswv thaum sawv ntxov, qhuas Vajtswv thiab sib tham txog tej ntsiab lus uas tau xaiv tseg. Thaum yav tav su, peb muaj sijhawm so mus taug kev, so rau ntawm tej tsev so me me, pw ib pliag ntawm tej duab ntxoov ntxoo hauv tej tsob ntoo loj, lossis zaum saum tej nyom nyeem ntawv thiab sau ntawd. Ntawm no kuj muaj ib lub tsev thov Vajtswv, kom peb zaum twj ywm ntsiag to thiab saj tau Vajtswv kev tshwm ntsej muag. 

Kuv yeej tsis muaj ib zaug hnov qab lub sijhawm muaj nqis ntawd – txoj kev kaj siab uas kuv tsis tas yuav siv zog kom muaj. Kuv yuav pub kev thajyeeb rau txhua tus, tsis hais cov uas nyob deb lossis nyob ze! Kuv yuav kho kuv haivneeg kom zoo mob (Yaxayas 57:19). 

Koj muaj cuab kav npaj ib lub rooj li no rau koj Pawg Ntseeg. Ib lub tsev qhua so zoo nkauj muaj txhua tsav yam dav kuj yog thaj chaw zoo tseg rau sab ntsujplig tau so. 

Yog koj lossis lwm tus ntseeg muaj dua lwm lub tsev loj chaw dav, ces ntawd kuj yog qhov chaw uas siv tau. 

Kuv tus niam hluas thiab tej phooj ywg mus ua si tom hiav txwv ib xyoos ib zaug kom tau so ib tav su, muaj sijhawm so, nyeem ntawv, sib tham thiab noj su ua ke. Sawv daws tsav tsheb rov qab los tsev ua ntej uas lawv tej menyuam kawm ntawv tag. 

Muaj ntau txoj kev zoo kom peb khiav tawm tau hauv lub ntiajteb no – yog peb muab peb lub siab thiab lub hlwb tso rau hauv. 

Ib txoj kev ntxiv kom pev rov qab sib txuas ua ke nrog Vajtswv yog dhau ntawm ib puas tsav yam uas Vajtswv tau tsim los. Txuas ua ke nrog Vajtswv dhau ntawm tej uas Vajtswv tau tsim los yog ib nyob rau hauv tej haujlwm uas tsimnyog ua tshaj plaws. Caij ntuj so xyoo 1988, kuv saj tau ib txoj kev hloov pauv txoj kev sib raug zoo nrog Vajtswv. Ib hnub nyob rau hauv lub 8 hlis yuav xaus, kuv npaj yuav mus nce roob Half Dome nyob rau hauv tebchaws lub vaj ua si Yosemite, ntawm no yog ib hnub nyob rau hauv cov niam tsev “txoj kev mus ncig ua si”. Kom npaj rau txoj kev mus, kuv nrog cov phooj ywg taug kev txhua thiv tau ob peb hlis ua ntej ntawd, tshawb nrhiav txog tej tsev ntaub, tej khaub hnab pw, tej laujkaub ua mov, tej zaub mov noj thiab tej hnab ris nyhav li tshaj 13 kg saum nruab qaum!

Nyob rau thawj hnub uas pib mus, kuv lub siab no kub lug thiab kuj zoo siab. Kuv twb npaj txhij lawm! Kuv xav kom tau so zoo – tsis khuv xim. Yog li, thaum uas tab tom nyob rau ntawm ib nta roob, kuv tig rov qab thiab saib sab nraud, tsis pub mus yuam kev ntawm no li. Kuv tuav ruaj ruaj txoj hlua. Tom qab ntawd kuv ua pa tas thiab pib saib ib puas tsav yam! 

Ntawm kuv xub ntiag, saib saud, saib hauv, thiab ob cag kuv ntsia pom puav leej zoo – nyob rau ntawm tej tsob ntoo loj loj nyob rau saum tej pob zeb, tej pob zeb loj loj nyob rau ntawm tej hauv paus ntoo, tej hauv roob siab siab puag saum ntuj ntsuab. Kuv hnov zoo kawg li. Yam uas tseem zoo tshaj nyob rau tej uas kuv xam txog. 

Kuv xav twj ywm: Ntawm no yog ib thaj chaw dawbhuv. Vajtswv tab tom nyob ntawm no. 

Kuv raug rub los rau ntawm txoj kev npaj homphiaj, txog qib uas tsis muaj sijhawm los xav ntau txog tej teeb meem nyob ntawm sab ntsujplig. Tiamsis ib puas tsav yam uas zoo kawg nkaus yeej ib txwm nyob ntawd, thiab kuv yeej tsis muaj dua lwm txoj kev yuav tsis saib li. 

“Oh tus Tswv” – kuv hais tsis tawm lus “Ua Koj tsaug txog tej no… ib pliag thiab xwb ces kuv twb tsis pom tej uas zoo kawg nkaus no!”

Thaum uas nqes saum roob los, kuv pib xav txog tag nrho tej txoj kev uas Vajtswv siv los txhab ntxiv rau kuv. Tej nplooj ntoo ciab zeeg tau dhau los ua ib daim lev pua rau kuv lub tsev ntaub. Tej hauv paus ntoo los zaum so, tej ceg ntoo tseg ziab vuam txwv, thiab tej duab ntxoov ntxoo tau so. Vajtswv nrog kuv nyob ntawd – ntawm thaj chaw hav zoov no – pab kuv txhua txoj kev cheem tsum uas kuv ntshaw. 

Tiamsis koj tsis tas yuav mus nce roob kom thiaj muaj kev sib txuas tau ua ke nrog Vajtswv. Koj mus rau tej chaw ua si hauv nroog lossis ntawm koj tshav puam kiag, nrog ib lub rooj zaum, ib hnab mov ntim su, ib phau Vajluskub thiab ob peb phau ntawv zoo. Cia li nyeem thiab thov Vajtswv, xav thiab cim nco ua tib zoo mloog thiab saib Vajtswv kev tshwm ntsej muag tau nthuav qhia dhau ntawm ib puas tsav yam uas Vajtswv tsim los. 

“Nws tsis tau muab cov neeg pluag tso tseg lossis tsis quavntsej tej kev txomnyem uas lawv raug, nws tsis tau khiav tso lawv tseg, tiamsis nws yeej teb lawv tej lus thov thaum lawv thov nws” (Ntawv Nkauj 22:24).

Thov caw nrog kuv peb thov Vajtswv ua ke

Tus Tswv es, thov Koj zam txim rau kuv vim ntev los no kuv tau khiav deb Koj. Thov Vajtswv Koj qhia rau kuv txoj kev kom cim civ paub los cuag Koj, rov qab nrhiav tau txoj kev sib raug zoo nrog Leej Txiv saum ntuj, thiab tuav txoj kev sib raug zoo ntawd kom yim hnub yim zoo, tsis khiav deb Koj. Kuv thov hauv Tswv Yexus Khetos lub npe. Amees.

Cov kwvtij phoojywg, Yog tias koj hnov koj tab tom khiav deb Vajtswv, tsuas cheem tsum ib me ntsis sijhawm xwb ces koj yuav rov qab muaj txoj kev sib raug zoo nrog Nws ua ke dua. Yog tias koj hnov tab tom nyob deb, hnub no yog lub sijhawm zoo uas koj yuav los nyob ze Vajtswv dhau ntawm ob peb kab ntawv sau cia, dhau ntawm tej uas Vajtswv tau tsim los, dhau ntawm ib lub sijhawm thov Vajtswv twjywm, lossis dhau ntawm ib txoj kev twg uas nws phim rau koj. Thiab yog tias koj hnov nyob deb heev yuav pab tsis tau lawm, nco qab ntsoov tias yeej tseem tshuav kev cia siab, vim Vajtswv tau cog lus yuav tsis khiav deb ntawm peb. Koj tsuas tsa suab hu: “Tus Tswv, kuv cheem tsum Koj!” Vajtswv yuav teb koj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.