Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej txhua hnub uas lawv tau ntsib dhau los, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Nrog rau tus ntseeg Vajtswv, txoj kev sib tw zoo tshaj plaws ces yog ncua kev nrog tus Tswv mus, ua li cas kom tuav tau txoj kev ntseeg mus txog thaum kawg. Txawm yog ntawm txoj kev sib tw no muaj ntau yam cuab kev, ntau ntu nkhaus, muaj ntau yam kev khwv, sim siab, tiamsis yog peb paub vam khom Vajtswv lub zog thiab xav txog qhov nqis zog uas Vajtswv yuav muab pub rau tus muaj yeej ces peb yuav tau rau siab ua kom tiav txoj kev sib tw.
Hnub no, yog hnub 27/03/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Paul Dailey dhau ntawm lub npe TXOJ KEV SIB TW ZOO TSHAJ PLAWS

Tiamsis kuv yeej tsis suav hais tias kuv lub neej tseemceeb dabtsi, rau qhov kuv xav ua tes haujlwm uas tus Tswv Yexus muab rau kuv ua kom tiav. Tes haujlwm ntawd yog mus qhia txojmoo zoo rau sawvdaws kom lawv paub hais tias Vajtswv hlub lawv  (Tegnum 20:24)

“Tiamsis kuv yeej tsis suav hais tias kuv lub neej tseemceeb dabtsi, rau qhov kuv xav ua tes haujlwm uas tus Tswv Yexus muab rau kuv ua kom tiav. Tes haujlwm ntawd yog mus qhia txojmoo zoo rau sawvdaws kom lawv paub hais tias Vajtswv hlub lawv.” (Tegnum 20:24).
Txawm yog koj yuav xav thiab tsis xav los peb txhua tus puav leej nyob rau hauv txoj kev sib tw khiav no. Thiab nyob hauv txoj kev sib tw kev ntseeg no, Vajtswv yeej ntuas kuv tias kuv yuav pib li cas los tsis tseem ceeb. Vim txhua hnub yeej muaj tsheej txhiab tus tib neeg pib. Qhov tseem ceeb yog yam uas peb yuav ua kom tiav txoj kev sib tw.
Yog leej twg twb ua tiav tas txoj kev sib tw khiav marathon ncua kev deb li 42 tus phiaj zeb lawv yuav hais rau koj tias, ib tshim kev koj khiav puav leej tsis muaj qab hau yog tias koj tsis khiav mus kom txog tus ciam tom kawg. Kuj ib yam li ntawd, yog peb khiav txoj kev hauv lub neej thiab siv zog tawm tsam kev ntseeg tiamsis mus tsis txog tus ciam tom kawg, tsis tuav tau txoj kev ntseeg txog thaum kawg ces tseeb tiag peb yuav txais tsis tau ib yam dab tsi li.
Yog li, nyob hauv txoj kev sib tw no peb txhua tus puav leej cheem tsum txog Vajtswv txoj kevhlub. Txoj kev hlub ntawd pab kom peb ua siab ntev thiab siv zog khiav thaum yuav nrog rau tej xwm txheej uas ua rau yus tus kheej pom nkees nkees.
Nyob rau txhua zaug Paulaus tshaj tawm txojmoo zoo, xib hwb Pauslaus nws tau ntsib ntau yam kev sim siab. Vajtswv yog tus twb cawm yawg thiab pab kom yawg rov qab ua dej num ntxiv. Thiab yawg tau nthuav qhia txog tej yam ntawd li hauv qab no:
“Cov kwv tij, peb xav kom nej paub hais tias thaum peb mus pem lub xeev Axias, peb raug txomnyem heev kawg li, peb tiv yuav luag tsis dhau, peb xav hais tias peb yeej yuav tuag xwb. Peb zoo li tej neeg raug txim uas luag yuav coj mus tua. Tiamsis cia peb raug kev txomnyem li no, peb thiaj tsis cia siab rau peb lub tswvyim. Tiamsis kom peb cia siab rau Vajtswv tus uas tsa tau neeg tuag sawv rov qab los. Nws pab peb dim ntawm txojkev tuag uas txaus ntshai heev, Nws yeej yuav pab kom peb dim; thiab peb cia siab hais tias, nws tseem yuav pab peb mus lawm yav tom ntej.” (2 Kauleethaus 1:8-10)
Yog li, yog koj tab tom qaug zog thiab tsis tab pov tias yus txaus zog nce ib theem ntxiv, yog koj hnov cuag li tsis muaj pa lawm, cia li nres thiab thov Vajtswv txoj kev hlub ntxiv lub zog rau koj, kom koj tsis vam khom koj lub zog tiamsis vam khom Vajtswv.
Cia li tig los rau ntawm Vajtswv hauv cov lus thov. Tus sau Ntawv Nkauj 121:2-3 twb tau ntsib dhau los lawm hais tias,
“Kev pab kuv yog tuaj ntawm tus Tswv tuaj, Nws yog tus tsim lub ntuj thiab lub ntiajteb. Nws yuav tsis pub koj ntog; tus tiv thaiv koj yeej tsis tsaug zog ib zaug li.”
Peb txhua tus yeej tau Vajtswv muab tso rau hauv ib txoj kev sib tw thiab peb yuav tau khiav kom kawg. Paub tias txoj kev sib tw twg los yeej muaj kev nkhaus, raug nrog toj, ntau zaug yuav ceev heev. Tiamsis ntau zaug, txoj kev sib tw ntawd nws kuj ho yog ib ncua kev zoo, tshwj xeeb yog thaum koj paub tias leej twg tab tom nrog koj khiav ua ke, thiab xav txog qhov nqis zog uas koj yuav tau txais thaum koj khiav txog tus ciam tom kawg.
Txhob qaug zog, txhob tag kev cia siab thaum ntsia pom ncua kev deb tom hauv ntej. Cia li ntsia ntsoov Tswv Yexus thiab ua siab ntev mus txog thaum kawg. Thov nco ntsoov tej lus Paulaus hais tseg rau peb:
“Kuv pom hais tias txojkev txomnyem uas tamsim no peb raug yeej piv tsis tau lub tshwjchim ci ntsa iab uas Vajtswv yuav pub rau peb yav tom ntej no” (Loos 8:18).

Thov caw nrog kuv peb thov Vajtswv ua ke: Vajtswv kuv paub hais tias kuv qaug zog thiab tag kev cia siab thaum ntsib tej kev sim siab hauv kev ntseeg ntawm yus lub neej. Thov Koj txoj kev hlub pab kom kuv ua tau siab ntev khiav raws txoj kev sib tw no kom khiav txog tus ciam tom kawg. Kuv thov hauv Yexus Khetos lub npe. Amees.

Cov kwv tij uas hlub tshua, nyob hauv txoj hau kev raws tus Tswv qab, thaum tag kev cia siab, qaugzog, koj cia li ntsia mus rau Vajtswv tus uas niaj hnub nyob nrog koj thiab ntxiv dag zog rau koj. Kuj cia li xav txog qhov nqis zog yuav muab pub rau tus neeg ua tiav kev sib tw cia kom koj ua siab ntev khiav mus kom txog tom kawg.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev txhawj xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj thiab peb xav kom txuas tau nrog koj.