Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Tòm tŭ lơh nền dòn dòp Yàng Jesu, bol he neh hòi dăn mơ jà Kơnràñ mut tòm rài kis mơ lơh cau tòm nùs nhơm he dê. Mơya đơs song lah, pal sền sơwì wơl ală tŭ tơngai neh rlau, ngan la bol he neh lòi Yàng lơh gơs cau tòm nus nhơm he dê dô bă wil tơl sơl? Hala bol he găm pơnđơl prap wơl dô êt pơnah tòm nus nhơm he mơ ò bài lời Yàng in mut?

Ngai do, ngai 21/10/2021, bơta hòi dăn kòp ngai dăn jà ồng mọ oh mi bơtê bal jơnau Yàng dê kơnòm dê bơta dong kòl mò Marsha Brickhouse Smith dê bơh tơnggume BOL HE GAM LÒI YÀNG IN LƠH CAU TÒM RÀI KIS HE DÊ SƠL?

Tŭ do gơwèt hơ Kơnràñ la Bơtau bơh gơnap gơnoar lơh broă tòm bol he, rgơi lơh tơngkah tơngkañ oă rlau mơ ală bơta bol he hòi dan mơ kơlôi sơnơng, (Ê-phê-sô 3:20)

Ngan lah dô ngai jòng mơ lơgah lơgañ. Añ lơh nền rơp lòt kơnhơl rò gah hiòng dà ring ngềt(niam). Cal khồm dàr dê ală ntê chi sronh cơ(...). Hơ̆ là dô ngai tòm kơnhai jrùh niam ngan. Mơya, gơ lơh be mìng gơs dô nă añ lơm tềng do. Gơs oă broă gơlik gơs tòm rài kis lơh añ in wil wơl (dơrcul).

Añ sơntòm tòmbơh bơr mơ Yàng Jesu, Bơtau git làm bơta kơlôi sơnơng tòm nus nhơm añ mơ kòñ gơboh añ dô bă dờng ơnàng ngan.

“Ơ Yàng, kòn neh hòi dăn, dăn Yàng mut tòm nus nhơm kòn mơya oă dơ̆ kòn gŏ nùs kòn dê gơlơh soh gòi lơm. Ngăn sơl la Yàng gam gơs mat tềng hơ̆ ”

Gơlơh be tòm nùs añ, añ đăl git gơs jơnau Yàng đơs lơbơn niam lah,”ơ kòn kòñ gơboh añ jê, Añ neh gơn kòn tus mơ lùp Añ. Gơs oă bơta lơh nùs kon in gơlơh be soh gòi lơm. Tŭ Añ tus mơ ală ơdŭ tòm nùs nhơm kòn, gen gơ til wơl. Bơh kòñ gơboh kòn, Añ neh jào ală kai mpồng tòm tê kòn. Gơs ală tiah Añ ò rgơi mut tàibơh kòn neh til kơ̆ . Kòn hòi dăn Añ lơh gơs cau tòm rài kis kòn dê mơya găm gơs ală tiah tòm rài kis kòn, kòn ò kòñ pò mpồng Añ in mut. Añ git lah kòn neh ơn nus nhơm kòn dê Añ in. Mơya gơs ală ơdŭ krơi is tòm hơ̆ kòn neh til kơ̆ cê mơ ơn mpàn ting bơr lah ‘Ò GEH MUT’. Behơ̆ tàng, kòn neh gŏ nùs nhơm kòn dê gơlơh be soh gòi mơ noat mrềt.”

Añ ho wơl tơn mơ Yàng lah, “mơya ơ Yàng, ală ơdŭ hơ̆ prap bềng bơta jê sồt, moat jrùng mơ dơrcul. Mìng bol gơ la ală ơdŭ mơ kòn òhềt pò bơh dilah pò gen gơ jê sồt oă ngăn. Digơlan kòn ò rgơi lời gơ til kơ̆ cê sơl ơ?”

“Ò, ơ kòn Añ jê. Dilah kòn kòñ Añ la Yàng rài kis kòn dê gen Añ pal mut ơm mơ lơh gơs cau tòm nus nhơm kòn dê. Mut ơm tòm làm nus nhơm. Kòn pal pò ơdŭ gơs sơnđăn la ‘Ò toh glài' hơ̆ mơ kòn toh glài tĕ. Jơh nùs toh glài mơ tă sang bơta tìs. Gen pơn jat lòt tus tai hơ ơdŭ gơs sơnđăn là ‘Jê Sồt Moat Jrung’ mơ lòi Añ in lơh bềng ơdŭ hơ̆ bơh bơta pơndòm pơniang mơ bơta kòñ gơboh. Mơ tus tai hơ ơdŭ gơs sơnđăn lah “Ngai neh rlau” mơ lời Añ in jùt rào gơ bơh mhàm màng să tòm Añ jê. Añ rơp tă tơlik jơh ală bơta tòm ală ơdŭ hơ̆ mơ tuh bềng lìu gơ bơh bơta kòñ gơboh, nus kòñ nđàc mơ bơta toh glài. Añ rơp tă jơh ală bơta jê sồt, jùt rào goh ală bơta sồt rmañ mơ kòn rơp jòi bàn ală bơta kas màng pồn ndơp tềng hơ̆”.

Añ kah wơl broă Yàng Jesus neh lik ling tòm bòng nhơt wàng belàt dê bơh hìu ơpah bic ò gơs ơdŭ nàng Kờnrãn in ơm tai. Bơh dêt, kòp tŭ kơlôi tus broă ò gơs ơdŭ Yàng Jesu in, añ gơlơh moat jrung ngăn. Mơ tŭ do, Yàng tơngkah wơl añ bơh añ neh lơh tòmtoh behơ̆, tòm tŭ til kơ̆ ală ơdŭ tòm nus nhơm he mơ ò lòi Yàng in mut. Să tòm añ kung be cau tòm hìu ơpah bic yau òr, đơs lah nùs añ ò gam gơs tiah gòi Kờnrãn in. Yàng kòñ añ pò nùs he dê mơ wă rò Kơnràñ ò di mìng cơn đòa mut mơya gơs làm jơh gơnoar lơh cau tòm ală ơdŭ, ală pơnah tòm nus nhơm, mơ rài kis añ jê.

Neh oă nam lòt gan, añ til kơ̆ cê ală ơdŭ hơ̆, ò lòi Kơnràñ in mut. Añ lùp is lah chi bơh tài añ sơnđan Kơnràñ la Yàng, la cau tòm mơya ò ngăn lòi Yàng at bồ wil tơl nus nhơm he dê taih?

Añ cùn gơltang di gah hiòng dà mơ dăn Yàng Jesu mut tòm ală ơdŭ hơ̆. Mơ Kơnràñ neh cơnđoà mut. Añ dòn lah Kơnràñ kung rơp lơh be hơ̆ mơ ồng mò oh mi. Lời tĕ Kơnràñ in lơh gơs cau tòm jơh nus nhơm bol he dê. Ò di la dô pơnah lơi hơ̆ mơya la pò wil tơl. Mơ bol he rơp geh tòm gơl wil tơl dô bă krơi is crih crài.

“Tŭ do gơwèt hơ Kơnràñ la Bơtau bơh gơnap gơnoar lơh broă tòm bol he, rgơi lơh tơngkah tơngkañ oă rlau mơ ală bơta bol he hòi dan mơ kơlôi sơnơng,” (Ephesô 3:20)

Dan jà bol he dô nùs bal tòm bơta hòi dan: Khoai Yàng, dăn toh glài kòn in bơh kòn găm til kơ̆ cê ală ơdŭ tòm nus nhơm kòn dê. Ngai do kòn dăn jào phi wil tơl nus nhơm kòn dê Yàng in, dăn Yàng mut at bồ, lơh cau tòm mơ sền gàr jơh ală pơnah rài kis kon dê. Kòn ai sơnđăn Yàng Jesus Krist, hòi dăn mơ Yàng Bèp. Amen.

Ơ ală ồng mò oh mi kòñ gơboh, gơs pơnah lơi tòm rài kis ồng mò oh mi dê òhềt jơh nùs dòn duh jat nus kòñ Yàng dê, găm kòñ prap is he in, mơ lơh jat sơnoa rnoas mơ nùs is he dê sơl? Ngai do Yàng hòi jà bol he dòn kơnòm dê Yàng dô bă jơh nus, dòn duh Yàng jơh nus mơ git làm gơnap gơnoăr tòm gơl crih crài Yàng dê ràng tơlik hơđang rài kis bol he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.