Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai

Dilah bol he hòi dan dan Yàng ai he in dô nơm hìu mơ jòi bàn dô nơm hìu niam nùs mơ khà priă kung dipal, bol he rơp lơh mbe lơi taih? Ngan la bol he rơp dòp rò tơn taibơh kơlôi lah hơ̆ la bơta Yàng cèng tus he in sơl? Hala bol he rơp kơrhia sền sơ wì hơ̆ ngan la bơta lơngai ngan hala mìng la dô nơm pơt dă cau sòtơm dê taih?

Ngai do, ngai 20/11/2021, bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl mò Shadow Lane dê bơh tơnggume BƠTA LƠNGAI BLAC CHỪT

Cà ràk cèng tai Kơnràñ guh hơđang mơnơm jơnhoa ngan, sơnio Kơnràñ in jơh ală lơgar tòm dunnia, mơ bơta gơklŏ gơ dê, 9mơ đơs lah: “Dilah Kơnràñ tơmbic să di đap añ mơ duh khoai añ, gen añ rơp ai Kơnràñ in jơh ală bơta do.(Mathiơ 4: 8-9).

Nđò nam lài, ùr klau bol hi neh rcang roat dô nơm hìu mơ bol hi kơp kòñ. Bol hi neh jòi lùp mơ pơnđơl jòi nàng gơs dô nơm hìu di pal ơm dê tiah niam rlau jơh. Mơ bol he neh jòi bàn dô nơm hìu behơ̆ tòm kơnhwàl Shadow Lane. 

Hơ̆ la dô nơm hìu gơs bàr tap hàng mơnĕ tòm dô kơnhwàl ring ngềt ngan. Bol hi sền gŏ gơlơh be hìu do la sèng hơ wơl jơnau hòi dan bol he dê. khà jền priă gèn di pal ngan mơ bol he neh rcang sir nàng roat. Ală bơta gơlơh be niam lơm...niam ngan lơm. Taibơh hơ̆, añ lơh nền sền sơ wì sră bơ àr jat be bơta boh lam bơh phan mơna nàng rgơi lơh tai ală cơnđoàn tơnơ̆. Ò roh oă tŭ tơngai jòi bàn, añ neh sền gŏ lah cau tòm hìu do ò gơs gơnoar ngui loh làng gơ wèt mơ phan mơna. Gơs pơnah la cau tòm hìu kòl dồs mơ cau ndai mơ neh ơn hìu dô ala dồs ồng in mơya ồng neh pồn ndơp bơta do mơ ò yal bol hi in bơh sơnròp.

Tơnơ̆ mơ neh lùp nền cau tòm hìu bơh bơta do, khai gam pơndang bơh pơnah dồs. Khai sồr bol hi ơpah hìu do jơl tus dê tŭ ală khà dồs geh tơm jơh. Dilah bol hi roat gen khà jền priă bol he dê roh jơh mơ ò gơs gơnoar ngui ală phan lơi tòm hìu do. Đal git broă do, bol he moat jrùng ngan. Bol hi neh sền do la hìu mơ bol hi kơp kòñ, la jơnau hơ jơnau bơta hòi dan, la bơta lơngai Yàng ai bol hi in. mơya tŭ do bol hi đal git gơ mìng la “phan blac chừt”, mơ la dô nơm dă lơm. 

Yàng neh ho bol hi in dô nơm hìu. Ngan gơ dê la, Yàng neh rcang lài dô nơm hìu mơ oă ngan bơta bol hi in, mơya lài mơtŭ bol hi rgơi git làm bơta rơndap tap sèng niam Yàng dê gen cau sòtơm neh geh gơs tŭ lơmpah mut mơ sơnnio bol hi in dô bơta lơngai blac chừt. Tơnggume broă khai dê la kòñ pơrlồm mơ kơñau bơta lơngai ngan mơ Yàng Tom Trồ ai bol he in.

Bulah bol hi kòn ngan hìu hơ̆ mơya ưnngai Yàng tàibơh Kơnràñ neh ai bol hi in tơl ngac ngar mơ àng loh nàng sang lòi bơta kă bro hơ̆. Ò jŏ tơnơ̆, bol hi jòi bàn mơ dòp geh dô nơm hìu mơ Yàng Tom Trồ neh ai bol hi in. Hơ̆ la hìu niam rlau jơh tòm dô bă tiah niam rlau jơh mơ bol hi neh roat gơ bơh khà priă jền ò oă ir. Bơta moat jrùng bơh neh roh bơta mơ bol hi kơlôi la hìu niam neh gơlik wơl bơta hòn chò tòm tŭ bol hi dòp geh hìu niam ngan. 

Tòm tŭ bol he cơnđoà lòt tòm ală bơta lơngai Yàng dê, kah tĕ lah cau sòtơm rơp pơnđơl pràn jòi tŭ lơmpah nàng mut, pơrlồm blac mơ tung kơñau ală bơta lơngai hơ̆ bol he dê. Tian gơs khai rơp lòt ngai rlau tus dê bơta tă tơlik bơta lơi hơ̆ bơsut be bơta lơngai Yàng Tom Trồ dê, kòp bơta lơi rgơi nàng lơh roh bơta rơndap Yàng Tom Trồ dê ai bol he in.

Tòm tŭ cà Satan ơnniai Yàng Jesu, khai neh tơlik dô bơta rơndap pa ala bơta rơndap Yàng Bèp dê. “Cà ràk cèng tai Kơnràñ guh hơđang mơnơm jơnhoa ngan, sơnio Kơnràñ in jơh ală lơgar tòm dunnia, mơ bơta gơklŏ gơ dê, 9mơ đơs lah: “Dilah Kơnràñ tơmbic să di đap añ mơ duh khoai añ, gen añ rơp ai Kơnràñ in jơh ală bơta do.”” (Mathiơ 4: 8-9).

Digơlan gơ wèt mơ dô êt nă cau gen do la dô bơta kă bro bơkah lơngồt. Tơnggume broă lồi dut Yàng Jesu dê tus dunnia la nàng cèng jơh tơl nă cau mut tòm lơgar Kơnràñ dê mơ at bồ bol he bơh bơta song ring. Tềng do, cà Satan neh tơlik dô jơnau hobal hơ̆ la jào Yàng Jesu in ală lơgar tòm dunnia mơ ò càng kong bòl glar lơi. Mơya Yàng Jesu ò dòn dòp jơnau gơ dê. Kơnràñ git lah ală phan ƀàn niam rlau jơh, ală phan ƀàn ngan, tus bơh Bèp hơđang trồ bol he dê, mơ Kơnràñ lơh nền lơh jat nùs kòñ Yàng Tom Trồ dê.

Yàng Jesu neh tìp mat mơ bơta do dô dơ̆ tai gan dê ồng Pier, cau bơtê kòñ gơboh Kơnràñ dê. Tòm tŭ Yàng Jesu đơs mơ ală cau bơtê lah Kơnràñ la Bơtau Krist, mơ Kơnràñ pal kong oă bơta bòl glar tòm tê ală cau at bồ làngbol Juda, ală cau lam bồ gơnoar ơn phan duh khoai bal mơ ală cau bơto bơta boh lam, mơ pal kong tơn chơt tòm Jerusalem gen…

“Pier lam Kơnràñ lik is mơ lah pơrhơng lah: “Ơ Yàng, Yàng Tom Trồ ò kòñ behơ̆ ò. Bơta hơ̆ ò tŭ lơi tus di Kơnràñ ò.” 23Mơya Kơnràñ wơlke đơs mơ Pier lah: “Ơ cà Satan, ruc tĕ tơnơ̆ Añ! Mê lơh kai gơtup tìs Añ in, bơh nùs kơlôi mê ò gơwèt hơ broă Yàng Tom Trồ, mơya gơwèt hơ broă kòn mơnus dê.”” (Mathiơ 16:22-23).

Cau sòtơm neh ngui jơh ală broă lơh nàng pơndòm Yàng Jesu dòp geh dô lơgar ala, hơ̆ lơgar blac chừt bơh cà Satan cèng tus, dô nơm lơgar rơp ò rgơi gam wơl sùm sùm. Dilah Yàng Jesu ơn nùs ơn tồr dê lơgar cà Satan dê, gen ndròm be bơta gơlik gơs mơ bol hi bơh hìu tòm kơnhwàl Shadow Lane, cà Satan rơp la cau tòm hìu hơ̆ dê, mơ Yàng Jesu rơp roh jơh ală bơta, mơ roh Lơgar ngan mơ Yàng Bèp neh ai Kơnràñ in. 

Tòm gùng jat Yàng, bol he jòi jat tĕ nùs kòñ Yàng dê, mơ kơp gơn bơta lơngai mơ Yàng rcang lài bol he in. kơrhia tĕ nàng ò gơ dùh tòm dă cà Satan dê. Hơ̆ sùm là bơta gơ tus lài ngan, digơlan sền gen niam ngan mơ gơlơh be hàng mơnĕ ngan, mơya dilah bol he sền sơ wì nề nền, bol he rơp sền gŏ gơs ală bơta ò tòm toh. Tŭ hơ̆, tă sang tĕ gơ. Bañ lòi gơkòl tòm bơta lơngai blac chừt.

Dan jà bol he dô nùs bal tòm bơta hòi dan:  Khoai Yàng, dan ai kòn in dô nơm hwềng soàn mhar git nàng rgơi đal git ală bơta tìs nrah tòm bơta mơ cà ràk cèng tus, tồ kòn ò gơkòl tòm bơta lơngai blac chừt cau sòtơm dê mơ lơh roh bơta lơngai ngan Yàng dê. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, taì mơtŭ dòn dòp ală “bơta lơngai” tus mơ he, bulah bol he kòñ gơboh gơ mbe lơi gen kung pal ngac ngar tĕ, dan Yàng sòl pơnđang nàng kơrhia pơndròm wơl bơta hơđap mat mơ bơta rơndap tapsèng Yàng Tom Trồ dê, bal mơ bơta bơto sồr Yàng dê tòm Sră Goh. dilah pin wil wơl mơ đal git ală bơta tìs nrah, gen khin cha tĕ pơndang sang lòi mơ pơn jat kơp gơn bơta lơngai song ngan bơh Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.