Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

La cau dòn Yàng, bol he git bơta dòn la kai mpồng nàng dòp rò bơta dong klàs, nàng git làm broă lơh Yàng dê tòm rài kis. Mơya , bol he kung pal chài rgơi tòm bơta dòn, git kơrhia nàng sac rwah pal dòn bơta lơi tồ ò kòl pơrlồm pơndòm bơh ală bơta tìs nrah, lơh jê sồt sătòm he in mơ jê sồt ală cau gùtdar war wĕ in.

Ngai do, ngai 25/09/2021, Bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl ồng Steven Halter dê bơh tơnggume CHÀI RGƠI TÒM BƠTA DÒN

...chài rgơi tĕ be bơs, mơ lơbơn niam tĕ be sềm ntòp. (Ma-thi-ơ 10:16b).

Bơta dòn la dô bơta crih crài ngan. Bol he neh geh dong klàs kơnòm dê bơta nđàc bơh bơta dòn (Ephesô 2:8). Kơnòm dê bơta dòn, bol he gơlik gơs kòn sau Yàng Tom Trồ dê (Jang 1:12). Bơh bơta dòn, bol he rgơi lơh niam nùs Yàng Tom Trồ (Hebrơ 11:6). Tòm tŭ bol he dòn Yàng, ală bơta ò rgơi rơp gơlik gơs rgơi.

Mơya , ngan sơl la bol he pal dòn jơh ală bơta ơ? Nàng hơ wơl sèng lùp do dô bă nền cê, bol he pal sền sơwì he dòn dê cau lơi mơ dòn dê bơta lơi. Bol he la cau dòn Yàng, dơ̆ dơ̆ kung òs dòn dê ală bơta tìs, mơ dòn dê gơ dô bă mhar ngan, mơ dô bă buơn soh.

Pơnyơu, dơ̆ dơ̆ bol he buơn ngan dòn dê ală jơnau đơs cok cek ală cau lơh broă bal dê. Bol he buơn dòn dê jơnau đơs rlau ir bơh ală cau tiơng pơnro. Digơlan bol he dòn dê ală jơnau tìs nrah, gơs pơnah đơs ò tòmtoh bơh ală cau lam bồ dà lơgar. Digơlan cau lam bồ dòn dê ală bơta lơh cơng ò niam bơh cau hơđơm he. Ală bơta do lam tus hơ broă bol he rơp lơh jê sồt cau ndai tòm tŭ dòn bơta lơi hơ̆ ò tòm toh bơh bol khai. Bol he dòp git ò tòm toh bơh cau ndai mơ lơh ală broă do in gơlik gơs iơh rlau tai tòm tŭ yal cau ndai in ală jơnau ma blac hala nggùl jơnau song ngan mơ bol he neh dòn.

Dơ̆ dơ̆ să tòm bol he lơh jê sồt is să tòm he tòm tŭ dòn dê ală bơta bơto mơ he iat kơno. Be la, bol he dòn dê dô nă cau pơrlồm blac chài rgơi tòmbơhbơr mơya ngan gơ dê la jòi gùng tă kơñau kơldung priă bol he dê.

Behơ̆ gen, lơh mbe lơi nàng sền gàr sătòm he mơ dô pleh bơh bơta lơh jê sồt cau ndai taih? Gơs dô êt bơta bol he rgơi lơh. Dùl tòm ală bơta hơ̆ la bañ mìng dòn dô gah lơm tòm tŭ kơno yal bơh dô nă cau lơi. Bol he pal càng iat bơh dê bàr gah nàng gơs bơta sền sơwì niam rlau jơh bơh broă neh gơlik gơs.

“Cau sơnròp yă wơn gơlơh be di pal; Mơya tŭ đah ne tus gen sồng git cau lơi di hala tìs.” (Jơnau pơnđic 18:17)

Dô gah tai, bol he rgơi sền gàr is să tòm he klàs dê ală bơta bơto sồr tìs be do: pơndròm wơl ală bơta he kơno bal mơ jơh ală bơta bơto sồr Sră Goh dê. Jơnau Yàng bơto bol he: “Ơ ală cau kòñ gơboh, bañ dòn di jơh ală hwềng, mơya lòng sơwì tĕ tồ git dilah ngan ală hwềng la tus bơh Yàng Tom Trồ hala ò; tài bơh gơs oă cau gơnoar hwơr ma blac neh lòt tus tòm dunnia.” ( 1 Jang 4:1)

Bol he pal lơh nền tồ ò lơh jê sồt să tòm he hala cau ndai tòm tŭ dòn dê ală bơta ò di pal dòn. Dan Yàng ai bol he in bơta chài rgơi nàng git cah is bơta lơi la di, bơta lơi la jak chài, bơta lơi la dipal. Să tòm Yàng Jesu neh đơs mơ ală cau bơtê, ““...chài rgơi tĕ be bơs, mơ lơbơn niam tĕ be sềm ntòp.” (Ma-thi-ơ 10:16b).

Jơnau Yàng dê tòm sră Jakơ cih be do: “Dilah tòm oh mi gơs cau lơi siơ̆u bơta jak chài, dan tĕ mơ Yàng Tom Trồ, gen Kơnràñ rơp ai, bơh Yàng Tom Trồ la Bơtau ai gòi tơl nă cau in dô bă ơnàng, ò lah pơrhơng cau lơi”. (Jakơ 1:5)

Ngan, bơta dòn la dô bơta crih crài ngan! Mơya ò di bơta lơi kung dòn. Bol he pal lòi Yàng Tom Trồ mơ jơnau song Kơnràñ dê lơh gơs tòm ryas bơta dòn bol he dê. Lơh behơ̆, bol he rơp la bơta àng ryŭ ryơm rlau jơh dunnia in. Mơ tòm tŭ dờng tơngguh tòm Yàng, sơlo ngai sơlo bơsut be rùp să Yàng Jesu, Bơtau Dong Klàs he dê

Dan jà bol he dô nùs bal tòm bơta hòi dan: Khoai Yàng, dan ai kòn in bơta jak chài bơh Yàng, nàng kòn in đal git bơta lơi là di, bơta lơi la tòm toh, bơta lơi la jak chài , tồ bơta dòn bol kòn dê geh kơ̆ wền mơ geh cồng nha tòm Yàng. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ông mò oh mi kòñ gơboh, bơta dòn bol he dê pal ơn Yàng mơ Jơnau Yàng dê lơh mơnàng. Behơ̆, pal ơn tŭ tơngai sền sơwì bơtê git nề nền rlau tai bơh Jơnau Yàng. Lài mơtŭ dòn dê ală bơta lơi, pal pơndròm wơl bơta hơ̆ mơ Sră Goh, mơ kơlôi sơnơng bơta he dòn gơs kwơ Yàng in mơ broă Yàng in hala ò.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.