Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Neh gơs tŭ lơi oh mi mut sa tòm tiah trŭ phan sa mòng git bal mơ nus nhơm chò hòp tài bơh rơp geh sa phan sa mơ he kòñ gơboh, mơya lồi dut mìng dòp wơl bơta moat jrùng tai bơh bơta kơp kòñ bol he dê ò gơlik gơs wil tơl be lài òr sơl? Digơlan tơnơ̆ mơ bơta gơlik gơs do, oh mi rơp ò tŭ lơi kòñ mut sa tòm tiah do tai. Dilah pơndròm bơta gơlik gơs tòm tŭ lòt sa mơ bơta gơlik gơs tòm tŭ lòt pơjum, gen oh mi gŏ gơs bơta lơi ndròm bal hala ò?

Ngai do, ngai 29/10/2021, bơta Hòi dan kòp ngai dan jà ồng mò oh mi bơtê bal jơnau Yàng dê kơnòm dê bơta dong kòl mò Dan Betzer dê bơh tơnggume Ò RGƠI LOAN JAI

Gen tàng oh mi pơndòm pơniang bal mơ gơp, bơt bơtào bal mơ gơp, kung be oh mi òs lơh. (1 Têsalônika 5:11)

Pa do, ùr klau añ mut tòm hìu lơh phan sa tòm bòn dờng la tiah mơ bol hi neh kis bơh lài. Añ kah să tòm añ kòñ ngan hìu lơh phan sa do tòm ală kơnhai sơnam hơ̆: cau dong broă niam, phan sa bơkah, tiah ơm gen niam ò git lơh.

Bol hi neh kơp gơn gơs dô tŭ tơngai behơ̆ dô dơ̆ tai. Ală cau dong broă gam lơh niam, mơya phan sa gen ò rgơi ngui diơng. Añ neh hòi dô pet poac ntìng rpàs, mơ añ kah wơl la, dô pet poac yau òr dờng ngan ndròm mơ mpàng jơng, Mơya poac mơ añ dòp tŭ do la dô bơta lơi hơ̆ lơh añ in mơp dơl.

Añ kơlôi hơ̆ la dô pet ồi cau cèng gơm tus dê gơ lề, sir behơ̆ gen tuh phan bơcă nàng jơm mơya phan bơcă hơ̆ ò git tus bơh lơi. Ală pet poac tòm prềng mơ cau yò sào bol hi in, tian gơs ò gŏ dô pet ntìng lơi tơl poac

Tòm tŭ añ lùp cau dong broă bơh bơta do gen khai gơlơh bàssìl mơ đơs “ Hìu trŭ phan sa bol hi dê neh tac mơ tiah lơh broă dờng in mơ bol hi mìng lơh jat be ală bơta mơ cau sơnnio”

Añ kah wơl tòm tŭ mut tòm hìu lơh phan sa, gơlơh be ring ngềt ò gơs dô nă cau lơi, mơya lài òr kòp dơ̆ kòñ mut sa tòm hìu lơh phan sa do gen pal ntào jat sèng nàng kơp gơn.

Dilah tiah lơh broă hơ̆ kơlôi lah, cau rơp pơnjat tus sa tềng do mìng tài bơh lài òr hìu lơh phan sa do tiơng pơnro gen añ kơp kòñ bol khai neh dòp geh dô bơta bơtê loh làng. Cau rơp tus dê tiah mơ bol khai geh wă rò niam mơ phan sa hùc bơkah, ò di la tài bơh sơnđan tiơng pơnro bơh lài òr lơm.

Nisơna, añ dòp git do kung la bơta bơto sồr lòi Hìu Jum Goh in. Ngai do, gơs oă ngan hìu jum gơlik gơs soh gòi, tòm tŭ lài òr ală tiah hơ̆ neh gơs ală bơta bơtào tơngguh đah hwềng dờng ngan! Digơlan la tài bơh ală cau at bồ mìng kơlôi tus dê sơnđan, tiơng pơnro, tian gơs la bơta gơklŏ tòm rài yau,  ò di la nùs nhơm ngan Hìu Jum Joh dê

Tòm tŭ ală tiah nggui tòm hìu jum gơlik gơs soh gòi, bol khai yoam bơh ală pah tơngai ngai do, đơs lah cau dòn ngai do ting jat phan mơna mơ sang lòi rài kis đah hwềng. Ngan gơ dê la, cau tus pơjum ò rgơi sa loan ală phan sa mơ cau yò sào bol khai in. Mìng behơ̆ lơm.

Añ dòn lah oă cau ngai do gam jơgloh tơhìr Yàng. Bơta gơlik gơs la oă Hìu Jum Goh mìng kơlôi tus hơ đah bơdìh, lơh mbe lơi hìu jum bơka niam, bơta rơnđap pơjum chò hòp, ntas kơñi dờng, rùp sơnnio pal niam tồ cau in kòñ sền, ò ơn nùs tồr dê cau mơ neh geh tòm gơl bơh bơta kòñ gơboh mơ bơta nđàc Yàng dê mơya kơlôi tus tĕ jơh tơl nă cau tòm Hìu Jum Goh dê, hòi dan tĕ Yàng Hwềng Goh tề lam nàng Jơnau Yàng geh bơto yal dô bă pràn kơldang mơ bềng bơta nđàc nàng kòp nă cau dòp rò Jơnau Yàng be bơta pal càng gơs. Lòi tĕ bơta kòñ gơboh song ngan mơ nùs nhơm jơh nùs duh broă bal mơ gơp geh ràng tơlik tòm să jan Bơtau Krist.

“Gen tàng oh mi pơndòm pơniang bal mơ gơp, bơt bơtào bal mơ gơp, kung be oh mi òs lơh” (1Tesalônila 5:11)

“Kòp nă tòm ală oh mi bañ mìng kơlôi rcang broă tòm he dê, mơya kung pal kơlôi rcang broă cau ndai in sơl” (Philip 2:4)

Dan jà bol he dô nùs bal tòm bơta hòi dan: Khoai Yàng, dan Yàng Hwềng Goh tuh bềng lìu bơta nđàc hơđang ală Hìu Jum Goh nàng gan bơh hơ̆, làng bol Yàng dê dòp geh Jơnau Yàng dô bă gơnap gơnoar, git làm bơta kòñ gơboh tòm hìu nhă bơta dòn mơ sùm tòmklac bal mơ Hìu Jum Goh. Kòn ai sơnđan Yàng Jesus Krist hòi dan mơ Yàng Bèp. Amen!

Ơ ală ồng mò oh mi kòn gơboh, bañ ràng tơlik bơta ò niam nùs mơ Hìu Jum Goh tòm tŭ bol he sền gŏ bơta pal càng đah hwềng bol he dê òhềt geh ho wơl, jơh nùs tĕ hòi dan ala Hìu Jum Goh in, ală cau at bồ in geh bơta nđàc bơh Yàng, mơ jơh nùs gơs pơnah tòm bơta duh broă, bơt bơtào bơta dòn cau ndai dê, chồl bơtrut ală cau dòn lơbơn lơño rê wơl hơ Hìu Bèp.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.