Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai

Kòn mơnus bol he buơn ngan gơ dùh tòm ală bơta tòm pơndang gơlơh be “ ring niam”. Mơya, mìng dô êt cau tòm pơndang bơh jơnau song, mơ òs la nàng sền gàr is să he mơ lơh cơng să tòm he la song. Yàng hòi jà bol he pal git kơrmap gàr să tòm mơ gơs nùs lơbơn niam, kòñ gơboh tŭ hơ wơl mơ kòp bơta tòm pơndang lơi. Gen behơ̆ bañ lòi să tòm he hala cau sò tòm he at bồ, kòp bol he pal gơs jak chài nàng ò lơh moat jrùng dê oh mi he.

Ngai do, ngai 24/09/2022, Bơta  Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Katy Kauffman dê bơh tơnggume: ÔNG MÒ OH MI BUƠN GƠ DÙH SƠL?

"Lơngai ală cau gơs nùs niam lơnhơn in, bơh rơp geh pơrdòn ù." (Mathiơ 5:5)

Kòn meo sơnđan la Sam tus tòm rài kis añ bơh nam añ 9 sơ nam. Gơ ò gơs rơnjài wăn dê ngko gen bol he ò git cau tòm ròng gơ la ncau. Hìu nhă añ neh dòp ròng kòn meo do, mơ hơ̆ la kòn meo kòñ gơboh bol he dê jơh 18 nam do. Tài bơh mìng gơ  la phan ròng tòm hìu, gen ông mò oh mi kung git la gơ moat jrùng ngan. Mơya ò di behơ̆ ò. Tài bơh añ sùm ơm rềp di gah gơ.

Añ rgơi bươn ngan hwài pơndòm kòn meo añ jê. Mìng gơs dô nơm sơnò, dô nơm che, đèng sol hala tia laze, añ buơn ngan lơh gơ in lòt jat mơ hwài gơ mut tòm bơta kơnhơl tòm ting. Gar mat tơr lir gơ dê gơlik gơs gơboh gơbài ngan, mơ gơ ò jai pơndang sang. Poan nơm jơng jù gơ dê lơh nền wèt hơ tơnggu, mơ jơh ală phan lơi añ at gen lồi dut kung rơp ơm tòm bơr gơ. Chò hòp mơ bơta pha lin, tơnơ̆ hơ̆ gơ wơlke mơ bic hơđơm mat tơngai hala pơnjat tai bơta gơ jòi git.

Kơlôi tus ală bơta mơ kòn meo añ neh lòt gan, añ lùp is añ rgơi kong cau ndai “at bồ” sơl? Ò di la kong  hwài mut tòm bơta kơnhơl meo kup đe, mơ la mut tòm bơta tòm dră tòm jơnau đơs mơ jòng să he dê? Lài òr, añ buơn ngan gơ dùh. Kalke ngan nàng kơryan wơl dô bơta tòm pơndang gơ lơh  be niam. Mơya añ gŏ lah ò di la jòng rơ jơnau song, lồi dut añ tòm pơndang nàng lơh cơng añ song. Bol he kòñ ngan tòm pơndang tŭ bơta tiang pơnrơ, bơta kwơ màng he dê hala nùs nhơm he geh tìp bơta iơh. Digơlan hơ̆ la bơta bơta do mơ Yàng tơngkah tus bơta niam lơhơn tòm ală bơta lơngai.

Mathiơ 5:5 cih: ' Lơngai ală cau gơs nùs niam lơnhơn in, bơh rơp geh pơrdòn ù. '

Añ bassìl ngan tŭ kah tus ală bơta lơngai Yàng Jesu ai cau gơs nùs niam lơhơn in. Añ neh ò kong sang ală bơta tòm pơndang gơ lơh be “ring niam”. Mơya bơta añ ò wờng la: cau gơs nùs niam lơhơn ò lòi gơnoar pha lin bol he dê nang gơlơh be la duh rngòt - bol khai sac rwah sang bơta kwơ màng he dê nàng ò lơh iơh tus cau ndai. Digơlan bol khai mìng ơm mŏ mŏ, hala hơ wơl ală jơnau đơs iơh gan dê nus nhơm kơ̆ wền. Bol khai ò buơn gơdùh bơh nùs nhơm hala bơta gơhào gơ jrañ, nàng hơ wơl dô bă sươu tòm toh.

Tu geh Yàng dong kòl, bol he rgơi tòm dră wơl ală bơta hơ wơl ală broă lơh ò duh rngòt, mơ dòp geh ù (Mathiơ 5:5). Tòm Sră Goh  pa “ù” sơnnio bơh ală bơta lơngai đah hwềng dờng rlau jơh.

Gơs nùs niam lơnhơn dong bol he geh bơta tòm klac đềt mềr mơ Yàng. Tài bơh “ù” tòm Sră goh Yau òs sơnio bơh sre brê cau ơm tòm bơta tòm klac ring niam mơ Yàng Tòm Trồ dê, gen rgơi đơs lah gơs nùs niam lơnhơn dong bol he toès bơta tòm klac đềt mềr mơ Yàng ngai do, dô sre brê dipal nàng kơp gơn mơ kwơ màng nàng bol he gơrmap gàr să tòm he. Tŭ gơrmap gàr nùs gơ hào gơ jrañ mơ ò lơh jat nùs nhơm tìs, hơ̆ la bol he jòng rơ Bơtau gơs nùs niam lơnhơn, bềng bơta nđàc mơ rgơi kong ơt rlau jơh. Bol he lơh niam nus Bèp, mơ gơlik gơs dòn kơnòm rlau tòm ală bơta tòm klac bol he dê bal mơ gơnoar broă Yàng jào. Bol he geh bơta chò hòp. Mơ bơta kas màng bơh sătòm he ò ting jat bơta pha lin cau ndai gan dê jơnau đơs, mơ jơnau pơndang, mơya jat Bơtau dờng rlau jơh, Bơtau sùm kòñ gơboh ală cau.

Kòn meo añ jê ò gam gơs bơta gơn kơnòm tai rau. Gơ ò jai tòm dră wơl ală bơta kơnhơl niam. Mơya tòm rài kis kòp ngai, tŭ ơn bơta kòñ gơboh dờng màng rlau mơ sătòm he gen, bol he rgơi tòm dră mơ ală bơta tòm pơndang mơ bơta pơndòm “bơkah lơngồt” ơn hơđap mat. Bol he rgơi tă sang bơta gơhào nùs, bơta gơjrañ mañ, bơta iơh bơ sak (Kôlôse 3:8) mơ soh tĕ nùs nđàc sơngit, kơ̆ dơn, pơndềt să” (Kôlôse 3:12)

Tài bơh Yàng kòñ gơboh bol he, Yàng rơp dong kol bol he git pal đơs bơta lơi hala lơh bơta lơi tŭ tìp bơta kalke, mơ Kơnràñ rơp tòm lơh ala mat bol he dilah pal càng.  Bơta kòñ gơboh mơ bơta dong kòl Yàng dê la bàr bơta kwơ màng rlau jơh tŭ bol he sac rwah kis niam lơnhơn mơ ò gơhào gơ jraañ. Tŭ hơ̆, ò gơs cau lơi rgơi lơh bol he in gơ dùh jat gùng iơh tai ò.

Dan jà bol he dô nùs bal tòm bơta hòi dan:

Dan Yàng toh glài kòn in tài bơh ală bơta tòm pơndang ơn să tòm he hơ đang rlau, lơh jê sồt ală oh mi ruh lŏ he mơ siơ̆u bơta kòñ gơboh. Dan Yàng ai kòn in gơs nùs niam lơnhơn, kong ơt kung be bơta jak chài mơ kah rngal nàng ò mut tòm ală bơta tòm pơndang ò kwơ màng. Dan Bèp dong kòl kòn rgơi lơh lòt tòm ală bơta dô bă gơs nùs kòñ gơboh mơ kong ơt. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, bol he la cau buơn gơdùh tòm ală bơta tòm pơndang ò kwơ màng mơ lơh cau ndai in moat jrùng sơl? Dơ̆ tơnơ̆, tŭ ntào hơđap dô bơta lơh nền tòm pơndang lơi, kơnòm tĕ Yàng dong kòl bol he gơs nùs niam lơhơn mơ kong ơt, Tŭ hơ̆, bol he rơp gơs bồ dơngoh jak chài rlau nàng lơh sir ală broă dô bă niam rlau jơh mơ ring lơ ngai rlau jơh.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.