Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Bol he git lah jơh tơl nă cau pal kong chơt mơ rơp ntào dê đap Sơban cahrña Yàng dê. Ngai hơ̆ rơp gơlơh be lơi taih? Bol he rơp đơs bơta lơi tòm tŭ Bơtau cahrña lùp, mơ bơta lơh nền lồi dut rơp mbe lơi taih?

Ngai do, ngai 28/12/2021, Bơta Hòi Dăn Kờp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl mò Missey Butler dê bơh tonggume SƠBAN CAH RÑA YÀNG DÊ

Jat be bơta neh lơh nền jơi kòn mơnus pal chơt dô dơ̆, gen tơnơ̆ pal kong cahrña. (Hebrơ 9:27)

Neh gơs tŭ lơi bol he ơn nùs kơlôi lơh mbe lơi nàng rgòi geh khà niam tòm bơta lòng bơtê dờng màng rlau jơh rài kis he dê hala ò? Tòm tŭ jơh tơl nă bol he ơm ntào dê đap Yàng Tòm Trồ kis sùm nàng yal wơl rài kis he dê taih? Lài mơtŭ bol he sơntờm klôi rcăng, rngòt rngơt, kơ̆ nùs tĕ bơh Yàng neh rcang jơnau hơ wơl tòm bơta pơr lòng bol he dê in rau.

Añ neh pơnđềt ngkời rơndeh añ jê jơnau cih be do: ‘Tŭ lơi gam bơta pơrlòng, tòm klờng rơp sùm gơs jơnau hòi dăn’. Dồ jơnau kơlôi gơdăn ñŏ ngan đơs bơh bơta kalke jŏ jòng mơ cau lơi kung pal kơlôi sơnơng. Mơya loh làng lah cau lơi kung rngòt tòm bơta pơrlòng, ngan sơl? Gen ñchi bơh tài jơh ală bơta rơm nùs tus bơh gơnoar broă pal ràng tơlik taih?

Tòm tŭ sền sơwì tơnggume do, añ dòp git bơta rơm-să să tờm añ jê – dô bơta kơlôi rcăng ò loh làng gơlik gơs tòm tŭ đơs bơh ‘ngai hơ̆’, mơ kung geh sơđan la ‘Ngai Cahrña’.

‘Jat be bơta neh lơh nền jơi kòn mơnus pal chơt dô dơ̆, gen tơnơ̆ pal kong cahrña’ (Hebrơ 9:27)

Añ sơntờm gŏ kalke kơlôi sơnơng tòm jơh ală broă, tài bơh la cau dờn Yàng Jesu, añ geh kờp tòm khà ală cau geh rài kis dòn nền dê bơta Sră Goh bơto dồ bă kràñ cê ờ tŭ lơi gơ lơnggơr. Mơya ngai cahrña gen mbe lơi taih? Añ kờñ tă tơlik jơh ală bơta kơlôi sơnơng neh lơh añ in sơrlồng sơrlàng dô bă kràñ cê.

Añ git lah să tờm añ pal cèng bơta do tus hơ sơban cahrña Lơgar Trồ dê. Añ rơp lùp Bơtau Cahrña Dờng Rlau Jơh trồ tiah dê. Mơya añ ò khin tòm tŭ añ mut tòm ală ơdŭ sàng goh mơ ờ geh jơnau bơto sôr di pal. Añ git să tờm añ kờñ geh dồ nă cau dong tò.

Ơ ală kòn añ jê, añ cih ală kòn in ală bơta do tồ ală kòn ò tìs glài. Mơya dilah gơs cau lơi tìs glài, gen bol he gơs dô Bơtau hòi dan ala ơm mơ Yàng Bèp, la Yàng Jesu Krist, hơ̆ la Bơtau song ring.(1 Jang 2:1)

Yàng Hwềng Goh be dô nă cau Kwang Cih sră tiah cahrña dê, neh pơndờm pơniang añ lah bơta cahrña neh geh ràng tơlik. Pơnah añ jê neh geh sền sơwì dô bă nề nền bơh dô nă Cau Dong Tò Tiơng pơn ro geh sơnđăn la Yàng Jesu Krist. Cồng nha la añ geh SÀNG GOH bơh bơta toh glài Yàng dê. Halelujah, Jòng ro Yàng!

Kơnràñ neh dong tă bol he lik klàs bơh gơnoar bơta klam jơngo dê, mơ cèng bol he hơ lơgar Kòn kòñ gơboh Kơnràñ dê. Tòm Kòn hơ̆ bol he gơs bơta dong tơwài la bơta toh glài bol he dê.(Kôlôse 1:13-14)

Bơta chò hòp hơ̆ la tŭ bol he ntào dê đap Yàng Tom Trồ, bol he rơp geh wil tơl tòm Kơnràñ! Bơta do geh gơtha la jơh ală bơta tìs glài mơ bol he neh tìs rơp geh mhàm Yàng Jesus dê jơm ndơp, geh hŭi jơh bơh yau mơ ò tŭ lơi yal wơl. Ală cau dờn Yàng Jesu ntào dê đap Sơban Cahrña mìng ñă ntào mơ ràng tơlik ală bơta niam lơm. Yàng rơp sền swì ală jơnau hòi dăn, ală nùs nhơm ñìm rac, ală dà mat, mơ ală jơnau rac ròc Yàng Hwềng dê. Yàng rơp kah wơl ală mơngàn dà mơ bol he neh ai cau tơhir in, mơ piang lă mơ bol he neh ai cau jơ-gloh in. Jơh ală broă bol he neh lơh Yàng in rơp geh ràng tơlik dồ bă loh làng.

 “Bơh Yàng Tom Trồ rơp cahrña kòp nă cau in jat be broă bol khai lơh. Cau lơi kơ̆ nùs lơh bơta niam, mơ jòi jat bơta gơklŏ, sền dờng màng mơ bơta ò ồm lề, gen Yàng Tom Trồ tơm wơl bol khai in bơta kis gam sùm sùm”. (Rôma 2:6-7)

Digơlan bol he lùp is lah: ‘Lơh mbe lơi nàng git nền lah ală broă iơh bol he dê rơp ờ gơlik cơng tàng sò dră wơl he taih?’ Bol he pal kah lah tòm Ngai Cahrña rơp gơs bàr sèng cau – belàt mơ be. Mpồl do rơp geh cah is mơ mpồl ne. Dô mpồl đah ma, dô mpồl đah kiau. Bơta do neh geh ràng tơlik tòm sră Mathiơ 25:32-22. Mìng ală cau ờ dờn, ờ bài dờp bơta nđàc rơp kong wơl ală broă iơh bol khai neh lơh.

Sră Goh ngui oă jơnau pơnyơu nang đơs bơh bơta cah is bàr mpồl do, mơ do la tŭ lơmpah niam nàng bol he sền swì wơl să tờm he ơm mpồl lơi: Cau dờn hala ờ dờn, Belàt hala be; Kòi mi hala ñhơt drung; Cau ơruh jak chài hala bơngơr gơla; cau lòt gùng hăt hala gùng ơ nàng, …

Añ hòi dăn dăn Yàng dong jơh kờp nă bol he git wă jơnau lơh nền lồi dut bol he in hơ̆ la ‘Ờ geh glài’ dê đap jơnau sò dră tài bơh mhàm màng Yàng Jesus neh hòr mơ rào goh jơh tồi glài bol he dê. Jơnau song do la lòs kơlnĕ hwềng soàn añ jê, mơ añ hòi dăn lah ồng mò oh mi kung rơp be hơ̆. Tŭ bol he ntào dê đap Yàng Dong Klàs dunnia dê tòm ngai cahrña hơ̆, dờp git bơta kờñ gơboh Yàng dê ai he in, gen dê đap jơh jơi kòn mơnus , Yàng rơp pò tê mơ wă rò bol he la bau ùr Kơràñ dê.

Bol he hòn chò mơ hừh hơh tĕ, jòng ro tĕ Kơnràñ; Bơh bơta tòmbau Belàt Kòn dê neh tus rau, mơ bau ùr Kơnràñ dê neh sơmpô să sir rau. (Yaltơlik 19:7)

Yàng hòi jà jơh tơl nă bol he pal duh rngòt dê đap gơnoar at bồ Kơnràñ dê. Mơ tòm tŭ bol he mut tòm ngai dờng màng mơ gơklŏ hơ̆, bol he rơp chờ hòp kơno iat ală jơnau mơ he sùm kơp gơn tus bơh Yàng Dong Klàs kờñ gơboh bol he dê, ‘Ơ cau dĭ lơbơn niam mơ dòn song ne, niam ngan; ... Mut tĕ tòm bơta hòn chò cau tòm mê dê.’ (Mathio 25:21a)

Dan jà bol he dô nùs bal tòm bơta hòi dan: Ưnngài Yàng bơh kòn git lah kòn rơp ờ ntào dê đap Sơbàn Cahrña Kơnràñ dê tồ kong cahrña, mơya kòn rơp geh phan ƀàn jat be bơta kòn neh duh broă Yàng. Dăn Yàng dong kòn sơbăt kơ̆ bơta do tồ jơh nùs duh broă Yàng tus dê ngai lồi dut. Kòn ai sơnđan Yàng Jesus Krist, hòi dan mơ Yàng Bèp. Amen.

Ơ ală ồng mò oh mi kờñ gơboh, jơnau đơs ‘ờ geh glài’ ờ di la kai nang bol he kis rài kis gơlềng gơlàng, mơya la gùng nàng bol he ơn să duh broă Yàng dồ bă jơh nùs. Bulah ală broă bol he lơh Yàng in tŭ do ờ geh cau sền dờng màng hala kah tus, gen jơh ală broă hơ̆ rơp geh ràng tơlik tòm ngai Yàng dê ai phan ƀàn. Behơ̆, bañ dơrcùl nùs tòm bơta duh broă Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.