Rim năr ih đei lăng kơ mĭl dôm wơ̆t? Rŏ lăng bu lăm lu bơ̆n kŭm kăl kơ đei kơ mĭl wă hơmet ming sŏk, hơbăn ao, dah rup gah ‘nguaih bơ̆n adrol kơ lĕch tơ’nguaih. Kơmĭl tơ gŭm lu bơ̆n ‘bôh băt dôm tơdrong ưh tim mă ‘lơ̆ng gah ‘nguaih, na Nơ̆r Kră Yang tơgŭm lu bơ̆n lăng ‘bôh tơdrong arih tơpă đơ̆ng chăl arih gah lăm. Thoi noh ih oei hơnơ̆ng kơ “lăng” jơhngơ̆m kơdih, lei lăi thoi ih lăng kơ mĭl rim năr ưh?

Năr ‘nâu, ‘năr 02/06/2026, tơdrong tơdă Amăn Jơ Krao Khan Rim Năr apinh wơ̆n đĭ đăng lu bơ̆n wang pơwao Nơ̆r Kră Yang hăm bơngai chih Dan Betzer kơ̆l ‘bai LĂNG KƠDIH LĂM KƠMĬL NƠ̆R KRĂ YANG.

“Bơngai bu mơ̆ng đe bơtho tơdrong ‘Bok Kei-Dei, mă mơ̆ng đĕch ưh kơ pơm kiơ̆, bơngai noh dang bơ̆n lăng muh măt bơ̆n tơ lăm amĭl. Kơplah bơ̆n lăng muh măt bơ̆n tơ lăm amĭl, bơ̆n ‘bôh nhên đĭ; mưh bơ̆n năm tơ nai, bơ̆n hiơt boih kơ muh măt bơ̆n thoi yơ.” (Yakơ 1:23-24)

Rŏ lăng lu bơ̆n đơ̆ng đei mơ̆ng hơ’mon kră sơ̆ “Bia Kok păng Tơpơh ‘nu tơdăm kơđeh” roi gah minh ‘nu yă pơtao pơm kơnê̆, jơ̆ mĕ hle kơ Bia Kok. Yă đei minh pôm “kơmĭl yang” ưh kơ đei pơma hơlĕnh. Rim wơ̆t yă jet: “Kơmĭl to oei tơ kơpal tơnăr, teh đak bu ‘lơ̆ng nhen thoi inh?” na kơmĭl ling lang pơma khan yă jơ̆ bơngai ‘lơ̆ng hloh. Mă lei kiơ̆ kơ khei ‘năr, Bia Kok wơ̆ ‘lŏ, jing minh ‘nu adruh, păng sư guăng ‘lơ̆ng hloh kơ đĭ đăng bơngai lăm dêh char. Truh kơ minh năr, kơmĭl pơma khan Bia Kok bơih jơ̆ bơngai ‘lơ̆ng hloh, păng đơ̆ng noh jơhngơ̆m areh klai pơ tơm đei pơjing lăm yă pơtao. Kơ mĭl noh, tơplih yua kơ tơgŭm yă ‘bôh băt tơdrong tơpă, đei jing tơmam wei rong tơdrong pơang păng tơdrong klai blĕk.

Sơ̆p Hla Bơar Nơ̆r ‘Bok Kei-Dei roi kơ lu bơ̆n gah minh “kơ mĭl” pha ra dêh. Kơ mĭl ‘nâu đei tơ’bôh tơdrong yoch đơ̆ng minh ‘nu bơngai, ba ăn tơdrong pơma chrih păng tơbral. ‘Bok Kei-Dei đei yua ‘bok khan lê̆ adrol Nathan thoi kơ minh “kơ mĭl” kơ pơtao Đawit kơplah sư pơm yoch hăm Batsêba păng pơlôch Uri. Kră Yang wơh ‘bok Nathan năm wă roi hơ’mon gah minh ‘nu bơngai mơdrŏng pơm kơnê̆ đei tơgar iŏk kon triu đơ̆ng bơngai minh ‘nu dơnuh sư đei lăp minh pôm kon triu đĕch wă rôp hơmet ‘nhĕm sa ăn kơ tơmoi. ‘Bok Đawit blĕk dêh kơ bơngai mơdrŏng ‘noh. Mă lei, Nathan pơma khan: “Pơtao bơih bơngai noh”. (II Samuel 12:7).

Trŏ kơ jơ phŭt ‘noh, ‘bok Đawit ‘bôh băt sư ưh kơ gơh weh wer tơdrong tơpă gah kơdih. Mă khan đei sơng iŏk lơ tơdrong pŭn hiôk đơ̆ng ‘Bok Kei-Dei, mă lei sư oei pơm yoch tih. Yua kơ thoi noh, ‘Bok Kei-Dei pơma khan tơdrong kơnê̆ truh gô truh lăm hnam ‘bok Đawit, păng dôm tơdrong kiơ pơtao pơm lăm trong ôn hlơp gô đei pơdah tơ’bôh đĭ đăng. Mă lei, đơ̆ng rŏng kơ tơdrong pơma chrih ‘noh jơ̆ nơ̆r krao sư athei tơbral păng wih brŏk dơ̆ng hăm Kră Yang.

Tơdrong ‘nâu kŭm jơ̆ nơ̆r tơ’blŏk kơ rim ‘nu lu bơ̆n năr ‘nâu. Kon bơngai ngăl đei tơdrong ôn klơ̆p dôm tơdrong yoch glăi đơ̆ng kơdih dôm tơdrong yua kơ đơ̆ng tơdrong trŏ dah gah ‘nguaih jơhngơ̆m. Lu bơ̆n ‘bônh kơ tơchĕng khan kơdih “oei hiôk hmă”, mă lei ala hơdah ‘lơ̆ng rơgoh đơ̆ng ‘Bok Kei-Dei, dôm “rơka” đơ̆ng tơdrong yoch, tơdrong wă kơ kơdih kâu đĕch, pơ-ang dah blĕk hil đei tơ’bôh pơdah hơđăl.

Yua kơ thoi noh, dang ei, ‘Bok Kei-Dei đei ăn kơ lu bơ̆n mĭnh pôm kơmĭl bơhngol, ‘noh trŏ jơ̆ Nơ̆r Sư. Mă kơmĭl ‘noh tơgŭm lu bơ̆n lăng ‘bôh tơdrong arih đơ̆ng bơhngol bơ̆n, mă lei dah lu bơ̆n ưh kơ tơplih, ưh kơ hơmet ming dơ̆ng chăl arih bơ̆n, lei kŭm ưh kơ đei yua kiơ. Thoi Yakơ đei pơma khan: “Bơngai bu mơ̆ng đe bơtho tơdrong ‘Bok Kei-Dei, mă mơ̆ng đĕch ưh kơ pơm kiơ̆, bơngai noh dang bơ̆n lăng muh măt bơ̆n tơ lăm amĭl. Kơplah bơ̆n lăng muh măt bơ̆n tơ lăm amĭl, bơ̆n ‘bôh nhên đĭ; mưh bơ̆n năm tơ nai, bơ̆n hiơt boih kơ muh măt bơ̆n thoi yơ.” (Yakơ 1:23-24)

Pha ra kơ kơmĭl yă Pơtao lăp ba ăn tơdrong ơh klai, dah kơmĭl đơ̆ng teh đak lăp ‘bôh dôm tơdrong ưh kơ ‘lơ̆ng, kơ mĭl đơ̆ng Nơ̆r Kră Yang pơma khan tơbăt tôm tơdrong tơchĕng păng trong yak năm kơ lu bơ̆n. Hêbrơ 4:12-13 chih: “Yua kơ nơ̆r ‘Bok Kei-Dei arih ling-lang, jăng dêh păng han hloh kơ đao ‘bar pah măt, ‘bet han klĕch tơ sĕch huan kơting, hrĕch kơtĕch jơhngơ̆m đơ̆ng bơhngol. Tơdrong Sư sek tơlang bơ̆n thoi noh. Sư băt tôm tơdrong đon tơchĕng kon bơngai ‘maih pơm. Ưh kơ đei tơdrong kiơ mă hlơp kơ ‘Bok Kei-Dei tơ’ngla mă sek tơlang bơ̆n, Sư ‘bôh nhên tôm tơdrong kon bơngai pơm.”

Ưh kơ dơ̆ng ‘bơ̆t tơdrong tơ’bôh tơdrong yoch, mă lei Nơ̆r Kră Yang kŭm chông ba lu bơ̆n truh tơdrong tơplih. Nơ̆r Sư bơtho, pơma chrih, hơmet ming păng pơhrăm pơjuăt lu bơ̆n lăm tơdrong tơpăt, wă kơ rim năr lu bơ̆n jing ‘lơ̆ng tôm păng gô pơm hloi tôm tơdrong jang ‘lơ̆ng (II Timôthê 3:16-17). Dah ăn Nơ̆r Kră Yang lăng hơmet, lu bơ̆n gô ‘bôh băt dôm kơ tơdrong jĭ jăn lăm bơhngol bơ̆n, dôm kơ tơdrong juăt kơ pơm kơnê̆, tơdrong blĕk hil, pơ-ang ayơ mă lu bơ̆n kăl “achăng tŭk, wă yak lăm minh tơdrong arih ‘nao.

Mă lei, tơdrong jơ̆ lu bơ̆n hăm đei “lăng kơmĭl” păng gô tơplih hloi đơ̆ng rŏng kơ lăng kơmĭl dah ưh. Đei lơ Bơngai Lui dang ei đei chăl arih ưh kơ đei yua dah phŏ kŭm kơdŭn tơrŏng, ‘noh jơ̆ yua kơ lu sư ưh kơ wă đŏk Nơ̆r Kră Yang rim năr wă kơ đei lăng hơmet; dah đei ‘măn jơ năr đŏk Nơ̆r Kră Yang, mă lei ưh kơ đei tơchĕng pơwao păng pơm kiơ̆.

Trŏ thoi noh, lu bơ̆n ‘bôh băt kơdih kăl kơ Kră Yang lơ hloh, apinh Sư ăn jơhngơ̆m pran wă kơ lu bơ̆n pơhrăm păng pơm kiơ̆ Nơ̆r Sư. Yua kơ đơ̆ng kơ mĭl lăng ‘lơ̆ng rŏ đơ̆ng Nơ̆r Kră Yang na lu bơ̆n ‘bôh kơdih jơ̆ bu, păng kŭm đei tơplih wă kơ jing kon bơngai ‘Bok Kei-Dei wă.

Apĭnh đĭ đăng krao khan hơdai: Kơkuh kơ Kră Yang, apinh tơgŭm kon lăng kơdih lăm Nơ̆r Kră Yang rim năr, yua kơ lăp lăm Nơ̆r Ih kon gơh ‘bôh băt tơdrong arih đơ̆ng bơhngol kơdih. Hơpơi Nơ̆r Kră Yang jơ̆ nơ̆r pơlung tơiung kon lăm dôm kơplah pơmat tat, kŭm jơ̆ Nơ̆r tơ’bôh tơbăt tơdrong glăi, bơtho hơmet kon rim wơ̆t kon pơm yoch. Apinh ăn kơ kon jơhngơ̆m pran wă achăng dôm tơdrong juăt kơ pơm kơnê̆ păng dôm tơdrong yoch oei dui pơhlŭ tơdrong arih kon. Hơpơi tơdrong arih kon gơh wơ̆ ‘lŏ yua kơ đơ̆ng Nơ̆r Kră Yang, păng rim năr lei lăi Ih hloh. Kon kŭp kơ̆l krao khan hăm anăn Yang Yêsu Krit, Amen.

Ơ lu bơngai mơ̆ng mă ‘mêm kơ eng, ưh kơ đei bu đơ̆ng rŏng kơ lăng kơ mĭl, ‘bôh hơbăn ao ưh kơ tơpăt ‘lơ̆ng, sŏk oei tơta, muh măt ‘bĕnh tơdrong ưh kơ ‘lơ̆ng, na đei lê̆ hmă thoi noh, ưh kơ pơm kiơ. Kŭm thoi noh, rim ‘nu lu bơ̆n athei pơm hloi kiơ̆ dôm tơdrong kiơ kơ mĭl Nơ̆r Kră Yang tơ’bôh ăn kơ lu bơ̆n ‘bôh.

Yua kơ thoi noh, năr ‘nâu athei năm hăm Nơ̆r Kră Yang, wă apinh Sư tơ’bôh kơ ih ‘bôh dôm tơdrong kăl kơ achăng tŭk, dôm kơ tơdrong kăl kơ tơbral păng tơplih lăm tơdrong arih. ‘Nĕ kơ lăp dơ̆ng ‘bơ̆t tơdrong đŏk Nơ̆r Kră Yang, mă lei athei tơchĕng pơwao păng pơm kiơ̆ wă kơ tơdrong arih ih gơh tơplih tơpă. Hơpơi đơ̆ng Nơ̆r Kră Yang, ih ‘bôh băt tơdrong mơnat ăn đĕch păng tơdrong pơklaih tih hloh đơ̆ng Kră Yang, wă tơbral hloi păng kơkuh kơ Sư đĭ jơhngơ̆m.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.