He neh tú lơi gơtìp broă hớ la mhar húi dồ broă he kờn đơs bal mơ dồ nă cau ndai sơl ơ? Ală cau tâm lý học sơnđan bơta hớ la “hiệu ứng ngưỡng cửa” (Doorway effect), dồ broă ờs mờng gơlik gơs mơ tơl nă bol he. Gơwèt mơ Yàng Tòm Trồ gen mbè lơi taih? Yàng gơs tú lơi húi bol he sơl ơ?

Ngai do, 11/3/2026, rơndap bơta hòi dăn kòp ngai hòi jà ồng mọ oh mi kơ-lôi sơ-nơng Jơ-nau Yàng bơh tơnggume YÀNG TÒM TRỒ KAH

“Yàng Tom Trồ kah wơl Racel, gen dòp jơnau … ”(‭‭Sơnròp Gơlik Gơs‬ ‭30‬:‭22)

Bòn bềng bơkào wă rò an rê wơl tơnớ mơ oă sơ-nam lòt ngài. Tiah do gam bè hớ, gam hèr niam mơ hàng mơné. Dê gùl bòn dờng oă cau do gơs ală tiah dềt ngềt ngơt, la ală gùng kơh bal mơ tờm chi nho tơlir gơlơh bè gam kơp gơn dồ nă cau lơi. An ơm mo mó sền ală gùng lòt mơ rơndeh bol hi lòt gan. Nisơna an sền gó dồ bơkào phồng àng gơcrà rềp dê gah gùng. Dồ tờm, bar tờm, pe tờm, “bơkào mai anh đào! Ngan la bơkào mai anh đào”. An đơs dồ bă nisơna. Di di tòm tú hớ, rơndeh lòt tus gùng ndai. An poh bơlai sền mơ kơp kờn ngan rgơi cơnđoà lòt hơđơm ală tòm chi hớ”

“Dilah …” dồ jơnau oă ngan nùs nhơm tềng hớ. Tòm Sră Goh, bol he kung rgơi tìp ală bơta “dilah..” bè hớ. Mơ rài kis mò Rachel la dồ cơng tàng. Rachel la dùl tòm bar nă kon ồng Laban, kồn ông Jakôp. Rachel la cau geh Jakop kờn gơboh, kờn gơboh rlau mơ bau ùr sơnrờp. Kơlôi lah rài kis mò Rachel neh wil tơl tòm bơta kờn gơboh bal mơ bau klau khai dê., mơ ya tòm dơrlam nùs nhơm mò dê, sùm gơs ală bơta “dilah…” tài bơh Rachel ờ rgơi deh kon ồng Jakop in (Sơn Rờp 30:1). Tòm tú hớ, mò Lea gen deh 4 nă kon pơnjat ồng Jakop in. broă gơs ală oh kon bau klau he in la dồ broă kơp kờn dờng ngan gơwèt mơ mò Rachel, tian gơs mò chò nùs pà kon ùr dí khai dê nàng tus mơ bau klau, mơ deh kon ala khai in.

Jơl tus di tú … “Yàng Tom Trồ kah wơl Racel, gen dòp jơnau khai mơ ai khai in gơs kòn. Khai bun, deh dô nă kòn klau mơ đơs lah: “Yàng Tom Trồ neh tă bơta ƀàssìl añ jê rau.” Gen khai sơnđan kòn klau hơ̆ la Jôsep mơ đơs lah: “Dan Yàng Jehôwa bơtơl añ in tai dô nă kòn klau.” (‭‭Sơnròp Gơlik Gơs‬ ‭30‬:‭22‬-‭24). Ờ Gơs bơta lơi chò hòp dờng rlau mơ bơta do. Tòm pah rài mơ cau sền ờ sơp dê cau ur đơs is la ală cau ùr ờ gơs kon. Gen ală jơnau lik bơh bơr mò Rachel dê he kung rgơi git nchi bơtài bè hớ. Dialh lài đap, bol he gó mò Rachel ờ gơs kon, bơh bơta kơp kờn geh kon mò neh yoam dê bau klau mò dê lah: pà an in dồ nă kon, dilah ờ, an rơp chơt. Gen tú do la dồ nă mò Rachel bềng bơta chò hòp. Mò sơnđan kon la Josep, geh gơtha la “rào” nàng tơngkah să tờm mò lah sătòm Yàng Tòm Trồ la Bơtau neh rào bơta bàssìl mò dê.

Bơta chò hòp mò Rachel gơs la bơh Yàng Tòm Trồ. Sră Goh cih lah: “Yàng Tòm Trồ kah wơl Rachel…” (Sơn rờp 30:22). Mìng dồ et jơnau “Yàng Tòm Trồ kah…” mơya oă ngan bơta gơtha. Jơnau do kung geh jòi bàn tềng tiah ndai tòm Sră Goh bè: “Mơya Yàng Tom Trồ kah wơl Nôe mơ jơh ală phan poan jơng tòm brê, mơ ală phan poan jơng tòm hìu ơm bal mơ khai tòm ơhò, gen Yàng Tom Trồ lơh dà gơ mù.” (‭‭Sơnròp Gơlik Gơs‬ ‭8‬:‭1). Hala tú Yàng Tòm Trồ kah mò Anne mơ pà mò in deh dồ nă kon klau (1 Samuen 1:20). Hala tú Yàng Tòm Trồ kah bơta hơbal mơ Yàng neh hơ mơ Apraham, mơ Isac, mơ Jakop, mơ Yàng tă tơlik làng bol Israel bơh tiah Ejipto mơ mut tòm ù tiah neh geh hơ.

Yàng Tòm Trồ kah, bơta do geh gơtha bè lơi tiah? La Yàng kung mhar húi bè bol he sơl ơ? Ờ di, Sră Goh ờ đơs bè hớ ờ. Pơrlớ wơl, tú đơs Yàng Tòm Trồ kah, Sră Goh kờn đơs bơh bơta dờn song Yàng dê. Tú Yàng hơ bơta lơi, Yàng rơp lơh sir. Hơ la Yàng git mơ kah tus dê nùs kờn gơboh kung bè broă lơh mơ làng bol Yàng dê lơh bơh sơnđan Kơnràng (Heboro 6:1). Hớ la bơh nùs nđàc sơnghit Yàng dê, Yàng rơp pà ai bơta nùs bol he kơp kờn bulah bol he ờ kah tai.

Rơndeh bol hi dê lòt tai mơ lồi dut, ơm wơl tiah bol hi rơp ơm tòm dồ êt ngai tus. Tềng hớ gơs ală tòm chi nho tơlir kung gơs bơkào phồng bơh tòm mai anh đào dê. An nhó tòm tú kơlôi tus bơta an kơp kờn “dilah” an dê tòm tú gam lòt gùng… tus dê ngai dớ bar tú an lòt jơng tòm suơn tiah bol hi ơm, an sền gó dồ brê tòm mai anh đào rềp dê gah tơrlung dà tơlir niam. Bơkào phồng àng gơcrà jơh gùng lòt lơh an in nrơt nrơl ngan gơlơh bè an neh lòt dê tiah lơgar ndai bè kon ùr Alice tòm dồ nơm film cau kơn nòm dềt. An chò hòp mơ sền bơta niam hớ, an nhó, mơ dờp git lah Yàng Tòm Trồ neh kah. Yàng git bơta nùs nhơm an kơp kờn bulah broă do la dềt rhền ngan. Mơ Yàng neh pà ai an in dồ bă dờng rlau mơ bơta kơlôi sơnơng an dê.

Lik bơh brê mai anh đào hớ, nùs nhơm an dê bềng bơta ừn ngài Yàng neh pà an in sền gó bơta hèr niam tòm phan Yàng neh crơng gơs. Gen tơnớ an đơs ờm mơ Yàng ală bơta an kơp kờn tòm nam pa. Bơh an git lah Yàng Tòm Trồ kah. Mơ an dờn lah Yàng rơp lơh sir ală bơta kơp kờn hớ jat nùs kờn mơ di dê tú jơ Yàng dê. Tài bơh Yàng ờ tú lơi húi.

Dan jà bol he dô nùs bal tòm bơta hòi dan: Khoai Yàng, la Bèp kờn gơboh bol kon dê, ừn ngài Yàng tài bơh bol kon gam duh khoai Bơtau ờ tú lơi húi. Yàng sùm kah mơ lơh sir jơh ală jơnau mơ Yang neh hơ. Yàng sùm git mơ kah tus dê ală bơta kơp kờn bol kon dê bulah ală jơnau hớ ờ hềt gơlik dê sơndồi bơr. Ừn ngài Yàng tài bơh Yàng sùm lơh sir bơta bol kon dan jat gùng dà niam Yàng dê. Bol kon ừn ngài Yàng. kon jơh nùs hòi dan ai sơn đan Yàng Jêsu Krist, Amen.

Ơ ală ồng mọ oh mi kờn gơboh, kon mơnus bol he ờs kah bơta pal càng húi mơ húi bơta pal càng kah, mơya Yàng Tòm Trồ ờ di bè hớ ờ. Yàng húi ală tồi glài bol he neh lơh tú bol he jơh nùs gơjran sang glài, mơ Yàng kah jơh ală bơta he ơn Yàng in. ngai do dilah he gam gơs ală bơta kơp kờn lơi mơ he ờ khi nàng tom pà mơ cau ndai, gen khi cha té tus ơn Yàng in. dilah gơs ală jơnau hòi dăn mơ Yàng gam kơn he pal kơp gơn, kớ té nùs. Tài bơh Bơta mơ bol he gam duh khoai la Yàng Tòm Trồ sùm kah tus dê ală oh kon dềt rhền Yàng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.